1. ¿Tlenon tikuelitaskiaj makichiuakan tochanejkauan?

“IJKUAK onikixmat tlen melauak, oniknek ika nochimej nochanejkauan nouan manemikan ipan xochitlalpan. Niman melak niknekiya ika noueuentsin Wayne niman tokonetsin san sekan matiktekichiuilikan Jehová”, ijkon okijto se tokniuj siuatl itoka Pauline. * Tla sekimej tochanejkauan xkixmatij niman xkitlasojtlaj toTajtsin, kanaj noijki ijkon tomachiliaj ken yejuin tokniuj.

2. ¿Tlenon tiknankiliskej ipan yejuin tlamachtijli?

² Xuelis tikinchiualtiskej tochanejkauan makiselikan tlen melauak itech toTajtsin. San ika, kema uelis tikinpaleuiskej makikakikan iTlajtol toTajtsin (2 Tim. 3:14, 15). ¿Tleka noneki tikinnojnotsaskej tochanejkauan? ¿Tleka noneki tikinmasikamatiskej? ¿Niman kenon ueliskej techpaleuiskej tokniuan akin nemij ipan totlanechikol?

3. Ken kijtoua 2 Pedro 3:9, ¿tleka noneki tikinnojnotsaskej tochanejkauan?

³ Sa achijtsin poliui ika Jehová kipopolos yejuin tlaltikpaktli kampa tlayekana Satanás. San makisaskej akin melauak kinekiskej kipiyaskej nemilistli tlen xkeman tlamis (Hech. 13:48, TNM). Melak tokojtiliaj tikinnojnotsaskej akin nion xtikimixmatij,  kuakon, xtemojkatlachialti ika tiknekij tikinnojnotsaskej tochanejkauan niman ijkon makitekichiuilikan Jehová. ToTajtsin iluikakchane “nion se tlakatl xkineki ma poliui, yej kineki para nochimej ma noyolpatlakan” (xpoua 2 Pedro 3:9).

4. ¿Kemantika kenon tikinnojnotsaj tochanejkauan?

⁴ Noneki tikilnamikiskej ika uelis titenojnotsaskej ken kinamiki noso ken xkinamiki. Kanaj yakaj akin xtikixmatij tiknojnotsaj ika tetlakaitalistli, san ika, kanaj akin tochanejkauan chikauak tikinnojnotsaj.

5. ¿Kenon noneki tikinnojnotsaskej tochanejkauan?

⁵ ¿Tikilnamikij ijkuak kachtopa otikinnojnotskej tochanejkauan? Timiyekej kanaj tajmanaj ijkuak tikilnamikij kenon otikinnojnotskej niman tiknemiliaj ika ueliskia más kuajli tikinnojnotsaskiaj. Apóstol Pablo okimijlika tokniuan: “Noneki nochipa nenteyeknojnotsaskej niman nemotlajtol ma yemanki para kuelkakiskej. Niman no noneki nenkimatiskej kenijki nenkinankiliskej cada se” (Col. 4:5, 6). Melak techpaleuis tla xtikilkauaj yejuin tlajtoltin ijkuak tikinnojnotsaskej tochanejkauan. Tla xijkon tikchiuaj, tochanejkauan kanaj xkinekiskej matikinnojnotsakan itech toTajtsin.

6, 7. Xkijto se neskayotl kampa makiteititi ika akin yononamiktijkej noneki makimasikamatikan imixnamik akin xnomachtia.

⁶ Matiteasikamatikan. Pauline, akin yotikteneujkaj, kijtoua: “Kachtopa, san niknekiya nitlajtlajtos iuan noueuentsin itech Biblia. Xtitlajtouayaj itech okse tlemach”. San ika, iueuentsin, Wayne, san achijtsin kimatiya itech Biblia niman xitlaj kasikamatiya tlen isiuauj kijliaya. Wayne kitaya ika Pauline san tlanemiliaya itech itlaneltok noso ireligión.  Kinemiliaya ika isiuauj yokalajka ipan se secta tlen xkuajli kampa san kikajkayaujtoyaj.

