1, 2. ¿Kenon uelis tikitstiaskej Jesús? Xkijto se neskayotl.

MATIKONNEMILIKAN ika imiuan oksekimej tonpaxalouaj kampa tejtepeyoj, niman ompa melak xtlakualkan. Niman touan yauj yakaj akin tlaixmati niman yejua chojcholojtiuj kampa tlasokititlan para tikitstiaskej kanon ika yauj. Maski tikitaj ika yotechkaujteuj, xtomojtiaj pampa tikitstiuej kanon ika ochojcholojtia.

² Tejuamej akin tikchiuaj ken Cristo tinejnentiuej ipan yejuin tlaltikpaktli, kampa melak xtlakualkan. San ika, xtomojtiaj pampa techyekantika Jesús, akin xkeman nopopoloua. Ika yejon, noneki tikchiuaskej ijkon ken yejua okichiuj (1 Ped. 2:21). Se ixtlamatki itech Biblia kijtoua ika Pedro kijtojtoya ika Jesús katka ken yakaj akin teyekana. Ijkon ken akin onpaxaloua ueli kitstiuj kanon ika chojcholojtiuj akin kiyekana, tejuamej noijki uelis tikitstiaskej kanon ika ochojcholojtia Jesús. Aman tikitaskej tlenon kijtosneki tikitstiaskej Jesús, tleka noneki tikitstiaskej niman kenon uelis tikitstiaskej.

3. ¿Tlenon kijtosneki tikitstias kampa yakaj ocholojtia?

³ ¿Tlenon kijtosneki tikitstias kampa yakaj ocholojtia? Ipan Biblia tlajtojli tikistinemis niman ticholos, kemantika kijtosneki tlen yakaj kichiua ipan nochi inemilis (Prov. 3:23; 4:26). Ijkuak tikijtouaj ika noneki tikitstiaskej kampa yakaj  chojcholojtiuj, kijtosneki ika noneki tikitaskej tlenon okichiuj para noijki ijkon tikchiuaskej.

4. ¿Tlenon kijtosneki tikitstiaskej Jesús?

⁴ Kuakon, tikitstiaskej Jesús kijtosneki tikchiuaskej tlen yejua okichiuj. Ipan tlaxelojli kampa onokixti yejuin tlamachtijli, apóstol Pedro okijto ika Jesús otechititi kenon noneki titlaxikoskej ijkuak techtlajyouiltiskej. San ika, xsan yejon tlen Jesús otechititi (1 Ped. 2:18-25). Nochi tlen Jesús okijto niman okichiuj, techititia tlen noneki tikchiuaskej.

5. Xkijto tleka tinochimej uelis tikchiuaskej ijkon ken Jesús maski titlajtlakolejkej.

⁵ ¿Tleka tikijtouaj ika tejuamej uelis tikchiuaskej ijkon ken Jesús maski titlajtlakolejkej? Pampa apóstol Pedro xokijto ika xtopopoloskej ijkuak tikchiuaskej ken Jesús, yejua kijtojtoya ika noneki tokojtiliskej. Kuakon, tla tejuamej tokojtiliaj tikitstiaskej Jesús, tikchiujtoskej tlen apóstol Juan okijto, tinemiskej “ken JesuCristo nemiya” (1 Juan 2:6).

6, 7. ¿Tleka tikijtouaj ika tla tikchiuaj ijkon ken Jesús tiknisiuiyaj Jehová?

⁶ Tla tikitstiuej Jesús, tiknisiuiskej Jehová. ¿Tleka? Kachtopa, pampa Jesús kuajli otechititi kenon tikyolpaktiskej Jehová (Juan 8:29). Kuakon, tla tikchiuaj ken Jesús, Jehová yolpakis. Noijki, kuajli tikmatstokej ika Jehová kinnisiuiya akin nokojtiliaj kuajli iuan nouikaskej (Sant. 4:8).

⁷ Ika ome, Jesús nochipa okichiuj ijkon ken iTaj. Ika yejon, ouel okijto: “Yejuan nechita, no kita on noTajtsin” (Juan 14:9). Ijkuak tikchiuaj ken Jesús, kentla tikchiujtoskiaj ken Jehová. Jesús oteikneli. Yejua okikneli se tlakatl akin kipiaya lepra, okikneli se siuatsintli akin kipiaya se ueyi kokolistli  niman noijki okimikneli akin yomijkaj inchanejkauan (Mar. 1:40, 41; 5:25-34; Juan 11:33-35). Ijkuak más tokojtiliaj tikchiuaskej ken Jehová, más tiknisiuiyaj.

