1. ¿Tlenon okijto Isaías itech Jesús, niman tleka yejuin teotlajtojli techyolchikaua?

IPAN se teotlajtojli itech Jesús, Isaías okijto: “Xteyolkuitis ipampa tlen ixtololojuan kitaj, xtechikajkanotsas san ipampa tlen inakasuan kikakij. Yejua kiyolkuitis akin yolyemanki ika melajkayotl” (Is. 11:3, 4). Yejuin tlajtoltin melak techyolchikauaj. ¿Tleka? Pampa tinemij ipan se tlaltikpaktli kampa melak nochikoitalo. Tinochimej techpoloua se akin matechyolkuiti ika melajkayotl, niman Jesús ijkon kichiuas, yejua xkeman teyolkuitis san ipampa tlen kitas.

2. ¿Tlenon otechnauati Jesús, niman tlenon tikitaskej ipan yejuin tlamachtijli?

² Mojmostla itlaj tiknemiliaj intech oksekimej. San ika, pampa titlajtlakolejkej, ouijtika tikimitaj oksekimej ijkon ken Jesús kimita. Tejuamej nimantsin itlaj tiknemiliaj intech oksekimej san ipampa tlen tikitaj. Ika yejon, Jesús otechnauati yejuin: “Ma ka xtetlajtlakolmakakan san isijkapan. Yej san xtlajtlakolmakakan yakaj tla melauak nenkimatij ika okichiu tlen xkuajli” (Juan 7:24). Kuakon, Jesús kineki matikchiuakan ijkon ken yejua kichiua niman maka matitetlajtlakolmakakan noso matitechikoitakan san ipampa tlen tikitaj. Ipan yejuin tlamachtijli, tikitaskej yeyi  tlemach tlen uelis kichiuas yakaj matikchikoitakan: pampa oksekan ualeua, pampa miyek kipiya tomin noso xmiyek kipiya, pampa iueyi noso melak telpochtli. Niman noijki tikitaskej kenon uelis tiktlakamatiskej Jesús niman ijkon xtitechikoitaskej san ipampa tlen tikitaj.

3, 4. a) ¿Tleka apóstol Pedro okipatlak ken kimitaya akin xjudíos katkaj? (Xkita tlaixkopinajli kampa peua tlen tomachtijtokej). b) ¿Tlenon Jehová okimachti Pedro?

³ Xnemili kenon onomachili apóstol Pedro ijkuak okijlikej mauiya ichan Cornelio, akin xjudío katka niman chantiya Cesarea (Hech. 10:17-29). Pedro okimachtijkej ika akin xjudíos, xchipaujkej katkaj niman yejua nochipa ijkon okineltokak. San ika, kemach ipan yopanoka seki tlemach tlen okichiuj makipatla ken tlanemiliaya. Ipampa yejuin, Pedro xok ijkon kimitaya akin xjudíos katkaj. Se neskayotl, okitak se tlatlachalistli tlen ualeuaya itech toTajtsin (Hech. 10:9-16). Ipan tlatlachalistli, Pedro okitak ika itech iluikak itlaj uajtemouaya kentla se “ueyi manta istak” niman tentoya ika yolkamej tlen xchipaujkej katkaj. Pedro noijki okikak se tlajtojli tlen kinauatiaya makinmikti niman makinkua. Yejua kuajli okijto ika xkikuas yejon. Kuakon, se tlajtojli itech iluikak okijli: “Tlen Dios okichipau, ma ka xkijto ika xchipauak”. Sakin ika okitak yejon tlatlachalistli, Pedro xkasikamatiya tlenon kijtosnekiya yejon tlajtoltin. Nimantsin, itech oajsikej sekimej tlakamej akin Cornelio okintitlanka. Espíritu santo okiyekan Pedro mauiya ichan Cornelio, kuakon, yejua oyaj imiuan yejon tlakamej.