⁷ Pauline kinokuitia ika uejkauiya nemiya imiuan tokniuan, kema, imiuan nemiya ipan tlanechikoltin, imiuan ontenojnotsaya niman imiuan nosentlaliaya. Pauline kijtoua: “Kemantika, ijkuak Wayne ajsiya tochan, xakaj ompa nemiya niman san iselti nomachiliaya”. Wayne kitemouaya isiuatsin niman ikoneuj. Noijki, xkimixmatiya tokniuan akin isiuauj imiuan nosentlaliaya niman okinemili ika isiuauj san kinekiya nemis imiuan ikniuan. Kuakon, Wayne okijli isiuauj ika kikauaskia. ¿Xmelak ika Pauline ueliskia más kasikamatis iueuentsin?

8. Ken kijtoua 1 Pedro 3:1, 2, ¿tlenon más kitaj tochanejkauan?

⁸ Matikchiuakan tlen kuajli. Miyekpa, tochanejkauan más kitaj tlen tikchiuaj xijkon ken tlen tikijtouaj (xpoua 1 Pedro 3:1, 2). Pauline sakin okasikamat yejon. Yejua kijtoua: “Nikmatstoya ika Wayne techtlasojtlaya niman xkinekiya techkauas. San ika, tlen onechijli onechasikamachilti ika nonekiya nikchiuas ken Jehová kijtoua. Xnonekiya melak nitlajtos, nonekiya nikchiuas tlen kuajli”. Kuakon, Pauline xok kichiualtiaya iueuentsin iuan matlajto itech Biblia, aman, opeuj iuan tlajtoua itech tlen ipan onochiuj ipan yejon tonajli. Wayne okitak ika isiuatsin más kitlakaitaya niman ika ikoneuj kichiuaya tlen kuajli (Prov. 31:18, 27, 28). Ijkuak okitak ika Biblia melak kinpaleuijtoya ichanejkauan, Wayne más okinek kikakis tlen kijtoua iTlajtol toTajtsin (1 Cor. 7:12-14, 16).

9. ¿Tleka xnoneki tosiaujkauaskej?

⁹ Maka matosiaujkauakan. Jehová techititia ika yejua xnosiaujkaua. Yejua miyekpa  kinpaleuiya tlaltikpakchanejkej makikakikan iTlajtol niman makiselikan nemilistli (Jer. 44:4). Apóstol Pablo okijli Timoteo nochipa makinpaleuijto oksekimej pampa san ijkon nomakixtiskia niman kinmakixtiskia akin kikakiskiaj (1 Tim. 4:16). Pampa tikintlasojtlaj tochanejkauan, tiknekij makimatikan tlen Biblia temachtia. Pauline opeuj kichiua tlen kuajli niman yejon melak okinpaleui ichanejkauan. Aman yolpaki pampa kitekichiuilia Jehová iuan iueuentsin, nochimej precursores niman Wayne tlapaleuiya ken tlayekanketl.

10. ¿Tleka noneki titeijyouiskej?

¹⁰ Matiteijyouikan. Ijkuak opeuj tikintlakamatij itlanauatiluan toTajtsin, opeuj topatlaj niman opeuj tikneltokaj tlen kijtoua Biblia. Tochanejkauan kanaj xuelij kineltokaj tleka ijkon opeuj tikchiuaj. Kanaj yokitakej ika xok imiuan tiiluipanouaj niman ika xok tokalaktiaj ipan política. Niman kanaj sekimej yopeujkej techtlauelitaj (Mat. 10:35, 36). San ika, xkipiya ika tiknemiliskej tla xkeman nopatlaskej. Tla xok tokojtiliaj tikinpaleuiskej makasikamatikan tlen tikneltokaj, kuakon, kijtosneki yotiknemilijkej ika xkinnamiki makiselikan nemilistli tlen xkeman tlamis. San ika, xtejuamej totekiyo tikijtoskej yejon. Jehová yokitekitlali Jesús niman ijkon yejua makita akinomej kiseliskej noso xkiseliskej nemilistli (Juan 5:22). Tla tikimijyouiyaj tochanejkauan, kanaj sakin kinekiskej kikakiskej iTlajtol toTajtsin (xkita recuadro “ Matijkuikan página tlen tikpiyaj ipan Internet”).

