1. ¿Tleka titlanankiliaj ipan tlanechikoltin?

 ¿TLEKA tiauej tlanechikoltin? Pampa tiknekij tikueyichiuaskej Jehová (Sal. 26:12; 111:1). San ika, noijki tiauej pampa tiknekij toyolchikauaskej imiuan tokniuan ipan yejuin tonaltin tlen melak ouijtika (1 Tes. 5:11). Aman tej, ijkuak titlanankiliaj, tikchiuaj yejuin ome tlemach: tikueyichiuaj Jehová niman tikinyolchikauaj tokniuan.

2. ¿Kemanon uelis titlanankiliskej ipan tlanechikoltin?

² Nochi semanas tikinpiyaj tlanechikoltin kampa uelis titlanankiliskej. Ipan tlanechikoltin tlen tikinpiyaj itlamiyan semana, uelis titlanankiliskej ijkuak tomachtiskej Amatl Tekakistilijketl. Niman ipan tlanechikoltin tlen tikinpiyaj itlajkotian semana, uelis titlanankiliskej ipan sección “Tlen tepaleui niman iyantika”, ipan Tlamachtijli itech Biblia iuan tlanechikojli niman ipan okseki tlamachtiltin kampa noijtos ika uelis titlanankiliskej.

3. a) ¿Tleka kanaj ouijtika tikitaj titlanankiliskej? b) ¿Kenon techpaleuiya Hebreos 10:24, 25?

³ Tinochimej tiknekij titlanankiliskej para tikueyichiuaskej Jehová niman tikinyolchikauaskej tokniuan. San ika, kanaj kemantika ouijtika tikitaj tikchiuaskej yejuin pampa melak tomojtiaj titlanankiliskej, noso pampa xnochipa techmakaj kampa tikuelitaskiaj titlanankiliskej maski miyekpa tomateketsaj. Ipan carta tlen apóstol Pablo okimijkuilouili tokniuan hebreos, tiknextiaj itlaj tlen uelis techpaleuis matitlanankilikan. Ijkuak Pablo kijtotoya ika melak noneki tiaskej  tlanechikoltin, okijto ika ompa melak noneki “ma titoyoleuakan iuan oksekimej” (xpoua Hebreos 10:24, 25). Tla nochipa tikilnamikij ika uelis titeyolchikauaskej maski achijtsin tikijtoskej ijkuak titlanankiliskej, xok más tomojtiskej ijkuak tomateketsaskej. Niman tla xueli miyekpa titlanankiliaj ken tikuelitaskiaj, tiyolpakiskej ijkuak tikitaskej ika oksekimej kema uelij tlanankiliaj (1 Ped. 3:8).

4. ¿Tlenon tikitaskej ipan yejuin tlamachtijli?

⁴ Ipan yejuin tlamachtijli, kachtopa tikitaskej kenon uelis toyolchikauaskej ipan se tlanechikojli kampa xmiyekej tokniuan niman uelis miyekpa titlanankiliskej. Sakin, noijki tikitaskej kenon uelis toyolchikauaskej ipan se tlanechikojli kampa nemij miyekej tokniuan akin kinekij tlanankiliskej. Niman sa ika tlami, tikitaskej kenon noneki titlanankiliskej niman ijkon tikinyolchikauaskej oksekimej.

5. ¿Tlenon uelis tikchiuaskej niman ijkon toyolchikauaskej tla xtimiyekej ipan totlanechikol?

⁵ Ipan se grupo noso ipan se tlanechikojli pitentsin xnemij miyekej akin tlanankiliaj. Kemantika, tokniuj akin kiyekana tlanechikojli noneki tlamachias niman ijkon yakaj manomateketsa. Yejuin uelis kichiuas más mauejkaui tlanechikojli. Niman yejon xteyolchikaua. ¿Tlenon uelis tikchiuaskej tla ijkon panoua ipan totlanechikol? Miyekpa matomateketsakan para titlanankiliskej. Tla ijkon tikchiuaj, oksekimej noijki kinekiskej tlanankiliskej.

