1. ¿Kenijki nomachiliaj sekimej ijkuak tenojnotsaj? (Noijki xkita tlaixkopinajli).

 TINOCHIMEJ akin tiitekipanojkauan Jehová titenojnotsaj pampa tiktlasojtlaj toTajtsin iluikakchane niman tiknekij ika oksekimej noijki makixmatikan. Miyekej tokniuan melak kuelitaj tenojnotsaskej, san ika, oksekimej melak ouijtika kitaj ontenojnotsaskej. ¿Tleka? Pampa sekimej pinauij niman xmás kimatij tlenon kijtoskej. Oksekimej xkinekij onteitaskej techan tla xokiminotskej mauiyan. Oksekimej nomojtiaj tla xokinejkej kinkakiskej. Niman miyekej okinmachtijkej maka matepajsolokan. Tikmatstokej ika nochimej akin ijkon nomachiliaj melak kitlasojtlaj Jehová, san ika, ouijtika kitaj kinnojnotsaskej akin xkimixmatij. Maski ijkon, yejuamej nochipa tenojnotsaj pampa kimatstokej ika melak noneki manochiua yejuin tekitl, niman Jehová melak yolpaki pampa ijkon kichiuaj.

2. ¿Tleka xnoneki tajmanaskej tla ouijtika tikitaj titenojnotsaskej?

² ¿Tejua ouijtika tikita titenojnotsas? Tla kema, maka xmajmana. Kanaj tejua ijkon tikmachilia pampa tiyolyemanki niman xtiknekiskia makinemilikan ika tejua melak tikmatstok niman noijki xtiknekiskia teuan timokualanis. Noso kanaj  xtikuelitaskia ika oksekimej maka makinekikan mitskakiskej pampa tejua san tikneki tikinpaleuis. San ika, moTajtsin iluikakchane mitsasikamati niman yejua kineki mitspaleuis (Is. 41:13). Ipan yejuin tlamachtijli tikitaskej makuijli tlemach tlen uelis tikchiuaskej niman ijkon más tiyolpakiskej ijkuak titenojnotsaskej.

BIBLIA MITSMAKAS KOJTILISTLI

3. ¿Kenijki Jeremías okipix kojtilistli para tenojnotsas?

³ Yeuejkaui, iTlajtol toTajtsin melak okinkojtili itekipanojkauan ijkuak ononek kichiuaskej se ueyi tekitl. Matitlajtokan itech teotlajtoketl Jeremías. Ijkuak Jehová okinauati matenojnotsati, yejua melak onomojti niman okijto: “Nejua san nitelpochtli, xnikmati tlenon nikijtos” (Jer. 1:​6, TNM). ¿Tlenon okipaleui matenojnotsa? ITlajtol toTajtsin okikojtili, yejua okijto: “Itlajtoluan yeskiaj ken se tlitl tlen onkatkaj ipan noyojlo, kitlatiaya noomiyouan, maski niknekiya san nejua nikmatstos, xok onikxiko” (Jer. 20:​8, 9, TNM). Akin Jeremías kinnojnotsaskia melak xkuajkualtin katkaj, san ika, tlen okinauatijkej makiteijli okimakak kojtilistli para kichiuas yejon tekitl.

4. ¿Tlenon panos tla tikamapouaj iTlajtol toTajtsin niman itech titlanemiliaj? (Colosenses 1:​9, 10).

⁴ Akin tikchiuaj ken Cristo noijki melak techkojtilia tlen kijtoua iTlajtol toTajtsin. Ijkuak apóstol Pablo okintlajkuilouili tokniuan akin chantiyaj Colosas, yejua okimijli tlenon inpan panoskia tla nomachtiayaj iTlajtol toTajtsin, yejua okimijli: “Nenueliskej nenkitlakaitaskej niman nenkipaktiskej toTEKO”. Niman noijki okimijli: “Nenueliskej nenkichiuaskej nochi tlajtlamach tlen kuajli” (xpoua Colosenses 1:​9, 10). Ijkuak titenojnotsaj, tikchiujtokej tlen kuajli. Kuakon, ijkuak tikamapouaj iTlajtol toTajtsin niman itech titlanemiliaj, más titlaneltokaj itech Jehová niman más tikasikamatij tleka melak noneki manotenojnotsa itech iTekiuajyo.

