TLAMACHTIJLI 19
Kenon uelis más tikneltokaskej ika onias se xochitlalpan
“Ijkuak [Jehová] kijtoua itlaj kichiuas, kichiua” (NÚM. 23:19).
TLAKUIKAJLI 142 Maka matikmakauakan totlamachialis
TLEN TIKITASKEJ a
1, 2. ¿Tlenon noneki tikchiuaskej chika tikchiaj ika Jehová makikuepa tlaltikpaktli se xochitlalpan?
MELAK tiktlasojkamachiliaj Jehová pampa yokijto kikuepas tlaltikpaktli se xochitlalpan (2 Ped. 3:13). Maski xtikmatij kemanon nochiuas yejon, nochi tlen panotika ipan tlaltikpaktli techititia ika sa achijtsin poliui para nochiuas tlen toTajtsin yokijto (Mat. 24:32-34, 36; Hech. 1:7).
2 Maski tla kemach noso youejkauj ika tiktekichiuiliaj Jehová, tinochimej noneki más tikchikauaskej totlaneltok itech tlen Jehová yokijto kichiuas. ¿Tleka? Pampa maski yakaj kipiya chikauak itlaneltok, tla xnotlajpiya, uelis ometlamatis. Apóstol Pablo okijto ika ijkuak xtikpiyaj chikauak totlaneltok, tikpiyaj “on tlajtlakojli yejuan techikximamalina [noso techikximamatiloua]” (Heb. 12:1). Kuakon, tla tiknekij machikaujto totlaneltok, noneki titlanemiliskej itech tlen kiteititia ika Jehová kema kikuepas tlaltikpaktli se xochitlalpan (Heb. 11:1).
3. ¿Tlenon tikitaskej ipan yejuin tlamachtijli?
3 Ipan yejuin tlamachtijli, tikitaskej yeyi tlemach tlen techpaleuis más matikneltokakan ika Jehová kikuepas tlaltikpaktli se xochitlalpan: 1) matitlanemilikan itech tlen Jesús okichiuj topampa, 2) matitlanemilikan itech ikojtilis Jehová niman 3) matikchiuakan tlen techpaleuis matiknisiuikan. Sakin tikitaskej ika tlen Jehová okijli Habacuc noijki texchikauilia totlaneltok. San ika, kachtopa matikitakan tleka melak noneki tikneltokaskej ika Jehová kikuepas tlaltikpaktli se xochitlalpan.
TLEKA NONEKI CHIKAUJTOS TOTLANELTOK
4. ¿Tleka noneki chikaujtos totlaneltok?
4 Mojmostla noneki tiktlapejpeniskej tlen tikchiuaskej, ika yejon, noneki chikaujtos totlaneltok. Noneki tiktlapejpeniskej iuan akinon touikaskej, kenon toyolpaktiskej, tlenon tomachtiskej ipan escuela, iuan akinon tonamiktiskej, tla tikinpiyaskej tokoneuan niman kanon titekitiskej. Melak kuajli tla totlajtoltiaj: “¿Tlenon kiteititia tlen niktlapejpenia? ¿Nikteititia ika nikneltoka ika tlen onka ipan tlaltikpaktli san panos niman ika sa achijtsin poliui ijkuak toTajtsin kikuepas tlaltikpaktli se xochitlalpan? ¿Noso tlen niktlapejpenia kiteititia ika nikchiua ijkon ken akin kinemiliaj ika xuelis nochipa tinemiskej?” (Mat. 6:19, 20; Luc. 12:16-21). Tla más tikneltokaj ika sa achijtsin poliui ijkuak toTajtsin kikuepas tlaltikpaktli se xochitlalpan, tiktlapejpeniskej tlen kuajli.
5, 6. ¿Tleka noneki tikpiyaskej chikauak totlaneltok ijkuak tikixnamikiskej tlen ouijtika? Xkijto se neskayotl.
