TLAMACHTIJLI 34
Tinochimej uelis titlapaleuiskej ipan tlanechikojli
“Itlalnakayo sen tlakatl miyek partes kipiya. Pero maski miyek tlajtlamach kipiya, san se tlalnakayotl nochiuaj. Tejuamej tej, no ijki titochiuaj itlalnakayo Cristo” (1 COR. 12:12).
TLAKUIKAJLI 101 San sekan matitekitikan
TLEN TIKITASKEJ *
1. ¿Tlenon melak tiktlasojkamatij?
¡MELAK tiktlasojkamatij ika tinemij ipan ikalpan Jehová! Tejuamej tinemij ika yolseuilistli niman melak tiyolpakij ijkuak tiktekichiuiliaj Jehová imiuan oksekimej tokniuan. San ika ¿kenon titlapaleuiyaj toseselti ipan tlanechikojli?
2. ¿Tlenon miyekpa okiteneuj apóstol Pablo ipan iamatlajkuiloluan?
2 Apóstol Pablo miyekan okiteneuj ipan iamatlajkuiloluan itlaj tlen techpaleuiya kuajli matikasikamatikan yejuin. Okijto ika tlanechikojli yeskia ken “itlalnakayo sen tlakatl”, niman akin nemij ipan tlanechikojli yeskiaj ken nochi yejon “partes” tlen kipiya itlalnakayo se tlakatl (Rom. 12:4-8; 1 Cor. 12:12-27; Efes. 4:16).
3. ¿Tlenon tikitaskej ipan yejuin tlamachtijli?
3 Ipan yejuin tlamachtijli, tikitaskej yeyi tlemach tlen tiuelij itech tlen apóstol Pablo okijto. Kachtopa, tikitaskej ika toseselti tikpiyaj se tekitl ipan tlanechikojli. * Ika ome, tikitaskej tlenon uelis tikchiuaskej tla ouijtika tikitaj tikasikamatiskej tlen tekitl tikpiyaj ipan tlanechikojli. Niman, ika yeyi, tikitaskej tleka noneki kuajli matikchiuakan totekiyo tlen Jehová yotechmakak.
TOSESELTI TIKPIYAJ SE TEKITL IPAN TLANECHIKOJLI
4. ¿Tlenon techititia tlen kijtoua Romanos 12:4, 5?
4 Kachtopa, tlen okijto apóstol Pablo techititia ika toseselti tikpiyaj se tekitl ipan ikalpan Jehová. Pablo okijto: “Totlalnakayo miyekan xexelijtikaj, niman cada parte kipiya sesekneka tekitl. Aman no ijki, maski tejuamej timiyekej, san se tlalnakayotl tiuajtochiuaj iuan Cristo. Ijkon tej, ipan sen tlalnakayotl tisesentenemij niman titopaleuiyaj iuan cada se” (Rom. 12:4, 5). Pablo kijtosnekiya ika toTajtsin techpatiojkaita maski “sesekneka tekitl” tikpiyaj ipan tlanechikojli.
Maski tejuamej xsan noijki tlen tiuelij tikchiuaj, Jehová tinochimej techpatiojkaita. (Xkimita párrafos 5-12). *
5. ¿Katlejua “tetlayokoliltin” yokimakak Jehová tlanechikojli?
5 ¿Itech akinon titlanemiliaj ijkuak kinteneuaj akin kipiyaj se tekitl ipan tlanechikojli? Kanaj nimantsin titlanemiliaj intech akin tlayekanaj (1 Tes. 5:12; Heb. 13:17). Kuajli tikmatstokej ika itechkopa Jesús, Jehová yokintlali tlayekankej ipan ikalpan. Tlayekankej yeskiaj kentla “tetlayokoliltin” (Efes. 4:8). Niman noijki kentla “tetlayokoliltin” yeskiaj on tokniuan akin nemij ipan Grupo akin Tlayekana ipan nochi tlanechikoltin niman akin kinpaleuiyaj, akin nemij ipan Grupo akin tlayekana ipan se Sucursal, tlayekankej ipan circuito, akin tlamachtiaj ipan tlamachtiltin tlen kitemaka ikalpan toTajtsin, tlayekankej niman tlapaleuijkej. Nochimej yejuin tokniuan yokintlapejpenikej itechkopa espíritu santo niman ijkon makintlajpiyakan iborreguitos Jehová niman makinyolchikauakan (1 Ped. 5:2, 3).