5. ¿Tlenon noneki tikchiuaskej tla tiknekij matechpaleui Biblia?

⁵ Tla tiknekij matechpaleui iTlajtol toTajtsin, noneki kuajli tomachtiskej, yolik tikamapouaskej niman itech titlanemiliskej. ¿Tlenon uelis tikchiuas tla kemantika tiknextia se texto tlen xtikasikamati? Maka san xpanaui. Xtejtemo tlen kijtosneki yejon texto ipan Índice de las publicaciones Watch Tower noso ipan amoxtli Tlen kinpaleuiya ika nomachtiaj  iteixpantijkauan Jehová. Tla tikxeloua tiempo para timomachtis, más titlaneltokas itech iTlajtol toTajtsin (1 Tes. 5:21). Niman tla más titlaneltoka itech Biblia, más tiyolpakis tikimijlis oksekimej tlen yotimomachti.

KUAJLI XMOYEKTLALI PARA TITENOJNOTSAS

6. ¿Tleka noneki kuajli toyektlaliskej para titenojnotsaskej?

⁶ Tla kuajli toyektlaliaj para titenojnotsaskej, xtomojtiskej ijkuak titlajtoskej imiuan tlaltikpakchanejkej. Jesús kuajli okinmachti inomachtijkauan achto komintitlaniskia matenojnotsatij (Luc. 10:​1-11). Niman yejuamej otenojnotskej ijkon ken Jesús okinmachti, ika yejon, melak oyolpajkej ijkuak okitakej ika kuajli okinkakkej (Luc. 10:17).

7. ¿Kenijki uelis toyektlaliskej para titenojnotsaskej? (Noijki xkita tlaixkopinajli).

⁷ ¿Kenijki uelis toyektlaliskej para titenojnotsaskej? Matiknemilikan kenijki uelis titenojnotsaskej ijkon ken nochipa titlajtouaj. Noijki melak kuajli tla tiknemiliaj ome noso yeyi tlemach tlen ueliskia techijliskej akin tikinnojnotsaj niman matiknemilikan kenijki uelis titenankiliskej. Tla ijkin tikchiuaj, ijkuak titenojnotsaskej xtomojtiskej, tiyolpakiskej niman kualtsin titenotsaskej.

8. ¿Tleka akin titenojnotsaj tiyeskiaj ken “kontli tlachijchijtli ikan sokitl”?

⁸ Apóstol Pablo okitekitilti se neskayotl para kijtos tlenon tikchiuaj ijkuak titenojnotsaj. Yejua okijto: “Tikpiyaj [ . . . ] ken itlaj tesoro ipan totlalnakayo yejuan ken itlaj kontli tlachijchijtli ikan sokitl” (2 Cor. 4:7). San ika ¿tlenon yejon tesoro? Tlen tikteijliaj itech Tekiuajyotl, pampa akin techkakij uelis makisaskej (2 Cor. 4:1). ¿Niman tlenon yejon “kontli tlachijchijtli ikan sokitl”? Tejuamej akin titenojnotsaj. Ijkuak nemiya Pablo, tlanemakakej kitkiyaj ipan kontin tlen melak patioj, ken tlakuajli, vino noso tomintsin. Aman Jehová noijki yotechmakak tlen melak patioj: Kuajli tlajtoltin. Niman yejua techpaleuis kuajli matitenojnotsakan.

XTLAJTLANILI TOTAJTSIN MAMITSYOLCHIKAUA

9. ¿Tlenon uelis techpaleuis maka matomojtikan ijkuak titenojnotsaskej? (Noijki xkita tlaixkopinajli).

