1. ¿Kenon Jehová okinyolchikauj niman okinmakak tlamachialistli tlaltikpakchanejkej sakin ika okixnamijkej ipan Edén?

IJKUAK tlaltikpakchanejkej otlajtlakojkej, Jehová okiteititi ika yejua toTajtsin akin teyolchikaua. Maski san kemach okixnamijkaj ipan Edén, yejua okijto se teotlajtojli tlen, ijkuak nasikamatiskia, kinyolchikauaskia inkoneuan Adán niman kinmakaskia se tlamachialistli. Tiknextiaj yejuin teotlajtojli ipan Génesis 3:15 niman kijtoua ika yejkos tonajli ijkuak kipopoloskej Satanás niman nochi tlen xkuajli kichiua (1 Juan 3:8; Apoc. 12:9).

2. ¿Kenon Jehová okiyolchikauj Noé?

² Noé onen ipan tonaltin ijkuak tlaltikpakchanejkej xkinekiyaj kinisiuiskej toTajtsin, niman san yejua niman ichanejkauan kiueyichiuayaj Jehová. Kanaj Noé onajman pampa nochiuiyan kitaya ika tlauisokiyaj niman auilnemiyaj (Gén. 6:4, 5, 11; Jud. 6). San ika, Jehová okimakak kojtilistli tlen ika ueliskia yolmelaujkanemis (Gén. 6:9). Okijli ika kipopoloskia yejon tlaltikpaktli tlen  xkuajli katka niman okijli tlenon kichiuas niman ijkon makisaskej ichanejkauan (Gén. 6:13-18). Yejon kanaj melak okiyolchikauj.

3. ¿Kenon Jehová okiyolchikauj Josué? (Xkita tlaixkopinajli kampa peua tlen tomachtijtokej).

³ Seki xiujtin sakin, Josué okimakakej se ueyi tekitl: kinyekanas israelitas niman ijkon manochantikan ipan Tlajli tlen yokimijlikaj kinmakaskiaj. Yejuin kijtosnekiya kimixnamikiskej kojtikej kalpamej tlen onkatkaj ipan yejon tlajli. Jehová kimatstoya ika nochi yejuin ueliskia kajmanas Josué. Ika yejon, okinauati Moisés makiyolseui. Okijli: “Xmaktili tekitl Josué niman xyolchikaua, pampa yejua akin kipanauis iyekapan yejuin kalpan niman yejua akin kichiuas makiselikan tlajli tlen tejua tikitas” (Deut. 3:28). Niman hasta Jehová noijki okiyolchikauj Josué ika yejuin tlajtoltin: “¿Xnejua yonimitsnauati? Xpiya yolchikaualistli niman kojtilistli. Maka xmojkamiki noso xmomojti, pampa Jehová moTajtsin mouan nemi maski san kanon tias” (Jos. 1:1, 9).

4, 5. a) ¿Kenon yeuejkaui Jehová okiyolchikauj ikalpan? b) ¿Kenon Jehová okiyolchikauj iKoneuj?

⁴ Jehová xokinyolchikauj san seki itekipanojkauan, noijki okiyolchikauj nochi ikalpan. Se neskayotl, pampa kimatiya ika kalpan judío nonekiskia makiyolchikauakan ijkuak kuikaskiaj Babilonia, okijli yejuin tlajtoltin: “Maka xmomojti, pampa mouan ninemi. Maka xmojkamiki, pampa nejua nimoTajtsin. Nejua nimitsyolchikauas, kema, nejua nimitspaleuis. Nejua yemelak kuajli nimitskitskijtos ika nomayekma tlen melajki” (Is. 41:10). Akin kichiuayaj ken Cristo ipan kachtopa siglo noijki kuajli kimatstoyaj yejon, niman aman tejuamej noijki kuajli tikmatstokej (xpoua 2 Corintios 1:3, 4).

⁵ Jehová noijki okiyolchikauj ikoneuj, Jesús. Ijkuak Jesús onoapolakti, okikak se tlajtojli tlen ualeuaya iluikak niman kijtouaya: “Yejua in yejua notlajsojkaKonetsin yejuan itech nipaktikaj” (Mat. 3:17). Uelis tikmatstoskej ika yejuin tlajtoltin okiyolchikauj ijkuak tenojnotstinemiya.

6. ¿Itech tlenon techyolchikaua neskayotl tlen tlajtoua itech talentos?

⁶ Jesús okixkopin ineskayo itaj. Ipan neskayotl tlen tlajtoua itech talentos, okinyolchikauj inomachtijkauan nochipa makitekichiuilijtokan Jehová ika melajkayotl. Itech tlen okijto ipan neskayotl, yejon tlakatl okintlakaitak intlakeualuan akin yolmelaujkej katkaj ijkuak okimijli: “¡Sanoyej kuajli! Tejua tikuajli tekitketl, niman otikchiu ken oniknek. Aman ika xomitsixkajkayau on achijtsin, más miyek nimitsmaktilis. [...] Niman nouan xpaki” (Mat. 25:21, 23).

