1, 2. ¿Tlenon kijtosneki tlaxtlauijli, niman tleka nonekiya Jesús matlatlaxtlaua topampa?

PAMPA Adán otlajtlako, yejua iuan ikoneuan xok ueliskiaj nemiskiaj nochipa. Adán nonekiya mikis pampa san no yejua okitlapejpeni xkitlakamatis toTajtsin. San ika ¿tleka ikoneuan nonekiya mikiskej tla yejuamej xotlajtlakojkej? (Rom. 5:12, 14). ¿Kenon ueliskia kinmakixtis Jehová ikoneuan Adán? Sakin ika otlajtlako Adán, Jehová okijtojtia kenon kinmakixtis nochimej ikoneuan Adán itech tlajtlakojli niman mikilistli (Gén. 3:15). Sakin, Jehová okuajtitlan iKonetsin niman ijkon makitlaxtlauaki ika inemilis tlen okichiuj Adán niman makinmakixtiki “miyek tlakatl” (Mar. 10:45; Juan 6:51).

² ¿Tlenon kijtosneki tlaxtlauijli? Ipan Tlajkuiloltin ika Griego, tlaxtlauijli kijtosneki tlen Jesús okichiuj para kitlaxtlauas tlajtlakojli tlen okichiuj Adán (1 Cor. 15:22). ¿Tleka nonekiya Jesús matlatlaxtlaua topampa? Pampa itlanauatiluan Jehová kijtouayaj ika tla yakaj temiktiaya noijki nonekiya kimiktiskej (Ex. 21:23, 24). Adán xtlajtlakole katka, ika yejon, nonekiya notemakas yakaj akin xtlajtlakole. Niman Jesús nonekiya ijkon kichiuas (Rom. 5:17). Ijkon, Jesús onochiuj inTajtsin “para yeyika” akin kineltokaskiaj ika yejua okinmakixti (Is. 9:6; Rom. 3:23, 24).

3. Itech tlen kijtoua Juan 14:31 niman 15:13, ¿tleka Jesús okinokauili makimiktikan?

³ Jesús okinokauili makimiktikan pampa melak kitlasojtla iTajtsin niman pampa melak techtlasojtla (xpoua Juan 14: 31; 15:13). Noijki, pampa melak kitlasojtla iTajtsin, omelajkanen hasta ijkuak omik niman nochipa okichiuj tlen yejua kitlajtlaniliaya. Pampa ijkon okichiuj, oksejpa uelis nochipa tinemiskej ipan yejuin tlaltikpaktli, ijkon ken Jehová kinekiya. Ipan yejuin tlamachtijli, tikitaskej tleka Jehová okitekauili melak makitlajyouiltikan Jesús ijkuak omik. Noijki, tikitaskej kenon se tlakatl akin okijkuilo Biblia melak kitlasojkamatiya tlen okichiuj Jesús. Niman sa ika tlami, tikitaskej kenon tikteititiskej ika tiktlasojkamatij niman tikpatiojkaitaj tlen Jehová niman Jesús okichiujkej topampa.

4. Xkijto kenon omik Jesús.

⁴ San matikonnemilikan kenon melak otlajyoui Jesús ijkuak ikimiktiskiaj. Jesús okinokauili ika soldados romanos makajsikan niman makiuisokikan, maski yejua ueliskia kimijliskia melak miyekej ángeles makipaleuikan (Mat. 26:52-54; Juan 18:3; 19:1). Okiuijuitejkej ika se mekatl tlen hasta kiyejyeskixtiaya. Sakin, okimamaltijkej se kojtli melaktik tlen ipan kipiloskiaj. Jesús okitilantiaj yejon kojtli melaktik hasta kampa kimiktiskiaj. Sakin, soldados romanos okichiualtijkej se tlakatl makipaleui Jesús makikechpano on kojtli melaktik (Mat. 27:32, TNM). Ijkuak Jesús oajsik kampa kimiktiskiaj, itlauelikniuan okimatetsotsonkej niman okikxitetsotsonkej ipan kojtli melaktik. Ijkuak okipilojkej, opeuj yetiya itlalnakayo. Niman kampa okintetsotsonilijkej clavos más otlapojtiaj itlalnakayo. Ijkuak ijkon panotoya, iamigos niman inan tlajyouijtoyaj niman chokatoyaj, san ika, tekiuajkej judíos san kipijpinaujtijtoyaj Jesús (Luc. 23:32-38; Juan 19:25, TNM). Jesús melak ouejkauj ika tlajyouijtoya. Pampa iyoltsin niman ipulmones xok más kipaleuiayaj opeuj más kitekiyomaka nijyotis. Pampa kimatiya ika yoyolmelajkanenka, sa ika tlami, okichiuili se teoyotl Jehová. Sakin “onotsonakapiloj, niman ouajnomikilij” (Mar. 15:37; Luc. 23:46; Juan 10:17, 18; 19:30). ¡Melak otlajyoui ken omik!