5 Noijki noneki chikaujtos totlaneltok pampa kanaj uelis techtlaueltokaskej, uelis tikualoskej niman xok tipajtiskej noso uelis tikixnamikiskej okse itlaj tlen kichiuas melak matajmanakan. Kanaj ijkuak peuas tikixnamikiskej itlaj, uelis tiknemiliskej ika kema titlaxikoskej. San ika, miyekpa panouani ika uejkaui tlen tikixnamikij. Ijkuak ijkon panos, noneki chikaujtos totlaneltok niman ijkon titlaxikoskej niman nochipa tiktekichiuiliskej Jehová ika pakilistli (Rom. 12:12; 1 Ped. 1:6, 7).
6 Ijkuak itlaj tikixnamiktokej, uelis tiknemiliskej ika Jehová xkeman kikuepas tlaltikpaktli se xochitlalpan. ¿Yejon kijtosneki ika xchikaujtok totlaneltok? Ka. Matikonteneuakan yejuin. Ijkuak melak youejkauj kiyaujtika, kanaj uelis tiknemiliskej ika xok kisas tonaltsintli. San ika, tonaltsintli nochipa kisa. Noijki ijkon, ijkuak melak titajmanaj, uelis tikmachiliskej ika Jehová xkeman kikuepas tlaltikpaktli se xochitlalpan. San ika, tla chikaujtok totlaneltok, kuajli tikmatstoskej ika Jehová kichiuas tlen yokijto (Sal. 94:3, 14, 15; Heb. 6:17-19). Tla chikauak tikpiyaj totlaneltok itech tlen Jehová kichiuas ika tlayekapan, nochipa chikauak tiktekichiuiliskej Jehová.
7. ¿Tlenon xnoneki tikchiuaskej?
7 Noijki noneki chikaujtos totlaneltok para titenojnotsaskej. Ijkuak tikimijliaj tlaltikpakchanejkej ika toTajtsin kikuepas tlaltikpaktli se xochitlalpan, miyekej kinemiliaj ika yejon melak kualtsin kakisti, san ika, xkinemiliaj tla melauak nochiuas (Mat. 24:14; Ezeq. 33:32). Tejuamej noneki totlajpiyaskej niman ijkon xtiometlamatiskej itech tlen toTajtsin kichiuas, ijkon ken kichiuaj tlaltikpakchanejkej. Tla xtiknekij tiometlamatiskej, noneki nochipa tikchikauaskej totlaneltok. Matikitakan yeyi tlemach tlen uelis tikchiuaskej.
MATITLANEMILIKAN ITECH TLEN JESÚS OKICHIUJ TOPAMPA
8, 9. ¿Kenon kichikaua totlaneltok tla titlanemiliaj itech nochi tlen Jehová niman Jesucristo okichiujkej topampa?
8 Uelis tikchikauaskej totlaneltok tla titlanemiliaj itech tlen Jesús okichiuj topampa. Jesucristo omikiko topampa, yejon techititia ika nochi tlen toTajtsin yokijto, nochiuas. Noneki tikxeloskej tiempo niman ijkon titlanemiliskej itech nochi tlen opanok ijkuak Jesús omik topampa niman itech tleka Jehová okitekauili makimiktikan. Tla ijkon tikchiuaj, más tikneltokaskej ika Jehová kikuepas tlaltikpaktli se xochitlalpan kampa uelis nochipa tichantiskej. ¿Tleka ijkon tikijtouaj?
9 Matitlanemilikan itech nochi tlen Jehová niman Jesucristo okichiujkej topampa. Jehová okinek kuajtitlanis isenteKonetsin, akin melak kuajli iuan nouikaya, para manemiki nikan ipan tlaltikpaktli ken se tlakatl akin xtlajtlakole. Ijkuak Jesús onen ipan tlaltikpaktli, melak otlajyoui, okixnamik miyek tlen ouijtika niman melak xkuajli ken omik. Melak ueyi tlen Jehová okitlaxtlauj. Jehová melak tetlasojtla, ika yejon, xkitekauiliskia ika iKoneuj melak matlajyoui tla xuejkauiskia kualtsin tinemiskiaj (Juan 3:16; 1 Ped. 1:18, 19). Pampa Jehová melak ueyi tlen okitlaxtlauj, kichiuas ika nochipa matinemikan ipan se xochitlalpan.