11-13. ¿Tlenon tiuelij itech tlen okichiuj Alice?

¹¹ Kuajli matitenotsakan, san ika, matikchiuakan ken yotikijtokej (Prov. 15:2). Matikitakan tlenon okichiuj Alice. Yejua okixmat tlen melauak ijkuak xchantiya imiuan itajuan. Itajuan xtlaneltokayaj itech toTajtsin niman melak nokalaktiayaj ipan política. Alice okasikamat ika nimantsin nonekiya kimijlis itajuan nochi tlen kualtsin youelka. Yejua kijtoua: “Mochanejkauan melak kualaniskej tla xnimantsin tikinnojnotsa itech tlen aman tikneltoka”. Ika yejon, opeuj komintlajkuilouilia itajuan, komintitlaniliaya cartas kampa tlajtouaya itech itlaj tlen kijtoua Biblia niman tlen yejua kinemiliaya kuelitaskej itajuan, ken itech tlasojtlalistli (1 Cor. 13:1-13). Kintlasojkamachiliaya itajuan pampa okiskaltijkej niman okitlajpixkej, niman komintitlaniliaya tetlayokoliltin. Ijkuak komintlajpalouaya, melak nokojtiliaya kipaleuis inan niman iuan tekichiuaya. San ika, ijkuak Alice opeuj kinnojnotsa itajuan itech tlen aman kineltokaya, yejuamej okualankej.

¹² Alice mojmostla kipouaya Biblia, niman ijkuak nemiya ichan itajuan, ok ijkon kichiuaya. Kuakon, inan okitak ika Alice kipatiojkaitaya Biblia. Niman itaj okinek nomachtis Biblia niman ijkon kasikamatis tlen aman kineltokaya ichpoch niman kinextis kanon nopopoloua Biblia. Alice kijtoua: “Oniktlayokoli notaj se Biblia, niman onikijkuilouili itlaj ipan yejon Biblia”. ¿Tlenon opanok? Itaj Alice xkanaj okinexti kampa Biblia manopopolo; melak okuelitak tlen okipouj.

¹³ Noneki kuajli titenotsaskej, san ika, noneki tikchiuaskej ken yotikijtokej maski tikixnamikiskej tlen ouijtika (1 Cor. 4:12b). Tikitaj ika Alice ononek kijyouis ika inan xkuelitaya ika nomachtiaya Biblia. Alice techijlia: “Ijkuak oninoapolakti, nonan onechijli ika xniktlasojtlaya”. ¿Tlenon okichiuj Alice? Yejua oksejpa kijtoua: “Onitlajto iuan nonan itech yejon ika tetlakaitalistli, onikijli ika yonikijtoka ninochiuas iteixpantijkauj Jehová niman xnikpatlaskia tlen yonikijtoka nikchiuas. Onikijli ika melak niktlasojtlaya. Tiomemej  otichokakej, niman sakin oniktlakualchiuili. Kuakon, nonan opeuj kasikamati ika Biblia melak yonechpaleuijka”.

14. ¿Tleka noneki tikchiuaskej ken yotikijtokej?

