1. ¿Tlenon panotoya ijkuak Jesús okichiuj kachtopa milagro?

 MATIKONNEMILIKAN ika tinemij itlamiyan xiuitl 29. Jesús kemach opeuj tenojnotsa. Yejua, inan niman sekimej inomachtijkauan yauej kampa ononamiktilok ne Caná, se kalpan tlen nokaua nisiuj Nazaret, kampa yejua onoskalti. María melak kuajli nouikaya imiuan ichanejkauan akin nonamiktijtoyaj niman nesi ika kinpaleuijtoya. San ika, panoua itlaj tlen uelis kinpinaujtis akin nonamiktijtokej niman inchanejkauan: tlami vino. b Kanaj xkichiayaj melak matojlanti. Kuakon, María nimantsin konta ikoneuj niman kijlia: “Xok kipiyaj vino” (Juan 2:1-3). ¿Tlenon kichiua Jesús? Itlaj tlen melak temojkatlachialti: atl kikuepa vino tlen melak “uelik” (Juan 2:9, 10).

2, 3. a) ¿Kenon Jesús okikuik kojtilistli tlen Jehová okimakak? b) ¿Tleka melak kuajli tla tomachtiaj itech imilagros Jesús?

² Jesús okichiuj más miyek milagros ijkuak otenojnotstinen. c Okikuik kojtilistli tlen Jehová okimakak para kinpaleuis miyekej tlaltikpakchanejkej. Sejpatipan, okintlakualti 5,000 tlakamej niman ipan okse tonajli okintlakualti 4,000 tlakamej. Ijkuak okichiuj yejuin ome milagros, kanaj okintlakualti ipantsin 27,000 tlaltikpakchanejkej, tla tikinpouaj siuamej niman kokonej akin ompa nemiyaj (Mat. 14:15-21; 15:32-38). Noijki, ijkuak Jesús okichiuj yejuin milagros, okinpajti akin kualouayaj (Mat.  14:14; 15:30, 31). Kanaj tlaltikpakchanejkej melak omojkatlachixkej ijkuak okitakej ika Jesús otetlakualti niman otepajti ika milagros.

³ Melak miyek tiuelij itech milagros tlen Jesús okinchiuj. Ipan yejuin tlamachtijli tikitaskej kenon yejon milagros kichikauaj totlaneltok. Noijki tikitaskej kenon uelis tikteititiskej ika tiyolyemankej niman ika titeikneliaj ijkon ken Jesús okiteititi ijkuak okinchiuj milagros.

4. ¿Intech akinomej tiuelij ijkuak tomachtiaj itech milagros tlen Jesús okinchiuj?

⁴ Milagros tlen Jesús okinchiuj xsan miyek techmachtiaj itech yejua, noijki miyek techmachtiaj itech iTajtsin. Matikilnamikikan ika Jehová yejua akin okimakak Jesús kojtilistli para makinchiua milagros. Hechos 10:38 ijkin kijtoua: “Dios okimakak poder Jesús yejuan ualeua ne Nazaret, niman okiyoltemitij ikan on Espíritu Santo. Niman nouiyan okichijtinen on tlen kuajli niman nochimej on yejuan itlaj ika kintlajyouiltiaya ipoder on diablo okimpajtij, pampa Dios iuan nemiya”. Ken tikmatij, nochi tlen Jesús okichiuj niman tlen okijto techititia kenon tlanemilia Jehová niman kenon nomachilia, ika yejon, milagros tlen Jesús okinchiuj noijki miyek techmachtiaj itech Jehová (Juan 14:9). Matikitakan yeyi tlemach tlen techmachtiaj imilagros Jesús. Yejuin techpaleuis matikchikauakan totlaneltok.

5. ¿Tleka Jesús okinchiuj milagros? (Mateo 20:30-34).