MATITLANEMILIKAN ITECH IKOJTILIS JEHOVÁ
10. Ijkon ken kijtoua Efesios 3:20, ¿tlenon ueli kichiua Jehová?
10 Noijki uelis tikchikauaskej totlaneltok tla titlanemiliaj itech ikojtilis Jehová. Yejua kipiya kojtilistli para kichiuas nochi tlen yokijto. Ipan yejuin tonaltin, miyekej tlaltikpakchanejkej kinemiliaj ika xkeman uelis nochipa tinemiskej ipan se kualtsin xochitlalpan. San ika, miyekpa tlen Jehová kijtoua kichiuas, tlaltikpakchanejkej xueli kichiuaj. Ijkon tikijtouaj pampa Jehová nochi ueli kichiua (Job 42:2; Mar. 10:27). Kuakon, xtechmojkatlachialtia tlen Jehová kijtoua kichiuas (xpoua Efesios 3:20).
11. Xteneua itlaj tlen Jehová okijtojka tlen nesiya ika xueliskia nochiuas (xkita recuadro “ Jehová okichiuj tlen okijto maski nesiya ika xueliskia nochiuas”).
11 Matitlanemilikan itech tlen yeuejkaui Jehová okimijli itekipanojkauan tlen ueliskia tiknemiliskiaj ika xkeman ueliskia nochiuas. Jehová okimijli Abrahán niman Sara ika kipiyaskiaj se inkoneuj maski iuejueyimej katkaj (Gén. 17:15-17). Noijki kuajli okijli Abrahán ika iuejkachanejkauan kinoyaxkatiskiaj Canaán. San ika, miyek xiuitl iuejkachanejkauan Abrahán, noso israelitas, onenkej ken tlakeualtin ne Egipto. Ika yejon, kanaj okinemilijkej ika xkeman nochiuaskia tlen Jehová okijlika Abrahán. San ika, kema onochiuj. Miyek xiuitl sakin, Jehová okijli Elisabet, akin melak iueyi katka, ika kipiyaskia se ikoneuj. Jehová noijki okijli María, se ichpochtli akin xinonamiktiaya, ika kinemitiskia iKoneuj. Ijkon nochiuaskia se teotlajtojli tlen Jehová okijtojka miyek xiuitl ika tlakuitlapan ipan xochitlalpan Edén (Gén. 3:15).
12. ¿Tlenon techijlia Josué 23:14 niman Isaías 55:10, 11 itech ikojtilis Jehová?
12 Ijkuak titlanemiliaj itech kenon onochiuj nochi tlen Jehová okijto, tikitaj ika yejua melak kojtik. Yejon kichiua más matikneltokakan ika kema kikuepas tlaltikpaktli se xochitlalpan (xpoua Josué 23:14; Isaías 55:10, 11). Tla chikaujtok totlaneltok, uelis tikinpaleuiskej oksekimej makasikamatikan ika yemelak nochiuas tlen toTajtsin okijto. Ijkuak Jehová okijto ika onias se yenkuik iluikak niman se yenkuik tlaltikpaktli, okijto yejuin: “In tlen nimitsijlijtikaj yejua tlen melauak niman kuajli para nochimej kineltokaskej” (Apoc. 21:1, 5).
MATIKCHIUAKAN TLEN TECHPALEUIS MATIKNISIUIKAN JEHOVÁ
IJKUAK TOSENTLALIAJ
¿Kenon yejuin techpaleuiya machikaui totlaneltok? (Xkimita párrafo 13).
13. ¿Kenon tlanechikoltin kichikauaj totlaneltok?
