1. ¿Tlenon kuajli tikmatstokej?

 AKIN tiitekipanojkauan Jehová tikmatstokej ika yejua techtlasojtla niman kineki kuajli matinemikan (Rom. 8:35-39). Noijki kuajli tikmatstokej ika melak techpaleuiya tiktlakamatiskej tlen kijtoua Biblia (Is. 48:17, 18). San ika ¿tla tikixnamikij se tlauejli tlen xtikchiayaj?

2. ¿Tlenon uelis tikixnamikiskej, niman kanaj tlenon uelis totlajtoltiskej?

² Nochimej akin tiktekichiuiliaj Jehová uelis tikpiyaskej tlauejli. Kanaj se tochanejkauj uelis kichiuas noso kijtos itlaj tlen techyolkokos. Noso kanaj uelis tiuajkualoskej niman xok uelis tiktekichiuiliskej Jehová ken tiknekiskiaj. Kanaj uelis titlajyouiskej pampa kampa tichantij tlaixpoliuis. Noso uelis techtlaueltokaskej ipampa tlen tikneltokaj. Ijkuak tikixnamikiskej yejuin, kanaj uelis totlajtoltiskej: “¿Tleka nopan nochiujtika yejuin? ¿Onikchiuj itlaj tlen xkuajli? ¿Kijtosneki yejuin ika Jehová xnechteochiujtika?”. Tla tejua kemantika ijkon yotimomachilijka, maka xmajmana. Miyekej itekipanojkauan Jehová akin itech melajkanemij noijki ijkon yonomachilijkaj (Sal. 22:1, 2; Hab. 1:2, 3).

3. ¿Tlenon techmachtia Salmo 34:19?

³ (Xpoua Salmo 34:19). Ipan yejuin tlaxelojli noijtoua ome tlemach tlen ueyi kijtosneki: 1) akin yolmelajkej kixnamikiskej tlen ouijtika niman 2) Jehová kinpaleuis. ¿Kenon? Jehová techpaleuiya matitlanemilikan ken kinamiki ijkuak tikixnamikij tlen ouijtika. Tikmatstokej ika Jehová yotechijli ika tiyolpakiskej  tla tiktekichiuiliaj, san ika, yejon xkijtosneki ika xtikpiyaskej tlauejli ipan yejuin tonaltin (Is. 66:14). ToTajtsin kineki matitlanemilikan itech kenon melak kualtsin tichantiskej ika tlayekapan (2 Cor. 4:16-18). Niman chika xiyejko yejon tonajli, techpaleuiya matitlaxikokan (Lam. 3:22-24).

4. ¿Tlenon tikitaskej ipan yejuin tlamachtijli?

⁴ Ipan yejuin tlamachtijli, titlajtoskej intech sekimej itekipanojkauan Jehová akin Biblia kinteneua niman intech oksekimej akin onenkej ipan yejuin tonaltin. Ken tikitaskej, maski tikixnamikiskej itlaj tlen xtikchiayaj, tla titlaneltokaj itech Jehová, yejua nochipa techpaleuis (Sal. 55:22). Ijkuak intech timomachtis, xmotlajtolti: “¿Tlenon nikchiuaskia nejua tla yejon nikixnamikiskia? ¿Kenon nechpaleuiya yejuin más manitlaneltoka itech Jehová? ¿Tlenon niueli itech yejuin?”.

5. ¿Tlenon okichiuilijkej Jacob? (Xkita tlaixkopinajli tlen nesi ixpan yejuin revista).

⁵ Sekimej itekipanojkauan Jehová akin Biblia kinteneua okixnamijkej tlen xkichiayaj. Matitlanemilikan itech Jacob. Itaj okinauati manonamikti iuan se ichpoch Labán pampa yejua kitekichiuiliaya Jehová. Niman okijli ika Jehová melak kiteochiuaskia (Gén. 28:1-4). Kuakon, Jacob okichiuj tlen kuajli: oyaj de Canaán niman oajsik hasta kampa chantiya Labán, akin kipiaya ome ichpoch, Lea niman Raquel. Jacob okuelitak Raquel, akin más pitentsin katka. Para uelis iuan nonamiktis, Jacob okinek kitekichiuilis Labán chikome xiuitl (Gén. 29:18). San ika, xonochiuj ijkon ken Jacob kichiaya. Labán okikajkayauj niman okimakak okse ichpoch akin más iueyi katka para iuan manonamikti, Lea. Se semana sakin, okikauili manonamikti iuan Raquel, san ika, okijli ika nonekiya itech tekitis okseki chikome xiuitl (Gén. 29:25-27). Niman xsan yejon tlen okichiuili. Labán melak okitekitilti Jacob niman ijkon sa no yejua nopaleuis. ¡20 xiuitl ijkon okichiuili! (Gén. 31:41, 42).

