1, 2. a) ¿Tlenon techititia ika tlaltikpakchanejkej melak kitejtemouaj kipiyaskej tlamakaualistli? b) ¿Kenon ontlami tlen kichiuaj?

AMAN, melak tlajtouaj itech xtitechikoitas niman tikpiyas tlamakaualistli. Miyekan ipan tlaltikpaktli, nemij akin kinekij nomakauaskej itech tlajyouilistli, itech ken kinchikoitaj niman itech mayantli. Oksekimej kitlajtlanij makinkauilikan makijtokan tlen kinemiliaj, kichiuaskej tlen yejuamej kitaj kuajli niman nemiskej ken kinekiskej. Nochimej kinekij kipiyaskej tlamakaualistli.

² Pampa kinekij kipiyaskej, nosentlaliaj niman ontetsajtsiliaj, niman hasta teixnamikij niman tlauisokij. San ika, yejuin xkichiua makipiyakan tlen kinekiyaj, miyekpa san kichiuaj maonia tlajyouilistli niman ika sekimej mamikikan. Ijkon, oksejpa nesi ika melauak yejon tlajtoltin tlen toTajtsin okichiuj makijkuilo tekiuaj Salomón: “Tlakatl yokinyekan tlaltikpakchanejkej niman ijkon matlajyouikan” (Ecl. 8:9).

3. ¿Tlenon uelis tikchiuaskej niman ijkon yemelak tipakiskej niman tinemiskej ika toyojlo?

³ Santiago, se inomachtijkauj Jesús, okijto tlenon noneki tikchiuaskej niman ijkon yemelak tipakiskej niman tinemiskej ika toyojlo. Yejua okijkuilo ika paki akin mojmostla “kinomachtia ikan nochi iyojlo on tlanauatijli yejuan ajsitikaj niman yejuan techmanauiya”  (Sant. 1:25). Jehová yejua akin okitemakak yejon tlanauatijli tlen “ajsitika”, niman ika yejon, yejua akin melak kuajli kimati tlenon noneki niman ijkon tipakiskej niman tinemiskej ika toyojlo. Okinmakak Adán niman Eva nochi tlen nonekiya niman ijkon mayolpakikan, niman noijki okinmakak melauak tlamakaualistli.

4. ¿Itech tlenon Adán niman Eva kipiayaj tlamakaualistli? (Xkita tlaixkopinajli kampa peua tlen tomachtijtokej).

⁴ Kachtopa ome uejueyimej tlaxeloltin itech amoxtli Génesis kuajli techititiaj ika ipan Xochitlalpan xonkatka mayantli, mojkayotl nion tlajyouilistli. Adán niman Eva kipiayaj se tlamakaualistli tlen aman tlaltikpakchanejkej san kitemikij. Yejuamej xkipiayaj ika najmanaskej ipampa tlen kikuaskej, itech tekitl, itech kokolistli nion itech mikilistli (Gén. 1:27-29; 2:8, 9, 15). ¿Kijtosneki yejuin ika Jehová okinkauilijka makichiuakan nochi tlen kinekiskiaj niman makijtokan tlenon kuajli niman tlenon xkuajli? Matikitakan.

5. Maski miyekej xijkon kinemiliaj, ¿tlenon noneki maonia niman ijkon tikpiyaskej tlamakaualistli?

⁵ Nemij akin kineltokaj ika melauak tlamakaualistli kijtosneki ika se uelis kichiuas nochi tlen kinekis maski san tlenon mapano. Noijtouani ika tlamakaualistli kijtosneki uelis tiktlapejpenis tlen tikchiuas niman tikchiuas tlen yotikijto. San ika, se enciclopedia kijtoua yejuin: “Tla tikitaj yejuin itech tlen kijtouaj tlanauatiltin, tlakamej kipiyaj tlamakaualistli ijkuak xkintlajtlaniliaj makichiuakan tlen xmelajki, tlen xnoneki noso tlen nion xkuajli ononemili” (The World Book Encyclopedia). Itech yejuin tikasikamatij ika ipan tonemilis noneki maonia seki tlemach tlen matechtelti, pampa san ijkon tinochimej uelis topaleuiskej itech tlamakaualistli. Kuakon, tlen noneki matikmatikan yejua akinon kinamiki makijto katlejua itech yejon tlemach nonekij, melajkej niman uelij nochiuaj.