⁴  Tla Pedro techikoitaskia san ipampa tlen kitaya, xkeman yaskia ichan Cornelio. Judíos xkeman yayaj inchan akin xjudíos katkaj. Kuakon, ¿tleka oyaj Pedro? Maski yejua kinchikoitaya akin xjudíos katkaj, yejon tlatlachalistli tlen okitak niman itlayekanalis espíritu santo okichiuj maka sa ijkon matlanemili. Sakin ika Pedro okikak Cornelio, yejua okijto: “Aman nikmati ika melauak Dios xkichikoita se tlakatl iuan okse, yej kiselia san katlejua tlakatl yejuan kitlakaita niman kuajli kichiua maski ualeua san katleua país” (Hech. 10:34, 35). Yejuin tlen yenkuik okasikamat Pedro melak okimojkatlachialti, niman yejuin kinpaleuiskia nochimej akin kichiuaj ken Cristo. ¿Tleka tikijtouaj yejuin?

5. a) ¿Tlenon kineki Jehová matikasikamatikan tinochimej akin tikchiuaj ken Cristo? b) Maski tikmatstokej ika toTajtsin xtechikoita, ¿tlenon uelis topan nochiuas?

⁵ Jehová okitekitilti Pedro niman ijkon makinmachti nochimej akin kitokaj Cristo ika toTajtsin xtechikoita. Yejua kinselia nochimej akin kimojkaitaj niman kichiuaj tlen melajki. Jehová xkita tla oksekan tiualeuaj, tla kenon titlachiaj, noso tla sejneka titlajtouaj (Gál. 3:26-28, TNM; Apoc. 7:9, 10). Kanaj tinochimej tikmatstokej yejuin. San ika, tla otitlakatkej ipan se kalpan noso tla tochanejkauan techikoitaj, ¿tikmachiliaj ika kemantika ok tiknekij titechikoitaskej? Maski Pedro okinpaleuijka oksekimej makasikamatikan ika toTajtsin xtechikoita, sakin yejua okiteititi ika ok techikoitaya (Gál. 2:11-14). Kuakon, ¿kenon uelis tiktlakamatiskej Jesús niman xtitechikoitaskej san ipampa tlen tikitaj?

6. a) ¿Tlenon techpaleuis maka sa matitechikoitakan? b) ¿Kenon ones ika se tokniuj otechikoitak ipan tlen okijkuilo?

⁶ Kipiya ika toixtlaloskej niman tikitaskej ipan Biblia tla tikchiujtokej tlen ompa technauatia, yejon techpaleuis matikitakan tla ok titechikoitaj (Sal. 119:105). Noijki, uelis tiktlajtoltiskej se akin iuan touikaj tla kita ika ok titechikoitaj (Gál. 2:11, 14).  Kanaj tejuamej xueli tikitaj tla ok titechikoitaj. Yejuin tlen ipan opanok se tokniuj akin kipiya se tekitl ipan tlanechikojli. Yejua okichijchiuj se amatl tlen okititlan sucursal kampa okijkuilo kenon tekititoya se tokniuj iuan isiuauj. Teueuentsin ualeuaya itech se kalpan tlen miyekej xkitlakaitaj. Tokniuj miyek okijkuilo tlen kuajli kichiujtoya teueuentsin, san ika, noijki okijkuilo: “Maski ualeua [itech yejuin kalpan], ken kichiua niman ken chanti kinpaleuiya oksekimej makasikamatikan ika maski tiualeuas [itech yejon kalpan] xkijtosneki tsokuiltik tichantis ken oksekimej, ijkon ken chantij ichanikniuan”. ¿Tlenon tiuelij itech yejuin? Ika maski tla ueyi noso xueyi tekitl tikpiyaj ipan tlanechikojli, kipiya ika toixtlaloskej niman tikinkakiskej oksekimej tla techijliaj ika ok titechikoitaj. ¿Tlenon okse tlemach uelis tikchiuaskej?

7. ¿Kenon uelis tikteititiskej ika titetlasojtlaj ika nochi toyojlo?

