1. ¿Tleka Pablo okimijli hebreos akin kichiuayaj ken Cristo melak manoyolchikauakan semej iuan oksekimej?

AMAN melak noneki matoyoleuakan noso matoyolchikauakan semej iuan oksekimej. ¿Tleka? Ipan amatlajkuilojli tlen apóstol Pablo okomintitlanili hebreos, yejua okijto: “Ma tiknemilikan ken ijki uelis tikinyoleuaskej oksekimej para ma notlajsojtlakan se iuan okse niman para ma kichiuakan on tlen kuajli. Niman ma ka no ijki ma tikchiuakan ken sekimej yejuan xok nosentlaliaj touan kampa tikmauistiliaj Dios. Yej ma titoyoleuakan se iuan okse, niman más ma toyoleuakan pampa tikmatij ika ye nisiu uajlau toTeko [‘inisiuj tonajli’, TNM]” (Heb. 10:24, 25). Panoskia makuijli xiuitl niman yejon tokniuan kitaskiaj kenon yejkoskia itonal Jehová ipan Jerusalén. Kasikamatiskiaj ika tlen Jesús okimijlika nochiujtoya niman nonekiya choloskej itech yejon kalpan (Hech. 2:19, 20, TNM; Luc. 21:20-22). Yejon tonajli oyejkok ipan xiuitl 70, ijkuak romanos okipopolojkej Jerusalén ken toTajtsin yokijtoka.

2. ¿Tleka noneki matikitstokan kenon melak toyolchikauaskej semej iuan oksekimej?

² Ipan yejuin tonaltin, miyek onka tlen techititia ika iyejkotika itonal  Jehová, tlen ueyi yes niman melak temojtis (Joel 2:11). Niman itlajtoluan Sofonías 1:14 nochiujtokej ipan yejuin tonaltin: “¡Iueyi tonal Jehová iyejkotika! ¡Iyejkotika, niman totoka uajlauj!”. Ika yejon, Pablo techijlia: “Ma tiknemilikan ken ijki uelis tikinyoleuaskej oksekimej para ma notlajsojtlakan se iuan okse niman para ma kichiuakan on tlen kuajli” (Heb. 10:24). Yejuin kijtosneki, ika noneki tikchikaujtiaskej ken tajmanaj inpampa tokniuan niman ijkon tikinyolchikauaskej ijkuak nonekis.

3. ¿Tlenon okiteititi apóstol Pablo itech titeyolchikauas? (Xkita tlaixkopinajli kampa peua tlen tomachtijtokej).

³ Biblia kijtoua: “Tlen kajmankamiktia iyojlo se tlakatl yejon tlen kajmana, san ika, tlen kuajli tlajtojli yejon tlen kiyolpaktia” (Prov. 12:25). Kema ijkon, maski san kemantika, tinochimej techpoloua matechijlikan tlen matechyolchikaua. Pablo okiteititi ika hasta akin teyolchikauaj noijki noneki makinyolchikauakan. Akin kichiuayaj ken Cristo niman chantiyaj Roma okimijkuilouili: “Sanoyej nikneki nemechitas para nemechmakas itlaj tetlayokolijli yejuan kisa itech on Espíritu Santo para xmelajkanemikan. Nikijtosneki ma titoyoleuakan se iuan okse  ika on tlaneltoktli yejuan tikpiaj” (Rom. 1:11, 12). Ken tikitaj, hasta Pablo kipolouaya kemantika makiyolchikauakan (xpoua Romanos 15:30-32).

4, 5. ¿Akinomej noneki makinyolchikauakan aman, niman tleka?

⁴ Miyekej tokniuan melak nokojtiliaj niman ijkon chikauak kitekichiuiliskej Jehová. Ijkon kichiuaj precursores akin yolmelaujkej, misioneros, tlayekankej ipan circuito niman insiuauan, niman tokniuan akin tekitij ipan se sucursal noso ipan se Kajli kampa Tlajtolkuepaj. Nochimej kinnamiki matikimijlikan ika melak kuajli ken tekichiuaj, niman noneki matikchiuakan. Niman tokniuan akin chikauak okitekichiuilijkej toTajtsin, san ika, pampa itlaj inpan opanok aman xok uelij ijkon tekitij, melak kitlasojkamatij matikinyolchikauakan.