6, 7. ¿Tlenon uelis tikchiuas para maka sanoyej timomojtis ijkuak titlanankilis?

⁶ Miyekej tokniuan melak nomojtiaj tlanankiliskej. Tla tejua timomojtia, ¿tlenon uelis tikchiuas? ¿Uelis tiktejtemos itlaj tlen mamitspaleui maka sanoyej xmomojti niman ijkon uelis titlanankilis para titeyolchikauas?

⁷ Uelis oksejpa tomachtiskej tlamachtiltin tlen yokiskaj ipan revistas Amatl Tekakistilijketl. b Ipan se tlamachtijli kijtoua ika noneki kuajli matomachtikan tlen nopanoltis ipan tlanechikojli (Prov. 21:5). Tla kuajli yotimomachti tlen nopanoltis ipan tlanechikojli, xouijtika tikitas timomateketsas. ¿Tlenon okse uelis techpaleuis? Maka miyek matikijtokan ijkuak titlanankiliskej (Prov. 15:23; 17:27). Tla xmiyek tikijtoua, xmás timomojtis. Noijki, tokniuan más mitsasikamatiskej tla ijkuak titlanankilia xmiyek tikijtoua. Tla xmás tiuejkaui ijkuak titlanankilia niman tlen tikijtoua kisa ipan moyojlo, oksekimej kitaskej ika kuajli otimomachti niman ika tikasikamati tlen noitstika.

8. ¿Tlenon kimachilia Jehová ijkuak kita ika tikchiuaj nochi tlen tiuelij?

⁸ ¿Tlenon uelis tikchiuas tla maski yotikchiuj tlen kemach yotikonteneujkej ok timomojtia niman san sejpa noso okpa ueli titlanankilia? Xkilnamiki ika Jehová melak kipatiojkaita ika tejua timokojtilia titlanankilis (Luc. 21:1-4). Noijki, Jehová kimati tlenon kema ueli tikchiua niman tlenon ka (Filip. 4:5). Kuakon, xnemili tlenon kema uelis tikchiuas, xyejyeko ijkon xchiua niman xtlajtlanili Jehová mamitspaleui. Kachtopa, uelis tipeuas titlanankilis ika achijtsin tlajtoltin.

9. ¿Tlenon ueliskia panos ipan se tlanechikojli kampa miyekej nosentlaliaj?

⁹ Tla ipan motlanechikol miyekej nosentlaliaj, kanaj xuelis miyekpa titlanankilis  pampa miyekej kinekij tlanankiliskej niman kemantika nion sejpa xuelis titlanankilis. Matitlanemilikan itech Daniela, se tokniuj akin melak kuelita tlanankilis ipan tlanechikojli. c Yejua melak kipatiojkaita tlanankilis pampa ijkon kiueyichiua Jehová, kinyolchikaua oksekimej niman más nokaua ipan itsontekon tlen Biblia temachtia. San ika, ijkuak opeuj tlapaleuiya ipan se tlanechikojli más ueyi, xok miyekpa tlanankiliaya niman kemantika nion sejpa. Yejua kijtoua: “Xkuajli ninomachiliaya, hasta niknemiliaya ika tlayekankej xok kinekiyaj manitlanankili. Ijkuak miyekpa xmitskauiliskej xtlanankili peuas tiknemilis ika san tejua xmitskauiliaj xtlanankili”.

10. ¿Tlenon ueliskia tikchiuas niman ijkon uelis titlanankilis?

