ITECH xiuitl tlen yopanok, nochiuiyan ipan tlaltikpaktli melak miyekej iteixpantijkauan Jehová okinmakakej tekitl ken tlayekankej niman tlapaleuijkej ipan tlanechikojli. Tla tejua otikseli yejuin tekitl, tokniuj akin timitstlasojtlaj, kuajli tikmatstokej ika tiyolpaki ipan yejuin yenkuik tekitl.

San ika, kanaj noijki achijtsin timomojtia, niman tikasikamatij. Jason, se tokniuj tlayekanketl akin san telpochtli, kijtoua: “Ijkuak san kemach onechmakakej yejuin tekitl, onikmachili ika xueliskia nikchiuas”. Moisés niman Jeremías noijki okimachilijkej ika xueliskiaj kichiuaskej tlen Jehová okinnauatijka (Éx. 4:10; Jer. 1:6). ¿Ijkon timomachilia? ¿Tlenon mitspaleuis maka ijkon xmomachili niman noijki xyektlalijtiuj ken tikchiua motekiyo? Matikitakan ineskayo Timoteo (Hech. 16:1-3).

Timoteo kipiaya kanaj 20 xiuitl ijkuak Pablo, itlatitlankauj Cristo, okinots iuan mauiya kampa yejua ontenojnotsaskia. Kanaj Timoteo xtlaneltokaya itech niman kanaj okpa kinemiliaya kichiuas yejuin yenkuik tekitl tlen yokimakakaj (1 Tim. 4:11, 12; 2 Tim. 1:1, 2, 7). San ika, ijkuak yopanoka majtlaktli xiuitl, Pablo ouel okijli tlanechikojli tlen onkatka Filipos: “Tla toTeko Jesús kineki, saniman niktitlanis Timoteo para mechontas [...]. Xnikpia okse yejuan no ijki kinemilia ken nejua” (Filip. 2:19, 20).

¿Tlenon okipaleui Timoteo manochiua se kuajli tlayekanketl? Matikitakan chikuasen tlen yejua okichiuj, tlen tejua noijki uelis tikchiuas.

1. Yemelak najmanaya inpampa oksekimej. Pablo okimijli tokniuan akin nemiyaj Filipos ika Timoteo yemelak najmanaya inpampa (Filip. 2:20). Kema, Timoteo najmanaya inpampa tlaltikpakchanejkej. Yejua melak kinekiya ika manonisiuikan itech Jehová, niman ika iyojlo okikauj tlen yejua kinekiya niman ijkon kinpaleuis.

Maka xchiua ijkon ken se akin kinejnemiltia autobús, akin melak kajmana saniman ajsis kampa notelketsaj autobuses xijkon ken kintlejkoltis akin kinuikas. William, se tokniuj akin kitlakaitaj niman kuajli yotekit 20 xiuitl ken tlayekanketl, kimijlia akin kemach okinmakakej se tekitl: “Xkintlasojtla tokniuan. Xkita tlenon kinpoloua niman maka san xkita kenon tikyekanas tlanechikojli”.

2. Kachtopa okitejtemo tenojnotsas. Ijkuak kijtotoya kenon Timoteo xijkon katka ken oksekimej, Pablo okijto: “Oksekimej kitejtemouaj nochi tlen kuajli san para yejuamej, niman xejua on yejuan para Cristo Jesús” (Filip. 2:21). Pablo nemiya Roma ijkuak okijkuilo yejuin tlajtoltin. Yejua okitak ika tokniuan melak tekititoyaj ipan tlen yejuamej kitejtemouayaj. Uelis tikijtoskej ika yejuamej kichiuayaj san tlen xkintekiyomakaya ijkuak kitekichiuiliayaj toTajtsin. ¡San ika, Timoteo xijkon kichiuaya! Ijkuak kitaya uelis kichiuas okseki ipan tenojnotsalistli, yejua tlanemiliaya ijkon ken Isaías, akin okijto: “¡Nikan ninemi! ¡Nejua xnechtitlani!” (Is. 6:8).

¿Tlenon mitspaleuis xchiua motekiyo niman noijki itekiyo toTajtsin? Kachtopa, xkita katlejua noneki kachtopa manochiua. Pablo okijto ika melak noneki matikmatikan katlejua tlemach “on tlen más kuajli” (Filip. 1:10). Kuajli xkita ika yejon tlen ueyi kijtosneki ixpan toTajtsin noijki yejon tlen maueyi makijtosneki ipan monemilis. Ika ome, xnemi san ika tlen noneki. Maka xchiua tlen mitskuilia tiempo niman kichiua xsiaui. Pablo okijli Timoteo: “Xtlalkaui ineleuilis on telpokamej. Tejua  xtoka on tlen melajki. Xpia tlaneltoktli, tetlajsojtlalistli niman yolseuilistli” (2 Tim. 2:22).

