“XTIKCHIUA motekiyo ken tajtli”, onechijli policía akin tekiti itech KGB, * “otiktlalkaui moichpokatsin niman noijki mosiuauj akin koneua. ¿Akinon kintlakualtis niman kintlajpiyas? Xkajkaua motlaneltokil niman xmokuepa mochan”. San ika, nejua oniknankili: “Xonikinkauj nochanejkauan. Nemejuamej oninechajsikej. ¿Niman tleka ijkon oninexchiuilijkej?”. Policía onechnankili: “Xonka okse itlaj melak xkuajli ken tiyes se Teixpantijketl”.

Yejuin opanok ipan xiuitl 1959 ijkuak nitsauktoya Irkutsk, ipan Rusia. Nosiuauj Maria, niman nejua yotiknemilijkaj timelajkanemiskej maski matitlajyouikan pampa “[tik]chiuaj on tlen kuajli” (1 Ped. 3:13, 14). Niman toTajtsin otechteochiuj ipampa yejon. Manimechijli tlenon topan onochiuj.

Onitlakat ipan xiuitl 1933 ipan se pitentsin kalpan tlen onka Ucrania, itoka Zolotniki. Ipan 1937, notíos, akin katkaj iteixpantijkauan Jehová niman chantiyaj Francia, otechtlajpalokoj niman otechmakakej amoxtin Gobierno niman Liberación. * Ijkuak notaj okinpouj, oksejpa okinek tlaneltokas itech toTajtsin. Nechajmana nikijtos ika ipan 1939 melak opeuj kualo. San ika, ijkuak imikiskia okijli nonan: “Yejuin tlen melauak. Xkinmachti tokoneuan”.

Ipan abril xiuitl 1951, tekiuajkej opeuj kinuikaj Siberia miyekej iteixpantijkauan Jehová akin chantiyaj kampa oeste itech Unión Soviética. Nonan, nokniuj pitentsin, Grigory, niman nejua otechtitlankej kampa Ucrania. Sakin ijkuak yotiajkaj kanaj 6,000 kilómetros ipan tren, otajsikej ipan kalpan Tulun, Siberia. Nokniuj akin iueyi, Bogdan, oajsik ome semanas sakin kampa tetsakuayaj nisiuj kalpan Angarsk. Yokijlikaj ika ompa chikauak tekititoskia 25 xiujtin.

Nonan, nokniuj Grigory niman nejua titenojnotsayaj inisiuj Tulun, san ika, melak tiktejtemouiliayaj kenon tikchiuaskej. Se neskayotl, titetlajtoltiayaj: “¿Tikmati tla yakaj kinemaka se uakax?”. Tla tiknextiayaj yakaj akin kinemakaya se, tiknojnotsayaj itech kenon melak kuajli tlachijchiujtli katka yejon yolki. Sakin, ititlajtotoyaj itech toTlachijchiujkauj. Ipan yejon tonaltin, se periódico okijkuilo ika iteixpantijkauan Jehová tetlajtoltiayaj itech uakaxtin, san ika, tlen yemelak kitejtemouayaj katka borreguitos akin kinmachtiskej. Niman kema, otikinnextijkej miyekej tlaltikpakchanejkej akin melak yolyemankej katkaj ken borreguitos. Melak tikuelitayaj tikinmachtiskej itech Biblia yejon tlaltikpakchanejkej akin melak yolyemankej katkaj niman kuajli techseliayaj. Amanin, ipan Tulun onka se tlanechikojli kampa nemij ipantsin 100 tenojnotskej.

Nosiuauj Maria, okixmat tlen melauak ipan Ucrania ijkuak panotoya ika okpa Guerra ipan nochi tlaltikpaktli. Ijkuak kipiaya 18 xiuitl, se policía itech KGB opeuj kichiualtia iuan maauilnemi, san ika, Maria xkinokauiliaya. Se tonajli, ijkuak oajsik ichan, okinexti yejon tlakatl nemiya ipan itlapech. Maria nimantsin ocholoj. Yejon policía melak okualan niman okijli ika pampa Teixpantijketl katka, kitsakuaskiaj. Niman ijkon opanok, ipan 1952 okijlikej ika tsauktoskia 10 xiuitl. Onomachili ijkon ken José, akin okitsajkej pampa oyolmelaujkanen itech Jehová (Gén. 39:12, 20). Akin okanato Maria kampa tekiuajkej niman okuikak cárcel okijli: “Maka xmomojti. Miyekej kintsakuaj, san ika, ijkuak kisaj ok kintlakaitaj”. Yejon tlajtoltin okiyolchikaujkej.