6. ¿Katlejua okseki tlaueltin okimixnamik Jacob?

⁶ Jacob okixnamik okseki tlaueltin. Kinpiaya melak miyekej inchanejkauan, san ika, ikoneuan xnochipa kuajli onouikakej. Hasta okinemakakej José ken tlakeuajli. Niman omemej ikoneuan Jacob, Simeón niman Leví, okichiujkej itlaj tlen melak xkuajli. Niman yejon okichiuj maka kuajli matlajtokan itech ichanejkauan Jacob niman itech Jehová. Noijki, isiuatsin akin melak kitlasojtlaya, Raquel, omik ijkuak okinemiti ika ome ikoneuj. Niman pampa xok kipiayaj tlen kikuaskej, Jacob ononek onchantis Egipto ijkuak melak iueyi katka (Gén. 34:30; 35:16-19; 37:28; 45:9-11, 28).

7. ¿Kenon Jehová okititi Jacob ika kuelitaya tlen kichiujtoya?

⁷ Maski Jacob okixnamik nochi yejon, yejua nochipa otlaneltokak itech Jehová niman itech tlen yokijlika kichiuas. Niman Jehová okititi Jacob ika kuelitaya tlen yejua kichiujtoya. ¿Tleka ijkon tikijtouaj? Pampa maski Labán miyekpa okikajkayauj, Jehová okipaleui Jacob makipiya miyek tlemach. Niman tikmatstokej ika Jacob melak okitlasojkamachili toTajtsin ijkuak miyek xiuitl sakin oksejpa okitak José, akin okinemilijka ika yomijka. Jacob ouel okixiko nochi tlen okixnamik pampa kuajli nouikaya iuan Jehová (Gén. 30:43; 32:9, 10; 46:28-30). Tejuamej noijki uelis tikxikoskej tlen tikixnamikiskej tla kuajli touikaj iuan Jehová.

8. ¿Tlenon kinekiya kichiuas tekiuaj David?

⁸ Tekiuaj David xokichiuj nochi tlen kinekiya ijkuak kitekichiuiliaya Jehová. Yejua  ika nochi iyojlo kinekiya kichijchiuilis ikal toTajtsin. Ijkuak David okijli teotlajtoketl Natán tlen kinekiya kichiuas, yejua okinankili: “Xchiua on tlen moyojlo mitsijlis, pampa Dios mouan nemi” (1 Crón. 17:1, 2). ¿Uelis tikonnemilis kenon David melak oyolpak ijkuak okikak yejuin tlajtoltin? Kanaj nimantsin opeuj kita kenon kichiuaskia yejon tekitl.

9. ¿Tlenon okichiuj David ijkuak xonochiuj tlen kinekiya?

⁹ San ika, iteotlajtokauj Jehová oksejpa nimantsin okitato tekiuaj David para konijlis itlaj tlen melak teajman. Ipan yejon yeuajli, Jehová okijli Natán ika xDavid kichijchiuaskia ikal, yej kichijchiuaskia se ikoneuj (1 Crón. 17:3, 4, 11, 12). ¿Tlenon okichiuj David ijkuak okikak yejuin? Okipatlak tlen yokinemilijka kichiuaskia. Opeuj kisentlalia tomin niman tlen kitekitiltiskia ikoneuj Salomón para kichijchiuas ikal Jehová (1 Crón. 29:1-5).

10. ¿Kenon Jehová okiteochiuj David?

¹⁰ Sakin ika tekiuaj David okimat ika xyejua kichijchiuaskia templo, Jehová iuan onotlajtolkauj: okijli ika se iuejkachanejkauj nochipa tekiuajtiskia (2 Sam. 7:16). Ipan yenkuik tlaltikpaktli, ijkuak Jesús Tekiuajtitos Mil Xiuitl, David melak yolpakis ijkuak kimatis ika se iuejkachanejkauj yejua akin tekiuajtitika. Yejuin techmachtia ika maski xueli tiktekichiuiliaj Jehová ijkon ken tikuelitaskiaj, yejua uelis techteochiuas ijkon ken xtikchiayaj.