8. Xkijto tleka uelis tiktlaniskej “ipoder in tlaltikpaktli” tla tikchiuaj ijkon ken Jesús.

⁸ Tla tikitstiuej Jesús, xtikchiuaskej ken akin xkitekichiuiliaj Jehová. Ijkuak Jesús imikiskia, okijto: “Nejua yoniktlan ipoder in tlaltikpaktli” (Juan 16:33). Yejua okijtosnek ika xokinokauili ika oksekimej makijtlakokan ken tlanemiliaya niman tlen kichiuaya. Yejua nochipa onokojtili kiteititis ika san Jehová kinamiki matlayekana, pampa yejua ika okuajtitlankaj. Ipan yejuin tonaltin, onka miyek tlemach tlen uelis kichiuas maka matikitstiakan Jesús. Kuakon, ¿tlenon uelis tikchiuaskej? Maka keman matijkajkauakan ika tiktekichiuiliaj Jehová. Tla ijkon tikchiuaj, tiktlaniskej “ipoder in tlaltikpaktli”, ijkon ken okichiuj Jesús (1 Juan 5:5).

9. ¿Tlenon noneki tikchiuaskej tla tiknekij nochipa tinemiskej?

⁹ Tla tikitstiuej Jesús, nochipa tinemiskej. Ijkuak se telpochtli akin kipiaya miyek tomin okitlajtolti Jesús tlenon nonekiya kichiuas para uelis nochipa nemis, Jesús okinankili: “Xuajla niman xuiya nouan” (Mat. 19:16-21). Jesús ijkin okimijli sekimej judíos akin xkineltokayaj ika yejua katka Cristo: “Noborregos [...] nechkuitlapanuiyaj. Nejua nikinmaka on nemilistli yejuan para nochipa” (Juan 10:24-29). Noijki, Jesús okijli Nicodemo, akin teuan katka itech Sanedrín niman kinekiya kimatis tlen yejua temachtiaya, ika akin tlaneltokaskiaj itech kipiyaskiaj nemilistli tlen xkeman tlamis (Juan 3:16). Tejuamej tikteitiaj ika titlaneltokaj itech Jesús ijkuak tikchiuaj tlen yejua otemachti niman tlen yejua okichiuj. Tla nochipa ijkon tikchiuaj, tikseliskej se nemilistli tlen xkeman tlamis (Mat. 7:14).

10. ¿Tlenon noneki tikchiuaskej tla tiknekij kuajli tikixmatiskej Jesús? (Juan 17:3).

¹⁰ Tla tiknekij kuajli tikitstiaskej Jesús, kachtopa noneki kuajli tikixmatiskej, yejuin itlaj tlen noneki nochipa tikchiujtoskej (xpoua Juan 17:3). Niman tla tiknekij kuajli tikixmatiskej Jesús, noneki tikitaskej tlen kichiuaya, ken tlanemiliaya niman ken noyekanaya. Maski tla yotiuejkaujkej noso tla xitiuejkauij ipan ikalpan toTajtsin, tinochimej noneki tokojtiliskej kuajli tikixmatiskej Jehová niman Jesús.

11. ¿Itech tlenon tlajtouaj naui Evangelios?

¹¹ Pampa Jehová melak techtlasojtla niman kineki kuajli matikixmatikan iKonetsin, okichiuj manoijkuilokan naui Evangelios ipan Biblia. Ompa techijlia tlenon okichiuj Jesús niman kenon otenojnots. Noijki techijliaj  tlenon okijto Jesús niman kenon onomachili. Yejuin naui Evangelios techpaleuiyaj kuajli matikitakan tlenon okichiuj Jesús (Heb. 12:3). Uelis tikijtoskej ika ompa tikitaj kanon ika onejnentia Jesús. Tla kuajli tomachtiaj yejuin Evangelios, uelis kuajli tikixmatstiaskej niman tikitstiaskej Jesús.

12. ¿Tlenon noneki tikchiuaskej tla tiknekij kuajli matechpaleuikan naui Evangelios?