13 Ika yeyi, noijki uelis tikchikauaskej totlaneltok tla tikchiuaj tlen techpaleuis matiknisiuikan Jehová. Matitlanemilikan itech kenon melak techpaleuiya ijkuak tosentlaliaj. Anna, b akin youejkauj chikauak kitekichiuilia Jehová, kijtoua: “Tlanechikoltin nechpaleuiyaj machikaujto notlaneltok. Maski tla tokniuan akin kiyekanaj tlamachtijli xmás kuajli temachtiaj noso xkijtouaj itlaj tlen yenkuik, nochipa nijkaki itlaj tlen kichiua más kuajli manikasikamati Biblia niman tlen más kichikaua notlaneltok”. Ipan tlanechikoltin noijki tijkakij kenon tlanankiliaj tokniuan niman yejon kichikaua totlaneltok (Rom. 1:11, 12; 10:17).
IJKUAK TITENOJNOTSAJ
¿Kenon yejuin techpaleuiya machikaui totlaneltok? (Xkimita párrafo 14).
14. ¿Kenon chikaui totlaneltok ijkuak titenojnotsaj?
14 Ijkuak titenojnotsaj, noijki chikaui totlaneltok (Heb. 10:23). Barbara, akin ikipiya ipantsin 70 xiuitl ken iteixpantijkauj Jehová, kijtoua: “Nochipa melak chikaui notlaneltok ijkuak nitenojnotsa. Nikita ika ijkuak más nitlajtoua itech Jehová niman itech tlen kualtsin kichiuas, más chikaui notlaneltok”.
IJKUAK SAN TOSELTI TOMACHTIAJ
¿Kenon yejuin techpaleuiya machikaui totlaneltok? (Xkimita párrafo 15).
15. ¿Kenon tla toselti tomachtiaj más chikauis totlaneltok? (Noijki xkimita tlaixkopinaltin).
15 Noijki, chikaui totlaneltok ijkuak san toselti tomachtiaj. Susan kijtoua ika melak kipaleuiya pampa ikipiya kemanon nomachtis. Yejua kijtoua: “Domingos ninomachtia Amatl Tekakistilijketl tlen noitas okse semana. Lunes niman martes ninomachtia tlen noitas ipan tlanechikojli tlen tikpiyaj itlajkotian semana. Niman ipan okseki tonaltin okse itlaj ninomachtia”. Tlen Susan kichiua kipaleuiya más machikaui itlaneltok. Niman tokniuj Irene, akin ikipiya miyek xiuitl ika tlapaleuiya ipan oficina kampa noyekanaj nochi sucursales, kijtoua ika melak chikaui itlaneltok ijkuak nomachtia itech teotlajtoltin tlen uajnesij ipan Biblia. Yejua kijtoua: “Melak nechmojkatlachialtia nikitas kenon melak kuajli nochiua nochi tlen Jehová kijtoua”. c
“MELAUAK YEJKOS”
16. ¿Tleka tikmatstokej ika tlen Jehová okijli Habacuc noijki techyolchikaua? (Hebreos 10:36, 37).
16 Sekimej itekipanojkauan Jehová melak youejkaujkej kichiatokej mayejko tonajli ijkuak Jehová tlapopolos, niman sekimej kinemiliaj ika melak youejkauj. Jehová kasikamati tlen kimachiliaj itekipanojkauan. Ika yejon, teotlajtoketl Habacuc okijto: “Tlatlachalistli ok poliui ijkuak panos, niman isiujkan nejnentika hasta ijkuak nochiuas, niman xtechkajkayauas. Maski tla uejkauiskia, ¡xtlatlachixtia! Pampa melauak yejkos. ¡Xuejkauis ika yejkos!” (Hab. 2:3, TNM). Yejuin tlajtoltin xsan okiyolchikauj Habacuc, tejuamej noijki techyolchikaua ipan yejuin tonaltin. Jehová okichiuj ika apóstol Pablo makimijkuilouili yejuin tlajtoltin akin kichiatokej yenkuik tlaltikpaktli (xpoua Hebreos 10:36, 37). Maski tikmachiliaj ika Jehová uejkaui, matikilnamikikan ika tlen kijtoua melauak nochiuas. “¡Xuejkauis ika yejkos!”.
17. ¿Kenon se tokniuj okichiuj tlen Jehová okijli Habacuc?