11. ¿Kenon okinteochiujkej tokniuan akin onenkej ipan kachtopa siglo maski iTekiuajyo toTajtsin xopeuj tlayekana ijkuak yejuamej kichiayaj? (Hechos 6:7).

¹¹ Tokniuan akin onenkej ipan kachtopa siglo okixnamijkej seki tlen xkichiayaj. Yejuamej sa kinektoyaj ika iTekiuajyo toTajtsin mapeua matlayekana, san ika, xkimatiyaj kemanon nochiuaskia yejon (Hech. 1:6, 7). Kuakon, ¿tlenon okichiujkej? Chikauak otenojnotskej. Ijkuak okitakej ika más miyekan ueliyaj tenojnotsayaj, okasikamatkej ika Jehová kinteochiujtoya (xpoua Hechos 6:7).

12. ¿Tlenon okichiujkej tokniuan ipan kachtopa siglo ijkuak tlaltikpakchanejkej xkipiayaj tlen kikuaskej?

¹² Oajsik se tiempo ijkuak tlaltikpakchanejkej akin onenkej ipan kachtopa siglo xkipiayaj tlen kikuaskej (Hech. 11:28). Niman tokniuan noijki xkipiayaj tlen kikuaskej. Kanaj tatajtin melak najmanayaj pampa xkimatiyaj kenon kinmakaskej inchanejkauan tlen kikuaskej. Niman telpokamej akin kinemilijtoyaj más chikauak tenojnotsaskej kanaj notlajtoltiayaj tla nonekiya nochiaskiaj hasta nochi manoyektlali. Maski san kenon, tokniuan okichiujkej tlen ouelkej. Onokojtilijkej tenojnotsaskej niman ika inyojlo okinmakakej tlen kipiayaj tokniuan akin chantiyaj Judea (Hech. 11:29, 30).

13. ¿Kenon Jehová okinteochiuj tokniuan akin onenkej ipan kachtopa siglo ijkuak xkipiayaj tlen kikuaskej?

¹³ ¿Kenon Jehová okinteochiuj tokniuan ijkuak kixnamiktoyaj tlen ouijtika? Tokniuan akin okinpaleuijkej kuajli okitakej kenon Jehová kintlajpixtoya (Mat. 6:31-33). Niman kanaj más okintlasojtlakej tokniuan akin okichiujkej tlen ouelkej para tepaleuiskej. Noijki, akin otepaleuijkej ika intomintsin noso ika okse itlaj, melak oyolpakej (Hech. 20:35). Jehová okinteochiuj tokniuan pampa maski okixnamijkej tlen ouijtika, nochipa okitekichiuilijkej niman okichiujkej tlen ouelkej.

14. ¿Tlenon inpan opanok Bernabé niman apóstol Pablo, niman tlenon opanok pampa xokikajkaujkej ika tenojnotsaj? (Hechos 14:21, 22).

¹⁴ Tokniuan akin onenkej ipan kachtopa siglo miyekpa okintlaueltokakej niman kemantika hasta ijkuak xkichiayaj. Matikitakan tlenon inpan opanok Bernabé niman apóstol Pablo ijkuak otenojnotsatoj Listra. Kachtopa, tlaltikpakchanejkej melak kuajli okinselijkej niman kuajli okinkakkej. San ika, sakin  sekimej tlaltikpakchanejkej “okinchiualtijkej on tlakamej de Listra para ma kitemojmotlakan Pablo” niman okinemilijkej ika okimiktijkej (Hech. 14:19). San ika, Bernabé niman Pablo oksekan oyajkej niman xokikajkaujkej ika tenojnotsaj. ¿Niman tlenon opanok pampa ijkon okichiujkej? Miyekej okinnojnotskej niman “miyekej otlaneltokakej”. Noijki, tlen okijtokej niman tlen okichiujkej melak okinyolchikauj tokniuan (xpoua Hechos 14:21, 22). Maski Bernabé niman Pablo okintlaueltokakej, yejuamej xokikajkaujkej ika tenojnotsaj. Niman pampa ijkon okichiujkej, melak miyekej okinpaleuijkej. Tla tejuamej titlaxikouaj ijkon ken yejuamej okichiujkej niman xtikajkauaj ika titenojnotsaj, Jehová melak techteochiuas.

15. ¿Tlenon tiuelij itech tokniuj Alexander Macmillan?