¹² Tla tiknekij kuajli matechpaleuikan yejon naui Evangelios, xsan noneki tikinpouaskej, noijki noneki kuajli tomachtiskej niman intech titlanemiliskej (uelis tikitas Josué 1:8). Aman matikitakan tlen uelis techpaleuis ijkuak tomachtiskej yejon naui Evangelios, niman kenon uelis tikchiuaskej tlen ompa tiueltiuej.

13. ¿Kenon uelis titlanemiliskej itech tlen kijtouaj Evangelios?

¹³ Kachtopa, matitlanemilikan itech tlen kijtouaj Evangelios. Matikonnemilikan ika tikitstokej, tikaktokej niman tikmachilijtokej tlen ompa panotika. Matopaleuikan ika amatlajkuiloltin tlen techinmaka ikalpan Jehová. Kuajli matikitakan nochi tlen panotoya. Tla tikpoujtokej itlaj ipan se Evangelio, matiktejtemokan ipan toamatlajkuiloluan tlenon kichiuayaj tlaltikpakchanejkej akin ompa noteneuaj, tlenon nochiuaya ipan kalpamej tlen ompa noteneuaj niman tlenon opanok achto niman sakin. Noijki, uelis tikimitaskej okseki Evangelios para tikitaskej tla ompa uajlauj itlaj tlen xnoteneua ipan Evangelio tlen tikitstokej.

14, 15. ¿Tlenon noneki tikchiuaskej tla tiknekij matechpaleui tlen tomachtiaj ipan Evangelios?

¹⁴ Ika ome, matikchiuakan tlen tomachtiaj ipan Evangelios (Juan 13:17). Sakin ika yotitlankej tikpouaj itlaj ipan se Evangelio, matotlajtoltikan: “¿Tlenon nechmachtia? ¿Kenon uelis ika nikinpaleuis oksekimej?”. Matiknemilikan akinon uelis kipaleuis tlen yotomachtijkej. Niman sakin, ika tlasojtlalistli, matikteneuilikan tlen otomachtijkej.

 ¹⁵ Aman matikitakan kenon uelis tikchiuaskej tlen yotikonijtokej. Amantsin tomachtiskej itech se siuakaualtsintli akin Jesús okitak ipan teopan.

16. Xkijto itech tlenon tlajtoua Marcos 12:41.

¹⁶ Kuajli matitlanemilikan itech tlen tikpouaj (xpoua Marcos 12:41). Matikonnemilikan ika tinemij ipan tonajli 11 de nisán itech xiuitl 33. Sa achijtsin poliui para kimiktiskej Jesús niman yejua nochi tonajli temachtijtoya teopan. Tlayekankej itech tlaneltokiltin melak yokitlatlatakej Jesús pampa kitlauelitaj. Sekimej yokijlikej ika xkinamiki yejua matlayekana. Niman sekimej melak yokitlajtlajtoltijkej pampa kinekij makijto itlaj tlen xkuajli (Mar. 11:27-33; 12:13-34). Sakin tikitaj ika Jesús yauj kampa nochimej konkauaj intomintsin. Yejua ompa onotlalito niman kitstika kenon miyekej konkauaj intomin. Kitstika kenon miyekej ricos konxinijtokej intomin, pampa nisiuj yeuatika kanaj hasta kikaktika kenon konxinijtokej intomin.

17. ¿Tlenon okichiuj on siuakaualtsintli akin noteneua ipan Marcos 12:42?

¹⁷ (Xpoua Marcos 12:42). Sakin tikitaj ika Jesús kita se siuakaualtsintli mayanki (Luc. 21:2). Yejuin siuakaualtsintli melak ouijtika kita kinextis tlen ika nopanoltis. Maski ijkon, yejua san ichtaka okikauato itomintsin, tlen ika ueliskia nopanoltis. Yejua okikauato ome itomintsin, tlen nion xonauat ijkuak okomonxini. San ika, Jesús kema kimatstika ika san okonxini ome leptones. Ika yejuin ome tomin nion xueliskia ika tijkouas se tototsintli, tlen ipan yejon tonaltin nion xpatiojkej katkaj.