5. ¿Tlenon más okiyolkoko Jesús?

⁵ Maski Jesús melak okitlajyouiltijkej ijkuak okimiktijkej, yejua más okiyolkoko pampa okijtouilijkej ika yokiuijuikaltijka toTajtsin (Mat. 26:64-66). Tlen okijtouilijkej Jesús melak kiyolkokojtoya niman yejua kinekiya ika iTajtsin makiteititi ika xmelauak tlen yokijtouilijkaj (Mat. 26:38, 39, 42). ¿Tleka Jehová okitekauili makitlajyouiltikan niman makimiktikan iKoneuj? Matikitakan.

6. ¿Tleka Jesús okipilojkej ipan se kojtli melaktik?

⁶ Kachtopa, Jesús nonekiya kipiloskej ipan se kojtli melaktik pampa nonekiya kinmakixtis judíos itech itlaj tlen xkuajli (Gál. 3:10, 13). Judíos okimijlikej ika inpan nochiuaskia itlaj tlen xkuajli pampa okijtokaj ika nochipa kintlakamatiskiaj itlanauatiluan toTajtsin, san ika, xijkon okichiujkej. Niman noijki pampa ualeuayaj itech Adán (Rom. 5:12). Itlanauatiluan toTajtsin tlen okinmakakaj israelitas, kijtouayaj ika tla yakaj kichiuaya se ueyi tlajtlakojli nonekiya kimiktiskej, niman kemantika, itlalnakayo akin yomijka kipilouayaj ipan se kojtli melaktik (Deut. 21:22, 23; 27:26). * Kuakon, ijkuak Jesús okipilojkej ipan kojtli melaktik okichiuj ika judíos akin xitech tlaneltokayaj mauelikan mamakisakan.

7. ¿Tleka Jehová okitekauili makitlajyouiltikan iKoneuj?

⁷ Ika ome, toTajtsin okitekauili makitlajyouiltikan iKoneuj pampa kinekiya ika manomajmachtijtiuj  kenon kichiuaskia itekiyo ken Ueyi Teopixki. Jesús okitak ika melak ouijtika tiktlakamatis toTajtsin ijkuak tikixnamikis tlen ouijtika. Ijkuak Jesús xok kimatiya tlenon kichiuas, “yejua ikan chikauak itlajtol niman ikan ixayo, okinots Dios”. Kuajli tikmatstokej ika pampa Jesús otlajyoui, yejua techasikamati niman “ueli kimpaleuiya on yejuan on diablo kintlatlata para ma tlajtlakokan”. Melak tiktlasojkamachiliaj Jehová ika yokitlali se Ueyi Teopixki akin “ueli techiknelia ijkuak xtikojtikej” (Heb. 2:17, 18; 4:14-16; 5:7-10).

8. ¿Tleka noijki toTajtsin okitekauili melak makitlajyouiltikan Jesús?

⁸ Ika yeyi, Jehová noijki okitekauili melak makitlajyouiltikan iKoneuj pampa kinekiya manonankili yejuin: ¿uelis yakaj yolmelajkanemis itech Jehová maski melak kitlatlataskej? Satanás kijtoua ika ka. Yejua kijtoua ika tiktekichiuiliaj toTajtsin pampa san totech titlanemiliaj. Satanás noijki kinemilia ika tejuamej xtiktlasojtlaj Jehová, ijkon ken Adán xokitlasojtlak (Job 1:9-11; 2:4, 5). Pampa Jehová kuajli kimatstoya ika iKoneuj itech yolmelajkanemiskia, okitekauili melak makitlajyouiltikan. Pampa Jesús omelajkanen, okiteititi ika Satanás se tlakajkayaujketl.

9. ¿Tlenon tiuelij itech apóstol Juan?