6. Ijkon ken kijtoua 1 Tesalonicenses 2:6-8, ¿tlenon nokojtiliaj kichiuaskej tokniuan akin yokintlapejpenikej itechkopa espíritu santo?
6 Yejuin tokniuan yokintlapejpenikej itechkopa espíritu santo niman ijkon kichiuaskej tlatlamantik tekitl. Ijkon ken tomauan, toikxiuan niman okseki tlen kipiya totlalnakayo kichiuaj sesejneka tekitl niman ijkon kuajli maonia nochi totlalnakayo, tokniuan akin yokintekitlalijkej kichiuaj tlatlamantik tekitl tlen kipaleuiya nochi tlanechikojli. Yejuamej xkitejtemouaj makinueyikaitakan, yej nokojtiliaj kinyolchikauaskej nochimej tokniuan niman kinchikauiliskej intlaneltokil (xpoua 1 Tesalonicenses 2:6-8). Melak tiktlasojkamachiliaj Jehová pampa “nemij” ipan tlanechikojli yejuin tokniuan akin chikauak kipiyaj intlaneltokil niman xsan intech tlanemiliaj.
7. ¿Tlen tlateochiualistin kiseliaj precursores niman misioneros?
7 Kanaj ipan totlanechikol nemij misioneros, precursores especiales noso precursores regulares. Ipan nochi tlaltikpaktli nemij tokniuan siuamej niman tlakamej akin chikauak kitekichiuiliaj Jehová, yejuamej melak tenojnotsaj niman temachtiaj. Melak miyekej yokinpaleuijkej manochiuakan inomachtijkauan Cristo. Maski yejuin tokniuan xmiyek tlemach kipiyaj, Jehová melak yokinteochiuj ipan innemilis (Mar. 10:29, 30). ¿Xmelak ika tiktlasojkamatij pampa yejuin tokniuan nemij ipan totlanechikol?
8. ¿Tleka Jehová melak kinpatiojkaita akin tenojnotsaj?
8 Kuakon, ¿kijtosneki ika san tlayekankej niman akin chikauak kitekichiuiliaj Jehová kipiyaj se tekitl ipan tlanechikojli? Ka, xyejon kijtosneki. Jehová niman tlanechikojli melak kinpatiojkaitaj inseselti akin tenojnotsaj (Rom. 10:15; 1 Cor. 3:6-9). Sajnoye tikinpatiojkaitaj pampa tikmatstokej ika melak noneki tikinpaleuiskej oksekimej manochiuakan inomachtijkauan Cristo (Mat. 28:19, 20, TNM; 1 Tim. 2:4). Nochimej tenojnotskej akin nemij ipan tlanechikojli, maski tla yonoapolaktijkej noso ka, nokojtiliaj kichiuaskej yejuin tekitl tlen melak kipatiojkaitaj (Mat. 24:14, TNM).
9. ¿Tleka tikinpatiojkaitaj tokniuan siuamej?
9 ¿Tlenon uelis tikijtoskej itech tokniuan siuamej? Jehová noijki kinmaka se ueyi tekitl ipan tlanechikojli. Yejua melak kinpatiojkaita nochimej on tesiuauan, nantin, kaualtsitsintin niman tokniuan akin xnonamiktiaj. Jehová kinpatiojkaita pampa yejuamej kitekichiuiliaj ika nochi inyojlo. Biblia kinteneua miyekej siuamej akin okiyolpaktijkej toTajtsin pampa tlamachilisejkej katkaj, otlaneltokakej, kuajli kichiuayaj intekiyo, yolchikaujkej katkaj, kuelitayaj kitemakaskej tlen kipiayaj niman kichiuayaj tlen kuajli (Luc. 8:2, 3; Hech. 16:14, 15; Rom. 16:3, 6; Filip. 4:3; Heb. 11:11, 31, 35). Ipan tlanechikoltin, nemij tokniuan siuamej akin noijki ijkon kichiuaj. Melak tiktlasojkamachiliaj Jehová pampa yejuin tokniuan nemij ipan totlanechikol.