6. a) ¿Tleka san Jehová kipiya tlamakaualistli itech nochi? b) ¿Itech tlenon tlaltikpakchanejkej uelis kipiyaskej tlamakaualistli, niman tleka?

⁶ Itlaj tlen xnoneki tikilkauaskej yejua ika san Jehová kipiya tlamakaualistli itech nochi. Yejuin ijkon pampa yejua akin okichijchiuj nochi, akin nochi ueli kichiua niman akin Ueyixtika (1 Tim. 1:17; Apoc. 4:11). Matikilnamikikan yejon kualtsitsintin tlajtoltin tlen okijto David ipan 1 Crónicas 29:11, 12 (xpoua). * Ompa okijto kenon Jehová melak ueyixtika. Niman, oksekimej akin yoltokej ipan iluikak niman tlaltikpaktli kipiyaj tlamakaualistli san itech seki tlemach. Noneki tikseliskej ika Jehová kipiya nochi tlanauatijkayotl ika kijtos hasta kanon toteltiskej, niman tlen kitlajtlani yejua yokitak ika noneki, melajki niman ueli nochiua. Niman yejon tlen okichiuj ijkuak opeuj kichijchiua nochi.

7. Xkijto seki tlen xtejuamej tiktlapejpeniaj tikchiuaskej, san ika, yotomatkej tikchiuaj niman techyolpaktia.

⁷ Maski ijkuak opeujkej nemij Adán niman Eva kipiayaj tlamakaualistli niman ueliyaj kichiuayaj miyek tlemach, Jehová okitlali seki tlen nonekiya kichiuaskej. Maski seki itech yejon yonomatkaj kichiuaj, xyejuamej kitlapejpeniayaj kichiuaskej. Se neskayotl, tla kinekiyaj nemiskej, nonekiya nijyotiskej, tlakuaskej niman kochiskej, niman okseki tlemach. San ika, xkinemiliayaj tla yejuin kinkuiliaya intlamakaualis. Jehová okichiuj ika mapakikan maski nonekiya mojmostla kichiuaskej yejuin (Sal. 104:14, 15; Ecl. 3:12, 13). ¿Xmelak ika tinochimej tikuelitaj tikijyotilanaskej ajakatl tlen chipauak niman sesektsin, tijkuaskej tlen melak tikueliliaj noso tokuiteuaskej  sakin ika kuajli otikochkej? Xtikmachiliaj ika tisalijtokej noso yetik tikchiuaskej yejuin. Ka, tipakij tikchiuaskej yejon, niman kuajli tikmatij ika Adán niman Eva noijki kinpaktiaya.

8. ¿Tlen tlanauatijli Jehová okinmakak Adán niman Eva, niman tleka?

⁸ Jehová okinnauati Adán niman Eva makitemiltikan niman makitlajpiyakan tlaltikpaktli (Gén. 1:28). ¿Okinkuili yejuin tlanauatijli tlamakaualistli tlen kipiayaj? Ka, xijkon opanok. Yejuin kinkauiliaya nochimej tlaltikpakchanejkej matlapaleuikan itech tlen toTajtsin kineki: ika tlaltikpaktli manochiua se xochitlalpan kampa tlaltikpakchanejkej manemikan nochipa (Is. 45:18). Ipan yejuin tonajli, akin kitlapejpeniaj xnonamiktiskej niman noijki akin yononamiktijkej san ika xkinekij kipiyaskej inkoneuan xkixnamikij tlen kineki toTajtsin. Maski san kenon, miyekej nonamiktiaj niman kinpiyaj inkoneuan maski yejon tlen kitlapejpeniaj kichiua makipiyakan tlaueltin (1 Cor. 7:36-38). ¿Tleka kichiuaj? Pampa, tla nochi kuajli kisa, yejuin kichiua kuajli manomachilikan niman mapakikan (Sal. 127:3). Ken tikitaj, Adán niman Eva ueliskiaj nochipa kinyolpaktis innamiktilis niman inkoneuan.