⁵ ¿Akinomej noijki noneki matikinyolchikauakan? Tokniuan akin xnonamiktiaj pampa kitlakamatij tlanauatijli tlen kijtoua ika san manonamiktikan“iuan se yejuan kineltoka toTeko” (1 Cor. 7:39). Se siuatsintli kineki ika iueuentsin makijli ika melak kitlasojtla niman kipatiojkaita nochi tlen kichiua (Prov. 31:28, 31). Niman xkipiya tikimilkauaskej tokniuan akin yolmelaujkanemij maski kintlaueltokaj noso melak kualoj (2 Tes. 1:3-5). Jehová niman Jesucristo kinyolseuiya nochimej yejuin tokniuan akin yolmelaujkanemij (xpoua 2 Tesalonicenses 2:16, 17).

6. Itech tlen kijtoua Isaías 32:1, 2, ¿tlen tekitl kipiyaj tlayekankej?

⁶ (Xpoua Isaías 32:1, 2). * Tinemij ipan ouijtika tonaltin, kuakon, kemantika xouijtika itlaj techyolkokos noso toyolajmanaskej. Jesucristo techmaka yolchikaualistli niman tlayekanalistli itechkopa “ikoneuan tekiuaj”, kijtosneki tlayekankej, akin tlapejpeniltin niman noijki akin nopouaj intech okseki borreguitos. Tlayekankej xkinnauatiaj ken tlaneltokaskej imikniuan, yejuamej tekitij inpampa niman ijkon mamelajkanemikan niman mapakikan. Yejuamej kinekij techpaleuiskej matipakikan niman matiyolmelaujkanemikan (2 Cor. 1:24).

7, 8. Tlayekankej kinyolchikauaj imikniuan ika tlajtoltin, san ika, ¿kenon noijki uelis kinyolchikauaskej?

⁷ Tlayekankej melak kuajli kichiuaj ijkuak kixkopinaj ineskayo apóstol Pablo. Yejua okintlajkuilouili akin kichiuayaj ken Cristo akin kintlaueltokayaj ipan Tesalónica: “Nemejuamej temechpialiaj miyek tetlajsojtlalistli yejuan  hasta tiknekiskiaj temechmakaskiaj, xsan yejua on kuajli tlajtojli yejuan kitemaka temakixtilistli, yej no hasta tonemilis pampa tejuamej otemechtlajsojtlakej sanoyej” (1 Tes. 2:8).

⁸ Pablo okiteititi ika kemantika xsan noneki titeyolchikauas ika tlajtoltin. Yejuin tlen okimijli tlayekankej akin chantiyaj Éfeso: “Noneki nentekitiskej niman nenkimpaleuiskej on yejuan itlaj kimpoloua. Niman xkelnamikikan on itlajtoltsin toTeko Jesús ken yejua okijtoj: ‘Más paki on yejuan kitemaka xken on yejuan kiselia’” (Hech. 20:35). Pablo xsan kinektoya kinyolchikauas imikniuan, noijki kinekiya kichiuas okseki. Okimijli: “Ikan kuajli noyojlo niktemakas nochi on tlen nikpia, niman xsan yejua on, yej nejua no niktemakas nonemilis ipampa nemoalma” (2 Cor. 12:15). Noijki ijkon, tlayekankej aman xsan kipiya ika kinyolchikauaskej niman kinyolseuiskej tokniuan ika tlajtoltin, noijki ika tlen kichiuaj. Ijkon kiteititiaj ika yemelak najmanaj inpampa (1 Cor. 14:3).

9. ¿Kenon tlayekankej uelis kinnonotsaskej noso kinyektlaliskej imikniuan niman ijkon kuajli teyolchikauaskej?

⁹ Tlayekankej kemantika noneki kinnonotsaskej noso kinyektlaliskej imikniuan niman ijkon kinyolchikauaskej. Tla kinekij kuajli teyolchikauaskej, noneki kilnamikiskej tlen temachtia Biblia. Sakin ika omik niman oyoliuj, Jesús okitemakak se melak kuajli neskayotl itech yejuin, ijkuak ononek kinmelajkanotsas seki tlanechikoltin itech Asia Menor. Tlanechikoltin tlen onkatkaj ipan Éfeso, Pérgamo niman Tiatira kachtopa okimijli ika tlasojtlalistli tlen kuajli kichiujtoyaj achto ika kinyektlalis (Apoc. 2:1-5, 12, 13, 18, 19). Niman tlanechikojli ipan Laodicea okijli: “On yejuan nikintlajsojtla, nikinchikajkanotsa, niman nikincastigaroua ijkuak kichiuaj on tlen xkuajli. Yejua ika, xnechtlakamati ikan nochi moyojlo niman xmoyolpatla” (Apoc. 3:19). Yemelak, tlayekankej nokojtiliaj kixkopinaskej Cristo ijkuak noneki kinnonotsaskej oksekimej.

