Tlen okijkuilojkej Mateo niman Lucas itech tlen opanok ijkuak Jesús otlakat niman ijkuak san se konetl katka, xsan noijki pampa omemej okijkuilojkej itech tlen kimatiyaj.

Mateo kijtoua tlen opanok iuan José, kijtoua tlenon okichiuj ijkuak okimat ika María koneua katka. Noijki kijtoua itech tlen okitemik José, kampa se iluikaktekitketl okijli tlenon panouaya, niman ika okichiuj nochi tlen okijlikej (Mat.1:19-25). Mateo kitetomilia okse tlen okitemik José kampa se iluikaktekitketl okinauati mauiya Egipto iuan ichanejkauan, niman ika yejua otetlakamat. Noijki tlajtoua itech okse tlen okitemik kampa se iluikaktekitketl okijli manokuepa Israel, niman ika ijkon okichiuj, niman okitlapejpeni nochantis Nazaret iuan ichanejkauan (Mat. 2:13, 14, 19-23, TNM). Ipan kachtopa ome tlaxeloltin uejueyimej itech Mateo, itokayo José miyekpa noteneua, 13, niman itokayo María xmiyekpa, san 10.

Niman Lucas kijtoua tlen ipan onochiuj María. Kijtoua ika iluikaktekitketl Gabriel okitlajpaloto, niman ika María okitato Elisabet, niman ika okiueyiteneuj Jehová (Luc. 1:26-56). Noijki kiteneua tlenon Simeón okijli María itech tlen kixikoskia Jesús. Lucas kijkuiloua tlen okijto María, niman xtlen okijto José ijkuak kitetomilia tlen opanok ijkuak ichanejkauan Jesús oyajkej teopan ijkuak kipiaya 12 xiuitl. Lucas kijtoua ika María xkeman okilkauj nochi tlen ipan opanok (Luc. 2:19, 34, 35, 48, 51). Ipan kachtopa ome tlaxeloltin uejueyimej itech Lucas, itokayo María miyekpa noteneua, 23, niman itokayo José xmiyekpa, san 8. Kuakon, tikitaj ika Mateo kitetomilia tlen okinemili José niman tlen okichiuj, san ika, Lucas kitetomilia tlen okinemili María niman tlen okichiuj.

Tlen okijkuilojkej yejuin omemej tlajkuilojkej itech inuejkachanejkauan María niman José, xsan noijki. Mateo kinamatlalia iuejkachanejkauan José, niman kiteititia ika pampa José itlakpataj Jesús, kuakon Jesús yejua akin kiselia tlen iyaxka tekiuaj David. ¿Tleka? Pampa José ualeuaya itech tekiuaj David itechkopa ikoneuj Salomón (Mat. 1:6, 16). Niman Lucas kinteneua iuejkachanejkauan María, niman kiteititia ika Jesús yejua yemelak ualeua itech tekiuaj David. Yejua katka se iuejkakoneuj David (Rom. 1:3). ¿Tleka? Pampa María ualeuaya itech Natán, se ikoneuj David (Luc. 3:31, 32). San ika, tla ikoneuj Helí katka María, ¿tleka Lucas kiteneua José? Pampa ijkuak noijkuilouayaj familias ixpan tekiuajkej nochipa noteneuayaj intokayo tlakamej. Kuakon, ijkuak Lucas kijtoua ika ikoneuj Helí katka José, nasikamati ika imon katka (Luc. 3:23).

Tlen okijkuilojkej Mateo niman Lucas itech iuejkachanejkauan Jesús, kiteititiaj ika Jesús yejua katka Mesías akin yonoijtoka uajlaskia. Kema, nochimej kimatstoyaj ika yejua tekoneuj katka itech David, niman hasta fariseos niman saduceos xueliskiaj kijtoskej tla xmelauak. Aman, yejon ome tlajkuiloltin itech iuejkachanejkauan Jesús ok kichikaua totlaneltokil niman kichiua matitlaneltokakan itech tlen toTajtsin yokijto kichiuas.