9. ¿Tleka nonekiya, melajki katka niman ueliya nochiuaya tlen otlanauati toTajtsin ipan Génesis 2:17?

⁹ Jehová okinmakak Adán niman Eva okse tlanauatijli, niman aman kuajli okimijli tlenon xkuajli inpan nochiuaskia tla xkitlakamatiyaj: “San ika, yejon kojtli tlen tetlalnamiktia, ika san nejua nechnamiki nikijtos tlen kuajli niman tlen xkuajli, maka tijkuas, pampa yejon tonajli ijkuak tejua tijkuas, timikis” (Gén. 2:17). ¿Nonekiya, melajki katka niman ueliya nochiuaya yejon tlanauatijli? ¿Kinkuiliaya seki itech tlamakaualistli tlen kipiayaj? Ka. Niman xsan yejon, miyekej ixtlamatkej itech Biblia kijtouaj ika yejuin tlanauatijli kuajli katka. Se neskayotl, se intech yejuamej kijtoua ika Génesis 2:16, 17 techmachtia ika “san toTajtsin kimati tlenon kuajli [...] inpampa tlakamej niman noijki kimati tlenon xkuajli [...] inpampa yejuamej. Tla kinekij pakiskej itech ‘tlen kuajli’ noneki tlaneltokaskej itech toTajtsin niman kitlakamatiskej. Tla xijkon kichiuaj, nonekis inselti kitlapejpeniskej tlenon kuajli niman tlenon ka”. Niman yejuin se ueyi tekitl tlen san yejuamej xuelis kichiuaskej.

10. ¿Tleka xsan noijki kijtosneki tiuelis tiktlapejpenis tlenon tikchiuas niman tiuelis tejua tikijtos tlenon kuajli niman tlenon xkuajli?

¹⁰ Miyekej ipan yejuin tonaltin kinemiliaj ika tlanauatijli tlen toTajtsin okimakak Adán kijtosnekiya ika xkinkauilijtoskia makichiuakan tlen yejuamej kinekiskiaj. San ika, yejon xmelauak. Xsan noijki kijtosneki tiuelis tiktlapejpenis tlenon tikchiuas niman tiuelis tejua tikijtos tlenon kuajli niman tlenon xkuajli. Adán niman Eva kipiayaj tlamakaualistli ika kitlapejpeniskej tla kitlakamatiskej toTajtsin noso ka. San ika, san Jehová kinamiki kijtos tlenon kuajli niman tlenon xkuajli. Yejon tlen kineskayotiaya kojtli tlen tetlalnamiktia tlen kuajli niman tlen xkuajli tlen onkatka ipan Xochitlalpan Edén (Gén. 2:9). Noneki tikseliskej ika xnochipa tikmatij tlen panos ijkuak itlaj tiktlapejpeniaj tikchiuaskej nion xnochipa kuajli tikmatiskej tla techpaleuis. Ika yejon, kemantika ijkuak yakaj ika kuajli iyojlo kitlapejpenia kichiuas itlaj, miyekpa kichiua maonia tlajyouilistli, mapano tlen xkuajli noso itlaj tlen temojti (Prov. 14:12). Niman yejuin panoua pampa tlaltikpakchanejkej xuelij kichiuaj nochi. Ika tlanauatijli tlen Jehová okinmakak Adán niman Eva, kiminmachtijtoya ika nonekiya kitlakamatiskej niman ijkon yemelak kipiyaskej tlamakaualistli. ¿Tlenon okitlapejpenijkej kichiuaskej?