17 Miyekej tokniuan youejkaujkej tlatlachixtokej ijkon ken Jehová okijli Habacuc. Matikitakan tlen ipan onochiuj tokniuj Louise, akin opeuj kitekichiuilia Jehová ipan 1939. Yejua kijtoua: “Oniknemili ika Armagedón yejkoskia achto ika nejua nikajxiltiskia 18 xiuitl. San ika, xijkon opanok. Ipan yejuin xiujtin melak onechpaleui nikamapouas intech akin melak otlamachixkej para kitaskej tlen Jehová okijto nochiuas, ken Noé, Abrahán, José niman oksekimej itekipanojkauan Jehová. Melak yonechpaleui nochipa manikilnamikto ika sa achijtsin poliui para toTajtsin tlayektlalis niman yejon noijki yokinpaleui oksekimej”. Tikmatstokej ika miyekej akin yokitekichiuilijkej Jehová miyek xiujtin noijki ijkon tlanemiliaj.
18. ¿Kenon tlen Jehová okichijchiuj techpaleuiya matikneltokakan ika kema kichiuas tlen yokijto?
18 Ipan yejuin tonaltin xtikitaj tla ionka se xochitlalpan. San ika, matitlanemilikan itech tlen aman tikitaj. Sitlalimej niman kojtin tlen aman tikimitaj, yeuejkaui xonkatkaj. Yolkamej niman tlaltikpakchanejkej akin aman nemij, yeuejkaui xnemiyaj. San ika, toTajtsin okinchijchiuj niman aman xakaj kijtoskia ika nochi yejuin xmelak onkatij noso xmelak nemij, pampa aman tikimitaj (Gén. 1:1, 26, 27). Aman tej, toTajtsin yokijto ika kikuepas tlaltikpaktli se xochitlalpan, niman kichiuas ijkon ken yokijto. Nochipa tinemiskej niman xkeman tikualoskej. Ijkuak ijkon panos, xakaj uelis kijtos ika xmelak onka xochitlalpan, pampa tinochimej ompa tichantitoskej (Is. 65:17; Apoc. 21:3, 4).
19. ¿Kenon uelis tikchikauaskej totlaneltok?
19 Chika xiyejko yenkuik tlaltikpaktli, matokojtilikan matikchikauakan totlaneltok. Matitlanemilikan itech tlen Jesús okichiuj topampa, itech ikojtilis Jehová niman matikchiuakan tlen techpaleuis más matiknisiuikan Jehová. Tla tikchiuaj nochi yejuin, techpouaskej imiuan akin “itechkopa intlaneltok niman inijyouilis [kiseliaj] on herencia” (Heb. 6:11, 12; Rom. 5:5).
TLAKUIKAJLI 139 Xmoita ijkuak nochi yenkuik yes
a Ipan yejuin tonaltin, miyekej xkineltokaj ika Jehová kikuepas tlaltikpaktli se xochitlalpan. Kijtouaj ika melak kualtsin yeskia tla ijkon panoskia, san ika, xkineltokaj tla yemelak nochiuas. Tejuamej kuajli tikmatstokej ika nochi tlen Jehová yokijto kema nochiuas. Maski ijkon, ok noneki tikchikauaskej totlaneltok. Ipan yejuin tlamachtijli tikitaskej kenon uelis tikchiuaskej yejon.
b Seki tokayomej yonopatlakej.
c Miyek tlamachtiltin tlen tlajtouaj itech teotlajtoltin tlen uajnesij ipan Biblia uelis tikinnextiskej ipan Índice de las publicaciones Watch Tower kampa kijtoua “Profecía”. Ompa uelis tikitas tlamachtijli “Lo que Jehová predice se cumple sin falta”, itech La Atalaya del 1 de enero de 2008. Noijki uelis tikinnextis seki tlamachtiltin ika náhuatl de Guerrero ipan amatlajkuilojli Tlen kinpaleuiya ika nomachtiaj iTeixpantijkauan Jehová, kampa kijtoua “Teotlajtojli”.