Ipan xiujtin 1952 hasta 1956, Maria otekit kampa melak tetlajyouiltiaj ika chikauak tekitl nisiuj kalpan Gorki (aman itoka Nizni Nóvgorod), ipan Rusia. Pampa kichiualtiayaj makinuiuitla kojtin maski melak seua, opeuj kualo. Ipan 1956 okikixtijkej niman okuikakej Tulun.

Se tokniuj onechijli ika se tokniuj siuatl yejkoskia Tulun, kuakon oniaj ipan bicicleta kampa yejkoyaj autobuses niman ijkon nikonamikis niman nikpaleuis ika tlen kuajkuiya. Ijkuak onikitak Maria nimantsin onikuelitak. Melak ononek ninokojtilis niman ijkon ninotlanilis iyojlo. Otonamiktijkej ipan 1957, niman se xiuitl sakin onemiko toichpokatsin Irina. Melak tiyolpaktoyaj, san ika, topakilis nion xouejkauj pampa ipan 1959 onechtsajkej pampa nikinchijchiuaya amatlajkuiloltin tlen tlajtouayaj itech Biblia. Onechtsajkej se xiuitl uan tlajko kampa san noselti ninemiya. Pampa xnikpolosnekiya noyolseuilis, miyekpa nikchiuaya teoyotl, nijkuikatiliaya Jehová niman niknemiliaya kenon nitenojnotstinemiskia tla xnitsauktoskia.

Se tonajli ijkuak nechtlatlajtoltijtoyaj kampa nitsauktoya, policía chikauak onechijli: “¡Sa achijtsin poliui niman nemopan tichojcholoskej ijkon ken tikinchiuiliaj kimichimej!”. Kuakon oniknankili: “Jesús okijto ika kuajli tlajtoltin itech Tekiuajyotl notenojnotsaskiaj ipan nochi kalpamej, niman xakaj uelis kiteltis”. Sakin, yejon policía okipatlak ken nexchiuiliaya niman aman okiyejyeko nechnekiltis manijkaua notlaneltok, ijkon ken onikijto ijkuak onipeuj. Maski nechmojtiaya niman nechtlatlatayaj ika ueliskia ninokuepas nochan, xonijkauj notlaneltok, kuakon onechijlikej ika ninemiskia chikome xiuitl kampa nochiua chikauak tekitl, inisiuj kalpan Saransk. Ipan ojtli ijkuak inechuikatoyaj, onikmat ika yotlakatka ika ome noichpokatsin, Olga. Maski nosiuauj niman noichpokatsitsinuan uejka nemiyaj, nechyolseuiyaya nikmatis ika Maria niman nejua timelajkanemiyaj itech Jehová.

Sejpa ipan xiuitl, Maria nechualitaya Saransk, kampa nitsauktoya, maski uejkauiya 12 tonaltin ika uajlas niman nokuepas ipan tren. Nochipa nechuajkuiliaya seki yenkuikej botas, niman ijtik botas kinkalaktiaya Amatl Tekakistilijketl tlen kemach yokiskaj. Ika ueyi tlasojtlalistli nikilnamiki tonajli ijkuak Maria onechitato iuan ome toichpokatsitsinuan. Uelis nenkinemiliskej kenon melak onechyolpakti nikimitas.

Ipan 1966, onikis itech kampa nechtekitiltiayaj ika chikauak tekitl, niman oninochantito iuan nochanejkauan ipan kalpan Armavir, inisiuj mar Negro. Ompa otlakatkej tokoneuan tlakamej Yaroslav niman Pavel.

 Nion xtiuejkauiyaj ompa ijkuak policías akin tekitiyaj itech KGB opeuj kitejtemouaj ipan tochan amatlajkuiloltin tlen tlajtouayaj itech Biblia. Nochiuiyan kitejtemouayaj, hasta itech intlakual touakaxuan. Se tonajli, policías melak nitonijtoyaj pampa tona katka, niman intlaken melak yotlaltexinka. Maria okimikneli, pampa kimatiya ika yejuamej san tetlakamatiyaj. Kuakon, okinmakak itlaj tlen koniskej niman okinmakak tlen ika kichipauaskej intlaken, noijki okinmakak atl, niman tlen ika nouatsaskej. Sakin, ijkuak intlayekankauj itech KGB oajsik, policías okijlikej kenon melak kuajli otikinchiuilijkej. Ijkuak ooneujkej, intlayekankauj otechixuetskili niman otechtlajpalo ijkuak oyaj. Melak otechyolpakti ijkuak otikitakej tlenon uelis panos ijkuak tokojtiliaj tiktlakamatiskej yejuin: “Ika on tlen kuajli xtlanikan on tlen xkuajli” (Rom. 12:21).