⁵ Kachtopa, Jesús niman iTaj melak techtlasojtlaj. Ijkuak Jesús onen ipan tlaltikpaktli, okiteititi ika melak kintlasojtlaya tlaltikpakchanejkej pampa okikuik ikojtilis niman ijkon kinchiuas milagros para kinpaleuis tlaltikpakchanejkej. Sejpa, omemej tlakamej akin xtlachiayaj okitsajtsilijkej Jesús niman okijlikej makinpaleui (xpoua Mateo 20:30-34). Biblia kijtoua ika Jesús sajnoye “okimiknelij” niman sakin okichiuj matlachiakan. Ika tlajtojli griego “okimiknelij”, teasikamachiltia ika Jesús melak onoyolkoko ijkuak okitak ika yejuin tlakamej tlajyouijtoyaj. Jesús melak kintlasojtlaya tlaltikpakchanejkej, ika yejon, okimikneli. Niman pampa oteikneli, okintlakualti akin apismikiyaj niman okipajti se tlakatl akin kipiaya lepra (Mat. 15:32; Mar. 1:41). Kuakon kuajli tikmatstokej ika Jehová, akin “sanoyej teiknelia”, niman iKoneuj melak techtlasojtlaj, niman melak kinyolkokoua ijkuak kitaj ika titlajyouiyaj (Luc. 1:78; 1 Ped. 5:7). Yejuamej yemelak kinekij kipopoloskej nochi tlen aman techtlajyouiltia.

6. ¿Tlenon uelis kichiuas Jesús ika kojtilistli tlen toTajtsin okimakak?

⁶ Ika ome, toTajtsin yokimakak Jesús kojtilistli niman ijkon makinpopolo nochi tlaueltin tlen kipiyaj tlaltikpakchanejkej. Onka seki tlaueltin tlen tejuamej xkeman ueliskia tikinpopoloskej. San ika, ijkuak Jesús okinchiuj milagros, otechititi ika yejua kema uelis kinpopolos. Yejua kipiya kojtilistli para kipopolos tlen kichiua matitlajyouikan: tlajtlakojli tlen otechpanoltili Adán, tlen kichiua matikualokan niman matimikikan (Mat. 9:1-6; Rom. 5:12, 18, 19). Milagros tlen okinchiuj Jesús techititiaj ika yejua uelis kipajtis “nochi tlajtlamach kualolistli niman kokolistli” niman ika uelis kinyolitis akin yomijkej (Mat. 4:23; Juan 11:43, 44). Noijki kipiya kojtilistli para kinteltis ajakakiyaujtin niman para kintlanis xkuajkualtin espíritus (Mar. 4:37-39; Luc. 8:2). Jehová okimakak Jesús miyek kojtilistli. ¿Xmelak ika yejon techyolseuiya?

7, 8. a) ¿Tlenon kuajli tikmatstokej pampa Jesús okinchiuj milagros ijkuak onen ipan tlaltikpaktli? b) ¿Katlejua milagro sa tiknektika manochiua?

⁷ Ika yeyi, uelis kuajli tikmatstoskej ika melak kualtsin tichantiskej ijkuak Jesús tekiuajtitos ipan iTekiuajyo toTajtsin. Milagros tlen  okinchiuj Jesús ijkuak nemiya ipan tlaltikpaktli techititiaj ika más kichiuas milagros ijkuak tekiuajtis ipan iTekiuajyo toTajtsin. San xkonnemili kenon tinemiskej ijkuak Cristo tekiuajtitos ipan tlaltikpaktli. Ijkuak yejua tekiuajtitos, kipopolos nochi kokolistli, ika yejon, xok tikualoskej (Is. 33:24; 35:5, 6; Apoc. 21:3, 4). Xok keman techpolos tlen tikuaskej niman xok keman tlaixpoliuis kampa tichantiskej (Is. 25:6; Mar. 4:41). Melak techyolpaktis tikinseliskej tochanejkauan akin yomijkej (Juan 5:28, 29). Ijkuak tontlanemilia ika tinemi ipan yenkuik tlaltikpaktli, ¿katlejua milagro sa tiknektika manochiua?