⁹ Tlen Jesús okichiuj topampa, yokinpaleui melak miyekej tokniuan makichikauakan intlaneltokil. Yokinpaleui matenojnotsakan ijkuak kintlaueltokaj niman matlaxikokan ijkuak kixnamikij tlen ouijtika. Matitlajtokan itech apóstol Juan. Yejua kanaj ipantsin 60 xiuitl otenojnotstinen itech Jesús niman itech tlen okichiuj topampa. Niman ijkuak kipiaya kanaj 100 xiuitl, romanos okitsakuatoj ipan se isla tlen onka Patmos. ¿Tleka? Yejua okijto: “Ompa onechontotokakej pampa nikteijlia on itlajtoltsin Dios niman on tlen nikmati de JesuCristo” (Apoc. 1:9). ¡Kuajli nesi ika melak yolchikauak katka niman melak tlaneltokaya!

10. ¿Kenon okiteititi apóstol Juan ika melak kitlasojkamatiya tlen Jesús okichiuj topampa?

¹⁰ Ipan libros tlen okimijkuilo apóstol Juan, kuajli nesi ika yejua melak kitlasojtlaya Jesús niman ika kitlasojkamatiya tlen okichiuj topampa. Ipan iamatlajkuiloluan, yejua kanaj ipantsin 100 veces okiteneuj tlen Jesús okichiuj topampa niman kenon techpaleuiya. Sejpatipan, yejua okijto: “Tla yakaj tlajtlakoua, tikpiyaj totepantlajtojkau yejuan techpaleuis para tikseliskej tetlapojpoluilistli itech toTajtsin Dios. In totepantlajtojkau yejua JesuCristo yejuan yolmelajki” (1 Juan 2:1, 2). Noijki okijto ika noneki tikteijliskej “tlen melauak yejuan Jesús otemachtij” (Apoc. 19:10). Kuajli nesi ika Juan melak kitlasojkamatiya tlen Jesús okichiuj topampa. Niman tejuamej, ¿kenon uelis tikteititiskej ika noijki tiktlasojkamatij?

11. ¿Tlenon techpaleuis maka matitlajtlakokan?

¹¹ Matokojtilikan maka titlajtlakoskej. Tla yemelak tiktlasojkamatij tlen Jesús okichiuj topampa, xijkin titlanemiliskej: “Xnoneki nitlaxikojtos. Uelis nitlajtlakos niman sakin nikteijlis manechtlapopoluikan”. Maka keman ijkon matitlanemilikan, ijkuak tiknekiskej tikchiuaskej itlaj tlen xkuajli, más kuajli tla tikijtouaj: “¡Ka! Xuelis nikchiuas yejuin pampa Jehová niman Jesús miyek yokichiujkej nopampa”. Noijki, uelis tiktlajtlaniliskej Jehová matechkojtili niman uelis tikijliskej: “Xtechpaleui para maka titlajtlakoskej” (Mat. 6:13).

12. ¿Kenon uelis tikchiuaskej tlen kijtoua 1 Juan 3:16-18?

 ¹² Matikintlasojtlakan tokniuan. Ijkuak tikintlasojtlaj, tikteititiaj ika tiktlasojkamatij tlen Jesús okichiuj topampa. ¿Tleka ijkon tikijtouaj? Pampa Jesús xsan omik topampa, noijki omik inpampa tokniuan. Niman ijkon okichiuj pampa melak kintlasojtla (xpoua 1 Juan 3:16-18). Tlen tikinchiuiliaj kiteititia tla tikintlasojtlaj noso xtikintlasojtlaj (Efes. 4:29, 31–5:2). Tejuamej tikinpaleuiyaj tokniuan ijkuak kualoj, ijkuak kixnamikij tlen ouijtika niman ijkuak tlaixpoliui. San ika ¿tlenon tikchiuaskej ijkuak se tokniuj kijtos noso kichiuas itlaj tlen xtikuelitaj?

13. ¿Tleka noneki titetlapopoluiskej?

¹³ ¿Xueli tikilkauaj ijkuak texchiuiliaj itlaj tlen xkuajli? (Lev. 19:18). Tla ka, matikchiuakan tlen kijtoua yejuin tlaxelojli: “Nemejuamej xmouikakan tenotskej niman yolyemankej iminuan oksekimej, niman xmotlapojpoluikan iminuan oksekimej ijkon ken Dios omechtlapojpoluij itechkopa Cristo” (Efes. 4:32). Ijkuak tejuamej tiktlapopoluiyaj se tokniuj, tikititiaj Jehová ika melak tiktlasojkamatij tlen iKonetsin okichiuj topampa. ¿Kenon uelis más tikteititiskej ika tiktlasojkamatij tlen Jesús okichiuj topampa?