⁷ Tla titetlasojtlaj ika nochi toyojlo, xok titechikoitaskej (2 Cor. 6:11-13). ¿San tiknekij tosentlaliskej imiuan akin noijki tlajtouaj ken tejuamej noso akin ualeuaj kampa tejuamej tiualeuaj? Tla ijkon tikchiuaj, matikyejyekokan noijki tosentlaliskej imiuan tokniuan akin oksekan ualeuaj niman tlamantikej. Uelis tikinnotsaskej touan matenojnotsakan, touan matlakuakan noso touan manosentlalikan (Hech. 16:14, 15, TNM). Ika yolik, ueyiyas totlasojtlalis niman xok titechikoitaskej. Aman matikitakan okse tlemach tlen uelis kichiuas matitechikoitakan san ipampa tlen tikitaj.

8. Itech tlen kijtoua Levítico 19:15, ¿tlenon uelis kichiuas matitechikoitakan?

⁸ Uelis peuas yakaj tikchikoitaskej san pampa kipiya miyek tomin noso pampa xmiyek kipiya. Levítico 19:15 kijtoua: “Kipiya ika nenmelajkej yeskej ijkuak nentetlajtlakolmakaskej. Xkipiya ika nenkichikoitaskej akin xkipiya tomin noso nenkinekiskej nenkipaleuiskej akin kipiya tomin. Ika melajkayotl kipiya ika tiktlajtlakolmakas akin iuan timouika”. ¿Kenon yakaj uelis peuas techikoitas san pampa kita ika yakaj kipiya tomin noso pampa xmiyek kipiya?

9. ¿Tlenon okijkuilo Salomón tlen yemelak nochipa ijkon panoua, niman tlenon tiuelij itech yejuin?

⁹ Espíritu santo okichiuj ika Salomón makijkuilo yejuin tlajtoltin tlen yemelak panoua: “Akin xkipiya tomin hasta akin nisiuj imiuan chanti kitlauelitaj, san ika, miyekej nouikaj iuan akin kipiya miyek tomin” (Prov. 14:20). ¿Tlenon techmachtia yejuin tlaxelojli? Tla xtotlajpiyaj, kanaj san tiknekiskej touikaskej imiuan tokniuan akin kipiyaj miyek tomin niman kanaj xtiknekiskej touikaskej imiuan akin xmiyek kipiyaj. ¿Tleka melak teijtlako tikinchikoitas oksekimej san pampa kipiyaj tomin noso xmiyek kipiyaj?

10. ¿Tlenon okimelajkaijto Santiago?

¹⁰ Tla tikinchikoitaj tokniuan san pampa intomin, uelis titexejxeloskej ipan tlanechikojli. Yejuin tlen panouaya ipan seki tlanechikoltin ipan kachtopa siglo, niman Santiago okinmelajkaijli manotlajpiyakan (xpoua Santiago 2:1-4). Maka matitexejxelokan ipan totlanechikol. Kuakon, ¿tlenon uelis tikchiuaskej niman ijkon xtitechikoitaskej?

11. Xkijto kenon yakaj uelis kijtlakos ken nouika iuan Jehová san pampa kipiya tomin noso xmiyek kipiya.

¹¹ Noneki tikimitaskej tokniuan ijkon ken Jehová kimita. Yejua nochimej kintlasojtla, akin kipiyaj tomin niman akin xkipiyaj. Maka matiknemilikan ika uelis touikaskej iuan toTajtsin pampa miyek tikpiyaj noso pampa xmiyek tikpiyaj. Yemelak ika Jesús okijto ika  ouijtika yeskia ika yakaj akin kipiya miyek tomin makalaki kampa tlanauatis iTekiuajyo toTajtsin, san ika, yejua xokijto tla xuelis kalakis (Mat. 19:23). Aman tej, Jesús noijki okijto: “Dios mechtiochiua nemejuamej pobres, pampa nenkalakiskej ne kampa Dios tekiuajtitikaj” (Luc. 6:20). Ika yejon tlajtoltin xokijtosnek ika nochimej akin xkipiayaj tomin kikakiskiaj niman kiseliskiaj tlateochiualistin. Melak miyekej akin xkipiayaj tomin xokitokakej Jesús. Yemelak tej, xuelis tikijtoskej ika yakaj uelis iuan nouikas toTajtsin san pampa kipiya tomin noso pampa xmiyek kipiya.