7. a) ¿Kenon Jesús kinyolchikauaya itlatitlankauan? b) ¿Kenon Jesús okiyolchikauj Pedro?

⁷ Jesús nochipa kinyolchikauaya itlatitlankauan, maski ijkuak kichiuayaj tlen xkuelitaya. Xtlanemili itech yejuin, yejuamej miyekpa nokualaniayaj pampa kimatisnekiyaj akinon ueyixtoya intech yejuamej. San ika, Jesús ika ijyouilistli kintlalnamiktiaya ika nonekiya yolyemankej yeskej niman kichiuaskej ken akin tetekichiuiliaj, niman xken akin tlanauatiaj (Luc. 22:24-26). Pedro miyekpa okichiuj tlen Jesús xkuelitaya (Mat. 16:21-23; 26:31-35, 75). Maski ijkon, Jesús xokikauj. Ka, yejua okiyolchikauj niman hasta okinauati makinyolchikaua imikniuan (Juan 21:16).

8. ¿Kenon Ezequías okinyolchikauj akin kinyekanaj tlaixnamijkej niman kalpan Judá?

⁸ Achto ika Jesús uajlaskia ipan tlaltikpaktli niman kitemakas se melak kuajli neskayotl, itekipanojkauan toTajtsin ikasikamatiyaj ika melak nonekiya kinyolchikauaskej oksekimej. Matikitakan tlenon okichiuj tekiuaj Ezequías. Ijkuak asirios kinekiyaj kixnamikiskej Judá, Ezequías okinsentlali tlayekankej itech akin  tlaixnamikij niman nochi kalpan, niman okimijli seki tlajtoltin tlen okinyolchikauj (xpoua 2 Crónicas 32:6-8). *

9. ¿Tlenon techmachtia amoxtli Job itech tiktemakas yolseuilistli?

⁹ Matitlajtokan aman itech tlen ipan onochiuj Job. Yejua melak najmanaya, san ika, akin okiyolchikauatoj onochiujkej tlakamej akin tepajsolouayaj, niman san okijlikej tlajtoltin tlen teyolkokojkej. Maski ijkon, yejua okinmachti kenon kinyolchikauaskej oksekimej. Okimijli ika, tla yejua nonekiskia kinyolchikauas, kimijliskia tlajtoltin tlen teyolchikauaj niman tlen kichiuaskia kuajli manomachilikan (Job 16:1-5). Sa ika tlami, Elihú niman Jehová yejuamej akin okiyolchikaujkej Job (Job 33:24, 25; 36:1, 11; 42:7, 10).

10, 11. a) ¿Tleka nonekiya makiyolseuikan niman makiyolchikauakan ichpoch Jefté? b) ¿Akinomej noijki kinnamiki matikimijlikan ika kuajli tlen kichiuaj niman matikinyolchikauakan aman?

¹⁰ Ichpoch Jefté noijki ononek makiyolchikauakan. Jefté kominixnamikiskia ammonitas. Yejua okijto ika tla Jehová kipaleuiaya matetlani, kitemakaskia akin kachtopa kuajnamikiskia sakin ika ontlaixnamikiskia niman ijkon makitekichiuili Jehová ipan tabernáculo. Aman tej, ichpoch Jefté yejua akin kachtopa okinamikito ika pakilistli pampa otetlanka. Jefté melak onajman, pampa xkinpiaya okseki ikoneuan. Maski ijkon, okichiuj tlen okijto niman okititlan ichpoch kampa Siló niman ijkon ompa matekiti nochi inemilis ipan tabernáculo (Juec. 11:30-35).

¹¹ Yejon ouijtika okitak Jefté, san ika, kanaj ichpoch yejua akin melak ouijtika okitak yejuin. Maski ijkon, yejua okinek kichiuas tlen itaj yokijtoka (Juec. 11:36, 37). Yejuin okijtosnek ika xkeman ueliskia nonamiktis nion kinpiyas ikoneuan. Xok kinpiyaskiaj inchanejkauan niman xok kimilnamikiskiaj. Kema, yemelak nonekiya makiyolseuikan niman makiyolchikauakan. Biblia techijlia: “Niman onomatkej kichiuaj yejuin ipan Israel: Sejse xiuitl, ichpokamej itech Israel yayaj konyolchikauayaj ichpoch Jefté akin galaadita, naui tonajli ipan se xiuitl” (Juec. 11:39, 40). Ipan yejuin tonajli, akin kichiuaj ken Cristo niman xnonamiktiaj niman nokojtiliaj miyek kichiuaskej ipan itekiyo toTajtsin kinnamiki noijki matikimijlikan ika kuajli tlen kichiuaj niman matikinyolchikauakan (1 Cor. 7:32-35).

