¿TIKUELITASKIAJ tikpiyaskej se tekitl ipan tlanechikojli, san ika, tikitaj ika xuelis tikpiyaskej? Kanaj tikuelitaskiaj tikchiuaskej se tekitl tlen kichiua okse tokniuj noso kanaj oksejpa tiknekij tikchiuaskej yejon tekitl tlen yeuejkaui tikchiuayaj. San ika, kanaj xok tikpiyaj chikaualistli, tikualoj, xtikpiyaj miyek tomin noso noneki tikchiuaskej okse tekitl tlen xtechkauilia matikchiuakan tlen tiknekij. Noso kanaj otiuejkaujkej tikpiyaj se tekitl ipan ikalpan toTajtsin, san ika, otechijlikej ika xok tikpiyaskej yejon tekitl. Maski san tlenon tikixnamikij, kanaj tikmachiliaj ika xtiktekichiuilijtokej Jehová ken tikuelitaskiaj. Yejon kichiua ika kemantika maka kuajli matomachilikan. San ika ¿tlenon techpaleuis maka matajmanakan, matajmankamikikan noso matitlauelmikikan? ¿Kenon uelis nochipa tiyolpakiskej?

Tlen okichiuj Juan Teapolaktijketl techpaleuiya matikmatikan kenon uelis tiyolpakiskej. Yejuin itekipanojkauj toTajtsin okimakakaj tekitl tlen ueyi kijtosnekiya. San ika, kanaj xkeman okinemili tlen ipan nochiuaskia. Yejua más ouejkauj ipan cárcel xijkon ken ipan tenojnotsalistli. Maski ijkon, Juan nochipa onen ika iyojlo. ¿Tlenon okipaleui? ¿Niman kenon uelis tiyolpakiskej maski tikixnamikiskej tlen ouijtika?

Kanaj ipan abril itech xiuitl 29, Juan opeuj kiteijlia ika uajlaskia Mesías, ijkon ken toTajtsin yokinauatijka. Kiteijliaya: “Xkajkauakan ika nenkichiuaj on tlen xkuajli, pampa ye uajlau on tonaltin ijkuak Dios tlamandaros nikan ken tlamandaroua ne iluikak” (Mat. 3:2; Luc. 1:12-17). Miyekej kuajli okikakej Juan. Kema, miyekej konitayaj Juan niman ijkon kikakiskej maski uejka ualeuayaj, miyekej onoyolkuepkej niman onoapolaktijkej. Juan noijki xonomojti kimijlis tlayekankej ipan tlaneltokijli ika toTajtsin kintlajtlakolmakaskia tla xnopatlayaj (Mat. 3:5-12). Oajsik tonajli ijkuak Juan okichiuj se tekitl tlen melak ueyi kijtosnekiya: okiapolakti Jesús ipan octubre itech xiuitl 29. Sakin, Juan opeuj teyolchikaua makitokakan Jesús, akin Mesías katka (Juan 1:32-37).

Juan okichiuj se kualtsin tekitl, yejua ika, Jesús okijto ika “intsajlan nochimej on tlakamej xkaman yakaj otlakat yejuan más ueyixtikaj” ken Juan Teapolaktijketl (Mat. 11:11). Kuajli tikmatstokej  ika Juan kipatiojkaitaya nochi tlen kichiuaya ipampa Jehová niman ika yolpakiya ipampa nochi tlateochiualistin tlen kiseliaya. Ijkon ken Juan, miyekej tokniuan akin chikauak yokitekichiuilijkej Jehová, noijki yokiselijkej miyek tlateochiualistin. Matitlajtokan itech tokniuj Terry. Yejua iuan isiuauj, Sandra, youejkaujkej 50 xiuitl ika chikauak kitekichiuiliaj Jehová. Terry kijtoua: “Yonikpix miyek tlateochiualistin, yonitlapaleui ken precursor regular, ken betelita, ken precursor especial, ken tlayekanketl ipan circuito niman distrito, niman aman oksejpa niprecursor especial”. Melak tiyolpakij ijkuak tikseliaj ken yejuin tekitl. San ika, ijkon ken tikitaskej itech Juan, xnoneki tikpiyaskej miyek tekitl ipan ikalpan toTajtsin niman ijkon tiyolpakiskej, niman noijki tikitaskej ika noneki tokojtiliskej tla tiknekij nochipa tiyolpakiskej maski itlaj nopatlas ipan tonemilis.

