1. ¿Tlenon tikchiuaj ijkuak tiknekij yakaj iuan touikaskej?

MIYEKPA, ijkuak tiknekij yakaj iuan touikaskej, iuan tonojnotsaj itech tlen tiknemiliaj, itech tlen tikmachiliaj niman itech tlen topan yonochiuj. Aman tej ¿kenon touikaj iuan Jesús? Kanaj ouijtika tikitaj iuan touikaskej. Matikitakan tlenon ueliskia kichiuas ijkon matikmachilikan.

2. ¿Tlenon ueliskia kichiuas ouijtika matikitakan touikaskej iuan Jesús?

² Kachtopa, kanaj ouijtika tikitaj touikaskej iuan Jesús pampa xueli tikitaj. Noijki ijkon inpan onochiuj tokniuan akin onenkej ipan kachtopa siglo. Maski ijkon, apóstol Pedro okimijli: “Nemejuamej nenkitlajsojtlaj JesuCristo maski xkaman onenkitakej. Maski aman xnenkitaj, nenkineltokaj” (1 Ped. 1:8). Ken tikitaj, xnoneki tikitaskej Jesús niman ijkon iuan touikaskej.

3. ¿Tlenon noijki uelis kichiuas ouijtika matikitakan touikaskej iuan Jesús?

³ Ika ome, kanaj ouijtika tikitaj touikaskej iuan Jesús pampa xueli iuan titlajtouaj. Maski tiktekitiltiaj itokayo Jesús ijkuak tikchiuaj teoyotl, xyejua akin tiknotsaj. Niman Jesús xkineki yejua matikchiuilikan teoyotl. ¿Tleka xkineki? Pampa kineki san Jehová matikueyichiuakan niman san yejua kinamiki matikchiuilikan teoyotl (Mat. 4:10). Maski ijkon, uelis tikteititiskej ika tiktlasojtlaj Jesús.

4. a) Xteneua okse tlen uelis kichiuas ouijtika matikitakan touikaskej iuan Jesús. b) ¿Tlenon tikitaskej ipan yejuin tlamachtijli?

 ⁴ Ika yeyi, kanaj ouijtika tikitaj touikaskej iuan Jesús pampa yejua nemi ne iluikak. Maski ijkon, uelis miyek tlemach tikmatiskej itech. Ipan yejuin tlamachtijli, tikitaskej naui tlemach tlen uelis tikchiuaskej niman ijkon touikaskej iuan. San ika, kachtopa matikitakan tleka melak noneki matouikakan iuan Cristo.

5. ¿Tleka noneki touikaskej iuan Jesús? (Noijki xkimita recuadros “ Tla touikaj iuan Jesús, uelis touikaskej iuan Jehová” niman “ Ken kinamiki matikitakan Jesús”).

⁵ Noneki touikaskej iuan Jesús pampa ijkon uelis touikaskej iuan Jehová. ¿Tleka ijkon tikijtouaj? Matikitakan tleka. Se tonajli, Jesús okintomili inomachtijkauan tleka toTajtsin kintlasojtlaya, yejua okimijli: “Mechtlajsojtla pampa nemejuamej nennechtlajsojtlaj” (Juan 16:27). Niman noijki okijto ika san itechkopa uelis tajsiskej itech toTajtsin (Juan 14:6). San matikonnemilikan yejuin, akin kineki nouikas iuan Jehová, san ika, xkineki nouikas iuan Jesús kentla kiyejyekoskia kalakis ijtik se kajli, san ika, xkinekis panos ipan puerta. Jesús okijto ika yejua katka kentla “ikalakiyan on corral kampa kalakij on borreguitos” (Juan 10:7). Noijki noneki touikaskej iuan Jesús pampa yejua okiteititi kenon toTajtsin. Okimijli inomachtijkauan: “On yejuan nechita, no kita on noTajtsin” (Juan 14:9). Kuakon, tla tiknekij tikixmatiskej Jehová, kachtopa noneki tikixmatiskej Jesús. Tla miyek tiuelij itech Jesús, más tiktlasojtlaskej. Niman tla más tonisiuiyaj itech, noijki más tiktlasojtlaskej toTajtsin.