18. Itech tlen kijtoua Marcos 12:43, 44, ¿tlenon okijto Jesús itech tlen okichiuj yejon siuakaualtsintli?

¹⁸ (Xpoua Marcos 12:43, 44). Jesús melak mojkatlachia ipampa tlen okichiuj yejuin siuakaualtsintli. Kuakon kominotsa inomachtijkauan, kimititia on siuakaualtsintli niman kimijlia: “Ika tlen melauak nemechijlia ika in mayanki siuakaualtsintli más ueyi okitlalij iuentomin xken nochimej on oksekimej”. Niman noijki okimijli: “On yejuan ricos kitemakaj san on tlen kinsobraroua. Pero in siuatl, yejuan mayanki, okitemakak nochi hasta on tlen sa ika nochi kipiyaya para nopanoltis”. Ijkuak yejon siuakaualtsintli okonxini nochi itomin, okiteititi ika kineltokaya ika Jehová kitlajpiyaskia (Sal. 26:3).

19. ¿Tlenon techmachtia tlen Jesús okijto itech yejon siuakaualtsintli?

¹⁹ Matikchiuakan tlen ompa tomachtiaj. Matotlajtoltikan: “¿Tlenon nechmachtia tlen Jesús okijto itech yejon siuakaualtsintli?”. Matikonnemilikan kenon nomachiliaya. Kuajli tikmatstokej ika yejua kuelitaskia más kimakas Jehová. Maski ijkon, yejua okimakak Jehová nochi tlen kipiaya. Niman Jesús kuajli kimatstoya ika iTaj melak kipatiojkaitaya tlen okichiuj yejuin siuakaualtsintli. Yejuin techmachtia ika Jehová kineki matikmakakan nochi tlen tikpiyaj, ika matiktekichiuilikan ika nochi toyoltsin niman ika nochi tonemilis (Mat. 22:37; Col. 3:23). Jehová melak yolpaki ijkuak tikchiuaj nochi tlen tiuelij, ken ijkuak tijkuij totiempo niman tochikaualis niman ijkon tontenojnotsaskej niman tiaskej tlanechikoltin.

20. ¿Kenon uelis tikchiuaskej tlen otiuelkej itech siuakaualtsintli? Xkijto se neskayotl.

²⁰ ¿Kenon uelis tikchiuaskej tlen otiuelkej itech siuakaualtsintli? Matitlanemilikan  itech sekimej tokniuan akin kinyolchikauaskia tla tikimijliaj ika Jehová melak kipatiojkaita nochi tlen kichiuaj. ¿Tikixmati se tokniuj akin iueyi niman noyolkokoua pampa xok tenojnotsa ijkon ken yejua kuelitaskia? noso ¿tikixmati se tokniuj akin xueli yauj tlanechikoltin pampa melak kualo? Tla tikixmatij se tokniuj akin kixnamiktika yejuin, uelis tikyolchikauaskej (Efes. 4:29). Matikimijlikan tlen otiuelkej itech yejon siuakaualtsintli. Tlen tikimijliskej uelis kimilnamiktis ika Jehová melak kipatiojkaita ijkuak tikchiuaj nochi tlen tiuelij (Prov. 15:23; 1 Tes. 5:11). Tikteititiaj ika tikchiuaj ken Jesús ijkuak tikinyolchikauaj yejuin tokniuan niman tikimijliaj ika melak kuajli kitekichiuilijtokej Jehová, maski yejuamej xijkon kinemiliaj.

21. ¿Tlenon yotikijto tikchiuas?

²¹ Melak tiktlasojkamachiliaj toTajtsin pampa okichiuj ika manoijkuilokan naui Evangelios, kampa nesi tlen Jesús okichiuj. Niman yejuin techpaleuiya matikitstiakan kampa onejnentia Jesús. ¿Xmelak ika kuajli yeskia san toselti tomachtiskiaj noso imiuan tochanejkauan itech yejuin Evangelios? Tla tiknekij kuajli matechpaleuikan yejuin naui Evangelios, noneki intech titlanemiliskej niman tikchiuaskej tlen techmachtiaj. Xsan noneki tikchiuaskej ijkon ken Jesús okichiuj, noijki noneki matijkakikan tlen yejua okijto. Ipan okse tlamachtijli, tikitaskej tlenon techmachtia tlen Jesús okijto ijkuak pilkatoya ipan kojtli melaktik.