12. ¿Tlenon kinnauatia Biblia akin kipiyaj tomin niman akin xmiyek kipiyaj?

¹² Ipan ikalpan Jehová nemij tokniuan akin kipiyaj tomin niman noijki nemij akin xmiyek kipiyaj. Maski ijkon, nochimej kitlasojtlaj Jehová niman kitekichiuiliaj ika nochi inyojlo. Biblia kinnauatia akin kipiyaj tomin maka “ma kitlalikan inyojlo itech on miyek tlen kipiaj, pampa on san panos”. Noijki kimijlia: “Más kuajli tla yej itech Dios kitlaliskej inyojlo” (xpoua 1 Timoteo 6:17-19). Niman noijki kimijlia nochimej akin kitekichiuiliaj Jehová, maski akin kipiyaj tomin noso xmiyek kipiyaj, ika melak teijtlako tiktlasojtlas tomin (1 Tim. 6:9, 10). Tla tikimitaj tokniuan ijkon ken kimita Jehová, xtikinchikoitaskej san ipampa tlen kipiyaj noso xkipiyaj. San ika ¿kuajli yeskia tikinchikoitaskej san pampa iuejueyimej noso pampa telpokamej?

13. ¿Tlenon techmachtia Biblia itech ken tikimitaskej akin iuejueyimej?

¹³ Biblia miyekpa technauatia matikintlakaitakan akin iuejueyimej. Levítico 19:32 kijtoua: “Ixpan akin yokuaistayak noneki xmokuiteua, niman noneki tiktlakaitas akin youeuentsintiak, niman noneki tikmojkaitas moTajtsin”. Proverbios 16:31 techijlia ika “kuaistajli se kualtsin corona ijkuak onka ipan ojtli tlen melajki”. Pablo okijli Timoteo: “Ma ka xkajua yejuan ueuentsin, yej san xtlakanonotsa ken yakaj motaj yeskia” (1 Tim. 5:1, 2). Maski Timoteo tlayekanaya ipan tlanechikojli, yejua kipiaya ika kintlakaitas tokniuan niman kimiknelis.

14. ¿Kemanon noneki matikmelajkatlalikan se akin iueyi?

¹⁴ ¿Tlenon uelis tikijtoskej tla se akin iueyi kichiua tlen xkuajli maski kimatstika ika xkipiya ika kichiuas noso kiteijlia manochiua itlaj tlen xkiyolpaktia Jehová? Maski iueyi niman kitlakaitaj, Jehová kitlajtlakolmakas. Matikitakan tlenon kijtoua Isaías 65:20: “Akin tlajtlakos kiuijuikaltiskej, maski makipiya cien xiuitl”. Ipan tlatlachalistli tlen okitak Ezequiel noijki yejon techmachtia (Ezeq. 9:5-7). Ijkon tej, tikitaj ika melak noneki matiktlakaitakan Jehová, “Akin yeuejkaui itech Tonaltin” (Dan. 7:9, 10, 13, 14). Tla tiktlakaitaj, tikpiyaskej yolchikaualistli niman ijkon tikpaleuiskej akin noneki makimelajkatlalikan, maski tla melak iueyi (Gál. 6:1).

15. ¿Tlenon techmachtia apóstol Pablo itech tikintlakaitaskej tokniuan telpokamej?

¹⁵ Aman tej, ¿kenon noneki tikimitaskej akin telpokamej? Pablo okijkuilouili Timoteo: “Motech ma kitakan on yejuan tlaneltokaj ken ijki titlajtlajtoua, ken ijki timouika, ken ijki titetlajsojtla, ken ijki titlaneltoka, niman ika monemilis chipauak para ijkon xuelis yakaj mitspijpinauis pampa san titelpochtli” (1 Tim. 4:12). Ijkuak Pablo okijkuilouili yejuin, Timoteo kipiaya kanaj 30 xiuitl. Maski ijkon, Pablo okimakak miyek tekitl tlen melak ueyi kijtosnekiya. ¿Tlenon tiuelij itech yejuin? Xkipiya ika tikinchikoitaskej tokniuan telpokamej san pampa xiuejueyimej. Matikilnamikikan ika Jesús  melak miyek okichiuj ijkuak san kipiaya kanaj 33 xiuitl.