10. ¿Tlenon uelis tikchiuaskej tinochimej niman ijkon toyolchikauaskej semej iuan oksekimej?

¹⁰ Aman tej, xsan tlayekankej kipiya ika kinyolchikauaskej oksekimej. Pablo technauatia tinochimej akin tikchiuaj ken Cristo matikijtokan  “tlen kuajli yejuan kimpaleuis oksekimej noskaltis intlaneltok, niman kinmakas tlatiochiualistli” oksekimej (Efes. 4:29). Kema ijkon, tinochimej noneki tajmanaskej inpampa tokniuan niman tikitstoskej tlen kinpoloua. Pablo okimijli tokniuan hebreos: “Xmoyoleuakan niman xmoyolchikauakan. Más xmouikakan ipan on kuajli ojtli para on yejuan mechajtokaskej, maski xkojtikej ipan intlaneltok, ma ka nokuepaskej ipan xkuajli ojtli, yej más kitokaskej on kuajli ojtli” (Heb. 12:12, 13). Hasta telpokamej ueliskej kinyolchikauaskej tokniuan ika intlajtoluan.

11. ¿Kenon okipaleuijkej se tokniuj ijkuak melak najmantoya?

¹¹ Matikitakan tlenon ipan onochiuj se tokniuj akin itoka Marthe, * yejua melak najmanaya. Marthe okijkuilo: “Se tonajli, ijkuak oniktlajtlanilijka Jehová manechpaleui, oniknamik se tokniuj akin iueyi katka. Niman yejuin tokniuj onechmakak tlen nechpolojtoya: onechnots ika tlasojtlalistli niman teiknelilistli. Noijki onechijli ika yejua itlaj ijkon okixnamijka, niman yejuin okichiuj maka sa noselti maninomachili”. Kanaj tokniuj akin iueyi nion xokinemili kenon itlajtoluan melak okipaleuijkej Marthe.

12, 13. ¿Kenon uelis tikchiuaskej tlen techijlia Filipenses 2:1-4?

¹² Pablo okimijli yejuin akin nemiyaj ipan tlanechikojli tlen onkatka Filipos: “Yejua ika, xnechajxiltilikan on paktli. Xpiakan san se tlanemilijli. Cada se xmomatikan san ikan se tetlajsojtlalistli. San se moyojlo niman san se tlamachilistli xpiakan. Ma ka itlaj xchiuakan ikan nexikojli nion pampa nenkinekij nemoueyimatiskej, yej ikan yolyemanilistli xmomatikan ika oksekimej más uejueyixtokej xken nemejuamej. Ma ka xchiuakan on tlen kuajli san para nemejuamej, yej no xkinchiuilikan on oksekimej on tlen no kuajli para yejuamej” (Filip. 2:2-4).

¹³ Yejuin tlaxeloltin techititiaj ika tinochimej noneki tokojtiliskej tikitaskej kenon uelis tikinyolchikauaskej tokniuan. Uelis tikinyoltlaliskej, tikintlasojtlaskej, tikinyolchikauaskej, tikimititiskej ika tikinnekij niman tikimikneliskej (Filip. 2:1, TNM).

14. ¿Tlenon uelis melak teyolchikauas?

¹⁴ Itlaj tlen melak techyolpaktia yejua tikmatiskej ika akin otikiminpaleuijkej yeuejkaui aman ok kitekichiuilijtokej Jehová. Apóstol Juan okijkuilo: “Xitlaj onkaj yejuan más nechpaktia xken ijkuak nikaki ika nokoneuan kitlakamatij on tlen melauak” (3 Juan 4). Miyekej precursores kuajli kijtouaj ika melak mitsyolchikauas tikmatis ika akin yeuejkaui otikmachti itech Biblia aman ok melajkanemi itech Jehová noso noijki yonochiuj precursor. Ika yejon, tla tikilnamiktia se precursor akin noyolajmana nochi tlen yokichiuj ipampa oksekimej, uelis kipaleuis kuajli manomachili.