Maski tlatejtemouayaj tochan, ok titenojnotsayaj ipan Armavir. Noijki, otikpaleuijkej se pitentsin grupo itech tenojnotskej ipan se kalpan nisiuj Kurgáninsk. Nechyolpaktia nikijtos ika aman onka chikuasen tlanechikoltin ipan Armavir niman naui kampa Kurgáninsk.

Nochi yejuin xiujtin, otikpixkej tonaltin ijkuak totlaneltok xok melak chikaujtoya. Melak tiktlasojkamachiliaj Jehová pampa okintekitilti tokniuan yolmelaujkej akin otechyektlalijkej niman otechyolchikaujkej (Sal. 130:3). Noijki melak ouijtika katka tiktekichiuiliskej Jehová intsajlan sekimej akin xtikmatiyaj tla tekitiyaj itech KGB niman nemiyaj ipan tlanechikojli. Yejuamej melak tenojnotsayaj niman teititiayaj ika kitlasojtlayaj tlen melauak. Sekimej hasta okiselijkej tekitl ipan ikalpan toTajtsin. San ika, sakin otikmatkej akinomej yemelak katkaj.

Ipan 1978, ijkuak Maria kipiaya 45 xiuitl, oksejpa okoneuajtiak. Pampa kualouaya itech iyojlo, tepajtikej kinemiliayaj ika ueliskia itlaj xkuajli ipan nochiuas niman okiyejyekojkej kinekiltiskej makitlajkali ikoneuj. Yejua xokinek. Kuakon sekimej tepajtikej kitotokatinemiyaj nochiuiyan ipan hospital ika se jeringa niman ijkon kitlaliliskiaj se pajtli tlen kichiuaskia makitlajkali ikonetsin. Pampa kinekiya kitlajpilis ikonetsin, Maria ocholoj itech hospital.

Pampa KGB otechnauati matikisakan itech yejon kalpan, otiajkej ipan se pitentsin kalpan nisiuj Tallin, ipan Estonia, tlen onkatka ipan itlal Unión Soviética ipan yejon tonaltin. Ompa, maski miyek tlen yokijtokaj tepajtikej, Maria okipix se konetsintli akin chikaujtoya, niman otiktokayotijkej Vitaly.

Sakin, otikiskej itech Estonia niman otajsikej Nezlobnaia, tlen onka itech Sur de Rusia. Melak totlajpiayaj ijkuak titenojnotsayaj ipan kalpamej tlen nisiuj onkatkaj, kampa ajsiyaj miyekej akin onnopajtiayaj niman miyekan ualeuayaj. Tlaltikpakchanejkej yayaj ompa pampa kinekiyaj pajtiskej, san ika, sekimej nokuepayaj ika se tlamachialistli itech se nemilistli tlen xkeman tlamis.

Melak otokojtilijkej tikinmachtiskej tokoneuan makitlasojtlakan Jehová niman makinekikan kitekichiuiliskej. Niman tikinnotsayaj tochan oksekimej tokniuan akin kinmakayaj se kuajli neskayotl tokoneuan. Se akin melak techualitaya katka nokniuj Grigory, akin otlapaleui ken tlayekanketl ipan circuito ipan xiujtin 1970 hasta 1995. Nochimej melak tikuelitayaj ijkuak uajlaya pampa nochipa melak pakiya niman melak techuetskitiaya. Kemantika imiuan tauiltiayaj akin uajlayaj tochan itech tlen uajnestiuj ipan  Biblia, niman yejon okinpaleui tokoneuan makitlasojtlakan tlen onka ipan Biblia.