Juan Teapolaktijketl kitlasojkamatiya itekiyo tlen toTajtsin okimakaka niman yejon okipaleui nochipa mayolpaki. Sakin ika Juan okiapolakti Jesús, miyekej opeuj kitokaj Jesús niman san achijtsitsintin onokaujkej akin kitokayaj Juan. Kuakon, sekimej inomachtijkauan okijlikej ika Jesús teapolaktiaya niman ika miyekej yopeujkaj kitokaj (Juan 3:26, TNM). Juan okinnankili: “Ne kampa nonamiktilo, on novio yejua kiselia on novia. Niman itlajsojkaikniu on novio no sanoyej paki ijkuak kaki tlajtlajtoua on novio. Nejua ken niitlajsojkaikniu on novio. Yejua ika tej, sanoyej nipaki ijkuak nikaki ika nochi tlakatl yau itech Jesús” (Juan 3:29). Juan xkitaya tla iuan notlatlantoya Jesús. Niman maski itekiyo Jesús más ueyi kijtosnekiya, yejua xokinemili tla itekiyo xitlaj kijtosnekiya. Juan yolpakiya pampa kipatiojkaitaya ika katka itlasojkaikniuj “on novio”.

Tikitaj ika Juan kuajli tlanemiliaya, niman yejon tlen okipaleui mayolpaki maski ouijtika katka itekiyo. San matikonnemilikan yejuin, yejua katka nazareo desde ijkuak otlakat, ika yejon, xueliskia konis vino (Luc. 1:15). Jesús okiteneuj kenon katka inemilis Juan, yejua okijto: “Ijkuak Juan ouajlaj, nosauaya niman xitlaj koniya”. San ika, Jesús iuan inomachtijkauan xnazareos katkaj niman ueliyaj kichiuayaj miyek tlemach (Mat. 11:18, 19). Maski Juan xkeman okichiuj milagros, yejua kimatstoya ika inomachtijkauan Jesús kema ueliyaj niman ika sekimej akin yejua inomachtijkauan katkaj, noijki okinmakakaj yejon kojtilistli (Mat. 10:1; Juan 10:41). San ika, Juan xsan tlanemilijtoya itech tlen oksekimej ueliyaj kichiuayaj, yejua kichiujtoya itekiyo tlen toTajtsin okimakaka.

Tla tejuamej noijki tikpatiojkaitaj tlen amantsin tikchiuaj ipampa Jehová, nochipa tiyolpakiskej. Terry, akin yotikteneujkaj, kijtoua: “Nochipa nitlanemiliaya ipan tekitl tlen toTajtsin nechmakaya”. Ijkuak tokniuj kilnamiki nochi tlen okichiuj ipampa Jehová, kijtoua: “Xninoyolkuepa nion achijtsin, san nikilnamiki tlen kualtsin onikchiuj yeuejkaui”.

Uelis más tiyolpakiskej tla tiknemiliaj ika nochi tekitl tlen Jehová techmaka melak ueyi kijtosneki pampa ijkon tiuelij titekitij iuan Jehová (1 Cor. 3:9). Matiknemilikan yejuin: tla itlaj youejkauj tikpiyaj, san ika, tiktlajpiyaj niman tikpopouaj, melak kualtsin nesis. Noijki ijkon, tejuamej nochipa tipakiskej tla nochipa tiknemiliaj ika se ueyi tlateochiualistli titekitiskej iuan Jehová. Xtiknemiliskej ika oksekimej más kuajli kitekichiuiliaj Jehová. Noijki, xtiknemiliskej ika tekitl tlen yotechmakak Jehová xueyi kijtosneki niman ika tlen kinmaka oksekimej más ueyi kijtosneki (Gál. 6:4).