12, 13. ¿Kenon Pedro okinyolchikauj tokniuan?

¹² Ipan yeuajli ijkuak imikiskia, Jesús okijli itlatitlankauj Pedro: “Simón, Simón, xkaki. Nemoka yotlajtlan Satanás para mechtsejtselos ken itlaj trigo, pero nejua moka yoniktlajtlan itech Dios para ma ka tikpolos motlaneltok. Niman ijkuak tejua yotimoyolkuep, xkimpaleui mokniuan para ma melajkanemikan” (Luc. 22:31, 32).

¹³ Pedro katka se akin kinyekanaya tokniuan ipan tlanechikojli tlen onkatka ipan kachtopa siglo (Gál. 2:9). Yolchikaualistli tlen okiteititi ipan Pentecostés niman ipan okseki tonaltin melak okinyolchikauj imikniuan. Sakin ika yokitekichiuili toTajtsin miyek xiuitl, okintlajkuilouili niman ijkin okimijli: “Itechkopa Silvano, akin nikita ken se tokniuj yolmelaujki, yonimechtlajkuilouili ika achijtsin tlajtoltin tlen ika nimechyolchikauas niman ika nochi noyojlo nimechijlis ika yejuin tlen melauak iueyiteiknelilis toTajtsin. Xmelajkanentokan itech yejuin” (1 Ped. 5:12, TNM). Itech miyek xiujtin, iamatlajkuiloluan Pedro melak yokinyolchikauj miyekej  akin kichiuaj ken Cristo. Niman aman, ijkuak tikchiaj manochiua tlen Jehová okijto techmakas, melak techpoloua yejon yolchikaualistli (2 Ped. 3:13).

14, 15. ¿Tleka itech miyek xiujtin amatlajkuiloltin tlen okimijkuilo apóstol Juan yokinyolchikauj akin kichiuaj ken Cristo?

¹⁴ Okse akin okinyekan tokniuan ipan tlanechikojli ipan kachtopa siglo yejua apóstol Juan. Nochi tlen okijkuilo itech ken otenojnots Jesús yokinyolchikauj itech miyek xiujtin akin kichiuaj ken Cristo niman ok techyolchikaua. Se neskayotl, evangelio tlen yejua okijkuilo san ompa ijkuiliujtika ika Jesús okijto ika tlasojtlalistli se kualneskayotl tlen kinneskayotiskia akin yemelak inomachtijkauan (xpoua Juan 13:34, 35).

¹⁵ Yeyi amatlajkuiloltin tlen okimijkuilo kuajkui tlamachtiltin tlen melak techpaleuiyaj. Se neskayotl, ijkuak tikmachiliaj ika xtlaj ika titepaleuiyaj pampa miyek ken otopopolojkej, ¿xmelak ika techyolseuiya tikmatiskej ika iyesyo tlen topampa okitemakak Jesús “techchipauilia nochi totlajtlakoluan”? (1 Juan 1:7). Niman tla toyojlo nochipa techtlajtlakolmakatika, ¿xmelak ika ajsi ipan toyojlo tikmatiskej ika “Dios más nochi kimati xken toyojlo”? (1 Juan 3:19, 20). Juan san yejua akin okijkuilo ika “Dios yejua tetlajsojtlalistli” (1 Juan 4:8, 16). Niman ipan ika ome niman ika yeyi iamatlajkuilol kimijlia ika kuajli kichiuaj tokniuan akin “kitlakamatij on temachtijli yejuan melauak” (2 Juan 4; 3 Juan 3, 4).

16, 17. ¿Kenon apóstol Pablo okinyolchikauj akin kichiuayaj ken Cristo ipan kachtopa siglo?

¹⁶ Apóstol akin miyek okichiuj niman ijkon kinyolchikauas imikniuan kanaj katka Pablo. Nesi, ika ijkuak opeuj notekichiuilia Cristo, miyekej apóstoles onokaujkej Jerusalén, kampa nemiya grupo akin tlayekanaya ipan nochi tlanechikoltin (Hech. 8:14; 15:2). Akin kichiuayaj ken Cristo ipan Judea kinnojnotsayaj itech Cristo tlaltikpakchanejkej akin, ipampa tlen kineltokayaj judíos, tlaneltokayaj san itech se inTajtsin. San ika,  espíritu santo okititlan apóstol Pablo makinnojnotsati griegos niman romanos, akin kinueyichiuayaj miyek tajtsitsintin (Gál. 2:7-9; 1 Tim. 2:7).