Ipan 1987, tokoneuj Yaroslav oyaj kalpan Riga, ipan Letonia, ompa tekauiliayaj titenojnotsas. San ika, pampa xokinek kalakis kampa temachtiaj kenon titlaixnamikis ipan Guerra, okitsajkej se xiuitl uan tlajko. Chiknaujkan okitsajkej. Tlen nejua onikijlika itech tlen onikixnamik ijkuak nitsauktoya, okipaleui matlaxiko. Sakin, opeuj tekiti ken precursor. Ipan 1990, Pavel, akin kipiaya 19 xiuitl, okinek tepaleuis ken precursor kampa Sajalín, se atlajkotian itech norte de Japón. Ijkuak kemach otikmatkej yejon, xotikuelitakej. San nemiyaj 20 tenojnotskej ipan nochi yejon atlajkotian niman tochan nokauaya 9,000 kilómetros ika uejka. Maski ijkon, otijkauilijkej mauiya. Niman kuajli ika otiktlapejpenijkej yejon. Tlaltikpakchanejkej kuajli okiselijkej tlajtoltin itech Tekiuajyotl. Achijtsin xiujtin sakin yonochijchiujkaj chikueyi tlanechikoltin. Pavel otenojnots ipan Sajalín hasta ipan 1995. Ipan yejon tonaltin, san Vitaly, totelpoch akin xokoyotl, ok chantiya touan. Ijkuak kemach konetl katka melak kuelitaya kiamapouas Biblia. Ijkuak kemach kipiaya 14 xiuitl onochiuj precursor, niman nejua noijki oninochiuj precursor ome xiuitl. Melak kualtsin tlen otipanokej. Ijkuak kipiaya 19 xiuitl, Vitaly okikauj tochan pampa opeuj tekiti ken precursor especial.

Ipan 1952 se policía itech KGB okijlika Maria: “Xkajkaua motlaneltokil noso titsauktos majtlaktli xiujtin. Ijkuak tikisas, tilamajtsin yes niman moselti timokauas”. San ika, yejon nion achijtsin xijkon onochiuj. Yejua niman nejua yotikmachilijkej kenon toTajtsin Jehová, tokoneuan niman nochimej akin otikinmachtijkej tlen melauak, melak techtlasojtlaj. Noijki melak otikuelitakej san sekan tiaskej niman tonpaxaloskej kampa tlapaleuijtoyaj tokoneuan pampa ompa otikitakej kenon tokniuan melak kitlasojkamatij ika tokoneuan okinpaleuijkej makixmatikan tlen melauak.

Ipan 1991, iteixpantijkauan Jehová okimijkuilojkej ixpan tekiuajkej. Yejuin okichiuj ika tekitl itech tenojnotsalistli maueyiya. Totlanechikol hasta okikouj se autobús niman ijkon itlamiyan semana tiueliskiaj tiaskej ipan okseki kalpamej tlen toyeualiyan onkatkaj.

Melak nechyolpaktia ika Yaroslav iuan isiuauj, Alyona, niman Pavel iuan isiuauj, Raya, tekitij ipan Betel. Noijki ika Vitaly niman isiuauj, Svetlana, tlapaleuiyaj ipan circuito. Irina chanti Alemania, niman iueuentsin, Vladimir, niman yeyi inkoneuan tlayekankej ipan tlanechikojli. Olga chanti Estonia niman miyekpa nechuajnotsa. Teajman ika nosiuatsin, Maria, omik ipan xiuitl 2014. Ika nochi noyojlo nikchiatika oksejpa nikitas ijkuak yoliuis. Aman nichanti ipan Bielgorod, niman tokniuan ipan tlanechikojli melak nechpaleuiyaj.

Ipan nochi yejuin xiujtin yoniuel ika ouijtika tiyolmelaujkanemis itech toTajtsin, san ika, yolseuilistli tlen Jehová techmaka ipampa yejon, melak ueyi kijtosneki. Pampa otikxikojkej tlen ouijtika, yotikselijkej tlateochiualistin tlen nion xtikinchiayaj. Ijkuak ok onkatka Unión Soviética ipan 1991, nemiyaj kanaj 40,000 tenojnotskej. Amanin, ipan países tlen teuan nemiyaj ipan Unión Soviética, nemij ipantsin 400,000 tenojnotskej. Aman nikpiya 83 xiuitl niman nitekiti ken tlayekanketl. Jehová nochipa yonechmakak kojtilistli tlen nechpoloua tlen ika nitlaxikos. Kema, Jehová yonechmakak miyek tlateochiualistin (Sal. 13:5, 6).