11, 12. ¿Tleka melak xkuajli otlamito tlen okitlapejpenijkej kichiuaskej Adán niman Eva? Xkijto se neskayotl.

¹¹ Teajman ika Adán niman Eva okitlapejpenijkej xtetlakamatiskej. Eva nion xouel okixiko yejuin tlatlatalistli tlen okitlalili Satanás:  “Nemixtlapouiskej niman nemochiuaskej ken toTajtsin, nenkixmatiskej tlen kuajli niman tlen xkuajli” (Gén. 3:5). San ika ¿ouel okipixkej miyek tlamakaualistli Adán niman Eva? Ka. Tlen okitlapejpenijkej xokinmakak tlen Satanás okimijlika. Niman xsan yejon, nimantsin okitakej ika tla tikmapeuas itlayekanalis toTajtsin niman san tejua timoyekanas melak xkuajli tontlamis (Gén. 3:16-19). ¿Tleka ijkon panoua? Xouijtika, pampa Jehová xokinchijchiuj tlaltikpakchanejkej sa no yejuamej mauelikan makitlapejpenikan tlenon kuajli niman tlenon xkuajli (xpoua Proverbios 20:24; * Jeremías 10:23). *

¹² Matikitakan se neskayotl itech akin kuika se avión. Yejua kuajli ajsi kampa yauj pampa kitoka se ojtli tlen achtopa yonoitak ika kuajli. Noijki, uelis kitas aparatos tlen ika noyekanaj akin kuikaj aviones niman nonotsas imiuan akin kitstokej kechmej aviones nemij iluikak. Aman tej, tla kimapeuaskia nochi yejuin tlen tepaleui niman yaskia kampa yejua kinekiskia, ueliskia panos itlaj tlen xkuajli. Itlaj ken yejuin okichiujkej Adán niman Eva. Okimapeujkej tlayekanalistli tlen okinmakaka toTajtsin, niman melak xkuajli okisatoj: onochiujkej tlajtlakolejkej niman omijkej, niman noijki ijkon inpan panoskia inkoneuan (Rom. 5:12). Pampa kinekiyaj nemiskej ken yejuamej kinekiyaj, okipolojkej melauak tlamakaualistli.

13, 14. ¿Kenon uelis tikpiyaskej melauak tlamakaualistli?

¹³ Miyekej tlaltikpakchanejkej kinemiliaj ika tla kipiyaj miyek tlamakaualistli melak kuajli ontlamiskej. San ika, tlen melauak, tlamakaualistli tlen xtlaj kiteltia melak teijtlako ken se cuchillo tlen melak tlateki. Melauak, tikpiyas tlamakaualistli mitspaleuis. San ika ¿kenon yeskia tlaltikpaktli tla xoniaskia itlaj tlen matechtelti? Ipampa yejuin, enciclopedia tlen onoteneuj ipan párrafo 5 kijtoua: “Itlanauatiluan tlaltikpakchanejkej akin kuajli noyekanaj kichiuaj ika maonia tlen uelis se kichiuas niman noijki tlen xuelis kichiuas”. Yemelak, yejuin itlaj tlen ouijtika. San matikonnemilikan kenon melak miyek tlanauatiltin tlen tlakamej  yokimijkuilojkej, niman noijki kenon melak miyekej abogados niman teyolkuitijkej nonekij niman ijkon makiteasikamachiltikan niman makintekitiltikan.