⁸ Ijkuak Jesús okinchiuj milagros, okiteititi itlaj tlen tejuamej noijki noneki tikchiuaskej: ika yolyemanki niman teiknelia. Matikitakan ome milagros tlen yejua okinchiuj. Kachtopa matikitakan tlen opanok ijkuak ononamiktilok ne Caná.

9. ¿Tleka Jesús okichiuj se milagro ijkuak ononamiktilok ne Caná? (Juan 2:6-10).

⁹ (Xpoua Juan 2:6-10). Ijkuak otlan vino kampa nonamiktijtoyaj ne Caná, ¿nonekiya itlaj makichiua Jesús? Ka. Xonkatka nion se teotlajtojli kampa kijtouaya ika Mesías kichijchiuaskia vino ika se milagro. San ika, san xkonnemili kenon timomachiliskia tla tejua timonamiktijtoskia niman itlaj xkimajxiliskia akin ompa nemij. Kanaj Jesús okinemili kenon melak pinauiskiaj akin nonamiktijtoyaj niman  ichanejkauan, niman pampa okimikneli, okinpaleui. Ika yejon, okichiuj milagro tlen otikteneujkej ipeujyan yejuin tlamachtijli. Okikuik 390 litros de atl niman okikuep vino tlen melak uelik. ¿Niman tleka melak miyek? Kanaj vino tlen nokauaskia ueliskia koniskej okse tonajli noso kinemakaskiaj niman ijkon kinpaleuiskej akin kemach yononamiktijkaj. Kanaj akin kemach yononamiktijkaj melak okitlasojkamatkej pampa okinpaleuijkej.

10. Xteneua seki tlen opanok ijkuak ononamiktilok ne Caná tlen noteneua ipan Juan capítulo 2 (noijki xkita tlaixkopinajli).

¹⁰ Matikitakan okseki tlen opanok tlen noteneua ipan Juan capítulo 2. ¿Otikitak akinon okintemilti kontin ika atl? Xokintemilti Jesús. Jesús xkinekiya makimatikan ika yejua kichijchiuaskia vino ika se milagro, ika yejon, okimijli akin ompa tlapaleuijtoyaj yejuamej makintemiltikan kontin ika atl (tlaxeloltin 6 niman 7). Niman, sakin ika Jesús okichiuj milagro, ¿akinon okijlito akin tlayekantoya ipan iluitl makimati vino? Noijki xJesús. Yejua okimijli akin ompa tlapaleuijtoyaj makimachiltitij vino akin kiyekantoya iluitl (tlaxelojli 8). Niman noijki, Jesús xokajkok se copa de vino niman ompa teixpan okijto: “¡Xmatikan yejuin vino tlen kemach onikonchijchiuj, melak uelik!”.

11. ¿Tlenon techmachtia milagro tlen Jesús okichiuj ne Caná?

¹¹ ¿Tlenon techmachtia yejuin milagro tlen Jesús okichiuj? Techmachtia ika noneki tiyolyemankej yeskej. Jesús xokiteijlitinen ika okichijchiuj vino ika se milagro. Yejua xkeman kimijlitinemiya oksekimej nochi tlen kuajli kichiuaya, ka, yejua yolyemanki katka niman nochipa kiueyiteneuaya iTajtsin (Juan 5:19, 30; 8:28). Tla tikchiuaj ijkon ken Jesús, tiyolyemankej yeskej niman xtikteijlitinemiskej tlen kuajli yotikchiujkej. Maski tla chikauak tiktekichiuilijtokej Jehová, maka matoueyimatikan, yej nochipa matikueyiteneuakan toueyiTajtsin akin tiktekichiuiliaj (Jer. 9:23, 24). Matikilnamikikan ika xueliskia tikchiuaskiaj itlaj tlen kuajli tla Jehová xtechpaleuiskia, ika yejon, noneki nochipa matikueyiteneuakan (1 Cor. 1:26-31).