15. Xkijto se ken uelis tikinyolchikauas akin kuajli kitekichiuilijtokej Jehová.

¹⁵ Miyekej tlayekankej ipan circuito yokijtokej kenon melak kuajli yonomachilijkej yejuamej niman insiuauan ijkuak kiseliaj se amatsintli kampa se tokniuj kimijlia ika kitlasojkamati ika okitlajpalotoj tlanechikojli. Niman noijki ijkon kimachiliaj tlayekankej, misioneros, precursores niman betelitas ijkuak kintlasojkamachiliaj ken kuajli kitekichiuiliaj Jehová.

16. ¿Noneki miyek niman ijkon uelis yakaj tikyolchikauas?

¹⁶ Tla xsajnoye titenotskej noso xtikmatij tlenon tikijtoskej, xkipiya tiknemiliskej ika xuelis tikinyolchikauaskej oksekimej. Melauak, xouijtika tikchiuas. Se neskayotl, ijkuak tiktlajpalouaj se tokniuj, uelis tikyejyekoskej tiktlajpaloskej ika pakilistli. Tla yejua xotechuetskili, kanaj pampa kixnamiktika se tlauejli niman kipoloua yakaj iuan tlajtos. Kanaj melak tikpaleuiskej kuajli manomachili tla tijkakij tlen techijlia (Sant. 1:19).

17. ¿Kenon okipaleuijkej se tokniuj telpochtli?

 ¹⁷ Matikitakan tlen ipan onochiuj se tokniuj telpochtli akin itoka Henri. Yejua melak noyolajmanaya pampa miyekej ichanejkauan yokikaujkaj tlen melauak, se intech yejuamej katka itaj, akin se tlayekanketl katka akin kitlakaitayaj. Pampa se tlayekanketl ipan circuito kiyolchikauasnekiya Henri, okuikak kampa kinemakaj café niman kuajli okikak ijkuak yejua kijlitoya tlen kajmanaya. Henri okasikamat ika san uelis kinpaleuis ichanejkauan mauajnokuepakan itech Jehová tla yejua yolmelaujkanemi. Noijki okiyolchikauj kipouas Salmo 46, Sofonías 3:17 niman Marcos 10:29, 30.

18. a) ¿Tlenon okijto tekiuaj Salomón? b) ¿Tlenon okijto apóstol Pablo?

¹⁸ ¿Tlenon tiuelij intech inneskayo Henri niman Marthe, akin onoteneuj ipan párrafo 11? Ika tinochimej uelis tikinpaleuiskej akin noneki makinyolchikauakan. Tekiuaj Salomón okijkuilo: “Se tlajtojli tlen noijtoua ijkuak noneki, ¡melak kuajli!”. Niman noijki okijto: “Ixtololojtin tlen petlanij teyolpaktiaj; se kuajli tlajtojli kinchikaua omiyomej” (Prov. 15:23, 30). Tla tikitaj ika yakaj melak najmana, ¿tlenon uelis tikchiuaskej? Kanaj uelis tikpouiliskej Amatl Tekakistilijketl noso itlaj tlen onka ipan página tlen tikpiyaj ipan Internet. Aman, Pablo noijki okijkuilo: “Xmomachtikan niman xmoyoleuakan iuan oksekimej ikan nochi tlamatkilistli. Xtlakuikatikan itech Dios ikan tlaxtlauijli ipan nemoyojlo. Xtlakuikatikan salmos, tlakuikalmej de yekteneualistli niman tlakuikalmej itech Dios” (Col. 3:16; Hech. 16:25). Ken tikitaj, tokuikatiskej san sekan tlakuikaltin itech Tekiuajyotl noijki uelis kichiuas kuajli matomachilikan.

19. ¿Tleka aman melak ueyi kijtosneki matoyolchikauakan semej iuan oksekimej, niman tlenon noneki tikchiuaskej?

¹⁹ Pampa inisiuj onka itonal Jehová, melak ueyi kijtosneki matoyolchikauakan semej iuan oksekimej (Heb. 10:25). Ika yejon, nochipa matiktlakamatikan yejuin tlen otechijli apóstol Pablo: “Xmoyoleuakan se iuan okse, niman xmoyolchikauakan ikan tlaneltoktli iuan oksekimej ijki ken nenkichijtokej” (1 Tes. 5:11).