¹⁰ ¿Kemantika yotimomachilijka ijkon ken Daniela? Tla kema, kanaj otiknemili xok timomateketsas niman san titlakaktos. San ika, maka xmosiaujkaua. ¿Tlenon ueliskia tikchiuas niman ijkon titlanankilis? Uelis kuajli timomachtis miyekan kampa uelis titlanankilis. Ijkon, tla xtitlanankilia ipan párrafos kampa peua tlamachtijli, uelis titlanankilis sakin ipan okseki párrafos. Ijkuak timomachtis itech tlen noitas ipan Amatl Tekakistilijketl, xnemili kenon nochi párrafos notlajtolnamikij ika tlen tlajtoua tlamachtijli. Ijkon tejua nochipa tikmatstos tlen uelis tikijtos. Noijki, uelis más timomachtis ipan párrafos kampa ouijtika tikasikamatis niman ijkon uelis ompa titlanankilis (1 Cor. 2:10). Ipan yejon párrafos kampa ouijtika tikasikamatis xmiyekej nomateketsaj. San ika ¿tlenon uelis tikchiuas tla maski miyekpa yotikchiuj tlen yotikontakej ok xueli titlanankilia? Achto ika peuas tlanechikojli, xtlajto iuan tokniuj akin kiyekana tlamachtijli niman xkijli kanon tikuelitaskia titlanankilis.

11. Ken kijtoua Filipenses 2:4, ¿tlenon uelis tikchiuaskej?

¹¹ (Xpoua Filipenses 2:4). Ika iespíritu santo, Jehová okichiuj ika apóstol Pablo makimijli akin kichiuayaj ken Cristo ika noneki tlanemiliskej intech oksekimej. ¿Kenon uelis tikchiuaskej tlen okijto apóstol Pablo ijkuak tiaskej ipan totlanechikol? Matikilnamikikan  ika oksekimej noijki kuelitaskiaj tlanankiliskej.

12. ¿Kenon uelis tikinyolchikauaskej tokniuan ipan tlanechikoltin? (Noijki xkita tlaixkopinajli).

¹² Matitlanemilikan itech yejuin, ¿xmelak ika ijkuak timonojnotsa iuan moamigos tikinkauilia matlajtokan niman xsan nochipa tejua titlajtoua? Noijki ijkon panoua ipan totlanechikoluan, tiknekij ika miyekej tokniuan matlanankilikan. Niman uelis más tikinyolchikauaskej tokniuan tla tikinkauiliaj matlanankilikan (1 Cor. 10:24). Matikitakan kenon uelis tikchiuaskej yejuin.

13. ¿Tlenon uelis tikchiuaskej niman ijkon oksekimej tokniuan uelis tlanankiliskej?

¹³ Tla tiknekij ika miyekej tokniuan matlanankilikan, xnoneki tiuejkauiskej ijkuak tejuamej titlanankiliskej. Melak kuajli tla tlayekankej niman oksekimej tokniuan akin youejkaujkej kitekichiuiliaj Jehová ijkon kichiuaj. Niman xsan noneki xtiuejkauiskej, noijki noneki xnochi tikijtoskej tlen uajlauj ipan párrafo. Tla tejua nochi tikijtoua tlen onka ipan párrafo, oksekimej xok kimatiskej tlenon kijtoskej. Ipan yejuin párrafo onka ome tlemach tlen uelis tikchiuaskej: xnoneki tiuejkauiskej ijkuak titlanankiliskej niman xnoneki tikijtoskej nochi tlen uajlauj ipan párrafo. Tla tejua akin kachtopa titlanankilia ipan yejuin párrafo, ¿tleka xtikteneua san se tlen uelis tikchiuaskej?

14. ¿Tleka noneki kuajli tiknemiliskej kechpa tomateketsaskej? (Noijki xkita tlaixkopinajli).

¹⁴ Noijki noneki tiknemiliskej kechpa tomateketsaskej para titlanankiliskej. Tla nochipa tomateketstokej, kanaj tokniuj akin kiyekana tlamachtijli miyekpa kinekis techmakas kampa titlanankiliskej maski oksekimej xitlanankiliaj. Noijki, oksekimej uelis kinemiliskej ika xok noneki nomateketsaskej (Ecl. 3:7).

15. a) ¿Kenon xnoneki tomachiliskej tla xueli titlanankiliaj ipan tlanechikojli? b) ¿Tlenon noneki kilnamiktos tokniuj akin kiyekana tlamachtijli? (Xkita recuadro “ Tla tejua tikyekantok se tlamachtijli”).