12. ¿Kenon noijki uelis tikteititiskej ika tiyolyemankej ken Jesús? Xkijto se neskayotl.

¹² Matikitakan kenon noijki uelis tikteititiskej ika tiyolyemankej ken Jesús. Matikonnemilikan ika se tokniuj tlayekanketl melak kipaleuiya se tokniuj tlapaleuijketl pampa kemach ika sejpa kipanoltis se tlamachtijli. Tokniuj tlapaleuijketl melak kuajli kipanoltia itlamachtil pampa yejon tlayekanketl okipaleui, niman tokniuan ipan tlanechikojli melak kuelkakij itlamachtil. Sakin, ijkuak tlami tlanechikojli, yakaj kijlia tokniuj tlayekanketl: “Melak kuajli tlamachtijli tlen okipanolti tokniuj ¿xmelak?”. ¿Tiknemilia ika tlayekanketl kijlis: “Kema, pampa nejua onikpaleui”? ¿Noso tiknemilia kijtos: “Kema, melak kuajli ken okipanolti”? Yakaj akin yolyemanki xkichia ika oksekimej makiueyiteneuakan ijkuak kinpaleuiya oksekimej. Yejua kuajli nomachilia pampa kimatstok ika Jehová kita niman kipatiojkaita tlen kichiua (uelis tikitas Mateo 6:2-4; Heb. 13:16). Jehová melak yolpaki ijkuak kita ika tiknekij tiyolyemankej yeskej ijkon ken Jesús (1 Ped. 5:6).

13. ¿Tlenon kita Jesús ijkuak ajsi kalpan Naín, niman tlenon kichiua? (Lucas 7:11-15).

¹³ (Xpoua Lucas 7:11-15). Ijkuak Jesús itenojnotstinemiya, oyaj ipan ueyikalpan Naín. Yejon kalpan onkatka Galilea, nisiuj Sunem. Ikipiaya 900 xiuitl ika ompa Eliseo okiyoliti ikoneuj se siuatsintli (2 Rey. 4:32-37).  Ijkuak ajsi Naín, Jesús kita ika melak tojlan pampa yakaj omik. Melak teyolkoko tlen kita. Kemach omik isentekonetsin se siuakaualtsintli. Yejon siuatsintli xsan iselti ompa nemi, miyekej akin ompa chantij iuan nemij. Jesús kinteltia niman kichiua itlaj ipampa yejuin siuatsintli akin melak noyolkokoua: kiyolitia ikonetsin. Evangelios kinteneua yeyimej akin Jesús okinyoliti. Niman ikoneuj siuakaualtsintli yejua akin Jesús kachtopa okiyoliti.

14. Xteneua seki tlen opanok ipan Lucas capítulo 7 (noijki xkita tlaixkopinajli).

¹⁴ Matikitakan seki tlen noteneua ipan Lucas capítulo 7. ¿Otikitak tlenon kachtopa opanok? Jesús kachtopa “okitak on siuakaualtsintli” niman sakin “okiknelij” (tlaxelojli 13). Kanaj okitak ika nantli chokatiaya ijkuak nejnentiaya para kontokas ikonetsin. Tlen okitak Jesús melak okiyolkoko. Yejua xsan okimachili ika okikneli, yej okiteititi ika okikneli. Kanaj ika yemanki tlajtojli okijli: “Maka xchoka”. San ika, xsan iuan otlajto, yejua okiyolitili ikonetsin niman “okimaktilij” (tlaxeloltin 14 niman 15).

15. ¿Tlenon techmachtia yejuin milagro tlen Jesús okichiuj?