6. ¿Tleka noijki noneki touikaskej iuan Jesús?

⁶ Noneki touikaskej iuan Jesús pampa ijkon  Jehová uelis kinnankilis toteoyouan. Yejuin kijtosneki ika xsan noneki tiktekitiltiskej itokayo Jesús ijkuak titlamiskej se teoyotl. Noneki kuajli tikasikamatiskej kenon Jehová kitekitiltia Jesús niman ijkon kinnankilis toteoyouan. Jesús okimijli iapóstoles: “Nochi tlen nemejuamej nentlajtlaniskej ikan notoka, nejua nikchiuas” (Juan 14:13). Jehová yejua akin kinkaki niman kinnankilia toteoyouan, san ika, kitekitiltia Jesús niman ijkon kichiuas tlen kineki (Mat. 28:18). Ijkuak toTajtsin xikinankilia tlen tiktlajtlaniliaj, yejua kachtopa kita tla yotikchiujkej tlen Jesús yotechnauati. Se neskayotl, Jesús okijto: “Tla nenkintlapojpoluiskej oksekimej ika on tlen xkuajli mechchiuiliaj, nemoTajtsin iluikak chanej no mechtlapojpoluis. Pero tla on oksekimej xnenkintlapojpoluiliaj on tlen xkuajli mechchiuiliaj, nemoTajtsin no xmechtlapojpoluilis on tlen xkuajli onenkichijkej” (Mat. 6:14, 15). ¿Xmelak ika noneki tikintlapopoluiskej oksekimej ijkon ken Jehová niman Jesús techtlapopoluiyaj?

7. ¿Tlenon noneki tikchiuaskej niman ijkon uelis techpaleuis tlaxtlauijli tlen Jesús okitemakak?

⁷ San akin kuajli nouikaj iuan Jesús kinpaleuis tlaxtlauijli tlen yejua okitemakak. ¿Kenon tikmatij? Jesús okijto ika yejua mikiskia inpampa akin imiuan nouika (Juan 15:13). Itekipanojkauan toTajtsin akin onenkej achto uajlaskia Jesús ipan yejuin tlaltikpaktli, noijki nonekis kuajli kixmatiskej niman kitlasojtlaskej. Tlakamej niman siuamej akin melak okitlasojtlakej Jehová ijkon ken Abrahán, Sara, Moisés noso Rahab oksejpa yoliuiskej, san ika, hasta yejuamej nonekis nouikaskej iuan Jesús niman ijkon uelis kipiyaskej nemilistli tlen xkeman tlamis (Juan 17:3; Hech. 24:15; Heb. 11:8-12, TNM; Heb. 11:24-26, 31).

8, 9. Ijkon ken kijtoua Juan 15:4, 5, ¿tlenon ueli tikchiuaj pampa touikaj iuan Jesús, niman tleka noneki nochipa iuan matinemikan?

⁸ Tikpiyaj se tekitl tlen melak kualtsin: tikpaleuiyaj Jesús, kema, titenojnotsaj niman tikteijliaj kuajli tlajtoltin itech iTekiuajyo toTajtsin. Ijkuak Jesús onen ipan tlaltikpaktli, yejua ijkon okichiuj. Niman desde ijkuak onokuep iluikak, toTeko Jesús, akin tlayekanketl ipan tlanechikojli, ok kiyekantika yejuin tekitl tlen tikchiuaj. Kita niman kipatiojkaita nochi tlen tikchiuaj niman ijkon tikinpaleuiskej oksekimej makixmatikan iTajtsin niman yejua. Melauak, san tiuelij tikchiuaj yejuin tekitl pampa Jehová niman Jesús techpaleuiyaj (xpoua Juan 15:4, 5).