¹⁵ Ijkuak xiajsiya xiuitl 1914, itekipanojkauan Jehová kinemiliayaj ika sa achijtsin poliuiya para yaskej iluikak. Tokniuj Alexander Macmillan noijki ijkon tlanemiliaya. Ipan se tlamachtijli tlen yejua okipanolti ipan septiembre de 1914, okijto: “Kanaj yejuin sa ika tlami tlamachtijli tlen nikpanoltis”. San ika, xijkon opanok. Sakin, yejua okijkuilo: “Sekimej nimantsin otiknemilijtiuetskej ika itiaskiaj iluikak”. Niman noijki okijto: “San ika, san nonekiya tiknemiliskej kenon más kuajli tiktekichiuiliskej toTeko”. Niman ijkon okichiuj. Chikauak otenojnots, okinyolchikauj tokniuan akin tsauktoyaj pampa xokinejkej yaskej guerra niman nochipa oyaj tlanechikoltin hasta ijkuak melak iueuentsin katka. Yejua chikauak okitekichiuili Jehová ipan tlaltikpaktli chika kichiaya yas iluikak. ¿Kenon okipaleui pampa ijkon okichiuj? Ipan 1966, achto mikis, yejua okijkuilo yejuin: “Aman, notlaneltok melak chikauak ijkon ken yeuejkaui”. Tlen okichiuj tokniuj tinochimej melak techyolchikaua, san ika, más techyolchikaua akin youejkauj tikchiatokej mayejko itonal Jehová (Heb. 13:7).

16. ¿Tlenon okixnamik tokniuj Jennings niman isiuatsin? (Santiago 4:14).

¹⁶ Miyekej itekipanojkauan Jehová nimantsin uajkualotiuetsij. Matitlajtokan itech tokniuj Herbert Jennings. Ijkuak otlajto itech innemilis, okijto ika yejua iuan isiuatsin melak yolpakiyaj ijkuak tlapaleuijtoyaj ken misioneros ne Ghana. b Sakin okijlikej ika kipiaya se kokolistli tlen kichiuaya maka kuajli matlanemili niman maka kuajli manomachili. Tokniuj Jennings okijto ika xkichiaya makijlikan ika kualo niman okiteneuj Santiago 4:14 (xpoua). Yejua okijkuilo: “Otikasikamatkej ika xok ueliskia ompa titlapaleuiskej, niman opeuj tikimijliaj toamigos niman tokniuan de Ghana ika tokuepaskiaj Canadá [para ompa ninopajtiskia]”. Jehová okipaleui tokniuj Jennings niman isiuatsin para maka makikajkauakan ika kitekichiuiliaj maski ouijtika panotoyaj.

17. ¿Kenon yokinpaleui oksekimej tlen ipan opanok tokniuj Jennings?

¹⁷ Tlen okijto tokniuj Jennings ijkuak otlajto itech inemilis, melak okinpaleui oksekimej. Se tokniuj siuatl okijkuilo: “Yejuin tlamachtijli melak oajsik ipan noyojlo [...]. Ijkuak onikitak ika tokniuj Jennings ononek kikauas itekiyo ken misionero para nopajtis, onikasikamat ika xnonekiya ninajmanas pampa nejua noijki onikauj se tekitl tlen nikpiaya ipan ikalpan Jehová”. Okse tokniuj okijkuilo: “Nejua yoniuejkaujka ipantsin majtlaktli xiuitl ika nitlapaleuijtoya ken tlayekanketl ipan tlanechikojli, san ika, ononek nijkauas  yejon tekitl pampa onechajsik se kokolistli tlen kichiuaya maka kuajli manitlanemili. Melak xkuajli ken ninomachiliaya niman hasta xniknekiya nikinpouas tlamachtiltin kampa tokniuan tlajtouaj itech innemilis [...]. San ika, melak onechyolchikauj ijkuak onikamapouj kenon tokniuj Jennings otlaxiko”. Yejuin techilnamiktia ika tla topan panoua itlaj tlen xtikchiayaj niman titlaxikouaj, uelis tikinyolchikauaskej oksekimej. Kuakon, maski xtinemiskej ken tiknekiskiaj, uelis tikinpaleuiskej oksekimej tla titlaneltokaj niman tla titlaxikouaj (1 Ped. 5:9).

18. ¿Tlenon tiuelij itech tlen ipan onochiuj se tokniuj siuakaualtsintli de Nigeria? (Xkimita tlaixkopinaltin tlen kiteititiaj tlen ipan onochiuj tokniuj).