¹⁵ ¿Tlenon techmachtia yejuin milagro tlen Jesús okichiuj? Techmachtia kenon uelis tikteititiskej ika tikimikneliaj akin nomijkatiaj. Tikmatstokej ika xuelis tikinyolitiskej akin yomijkej, ijkon ken Jesús okiyoliti ikonetsin siuakaualtsintli. San ika, ijkon ken Jesús, tla tikitaj tlenon panoua toyeualiyan, kema uelis tikteititiskej ika tikimikneliaj akin nomijkatiaj. Sakin, noijki uelis tikteititiskej ika titeikneliaj tla tikijtouaj niman tikchiuaj itlaj tlen makinpaleui niman makinyolseui akin noyolkokouaj (Prov. 17:17; 2 Cor. 1:3, 4; 1 Ped. 3:8). d Tla tikchiua itlaj inpampa niman tla tikimijlia maski san se ome tlajtojli, uelis melak titepaleuis.

16. ¿Tlenon tiuelij itech tlen opanok ipan se tlanechikojli? (Xkita tlaixkopinajli tlen kiteititia tlen ipan onochiuj tokniuj).

¹⁶ Matitlanemilikan itech tlen opanok ipan se tlanechikojli. Ikipiya seki xiuitl, sekimej tokniuan  nokuikatijtoyaj se tlakuikajli tlen tlajtoua itech yoliuilistli, se tokniuj siuatl okitak ika se tokniuj chokatoya pampa kemach yomijka iichpokatsin. Pampa tokniuj siuatl kimatstoya tlen yejuin nantli kixnamiktoya, nimantsin iuan oyaj, okinapaloto niman iuan onokuikatito. Yejon nantli kilnamiki ika desde ipan yejon tonajli opeuj más kintlasojtla tokniuan. Melak yolpaktoya pampa oyaj tlanechikojli. Yejua kijtoua: “Nikmatstoya ika ipan Kajli kampa tosentlaliaj nechpaleuiskiaj”. Ijkuak tikimititiaj ika tikimikneliaj akin “sanoyej noyolkokouaj” pampa nomijkatiaj, Jehová kita niman kipatiojkaita, maski uelis tiknemiliskej ika xmiyek tikchiuaj inpampa (Sal. 34:18).

17. ¿Tlenon otiuelkej ipan yejuin tlamachtijli?

¹⁷ Uelis tikchikauaskej totlaneltok tla tomachtiaj itech milagros tlen Jesús okinchiuj. Tlen techijliaj Evangelios techititia ika Jehová niman Jesús melak techtlasojtlaj, ika Jesús kipiya kojtilistli niman ijkon kinpopolos nochi tlaueltin tlen kipiyaj tlaltikpakchanejkej niman ika uelis kuajli tikmatstoskej ika iTekiuajyo toTajtsin yemelak techpaleuis. Noijki, Evangelios techpaleuiyaj matitlanemilikan itech kenon uelis tikchiuaskej ken Jesús. ¿Tleka xtimomachtia okseki milagros tlen Jesús okinchiuj ijkuak tikueyichiuas Jehová iuan mochanejkauan noso ijkuak san moselti timomachtis? Xtlanemili itech tlenon mitsmachtiaj niman xkimijli oksekimej. Yejon kichiuas kualtsin xmonojnotsa imiuan tokniuan (Rom. 1:11, 12).

18. ¿Tlenon tikitaskej ipan okse tlamachtijli?

¹⁸ Ijkuak Jesús itlamiskia tenojnotsas, ika yexpa oteyoliti niman sa ika tlami ijkon okichiuj. San ika, aman tlamantik ken oteyoliti: okiyoliti se iamigo ijkuak ikuikaya naui tonajli ika yomijka. ¿Tlenon techmachtia yejuin milagro tlen Jesús okichiuj? ¿Niman tlenon uelis tikchiuaskej tla tiknekij machikaui totlaneltok itech yoliuilistli? Yejon tikitaskej ipan okse tlamachtijli.