14. ¿Tlenon uelis techpaleuis más matiktlasojkamatikan tlen Jesús okichiuj topampa?

¹⁴ Matiktlasojkamachilikan Jehová ipampa tlen okichiuj iKonetsin. Tokniuj Joanna, akin kipiya 83 xiuitl niman chanti India, kijtoua: “Nejua nikita ika melak noneki mojmostla nikijlis Jehová ika melak niktlasojkamati tlen iKonetsin okichiuj topampa”. Ijkuak tiknotsaskej Jehová, matikilnamikikan nochi tlen xkuajli yotikchiujkej ipan yejon tonajli niman matiktlajtlanilikan matechtlapopolui. San ika, tla otikchiujkej se ueyi tlajtlakojli, noijki noneki tikimijliskej tlayekankej matechpaleuikan. Yejuamej, kuajli techkakiskej niman techpaleuiskej ika Biblia. Noijki, yejuamej touan kichiuaskej teoyotl niman kitlajtlaniliskej Jehová matechtlapopolui. Niman itechkopa tlen Jesús okichiuj, Jehová uelis techtlapopoluis niman uelis oksejpa iuan touikaskej (Sant. 5:14-16).

15. ¿Tleka noneki tikxeloskej tiempo niman ijkon tikamapouaskej itech tlen Jesús okichiuj topampa niman itech titlanemiliskej?

¹⁵ Kuajli matitlanemilikan itech tlen Jesús okichiuj topampa. Se tokniuj siuatl, akin itoka Rajamani niman kipiya 73 xiuitl, kijtoua: “Ijkuak  nikpoua tlen Jesús okijyoui, hasta nixayotejtemi”. Kanaj tejuamej noijki ijkon tomachiliaj ijkuak titlanemiliaj itech kenon iKonetsin toTajtsin otlajyoui. San ika, tla más titlanemiliaj itech tlen okichiuj Jesús, más tiktlasojtlaskej yejua niman Jehová. Tla tejuamej tiknekij más tikintlasojtlaskej, noneki san toselti tomachtiskej itech tlen Jesús okichiuj topampa.

16. ¿Tlenon panoua ijkuak tikinmachtiaj oksekimej itech tlen Jesús okichiuj topampa? (Xkita tlaixkopinajli tlen onka ixpan yejuin revista).

¹⁶ Matikinmachtikan oksekimej itech tlen Jesús okichiuj topampa. Ijkuak ijkon tikchiuaj, más tiktlasojkamatij tlen Jesús okichiuj topampa. Tikpiyaj miyek tlen techpaleuiya matiktetomilikan tleka Jesús omik topampa. Uelis tikuiskej amatlajkuilojli ¡ToTajtsin techijlia tlen kualtsin! ipan tlamachtijli 4, tlen itoka: “¿Akinon Jesucristo?”. Noso uelis tiktekitiltiskej libro ¿Tlenon melauak temachtia Biblia? ipan capítulo 5, tlen itoka: “Tlaxtlauijli, se tlen melak ueyi itetlayokolil toTajtsin”. Sejse xiuitl melak tiktlasojkamatij tlen Jesús okichiuj topampa ijkuak tiauej Conmemoración niman ijkuak tikimijliaj oksekimej touan manosentlalikan ipan yejon tonajli. Jehová yotechkauili matikinmachtikan oksekimej itech iKoneuj. ¡Yejon se kualtsin tekitl!

17. ¿Tleka tikijtouaj ika tlen okichiuj Jesús topampa se ueyi itetlayokolil toTajtsin?

¹⁷ Kuajli tikmatstokej ika onka miyek tlen uelis ika tikteititiskej ika tiktlasojkamatij tlen Jesús okichiuj topampa niman tlen techpaleuis nochipa ijkon matikteititijtiakan. Pampa Jesús omik topampa, aman uelis kuajli iuan touikaskej Jehová maski titlajtlakolejkej. Niman, ipampa imikilis Jesús, noyektlalis nochi tlen Diablo yokijtlako (1 Juan 3:8). Noijki, yejuin tlaltikpaktli nokuepas se xochitlalpan ijkon ken Jehová kinekiya, niman nochimej kitlasojtlaskej niman kitekichiuiliskej. Kuakon, mojmostla matikitakan kenon uelis tiktlasojkamatiskej tlen Jesús okichiuj topampa. ¡Yejuin se ueyi tetlayokolijli tlen toTajtsin yotechmakak!