¹⁸ Tlen yopanok, ken pandemia COVID-19, yokichiuj ika itekipanojkauan Jehová makixnamikikan tlen ouijtika. Matitlajtokan itech se tokniuj siuakaualtsintli akin chanti Nigeria, yejua xmás kipiaya tlen kikuas niman xmás kipiaya tomintsin. Se tonajli ika kualkan, san kipiaya se taza de arroz niman iichpokatsin okitlajtolti tlenon kikuaskiaj sakin. Tokniuj okijli ika xok kipiayaj tlen kikuaskej nion tomintsin, san ika, nonekiya kichiuaskej ijkon ken siuakaualtsintli de Sarepta. Kichijchiuaskiaj arroz tlen kipiayaj niman kineltokaskiaj ika sakin Jehová kinmakaskia tlen kikuaskiaj (1 Rey. 17:8-16). Ijkuak xikinemiliayaj tlenon kikuaskej sakin, tokniuan okinkauilitoj tlen kikuaskej. ¡Tlen tokniuan okinkauilitoj kimajxiliskia para tlakuaskiaj ipantsin ome semanas! Tokniuj okasikamat ika Jehová okikak tlen okijli iichpokatsin. Yejuin techmachtia ika uelis más kuajli touikaskej iuan Jehová tla itech titlaneltokaj ijkuak tikixnamikiskej tlen ouijtika (1 Ped. 5:6, 7).

19. ¿Tlenon okixnamik tokniuj Alexéi Yershov?

¹⁹ Ikipiya seki xiuitl, miyekej tokniuan yopeujkej kintlaueltokaj niman yejuamej xkichiayaj ijkon inpan mapano. Matikitakan  tlen ipan opanok tokniuj Alexéi Yershov, akin chanti Rusia. Ijkuak yejua onoapolakti, ipan 1994, tekiuajkej xikimijliayaj iteixpantijkauan Jehová maka matenojnotsakan nion maka manosentlalikan. San ika, sakin yejon onopatlak. Ipan 2020, sekimej policías okalajkej ichan tokniuj Yershov, ompa okitlatejtemouilitoj niman okikuilijkej seki tlemach tlen itlatki katka. Seki metstin sakin, tekiuajkej okinotskej niman okijlikej ika xokintlakamat seki tlanauatiltin. Para tekiuajkej ueliskia kiteititiskej ika melauak tlen kijtotoyaj, okinteititijkej seki videos kampa uajnesiya tokniuj. Grabaciones itech yejon videos okinkixti yakaj akin ipantsin se xiuitl onosentlali imiuan tokniuan. Yejua okimititijka tokniuan ika kinekiya nomachtis Biblia, maski xmelauak katka. ¡Melak xkuajli ken okikajkayaujkej tokniuj Yershov!

20. ¿Tlenon yokichiuj tokniuj Yershov niman ijkon más kuajli nouikas iuan Jehová?

²⁰ Maski tokniuj Yershov melak xkuajli tlen ipan onochiuj, okitak ika noijki itlaj kualtsin opanok. Aman yejua más kuajli nouika iuan Jehová. Yejua kijtoua: “Nosiuauj niman nejua miyekpa tiknotsaj Jehová. Nikmatstok ika xueliskia nikxikos tlen xkuajli nopan opanok tla Jehová xnechpaleuiskia”. Yejua noijki kijtoua: “Ijkuak ninomachtia Biblia, nechpaleuiya maka melak maninajmana. Nitlanemilia itech tlen inpan onochiuj sekimej itekipanojkauan Jehová akin yeuejkaui onenkej. Biblia kinteneua miyekej itekipanojkauan toTajtsin akin okiteititijkej ika melak kuajli tla titlamachiaj niman titlaneltokaj itech Jehová”.

21. ¿Tlenon yotiuelkej ipan yejuin tlamachtijli?

²¹ ¿Tlenon yotiuelkej ipan yejuin tlamachtijli? Ika maski kemantika uelis itlaj san totoka tikixnamikiskej, tla titlaneltokaj itech Jehová, yejua nochipa techpaleuis. Ken kijtoua tlaxelojli kampa onokixti yejuin tlamachtijli, “sen yolmelajki tlakatl uelis tlajyouis ikan miyek pajsolouilistli pero toTEKO de nochi kimanauiya” (Sal. 34:19). Ika yejon, maka san matitlanemilijtokan itech tlen xkuajli tikixnamikij, yej matikitakan kenon Jehová techpaleuiya matitlaxikokan. Tla ijkon tikchiuaj, uelis tikijtoskej ijkon ken apóstol Pablo okijto: “Nochi ueli nikxikoua pampa yejua nechkojtilia” (Filip. 4:13, TNM).