⁹ Biblia techmachtia ika noneki tiktlasojtlaskej Jesús tla tiknekij tikyolpaktiskej Jehová. Yejua ika, matikitakan naui tlemach tlen noneki tikchiuaskej niman ijkon touikaskej iuan Jesús.

10. ¿Tlenon kachtopa noneki tikchiuaskej niman ijkon touikaskej iuan Jesús?

¹⁰ Kachtopa, noneki tikixmatiskej Jesús. Yejua ika, noneki tikinamapouaskej amoxtin tlen uajlauej ipan Biblia ijkon ken Mateo, Marcos, Lucas niman Juan. Tla titlanemiliaj itech tlen kijtouaj yejuin amoxtin niman tla tikitaj kenon Jesús otetlasojtlak, kichiuas matiktlasojtlakan niman matiktlakaitakan. Matitlanemilikan itech yejuin, Jesús xkeman okimitak inomachtijkauan ken itlakeualuan, maski inTeko katka. Yejua kuajli imiuan nouikaya niman kimijliaya kenon nomachiliaya niman tlenon kinemiliaya (Juan 15:15). Kasikamatiya kenon najmanayaj inomachtijkauan niman imiuan chokaya (Juan 11:32-36). Niman hasta akin kitlauelitayaj okitakej ika yejua nouikaya imiuan akin kuajli kikakiyaj  (Mat. 11:19). Tla tikintlasojtlaj oksekimej ijkon ken Jesús, más tipakiskej niman más tiktlasojtlaskej niman tiktlakaitaskej Jesús.

11. ¿Tlenon noijki noneki tikchiuaskej niman ijkon touikaskej iuan Jesús, niman tleka melak noneki?

¹¹ Ika ome, noneki titlanemiliskej niman tikchiuaskej ijkon ken Jesús. Tla tokojtiliaj ijkon tikchiuaskej, más kuajli iuan touikaskej (1 Cor. 2:16, TNM). ¿Kenon uelis tikchiuaskej ijkon ken yejua? Matikitakan itlaj tlen yejua kichiuaya. Yejua kitaya ika más ueyi kijtosnekiya kinpaleuis oksekimej xijkon ken san yejua noyolpaktis (Mat. 20:28; Rom. 15:1-3). Pampa ijkon tlanemiliaya, kichiuaya miyek tlemach inpampa oksekimej niman kintlapopoluiaya. Xnimantsin noyolkokouaya ipampa tlen kiteneuiliayaj (Juan 1:46, 47). Niman xkinemiliaya tlen xkuajli itech yakaj san pampa yejon tlaltikpakchane okichiujka tlen xkuajli yeuejkaui (1 Tim. 1:12-14). Melak noneki matikchiuakan ken yejua pampa yejua okijto: “Tla nemotlajsojtlaj inuan oksekimej, nochi tlakatl kitas ika nennotemachtijkauan” (Juan 13:35). Yejua ika, matotlajtoltikan: “¿Nikyejyekoua kuajli ninouikas imiuan tokniuan ijkon ken okichiuj Jesús?”.

12. ¿Tlenon okse tlemach noneki tikchiuaskej niman ijkon touikaskej iuan Jesús, niman kenon tikchiuaj yejuin?

¹² Ika yeyi, noneki tikinpaleuiskej ikniuan Cristo. Ijkuak tikinpaleuiyaj tlapejpeniltin, Jesús kita kentla yejua tikpaleuijtoskiaj (Mat. 25:34-40). Tejuamej tikinpaleuiyaj tlapejpeniltin ijkuak tikchiuaj tekitl tlen Jesús okinnauati itekipanojkauan. ¿Katlejua yejon tekitl? Titenojnotsaskej itech iTekiuajyo toTajtsin niman tikinpaleuiskej oksekimej manochiuakan inomachtijkauan Cristo (Mat. 28:19, 20; Hech. 10:42). Melak noneki ika “oksekimej borregos” makinpaleuikan akin tlapejpeniltin pampa ijkon yejuamej kichiuaj yejon tekitl tlen Jesús otlanauati niman tlen nochiujtika ipan nochi tlaltikpaktli (Juan 10:16). Tla tejuamej xtitlapejpeniltin, nochipa ijkuak titenojnotsaj niman titemachtiaj, tikteititiaj ika tikintlasojtlaj tlapejpeniltin niman Jesús.