16, 17. a) ¿Kenon kitaj tokniuan tlayekankej tla se tokniuj uelis tekitis ken tlapaleuijketl noso ken tlayekanketl? b) ¿Kenon tlayekankej uelis san kichiuaskej tlen yejuamej kinemiliaj niman xkichiuaskej tlen kijtoua Biblia?

¹⁶ Ipan seki kalpamej, tlaltikpakchanejkej xkintlakaitaj akin telpokamej. Ika yejon, sekimej tlayekankej xkiteijliaj tla se tokniuj uelis tekitis ken tlapaleuijketl noso ken tlayekanketl, maski yejua ikichiujtika tlen notlajtlani. Tlayekankej noneki makilnamikikan ika Biblia xkeman kijtoua kech xiuitl noneki kipiyas akin iuelis tekitis ken tlapaleuijketl noso ken tlayekanketl (1 Tim. 3:1-10, 12, 13; Tito 1:5-9). Tla se tlayekanketl kijtoua kech xiuitl noneki kajxiltis se tokniuj niman ijkon uelis tekitis, san pampa ijkon nochiua kampa yejua chanti, yejua xkitlakamatstika iTlajtol toTajtsin. Tlayekankej xkipiya kinchikoitaskej tokniuan telpokamej san ipampa tlen yejuamej kinemiliaj niman tlen kinemiliaj inchanikniuan. Noneki makitakan tlenon kijtoua iTlajtol toTajtsin (2 Tim. 3:16, 17).

¹⁷ Tla tlayekankej tlanemiliaj ken inchanikniuan niman xkitaj tlen kijtoua Biblia, kanaj xkiteijliskej ika sekimej tokniuan uelis tekitiskej ken tlayekankej noso ken tlapaleuijkej maski ikichiujtokej tlen notlajtlani. Ipan se kalpan, se tlapaleuijketl miyek tekitl kichiuaya ipan tlanechikojli, niman tlayekankej okitakej ika kichiujtoya nochi tlen Biblia kitlajtlani niman ijkon tekitis ken tlayekanketl. San ika, sekimej tlayekankej akin iuejueyimej katkaj okijtokej ika nesiya melak telpochtli niman xkinamikiya manochiua tlayekanketl. Kuakon, xokiteijlikej ika ueliskia tekitis ken tlayekanketl. Teajman ika ijkon okichiuilijkej yejuin tokniuj san pampa nesiya melak telpochtli. Niman nesi ika miyekej tlayekankej ijkon tlanemiliaj. Melak noneki matikitakan tlenon kijtoua Biblia niman maka matikchiuakan tlen tejuamej tiknemiliaj noso tlen oksekimej kinemiliaj. Tla ijkon tikchiuaj, tiktlakamatstoskej Jesús niman xtitechikoitaskej san ipampa tlen tikitaj.

18, 19. ¿Tlenon noneki tikchiuaskej niman ijkon tikimitaskej tokniuan ijkon ken kimita Jehová?

¹⁸ Maski titlajtlakolejkej, uelis tikimitaskej oksekimej ijkon ken kimita Jehová (Hech. 10:34, 35). Kuakon, nochipa matokojtilikan matikchiuakan tlen techijlia iTlajtol toTajtsin. Tla ijkon tikchiuaj, tiktlakamatstoskej itlanauatil Jesús kampa techijlia maka sa matikinchikoitakan oksekimej san ipampa tlen tikitaj (Juan 7:24).

¹⁹ Sa achijtsin poliui ijkuak totekiuaj Jesucristo kinyolkuitis nochimej tlaltikpakchanejkej. Yejua xteyolkuitis ipampa tlen kitas noso ipampa tlen kikakis. Yejua teyolkuitis ika melajkayotl (Is. 11:3, 4). ¡Melak tiknekij mayejko yejon tonajli!