¿Tleka achto ika mikis Jesús okiteneuj tlen okijto David ipan Salmo 22:1?

Mateo 27:46 kijtoua ika achto ika mikis, Jesús okijto: “NoDios, noDios, ¿tline tinechtlalkauiya?”. Ijkuak Jesús ijkon okijto, onochiuj tlen David okijto ipan Salmo 22:1 (Mar. 15:34). Ijkuak Jesús ijkon okijto, xokijtosnek ika yejua okualan iuan Jehová noso ika xok itech tlaneltokaya. Yejua kuajli kimatstoya ika nonekiya mikis, niman kinekiya kichiuas ika nochi iyojlo (Mat. 16:21; 20:28). Noijki kimatstoya ika ijkuak kimiktiskiaj, Jehová xkipaleuiskia (Job 1:10). Ijkon, Jehová okikauili Jesús makiteititi ika yolmelajkanemiskia maski melak kitlajyouiltiskiaj ijkuak kimiktiskiaj (Mar. 14:35, 36).

Kuakon, ¿tleka ijkon okijto Jesús? Xkuajli tikmatstokej tleka ijkon okijto, san ika, matikitakan seki tlemach tlen techititis kanaj tleka ijkon okijto. *

Ika yejuin tlajtoltin, Jesús kanaj kijtosnekiya ika Jehová xkipaleuiskia ijkuak kimiktiskiaj. Yejua kuajli kimatstoya ika tla kinekiya techmakixtis, Jehová xkipiaya ika kipaleuis. Jesús onemiko ken se tlaltikpakchane niman “omik ipampa nochi tlakatl” (Heb. 2:9).

Kanaj Jesús okiteneuj Salmo 22:1 pampa kinekiya kimilnamiktis tlenon kijtoua nochi yejuin salmo. Ipan yejon tonaltin, judíos kintsontekontlaliayaj miyek salmos.  Ika yejon, ijkuak kimijliayaj se tlaxelojli, nimantsin kilnamikiyaj nochi salmo. Tla yejon tlen Jesús kinekiya kichiuas, kuakon, kinekiya kimilnamiktis judíos nochi teotlajtoltin tlen tlajtouaj itech inemilis, tlen noteneuaj ipan yejuin salmo (Sal. 22:7, 8, 15, 16, 18, 24). Noijki, itlamiyan Salmo 22, kijtoua ika iTekiuajyo Jehová tlayekanas “ipan nochi naciones” (Sal. 22:27-31).

Ijkuak Jesús okiteneuj tlen okijto David, yejua kanaj kinekiya kiteititis ika xokichiuj itlaj tlen xkuajli. Achto ika kimiktiskej, Jesús okuikakej ixpan Sanedrín niman okijlikej ika yejua “yokuijuikaltij Dios” (Mat. 26:65, 66). Akin nemiyaj ipan Sanedrín nimantsin okitlajtlakoltijkej, okichiujkej ika tlayoua niman xokichiujkej ken kijtouayaj tlanauatiltin (Mat. 26:59; Mar. 14:56-59). Ijkuak Jesús okiteneuj Salmo 22:1, kentla yejua kijtoskia: “‘NoDios, noDios’, ¿tleka otinechtlalkaui tla nejua xonikchiuj itlaj tlen xkuajli?”. Ijkon kiteititijtoya ika yejua xokichiuj tlen kijtouiliayaj.

Jesús kanaj kinekiya teilnamiktis ika, maski David tlajyouijtoya, xkijtosnekiya ika Jehová xok iuan nouikaya. David ok tlaneltokaya itech toTajtsin. Pampa sakin ika okijto tlen nestika ipan Salmo 22:1, yejua okijto ika toTajtsin kinmakixtia itekipanojkauan, niman Jehová nochipa okiteochiuj (Sal. 22:23, 24, 27). Noijki ijkon, maski Jesús, akin “teuejkakoneu itech rey David”, tlajyouijtoya ipan kojtli melaktik xkijtosnekiya ika Jehová xok iuan nouikaya (Mat. 21:9).

Ijkuak Jesús okiteneuj yejuin tlaxelojli, kanaj kinekiya kiteititis ika noyolkokouaya pampa Jehová xkipaleuiskia ijkuak kitlajyouiltiskiaj niman ika san iselti kiteititiskia ika yolmelajkanemi. Pampa Adán iuan Eva xotetlakamatkej, aman ononek ika Jesús matlajyouiki niman mamikiki topampa. Jehová xkinekiya ijkon matlajyoui iKoneuj. Maski Jesús xokichiuj itlaj tlen xkuajli, otlajyoui niman omik niman ijkon okiteititi ika tlen kijtoua Satanás xmelauak, noijki otechmakixti niman okichiuj oksejpa matiuelikan matikpiyakan nemilistli tlen xkeman tlamis (Mar. 8:31; 1 Ped. 2:21-24). Maski Jehová nochipa kipaleuiaya iKoneuj, ijkuak okitlajyouiltijkej niman okimiktijkej, xokipaleui.

Jesús kanaj kinekiya kinpaleuis inomachtijkauan makasikamatikan tleka Jehová okikauili ijkon makimiktikan. * Jesús kuajli kimatstoya ika pampa kimiktiskiaj ipan se kojtli melaktik miyekej xok kineltokaskiaj ika yejua iKoneuj toTajtsin (1 Cor. 1:23, TNM). Tla inomachtijkauan kimatstoyaj tleka omik, yejuamej kuajli kasikamatiskiaj tleka onotemakako topampa (Gál. 3:13, 14). Niman inomachtijkauan xkitaskiaj ken yakaj akin okichiuj tlen xkuajli, yejuamej kitaskiaj ken inTemakixtijkauj.

Maski xkuajli tikmatij tleka Jesús okiteneuj Salmo 22:1, yejua kimatstoya ika, ijkuak mikiskia ipan kojtli melaktik, kichiujtoskia tlen Jehová kineki. Sakin ika okiteneuj tlen okijto David, yejua okijto: “Nochi kuajli yonocumpliroj” (Juan 19:30; Luc. 22:37). Kema, Jehová san iselti okikauj Jesús ijkuak okitlajyouiltijkej niman okimiktijkej. Niman ijkon yejua ouel okichiuj tlen yokinauatijkaj. Ijkuak Jesús omelajkanen, okichiuj ika manochiuakan nochi teotlajtoltin tlen “tlajkuilolnestikaj ipan itlanauatil Moisés niman ipan intlajkuilol on tiotlajtojkej niman ipan on salmos” (Luc. 24:44).