⁹ Kemantika uelis tomojtiskej ijkuak titenojnotsaskej. Kanaj tiknemiliaj ika xtechkakiskej noso kanaj tikinmakasij tlaltikpakchanejkej.  San ika ¿tlenon uelis techpaleuis? Uelis titlanemiliskej itech tlen okichiujkej apóstoles ijkuak okimijlijkej maka sa matenojnotsakan. Yejuamej okichiujkej teoyotl niman okitlajtlanilijkej Jehová makinpaleui para matenojnotsakan “ikan nochi yolchikaualistli”, niman Jehová nimantsin okinnankili (Hech. 4:​18, 29, 31). Matiktlajtlanilikan Jehová matechpaleui más matikintlasojtlakan tlaltikpakchanejkej niman ijkon maka matechmojti tikinnojnotsaskej.

10. ¿Tlenon techpaleuiya matitenojnotsatij? (Isaías 43:​10-12).

¹⁰ Jehová techijlia: “Nemejuamej nennotestigos” (xpoua Isaías 43:​10-12). Jehová yotechtlapejpeni para itech matitenojnotsakan niman techijlia ika techpaleuis matiyolchikaujkej. Matikitakan naui tlemach ken techpaleuiya. Kachtopa, Jesús touan nemi ijkuak tontenojnotsaj (Mat. 28:​18-20). Ika ome, Jehová yokinnauati iángeles matechpaleuikan (Apoc. 14:6). Ika yeyi, Jehová techmaka iespíritu santo para matechpaleui matikilnamikikan tlen yotomachtijkej (Juan 14:​25, 26). Niman, ika naui, Jehová yotechinmakak tokniuan akin touan ontenojnotsaj. Kuakon, uelis tontenojnotsaskej niman xtomojtiskej pampa Jehová niman tokniuan techpaleuiyaj.

XTEJTEMOUILI KENIJKI UELIS MÁS MITSKAKISKEJ

11. ¿Tlenon uelis tikchiuas niman ijkon uelis miyekej tikinnojnotsas? (Noijki xkita tlaixkopinajli).

¹¹ ¿Timajmana ijkuak xakaj tiknextia ichan para tiknojnotsas? Tla kema, xmotlajtolti: “¿Kanon oyajkej? ¿Otekititoj noso otlakouatoj?” (Hech. 16:13). Tla xakaj tiknextia, xkita tla uelis titenojnotsas ijkuak tikistinemis ipan ojtli. Se tokniuj akin itoka Joshua kijtoua: “Nejua kemantika nitenojnotsa kampa nikistinemi, kemantika nitenojnotsa mercado, ipan tiendas noso kampa nijkaua nocarro”. Tokniuj Joshua niman isiuauj Bridget ontenojnotsaj ika teotlak noso domingos ika tlajko tonajli, pampa yokitakej ika ijkuakon más miyekej nemij inchan (Efes. 5:​15, 16).

12. ¿Kenijki uelis tikmatiskej tlen kineltokaj niman tlen kinmajmana akin tikinnojnotsaj?

¹² Tla miyekej xmás kuajli techkakij, matikitakan tlenon kineltokaj noso tlenon  kinmajmana. Joshua niman Bridget kintekitiltiaj tratados niman ijkon peuaskej kinnojnotsaskej tlaltikpakchanejkej. Ijkuak kitemakaj tratado ¿Tlenon tiknemilia itech Biblia?, yejuamej ijkin tetlajtoltiaj: “Miyekej kinemiliaj ika Biblia ualeua itech toTajtsin, san ika, oksekimej xijkon kinemiliaj. ¿Tejua tlenon tiknemilia?”. Miyekej kuajli kinkakij pampa ijkin kimijliaj.

13. ¿Tleka tikijtouaj ika kuajli tikchiujtokej totekiyo maski xakaj techkaki? (Proverbios 27:11).

¹³ Tla miyekej xtechkakij ijkuak tikinnojnotsaj, ¿kijtosneki ika xkuajli tikchiujtokej totekiyo? Ka, xkilnamiki ika tikchiujtokej tlen Jehová niman iKoneuj techtlajtlaniliaj: titenojnotsaj (Hech. 10:42). Kuakon, maka matajmanakan tla xakaj otiknojnotskej noso tla xakaj okinek techkakis. Tejuamej uelis kuajli tomachiliskej pampa tikyolpaktijtokej toTaj Jehová (xpoua Proverbios 27:11).