Juan kanaj kimatstoya ika xuejkauiskia itekiyo tlen Jehová okimakaka, san ika, kanaj xkimatiya ika melak nimantsin tlamiskia (Juan 3:30). Ipan xiuitl 30, ijkuak san kemach yopanoka chikuasen metstli ika Juan okiapolaktijka Jesús, tekiuaj Herodes okitsauk Juan. Maski ijkon, Juan nochipa otenojnots (Mar. 6:17-20). ¿Tlenon okipaleui mayolpaki maski okixnamik tlen ouijtika? Yejua tlanemiliaya ipan tlen kichikauaya itlaneltokil.

Ijkuak tsauktoya, Juan okimat nochi tlen Jesús kichiujtoya (Mat. 11:2; Luc. 7:18). Juan kimatstoya ika Jesús katka Mesías, san ika, kanaj notlajtoltiaya kenon Jesús kichiuaskia nochi tlen iTlajtol toTajtsin kijtouaya kichiuaskia Mesías. Kanaj notlajtoltiaya tla Jesús nimantsin peuaskia tlanauatis  noso tla kikixtiskia kampa tsauktoya. Juan kinekiya kuajli kasikamatis tlenon kichiuaskia Jesús. Kuakon, okomintitlan omemej inomachtijkauan makitlajtoltitij “tla yejua melauak Cristo yejuan ye onkatka para uajlas, noso yej kichaskej okse” (Luc. 7:19). Kuajli tikmatstokej ika Juan kuajli okikak tlen inomachtijkauan okijlikej niman tlen Jesús okimijli makijlikan: “Aman tlachaj on yejuan ciegos katkaj, niman on yejuan uilatsitsimej katkaj kistinemij, niman on yejuan palaniya innakayo pajtij, niman on yejuan tsatsamej katkaj tlakakij, niman on mikatsitsimej yoliuij niman nokuiteuaj ipan intlalkon. Niman [...] on yejuan mayankej kakij on kuajli tlajtojli” (Luc. 7:20-22).

Tikmatstokej ika Juan onoyolchikauj ijkuak okikak yejuin, pampa kuajli nesiya ika Jesús kichiujtoya tlen yonoijtoka itech Mesías. Maski Jesús xkichiuaskia makisa Juan kampa tsauktoya, Juan kimatstoya ika itekiyo xsan nenka katka. Juan yolpakiya maski kixnamiktoya tlen ouijtika.

Tla tikchiuaj ken Juan niman titlanemiliaj ipan tlen kichikauas totlaneltokil, titlaxikoskej “ikan miyek ijyouilistli niman pakilistli” (Col. 1:9-11). Uelis ijkin titlaxikoskej tla tikpouaj Biblia niman tla itech titlanemiliaj, pampa yejuin techpaleuiya matikitakan ika xsan nenka tiktekichiuiliaj Jehová (1 Cor. 15:58). Sandra, akin yotikteneujkaj, kijtoua: “Nikpoua mojmostla se capítulo itech Biblia niman yejuin nechpaleuiya más maniknisiui Jehová niman itech manitlanemili. Xsan notech nitlanemilia”. Noijki uelis titlanemiliskej itech tlen ikalpan toTajtsin techijlia ika kichiujtika. Tla ijkon tikchiuaj, xsan titlanemiliskej itech tlen tikixnamiktokej, más titlanemiliskej itech tlen Jehová kichiujtika. Sandra noijki kijtoua: “Tlen nochi metstin tikitaj ipan JW Broadcasting techpaleuiya matikmachilikan ika nisiuj tinemij itech ikalpan toTajtsin niman techpaleuiya matiyolpakikan kampa amantsin titlapaleuijtokej”.

Juan Teapolaktijketl okichiuj itekiyo tlen xouejkauj “ikan iyolchikaualis niman poder ken on yejuan okipix on tiotlajtojketl Elías”. Niman ijkon ken Elías, Juan noijki katka ken tejuamej (Luc. 1:17; Sant. 5:17). Tla tiktlasojkamatij totekiyo tlen yotechmakakej niman tla titlanemiliaj ipan tlen kichikauas totlaneltokil ijkon ken okichiuj Juan, noijki uelis tiyolpakiskej maski san tlenon mapano.