¹⁵ Ijkuak miyekej tokniuan nomateketsaj,  kanaj xuelis miyekpa titlanankiliskej ken tikuelitaskiaj. Hasta uelis tlamis tlanechikojli niman nion sejpa xtitlanankiliskej. Kanaj yejon uelis kichiuas matajmanakan, san ika, xnoneki tikualaniskej (Ecl. 7:9).

16. ¿Tlenon uelis tikchiuaskej niman ijkon tikinyolchikauaskej akin yotlanankilijkej?

¹⁶ Maski xuelis miyekpa titlanankilis ken tikuelitaskia, nochipa uelis tijkakis kenon tlanankiliaj tokniuan niman sakin tla yotlan tlanechikojli, uelis tikimijlis ika melak kuajli ken otlanankilijkej. Kanaj tlen kualtsin tikimijlis tokniuan melak kinyolchikauas ijkon ken tikinyolchikauaskiaj tla titlanankiliskia (Prov. 10:21). Ijkuak tikimijliaj oksekimej ika kualtsin tlanankiliaj, noijki tikinyolchikauaj.

17. a) ¿Tlenon uelis kichiuaskej tatajtin? b) Ijkon ken nesi ipan video, ¿tlenon naui tlemach noneki tikchiuaskej niman ijkon tikyektlaliskej kampa titlanankiliskej? (Noijki xkita nota).

¹⁷ ¿Tlenon okseki uelis tikchiuaskej niman ijkon toyolchikauaskej imiuan oksekimej ipan tlanechikojli? Tla tejua tikinpiya mokoneuan pipitikej, xkinpaleui makiyektlalikan kampa tlanankiliskej niman ijkon makijtokan san tlen kinamiki (Mat. 21:16). Kemantika, ipan tlanechikojli tomachtiaj itech tlen kixnamikij akin yononamiktijkej noso itech kenon tichipaujkanemiskej. Maski ijkon, kanaj onias se noso ome párrafo kampa kokonej ueliskej tlanankiliskej. Noijki  uelis tikinpaleuis mokoneuan makasikamatikan tleka xnochipa uelis tlanankiliskej ijkuak nomateketsaskej. Tla tikimijlia yejuin mokoneuan, xnajmanaskej ijkuak xkintlapejpeniskej yejuamej matlanankilikan (1 Tim. 6:18). d

18. ¿Tlenon uelis tikchiuaskej niman ijkon xsajnoye totech titlajtoskej? (Proverbios 27:2).

¹⁸ Tinochimej uelis kuajli tikyektlaliskej ken titlanankiliskej niman ijkon tikueyichiuaskej Jehová niman tikinyolchikauaskej tokniuan (Prov. 25:11). Maski kemantika uelis achijtsin titlajtoskej itech tlen topan onochiuj, xnoneki sanoyej totech titlajtoskej (xpoua Proverbios 27:2; 2 Cor. 10:18). Yej noneki más titlajtoskej itech Jehová, itech iTlajtol niman itech ikalpan (Apoc. 4:11). San ika, tla tlajtoltilistli tlen uajlauj ipan párrafo techtlajtlanilia matikijtokan itlaj tlen topan onochiuj, uelis ijkon tikchiuaskej. Ipan okse párrafo uajlauj se tlajtoltilistli tlen techkauilia totech matitlajtokan.

19. a) ¿Tlenon panos tla ipan tlanechikojli titlanemiliaj intech oksekimej? (Romanos 1:11, 12). b) ¿Tleka tikuelita titlanankilis ipan tlanechikoltin?

¹⁹ Maski xonka tlanauatiltin itech kenon noneki titlanankiliskej, kema noneki tokojtiliskej tikitaskej kenon tikinyolchikauaskej oksekimej. Yejon kijtosneki ika kanaj sekimej tokniuan nonekis más tlanankiliskej. Niman kanaj oksekimej nonekis yolpakiskej ijkuak uelis tlanankiliskej niman noijki yolpakiskej ijkuak oksekimej tlanankiliaj. Tla ipan tlanechikojli titlanemiliaj intech oksekimej, tinochimej uelis toyolchikauaskej (xpoua Romanos 1:11, 12).