3. Chikauak okitekichiuili Jehová. Pablo okintlalnamikti filipenses: “Nemejuamej nenkimatstokej ken ijki Timoteo kiteititia ikuajlilis. Nenkimatstokej ken ijki tekipanoua nouan ipan on kuajli tlajtojli yejua kitemaka temakixtilistli ken se konetl yejuan kipaleuiya itaj” (Filip. 2:22). Timoteo xtlatsijki katka. Yejua niman Pablo chikauak san sekan otekitkej, niman yejuin okichiuj melak kuajli manouikakan.

Onka miyek tekitl ipan ikalpan toTajtsin. Yejuin tekitl melak mitsyolpaktis niman kichiuas xkinnisiui tokniuan. Yejua ika, xtejtemo nochipa chikauak titekititos ipan “itekiu toTeko” (1 Cor. 15:58).

4. Okichiuj tlen kimachtiayaj. Pablo okitlajkuilouili Timoteo: “Tejua kuajli tikmatstikaj notemachtil ken ijki ninoyekana, on tlinon nikneki nikchihuas, notlaneltok, noijyouilis, notetlajsojtlalis, tlinon nejua nikxikoua” (2 Tim. 3:10, 11). Pampa Timoteo kichiuaya tlen kimachtiayaj, ouel okimakakej okseki tekitl (1 Cor. 4:17).

¿Nemi yakaj akin iuan timouika, akin iueyi niman tlamachilise akin uelis tikixkopinas? Tla ka, ¿tleka xtiktejtemoua se? Tom, se tokniuj akin youejkauj ken tlayekanketl, kijtoua: “Se tokniuj tlayekanketl akin tlamachilise melak onajman nopampa niman miyek onechmachti. Nejua miyekpa itlaj niktlajtoltiaya niman nochipa nikchiuaya tlen nechijliaya. Yejuin onechpaleui manitlaneltoka notech”.

5. Sa no yejua nomachtijtiaya. Pablo okijli Timoteo: “Xmomachti sanoyej para kuajli timouikas itechika Dios ikan yolchipaualistli” (1 Tim. 4:7). Akin kichiua ejercicio uelis kipiyas akin kijlijtiuj tlenon noneki makichiua, san ika, noijki noneki sa no yejua nomachtijtias. Pablo okiyolchikauj Timoteo: “Nochipa xmomachtijto tejua titlapouas teixpan, titeyolchikauas, titemachtis. Xtlanemili itech yejuin tlemach; itech yejuin xmosentemaka, niman ijkon nochimej kitaskej ika tiueyixtiuj” (1 Tim. 4:13-15, TNM).

Tejua noijki uelis tikyektlalijtias tlen itiueli tikchiua. Maka xkauili ika motlaneltokil manoteltlali. Xmochikaua nochipa timomachtis tlen san kemach yokikixti ikalpan toTajtsin itech kenon noneki nochiuas tekitl. Xmotlajpiya maka melak titlaneltokas motech. Maka xnemili ika pampa miyek yotikixmat uelis itech itlaj titlapaleuis maski nion xotimomachti itech yejon. Ijkon ken Timoteo, “kuajli xmixtlalo niman kuajli xkita on tlen tiktemachtia” (1 Tim. 4:16).

6. Otlaneltokak itech itlayekanalis iespíritu santo Jehová. Ijkuak tlajtotoya itech itenojnotsalis Timoteo, Pablo okijli: “Xkejyeua yejuin tlen omitsmaktilijkej niman melak tlasojti itechkopa espíritu santo, tlen topan onka” (2 Tim. 1:14, TNM). Tla kinekiya kejyeuas noso kitlajpiyas itenojnotsalis, Timoteo nonekiya tlaneltokas itech itlayekanalis espíritu santo.

Donald, se tokniuj akin youejkauj miyek xiujtin ken tlayekanketl, kijtoua: “Tokniuan tlayekankej niman tlapaleuijkej noneki makipatiojkaitakan ken nouikaj iuan toTajtsin. Akin kichiuaj yejon, kipiyaskej chikaualistli. Tla kitlajtlanij espíritu santo niman kiskaltiaj itlakilyo, imikniuan yemelak kimitaskej ken se tlateochiualistli” (Sal. 84:7; 1 Ped. 4:11).

Melak kualtsin tikitas ika miyekej tokniuan akin kemach yokinmakakej tekitl ken tlayekankej niman tlapaleuijkej, ijkon ken tejua, kiueyilijtokej ken kitekichiuiliaj Jehová. Jason, akin otikteneujkej ijkuak otipeujkej, kijtoua: “Itech kech nikuika ken tlayekanketl, melak miyek yoniuel niman aman nikmachilia ika niueli nikchiua. Melak nechyolpaktia nikpiyas yejuin tekitl niman nikita kentla se ueyi tlateochiualistli”.

¿Tikueyilijtias ken tiktekichiuilia Jehová? Xmokojtili tikchiuas ken okichiuj Timoteo. Ijkon, tejua noijki timochiuas se tlateochiualistli ipan ikalpan Jehová.