¹⁴ San ika, Jesucristo okijto kenon nion xouijtika tikpiyaskej melauak tlamakaualistli. Okijto: “Tla nenmelajkanemiskej ipan on tlen nemechijlia, nemochiuaskej melauak nennomachtijkauan. Nenkixmatiskej tlen melauak, niman on tlen melauak yejua mechmanauis [noso mechmakas tlamakaualistli]” (Juan 8:31, 32). Toyekanaskej ika tlen okijto kijtosneki tikchiuaskej ome tlemach. Kachtopa, tikseliskej tlamachtijli itech tlen melauak tlen yejua otemachti. Niman ika ome, tochiuaskej inomachtijkauan. Tla tikchiuaj, tikpiyaskej melauak tlamakaualistli. ¿Tlamakaualistli itech tlenon? Jesús sakin okijto: “Nochimej yejuan tlajtlakouaj, yejuamej tlanamaktin itech on tlajtlakojli”. Niman noijki okijto: “Kuakon, tla Tekoneuj mechmakaua, yemelak nentlamakaualtin yeskej” (Juan 8:34; Juan 8:36, TNM).

15. ¿Tleka tlamakaualistli tlen Jesús okijto techmakas yejon tlen kichiua yemelak matikpiyakan tlamakaualistli?

¹⁵ Kuajli nestika ika tlamakaualistli tlen Jesús okijto kinmakas inomachtijkauan melak ueyi xijkon ken tlamakaualistli tlen miyekej kinekij itech ken nemiskej noso itech política. Ijkuak yejua okijto “tla Tekoneuj mechmakaua, yemelak nentlamakaualtin yeskej”, tlajtotoya ika techmakaua itech tlen melak kintlajyouiltia tlaltikpakchanejkej: ika titlanamaktin “itech on tlajtlakojli”. Tlajtlakojli xsan kichiua matikchiuakan tlen xkuajli, noijki xtechkauilia matikchiuakan tlen tikmatstokej ika kuajli noso nochi tlen tiueliskiaj. Yejuin tlen kijtosneki ika titlanamaktin itech tlajtlakojli. Yejuin kichiua matajmanakan, matitlajyouikan niman, sa ika nochi, matimikikan (Rom. 6:23). Apóstol Pablo kuajli kimatiya tlenon kijtosneki titlanamaktli yes (xpoua Romanos 7:21-25). San ijkuak xok tikpiyaskej tlajtlakojli, tlen yeskia ken se cadena tlen ika tisalijtokej, hasta ijkuakon topaktiskej itech melauak tlamakaualistli tlen okipolojkej Adán niman Eva.

16. ¿Kenon uelis tikpiyaskej melauak tlamakaualistli?

¹⁶ Ijkuak Jesús okijto ika noneki timelajkanemiskej ipan itlajtol, kijtosnekiya ika noneki tikchiuaskej seki tlemach niman ijkon techmakas tlamakaualistli. Akin tikchiuaj ken Cristo xtiktejtemouaj tlen tiknekij, tiktlapejpeniaj tiktlakamatiskej itech tlen yejua kinnauatia inomachtijkauan manoteltikan (Mat. 16:24). Ijkon ken okijto, tikpiyaskej melauak tlamakaualistli ijkuak kichiuas matikselikan nochi tlateochiualistin tlen techmaka tlaxtlauijli.

17. a) ¿Tlenon kichiuas matikmatikan tleka tinemij niman matiyolpakikan ipan tonemilis? b) ¿Tlenon tikitaskej ipan okse tlamachtijli?

¹⁷ Tiktlakamatiskej itlamachtiluan Jesús kichiuas matikmatikan tleka tinemij niman matiyolpakikan ipan tonemilis. Niman yejuin kichiuas ika tlayekapan matikpiyakan melauak tlamakaualistli itech tlajtlakojli niman mikilistli (xpoua Romanos 8:1, 2, 20, 21). Ipan okse tlamachtijli, tikitaskej kenon uelis kuajli tiktekitiltiskej tlamakaualistli tlen tikpiyaj aman niman ijkon nochipa tikueyichiuaskej Jehová, toTajtsin itech melauak tlamakaualistli.