1, 2. ¿Tleka Jesús melak nokuaajmantoya?

TONAJLI ijkuak imikiskia, Jesús melak nokuaajmantoya. Kimatstoya ika sa achijtsin poliuiya ijkuak itlauelikniuan kitlajyouiltiskiaj niman kimiktiskiaj. San ika, onkatka okse tlen kajmanaya. Yejua kinekiya kiyolpaktis iTaj pampa melak kitlasojtlaya. Niman kimatstoya ika tla melajkanemiskia maski kixnamikiskia tlen ouijtika, yejon tepaleuiskia manochipaua itoka toTajtsin. Noijki, Jesús kintlasojtlaya tlaltikpakchanejkej niman kasikamatiya ika ueliskiaj kipiyaskej nemilistli tlen xkeman tlamis tla yejua melajkanemiya hasta ijkuak mikiskia.

² Maski melak miyek tlen kixnamiktoya, Jesús nochipa yolseujtoya. Yokimijlika iapóstoles: “Nemechmaka yolseuilistli” (Juan 14:27). Jesús kipiaya iyolseuilis toTajtsin, kijtosneki, nemiya ika iyojlo ijkon ken nomachilia akin kuajli nouika iuan Jehová. Yejon kimachiliaya Jesús ipan itlamachilis niman ipan iyojlo (Filip. 4:6, 7).

3. ¿Tlenon tikitaskej ipan yejuin tlamachtijli?

³ Tejuamej xtikixnamikiskej tlen Jesús okixnamik. San ika, nochimej inomachtijkauan tikixnamikiskej tlen ouijtika (Mat. 16:24, 25; Juan 15:20). Niman ken Jesús, kemantika tokuaajmanaskej. ¿Tlenon techpaleuis ika tlen techajmana maka matechkuili toyolseuilis? Tikitaskej yeyi tlemach tlen okichiuj Jesús ijkuak otenojnotstinen  ipan tlaltikpaktli, niman tikitaskej kenon uelis tikchiuaskej ken yejua ijkuak tikixnamikiskej tlen ouijtika.

4. Xkijto kenon tikmatij ika Jesús miyekpa okichiuj teoyotl ipan tonajli ijkuak imikiskia.

⁴ (Xpoua 1 Tesalonicenses 5:17). Ipan tonajli ijkuak imikiskia, Jesús miyekpa okichiuj teoyotl. Ijkuak okinmachti inomachtijkauan kenon kilnamikiskej imikilis, okichiuj se teoyotl ijkuak okinpanoltili pan niman noijki ijkuak okinpanoltili vino (1 Cor. 11:23-25). Noijki, ijkuak otlankej kilnamikij Pascua, okichiuj se teoyotl (Juan 17:1-26). Ijkuak oajsikej monte de los Olivos, Jesús miyekpa okichiuj teoyotl (Mat. 26:36-39, 42, 44). Niman ijkuak imikiskia, okinots iTaj (Luc. 23:46). Ken tikitaj, Jesús nochipa kinotsaya Jehová niman ijkon kijlis tlen ipan nochiujtoya ipan yejon tonajli.

5. ¿Tleka iapóstoles Jesús xyolchikaujtoyaj?

⁵ Jesús otlaxiko pampa nochipa okitlajtlanili iTaj makipaleui. San ika, iapóstoles xijkon okichiujkej, ika yejon, xyolchikaujtoyaj ijkuak nonekiya (Mat. 26:40, 41, 43, 45, 56). ¿Tlenon techmachtia yejon? Ika san uelis timelajkanemiskej tla nochipa tikchiuaj teoyotl, ken Jesús. Aman, ¿tlenon noneki tiktlajtlaniskej?

6. ¿Kenon tla titlaneltokaj nochipa tiyolseujtoskej?

⁶ Uelis tiktlajtlaniliskej Jehová matechpaleui más matitlaneltokakan (Luc.  17:5; Juan 14:1). Nonekis pampa Satanás kintlatlatas nochimej inomachtijkauan Jesús (Luc. 22:31). Totlaneltokil techpaleuis matiyolseujtokan maski miyek tikixnamikiskej. ¿Tleka? Pampa, tla yotikchiujkej nochi tlen tiuelij, totlaneltokil kichiuas matijkauilikan Jehová yejua matechpaleui. Tla tikneltokaj ika Jehová uelis kiyektlalis tlen tikixnamiktokej, tinemiskej ika toyojlo (1 Ped. 5:6, 7).

7. ¿Tlenon tiuelij itech tlen kijtoua Robert?

⁷ Teoyotl techpaleuiya matiyolseujtokan maski san tlenon panos. Matikitakan tlen ipan onochiuj Robert, se tlayekanketl akin kipiya ipantsin 80 xiuitl. Yejua techijlia tlenon kipaleuiya nochipa mayolseujto: “Filipenses 4:6, 7 nochipa yonechpaleui manikixnamiki miyek tlen ouijtika”. Noijki kijtoua: “Niknotsa toTajtsin ijkuak nikmachilia ika itlaj nechajmana. Nikita ika ijkuak melak miyekpa niknotsa toTajtsin, noijki melak niyolseui”.