13. ¿Kenon uelis tikchiuaskej tlen Jesús okijto ipan Lucas 16:9?

¹³ Noijki uelis touikaskej iuan Jehová niman Jesús tla tiktemakaj totomintsin niman ijkon manochiua tekitl tlen yejuamej kiyekantokej (xpoua Lucas 16:9). Uelis tiktemakaskej totomintsin niman ijkon tokniuan más matenojnotsakan kampa melak uejka, makinchijchiuakan niman makinyektlalikan Kaltin kampa tosentlaliaj niman okseki kaltin kampa tikueyichiuaj Jehová, niman noijki makinpaleuikan oksekimej tokniuan akin chantij kampa tlaixpoliui. Noijki uelis tiktemakaskej totomintsin ipan totlanechikol niman uelis tikinpaleuiskej tokniuan akin itlaj kinpoloua (Prov. 19:17). Ijkuak tikchiuaj yejuin, tikinpaleuiyaj ikniuan Cristo.

14. Ijkon ken kijtoua Efesios 4:15, 16, ¿tlenon noijki noneki tikchiuaskej niman ijkon touikaskej iuan Jesús?

¹⁴ Ika naui, noneki tikchiuaskej ijkon ken techijlia ikalpan Jehová. Más kuajli touikaj iuan Jesús, akin kiyekana tlanechikojli, ijkuak tikinpaleuiyaj niman tikintlakamatij tokniuan akin yokintekitlalijkej matechyekanakan ika tlasojtlalistli (xpoua Efesios 4:15, 16). Ikalpan toTajtsin kitstika kuajli manotekitiltikan Kaltin kampa tosentlaliaj. Yejua ika, seki tlanechikoltin yonosetilijkej niman yokinpatilijkej kampa tenojnotsaj. Yejuin yokichiuj maka miyek tomin manopopolo. Melauak, miyek tlemach nopatla ijkuak ijkon nochiua. Sekimej tokniuan melak youejkaujkej ipan se tlanechikojli niman melak kintlasojtlaj tokniuan akin ompa nemij. San ika,  aman yokimijlikej ika noneki tlapaleuiskej ipan okse tlanechikojli. Matikonnemilikan kenon melak yolpaki Jesús ijkuak kita ika yejuin tokniuan kichiuaj ken kimijlia ikalpan Jehová.

15. ¿Kenon touikaskej iuan Jesús ika tlayekapan?

¹⁵ Tokniuan tlapejpeniltin kichiaj nochipa nemiskej iuan Jesús niman iuan tekiuajtiskej ipan iTekiuajyo toTajtsin. Yejuamej kitaskej, iuan tlajtoskej niman iuan nemiskej (Juan 14:2, 3). San ika, Jesús noijki kintlajpiyas niman kintlasojtlas akin nemiskej ipan yejuin tlaltikpaktli. Maski yejuamej xkitaskej, melak iuan nouikaskej ijkuak kipiyaskej yejon nemilistli tlen Jehová niman Jesús yokijtokaj kinmakaskej (Is. 9:6, 7).

16. ¿Tlen tlateochiualistin tikinseliaj pampa touikaj iuan Jesús?

¹⁶ Jesús techijlia iuan matouikakan. Niman pampa iuan touikaj, tikinseliaj miyek tlateochiualistin. San seki matikinteneuakan, yejua techtlasojtla niman techpaleuiya ipan yejuin tonaltin. Noijki, uelis tikpiyaskej se nemilistli tlen xkeman tlamis. Niman, tlen más ueyi kijtosneki, uelis touikaskej iuan toTajtsin Jehová. Melak kualtsin ika touikaj iuan Jesús.