¹⁴ Kanaj tochanejkauan xnimantsin kasikamatiskej ika melak tiknekij tiktekichiuiliskej Jehová. Se neskayotl, ijkuak Alice okinek nochiuas precursora niman xokinek nomachtis yejon carrera tlen itajuan yokitlapejpenilijkaj, inan oksejpa ochokak. San ika, Alice okichiuj ijkon ken yokijtoka. Yejua techijlia: “Tla san sejpa tikchiua ken mitsijliaj mochanejkauan, kanaj kinekiskej mitschiualtiskej xchiua okseki itlaj. San ika, tla ika tetlakaitalistli tikimijlia ika tikchiuas ken yotiknemili, kanaj sekimej mitskakiskej”. Ijkon ipan onochiuj yejuin tokniuj. Aman itajuan Alice precursores, niman itaj tlapaleuiya ken tlayekanketl.

15. Ken kijtoua Mateo 5:14-16 niman 1 Pedro 2:12, ¿kenon tlen kuajli kichiuaj tokniuan uelis kinpaleuis tochanejkauan?

¹⁵ Ika tlen kuajli kichiuaj tokniuan, Jehová kinyoltilana tlaltikpakchanejkej (xpoua Mateo 5:14-16; 1 Pedro 2:12). Tla moixnamik xiteixpantijkauj Jehová, ¿kimixmatstok tokniuan akin imiuan timosentlalia? Pauline, akin yotikteneujkaj, kinnotsaya tokniuan mauiyan ichan niman ijkon Wayne makimixmati. Wayne kilnamiki kenon se tokniuj okipaleui maka makinchikoita iteixpantijkauan Jehová. Wayne techijlia: “Yejon tokniuj okitlajtlan ipan itekiyo makikauilikan manoseui se tonajli niman ijkon nouan kitas se partido. Kuakon onikitak ika noijki ijkon katka ken nejua”.

16. ¿Tleka noneki tikinnotsaskej tochanejkauan touan mauiyan tlanechikoltin?

 ¹⁶ Uelis tikinpaleuiskej tochanejkauan tla tikinnotsaj touan mauiyan tlanechikoltin (1 Cor. 14:24, 25). Wayne xkeman yaya ipan se tlanechikojli, san ika, kema oyaj ijkuak onoilnamik imikilis Cristo pampa onochiuj ijkuak yokiska kampa tekiti niman pampa xuejkauiya tlanechikojli. Yejua kijtoua: “Xonikasikamat nochi tlen onoijto, san ika, kema nikilnamiki kenon onechselijkej. Onechnisiuijkej niman melak kuajli onechtlajpalojkej. Onikitak ika yolkuajkualtin”. Se tokniuj iuan isiuauj melak kipaleuiayaj Pauline ika ikoneuj ipan tlanechikoltin niman ijkuak ontenojnotsaya. Kuakon, ijkuak Wayne okinek nomachtis Biblia, Pauline okitlajtlanili yejon tokniuj tlakatl makimachti Wayne itech Biblia.

17. ¿Itech tlenon xnoneki totlajtlakoltiskej, san ika, tleka noneki nochipa matikinpaleuijtokan tochanejkauan?

¹⁷ Tikchiaj maajsi tonajli ijkuak tochanejkauan makitekichiuilikan Jehová. San ika, maski tikchiuaskej nochi tlen tiueliskej niman ijkon tikinpaleuiskej, kanaj xkeman kinekiskej kitekichiuiliskej Jehová. Tla ijkon panoua, maka matotlajtlakoltikan ipampa tlen tochanejkauan kitlapejpeniaj kichiuaskej. Tejuamej xuelis tikinchiualtiskej matlaneltokakan itech Jehová. Maski ijkon, matikteititikan ika tipakij pampa tiktekichiuiliaj Jehová, yejon uelis kinyoltilanas noijki makitekichiuilikan. Matikchiuakan teoyotl inpampa, matikinnojnotsakan itech Biblia ika tetlakaitalistli niman nochipa matikinpaleuijtokan (Hech. 20:20). Matikneltokakan ika Jehová kiteochiuas tlen tikchiuaj inpampa. Niman tla tochanejkauan techkakij, yejuamej makisaskej.