14. ¿Kenijki tomachiliaj ijkuak tikitaj ika yakaj kuajli okikak se tokniuj, niman tleka?

¹⁴ Tejuamej uelis tiyolpakiskej ijkuak tikitaskej ika yakaj kuajli kikaki se tokniuj. Matikteneuakan se neskayotl tlen yonoijtojka ipan se Amatl Tekakistilijketl. Ijkuak se konetl poliui, miyekej kitejtemouaj niman kinoxelouiliaj kampa kitejtemoskej. San ika, ijkuak kinextiaj yejon konetl, xsan yolpaki akin okinexti, yej nochimej yolpakij akin otlapaleuijkej. Noijki ijkon, akin titenojnotsaj san sekan topaleuiyaj pampa toxelouiliaj kampa titenojnotsaskej, niman tinochimej tiyolpakij ijkuak tikitaj ika yakaj peua yauj tlanechikoltin.

MÁS XTETLASOJTLA

15. ¿Tlenon techpaleuis más matiknekikan matitenojnotsakan? (Mateo 22:​37-39; noijki xkita tlaixkopinajli).

¹⁵ Tejuamej uelis más tiknekiskej titenojnotsaskej tla tiktlasojtlaj Jehová niman tla tikintlasojtlaj oksekimej (xpoua Mateo 22:​37-39). San xkonnemili kenijki Jehová melak yolpaki ijkuak kita ika titenojnotsaj niman kenijki melak yolpakij akin peuaj nomachtiaj Biblia. Niman maka matikilkauakan ika akin peuaj nomachtiaj uelis makisaskej (Juan 6:40; 1 Tim. 4:16).

16. ¿Tlenon uelis tikchiuaskej tla xueli tikisaj? Xkijto se neskayotl.

¹⁶ ¿Tlenon uelis tikchiuas tla xueli tontenojnotsa? Xmokojtili xchiua nochi tlen tiuelis niman ijkon tikimititis Jehová niman  tlaltikpakchanejkej ika tikintlasojtla. Ijkuak onkatka kokolistli COVID-19, Samuel niman Dania xueliyaj ontenojnotsayaj. San ika, yejuamej nochipa otenojnotskej ipan teléfono, kijkuilouayaj cartas niman temachtiayaj ipan Zoom. Noijki, Samuel kipiaya cáncer niman yejua tenojnotsaya kampa onopajtiaya. Samuel kijtoua: “Ijkuak itlaj tikixnamikis, melak tisiauis, xok tikmatis tlenon tikchiuas niman notlatlata motlaneltok, ika yejon, xotijkajkaujkej ika tiktekichiuiliaj Jehová pampa san yejon melak techyolpaktiaya”. Sakin, Dania ouejuets niman ononek nemis ipan tlapechtli yeyi metstli niman sakin ononek kistinemis chikuasen metstli ipan silla de ruedas. Dania kijtoua: “Oninokojtili nikchiuas hasta kampa niueliya. Oniknojnots se enfermera akin nechontaya niman nikinnojnotsaya akin techonkauiliayaj seki tlemach tochan. Noijki ouel oniknojnots ipan teléfono se siuatsintli akin tekitiya kampa kinemakayaj tlen ika timopajtis”. Maski Samuel niman Dania kixnamiktoyaj tlen ouijtika, yejuamej melak yolpakiyaj pampa kichiuayaj tlen ueliyaj.

17. ¿Tlenon noneki tikchiuaskej tla tiknekij matechpaleui tlen aman otomachtijkej?

¹⁷ Melak techpaleuis tla tikchiuaj nochi tlen otikitakej ipan yejuin tlamachtijli. Tlen otomachtijkej yeskia ken tlen tiktlaliliaj se tlakuajli. Ijkuak tikchijchiuaj tlakuajli niman tiktlaliliaj nochi tlen noneki, melak uelik kisa. Kuakon, tla tikchiuaj nochi tlen otiuelkej, melak kuajli tonkisaskej pampa xtajmanaskej ijkuak xtechkakiskej niman más tikuelitaskej titenojnotsaskej.