8. Itech tlen kijtoua Juan 8:29, ¿tleka Jesús noijki oyolseuj?

⁸ (Xpoua Juan 8:29). Maski ijkuak okitlaueltokakej, Jesús ika iyojlo nemiya. ¿Tleka? Pampa kimatstoya ika kiyolpaktijtoya iTaj. Nochipa okitlakamat maski melak ouijtika tlen okixnamik. Yejua onosentemakak itech Jehová pampa kitlasojtlaya. Ijkuak xiuajlaya ipan tlaltikpaktli, otekit iuan toTajtsin (Prov. 8: 30). Niman, ijkuak ouajla, okiyolpakti temachtis tlen melauak itech iTaj (Mat. 6:9; Juan 5:17). Yejuin tekitl melak okiyolpakti (Juan 4:34-36).

9. ¿Kenon tla nochipa titenojnotsaj techpaleuis nochipa matinemikan ika toyojlo?

⁹ Tikchiuaj ken Jesús ijkuak tiktlakamatij Jehová niman ijkuak miyek tikchiuaj ipan itekiyo (1 Cor. 15:58). Akin nokojtilia melak tenojnotsas tlamantik kita tlen kixnamiki (Hech. 18:5). Xnemili, akin tikinnojnotsaj más ouijtika kenon nemij. San ika, ijkuak peua kitlasojtlaj Jehová niman kichiuaj tlen kintlajtlanilia, más kuajli nemij niman melak yolpakij. Ijkuak tikitaj ika ijkon panoua, techpaleuiya matikneltokakan ika Jehová techtlajpiyas. Niman, yejon techpaleuiya nochipa matinemikan ika toyojlo. Ijkon ipan nochiua se tokniuj akin melak najmana niman kinemilia ika xtepaleuiya. Yejua kijtoua: “Ijkuak nitenojnotsa kichiua maninemi ika noyojlo. Niknemilia ika ijkon panoua pampa ninomachilia nisiuj itech Jehová”.

10. ¿Tlenon tiuelij itech tlen okijto Brenda?

¹⁰ Noijki matikitakan tlen ipan onochiuj Brenda. Yejua iuan iichpokatsin kipiyaj se kokolistli itoka esclerosis múltiple. Brenda nemi ipan silla de ruedas niman xok kojtik. Ijkuak ueli, ontenojnotsa techajchan, san ika, más san tenojnotsa ika cartas. Kijtoua: “Ijkuak onikasikamat ika xnipajtiskia, opeuj niknemilia kenon nitenojnotsas. Niman ijkuak nitenojnotsa kichiua manikilkaua tlen nechajmana. Kichiua manitlanemili kenon nikinpaleuis akin nikinnojnotsa. Yejuin nechtlalnamiktia tlen nikchiatika ika tlayekapan”.

11-13. a) ¿Kenon okiteititijkej apóstoles niman oksekimej ika yemelak nouikayaj iuan Jesús? b) ¿Kenon okipaleuijkej Jesús?

¹¹ Ijkuak otenojnots, Jesús okixnamik tlen ouijtika. San ika, apóstoles okiteititijkej ika yemelak nouikayaj iuan Jesús. Yejuamej okichiujkej tlen kijtoua Proverbios 18:24, ompa kijtoua: “Sekimej tlajsojkaiknijtin [...] más mitsnekiskej xken mokniuan”. Jesús melak kintlasojkaitaya. Matikilnamikikan ika ipan yejon tonaltin nion se ikniuj xitech tlaneltokaya (Juan 7:3-5). Niman hasta ichanejkauan okinemilijkej ika yokipolojka itlamachilis (Mar. 3:21). San ika, apóstoles xijkon katkaj. Ijkuak imikiskia, Jesús okimijli: “Nemejuamej nochipa nouan yonentlajyouijtinenkej” (Luc. 22:28).

¹² Apóstoles miyekpa onopopolojkej. San ika, Jesús xyejon okitak, yejua okitak kenon tlaneltokayaj itech (Mat. 26:40; Mar. 10:13, 14; Juan 6:66-69). Ipan yeuajli ijkuak ikajsiskiaj, okimijli: “Nemechtokayotia nennotlajsojkaikniuan pampa yonemechijlij nochi tlen noTajtsin onechijlij” (Juan 15:15). Tikmatstokej ika itlasojkaikniuan Jesús noso iamigos melak okiyolchikaujkej. Melak okiyolpakti kenon okipaleuijkej ijkuak okichiuako itekiyo ipan tlaltikpaktli (Luc. 10:17, 21).