¹⁷ Pablo okistinen ipan nochi kech ueyi niman patlauak tlen aman itoka Turquía, niman noijki ipan Grecia niman Italia, niman okinchijchiuj tlanechikoltin kampa nemiyaj akin xjudíos katkaj. Akin kemach yopeujkaj kichiuayaj ken Cristo niman chantiyaj ipan yejon ueyi kalpamej nonekiya makinyolchikauakan pampa san no inchanejkauan kintlaueltokayaj (1 Tes. 2:14). Ipan amatlajkuilojli tlen okimijkuilouili yenkuik tlanechikojli tlen onkatka Tesalónica, kanaj ipan xiuitl 50, Pablo okimijli: “Nochipa tikmakaj tlaxtlauijli Dios para nochimej nemejuamej, niman nochipa temechelnamikij ikan tooración. Temechelnamikij ixpan Dios toTajtsin ken ijki ipampa nemotlaneltok nenkichiuaj miyek tekitl, niman ken ijki ipampa nemotetlajsojtlalis nenkitekipanouaj, niman ken ijki ipampa nemotlamachalis itech toTeko Jesucristo nenmelajkanemij” (1 Tes. 1:2, 3). Noijki, okinnauati yejuin: “Xmoyoleuakan se iuan okse, niman xmoyolchikauakan ikan tlaneltoktli iuan oksekimej” (1 Tes. 5:11).

18. ¿Kenon grupo akin tlayekanaya ipan nochi tlanechikoltin okiyolchikauj Felipe?

¹⁸ Ipan kachtopa siglo, Jehová okitekitilti grupo akin tlayekanaya ipan nochi tlanechikoltin makinyolchikaua nochimej akin kichiuayaj ken Cristo, niman noijki tokniuan akin kinyekanayaj tlanechikoltin. Ijkuak Felipe okinnojnots samaritanos itech Cristo, tokniuan itech grupo akin tlayekanaya ipan nochi tlanechikoltin okipaleuijkej Felipe ipan tlen kichiuaya. Kema, ompa okintitlankej omemej tlakamej akin teuan nemiyaj ipan grupo, Pedro niman Juan, niman ijkon yejuamej makitlajtlanilikan Jehová ika akin kemach yopeujkaj kichiuaj ken Cristo makiselikan espíritu santo (Hech. 8:5, 14-17). Kuajli tikmatstokej ika yejuin melak okiyolchikauj Felipe niman noijki nochimej akin kemach yopeujkaj kichiuayaj ken Cristo.

19. ¿Tlenon okichiujkej akin kichiuayaj ken Cristo ijkuak okiselijkej iamatlajkuilol grupo akin tlayekanaya ipan nochi tlanechikoltin?

¹⁹ Sakin, okitlajtoltijkej grupo akin tlayekanaya ipan nochi tlanechikoltin tla akin kichiuayaj ken Cristo san ika xjudíos katkaj nonekiya manochiuilikan circuncisión, ijkon ken kijtouaya tlanauatijli tlen okinmakakaj judíos itechkopa Moisés (Hech. 15:1, 2). Akin tekitiyaj ipan grupo akin tlayekanaya ipan nochi tlanechikoltin okitlajtlanilijkej toTajtsin iespíritu santo, otlanemilijkej itech tlen kijtouaya iTlajtol toTajtsin niman okijtokej ika xok nonekiya nochiuiliskej circuncisión. Tlen okijtokej itech yejuin, okijkuilojkej ipan se carta niman okomintitlanilijkej tlanechikoltin itechkopa tokniuan akin tlajtouayaj inpampa. Ijkuak akin kichiuayaj ken Cristo okipoujkej, “sanoyej opajkej ipampa on yoltlalilistli yejuan okiselijkej” (Hech. 15:27-32).

20. a) ¿Kenon Grupo akin Tlayekana ipan nochi tlanechikoltin kinyolchikaua aman tokniuan ipan nochi tlaltikpaktli? b) ¿Tlenon tikitaskej ipan okse tlamachtijli?

²⁰ Aman, Grupo akin Tlayekana ipan nochi tlanechikoltin itech iteixpantijkauan Jehová kinyolchikaua tokniuan akin tekitij Betel, akin chikauak kitekichiuiliaj toTajtsin niman, noijki nochimej tokniuan ipan tlaltikpaktli. Ijkon ken ipan kachtopa siglo, tinochimej tipakij ika tikseliaj inyolchikaualis. Noijki, Grupo akin Tlayekana ipan nochi tlanechikoltin okikixti ipan 2015 amatlajkuilojli Xmokuepa itech Jehová tlen kinyolchikaua tlaltikpakchanejkej ipan nochi tlaltikpaktli manokuepakan itech tlen melauak. Aman tej, ¿san tokniuan akin kiyekanaj tenojnotsalistli noneki kixkopinaskej Jehová niman kinyolchikauaskej oksekimej? Tikitaskej yejuin ipan okse tlamachtijli.