¹³ Jesús okipix okseki iamigos niman iamigas akin okipaleuijkej ijkuak otenojnots. Sekimej okiselijkej inchan niman ijkon ompa ueliskia tlakuas (Luc. 10:38-42; Juan 12:1, 2). Oksekimej iuan okistinenkej niman okipopolojkej intomintsin ijkuak kipaleuiayaj (Luc. 8:3). ¿Tleka Jesús okinpix amigos akin melak  kipaleuiayaj? Pampa yejua noijki kinpaleuiaya. Yejua xkintlajtlaniliaya tlen xueliskiaj niman miyek kichiuaya inpampa. Maski yejuamej tlajtlakolejkej katkaj, okitlasojkamat ken okipaleuijkej. Tikmatij ika yejon okipaleui manemi ika iyojlo.

14, 15. a) ¿Kenon uelis tikpiyaskej se kuajli amigo? b) ¿Kenon uelis techpaleuis se kuajli amigo?

¹⁴ Se kuajli amigo techpaleuis matimelajkanemikan itech Jehová. Niman uelis tiknextiskej se kuajli amigo tla tejuamej noijki tochiuaj se kuajli amigo (Mat. 7:12). San xnemili, Biblia kijtoua matikinpaleuikan oksekimej, niman más akin itlaj kinpoloua (Efes. 4:28). Matitlanemilikan itech tokniuan itech tlanechikojli. ¿Nemij akin xkanaj uelij kisaj? Kanaj tejuamej uelis tikomintlakouiliskej. Noso uelis tikinmakaskej tlakuajli se familia akin kixnamiktok tlen ouijtika. ¿Ueli tiktekitiltiaj jw.org^® noso JW Library^®? Kuakon, uelis tikinpaleuiskej sekimej mauelikan makitekitiltikan yejon. Tla titlanemiliaj san tikinpaleuiskej oksekimej, melak tomachiliskej ika toyojlo (Hech. 20:35).

¹⁵ Yejon amigos techpaleuiskej ijkuak tikixnamikiskej tlen ouijtika niman kichiuaskej matomachilikan ika toyojlo. Ijkon ken Elihú okikak Job, toamigos techkakiskej ijkuak tikimijliskej tlen techajmana (Job 32:4). Maski xtikchiaskej matechijlikan tlen tikchiuaskej, techpaleuis tla tijkakij tlen yejuamej techijliskej itech Biblia (Prov. 15:22). Niman ijkuak itlaj techonpolos, matikchiuakan  ken tekiuaj David, maka matoueyimatikan niman matikselikan tlen techmakaskej (2 Sam. 17:27-29). Tla toamigos ijkomej, nochiuaj se tetlayokolijli itech Jehová (Sant. 1:17).

16. Ken kijtoua Filipenses 4:6, 7, ¿san kenon uelis tikpiyaskej yolseuilistli?

¹⁶ (Xpoua Filipenses 4:6, 7). ¿Tleka kijtoua Jehová ika uelis tikpiyaskej iyolseuilis itechkopa Cristo? Pampa tla tiknekij tikpiyaskej yolseuilistli ipan totlanemilil niman ipan toyojlo, noneki matikasikamatikan tlenon kichiua Jesús itech nochi itekiyo Jehová niman itech matitlaneltokakan. Se neskayotl, techyolseuiya pampa tikmatij ika techtlapopoluiliaj totlajtlakoluan itechkopa imikilis Jesús (1 Juan 2:12). Noijki tikpiyaj tlamachialistli ijkuak tikmatij ika Jesús niman iTekiuajyo toTajtsin kiyektlaliskej nochi tlen Satanás kijtlakoua (Is. 65:17; 1 Juan 3:8; Apoc. 21:3, 4). Niman, techyolchikaua tikmatiskej ika Jesús techpaleuijtok ipan ouijtika tekitl tlen tikchiujtokej sa itlamiyan yejuin tonaltin (Mat. 28:19, 20). ¿Xmelak ika yolseuilistli, tlamachialistli niman yolchikaualistli kichiua matinemikan ika toyojlo?

17. a) ¿Kenon uelis tiyolseujtoskej ipan totlamachilis? b) Ken kijtoua Juan 16:33, ¿tlenon uelis tikchiuaskej?

¹⁷ Kuakon, ¿kenon tiyolseujtoskej ipan totlamachilis ijkuak tikixnamikiskej tlen ouijtika? Tla tikchiuaj ken Jesús. Kachtopa, nochipa matikchiuakan teoyotl. Ome, matiktlakamatikan Jehová niman chikauak matitenojnotsakan maski maouijtika tlen tikixnamiktoskej. Niman yeyi, matikselikan ken techpaleuiyaj toamigos. Kuakon, iyolseuilis toTajtsin kitlajpiyas totlanemilil niman toyojlo. Niman ijkon ken Jesús, uelis tikxikoskej maski san tlenon topan mapano (xpoua Juan 16:33).