10. ¿Tleka tikinpatiojkaitaj tokniuan akin iueuentsitsintin?
10 Noijki melak tiyolpakij pampa ipan totlanechikol nemij tokniuan akin iueuentsitsintin. Sekimej kipiyaj miyek xiuitl ika kitekichiuilijtokej toTajtsin niman oksekimej kanaj kemach okixmatkej tlen melauak. San ika, yejuamej kanaj ouijtika kitaj más tlapaleuiskej ipan tlanechikojli noso ipan tenojnotsalistli. Maski ijkon, nokojtiliaj tenojnotsaskej, teyolchikauaskej niman kinmajmachtiskej tokniuan kenon kichiuaskej se tekitl. ¡Melak techpaleuiya nochi tlen yejuamej youelkej! Jehová, melak kinpatiojkaita, niman tejuamej noijki tikinpatiojkaitaj (Prov. 16:31).
11, 12. ¿Kenon mitsyolchikaua tlen kichiuaj telpokamej akin nemij ipan motlanechikol?
11 Noijki, matitlanemilikan itech tokniuan telpokamej. Yejuamej kixnamikij tlen ouijtika ipan yejuin tlaltikpaktli kampa tlayekantok Diablo niman kampa miyekej tlanemiliaj ken yejua (1 Juan 5:19). San ika, yejuin tokniuan melak techyolchikauaj ijkuak tikimitaj kenon tlanankiliaj ipan totlanechikoluan, kenon tenojnotsaj niman kenon yolmelajkanemij maski kimixnamikij. Telpokamej, nemejuamej melak nenkipaleuiyaj tlanechikojli, nenkichiuaj se ueyi tekitl (Sal. 8:2).
12 San ika, sekimej tokniuan tlakamej niman siuamej kintekiyomaka kineltokaskej ika tlapaleuiyaj ipan tlanechikojli. ¿Tlenon uelis techpaleuis matikitakan ika kema titepaleuijkej ipan tlanechikojli? Matikitakan.
MATIKASIKAMATIKAN KATLEJUA TOTEKIYO IPAN TLANECHIKOJLI
13, 14. ¿Tleka sekimej uelis kinemiliskej ika xtlaj ika tepaleuiyaj ipan tlanechikojli?
13 Tlen yeuejkaui okijto apóstol Pablo kichiua matitlanemilikan intech akin ouijtika kitaj kineltokaskej ika kema tlapaleuiyaj ipan tlanechikojli. Yejuin itlaj tlen miyekej kixnamikij. Aman matikitakan tlenon tiuelij itech tlen Pablo okijkuilo, yejua okijto: “Tla on ikxitl kijtoskia: ‘Nejua xnimatli, yejua ika xnitlapouajli ipan on tlalnakayotl’, xsan yejua ika on xok tlapouajli yes ipan on tlalnakayotl. Noso tla on nakastli kijtoskia: ‘Nejua xniixtololojtli, yejua ika xnitlapouajli ipan on tlalnakayotl’, xsan yejua ika on xok tlapouajli yes ipan on tlalnakayotl” (1 Cor. 12:15, 16). ¿Tlenon techmachtiaj yejuin tlajtoltin?
14 Tla san tikitstokej ika oksekimej miyek tekitl kichiujtokej ipan tlanechikojli xijkon ken tejuamej, uelis peuas tiknemiliskej ika xtitepaleuijkej. Sekimej tokniuan melak kuajli ken tlamachtiaj, oksekimej kuajli tlayejyektlaliaj niman oksekimej melak kuajli tlayekanaj. Niman kanaj tiknemiliaj ika tejuamej xijkon tikchiuaj. Yejuin kiteititia ika tiyolyemankej niman tikasikamatij ika xnochi uelis tikchiuaskej (Filip. 2:3). San ika, matotlajpiyakan. Uelis toyolajmanaskej tla nochipa san tikitstokej ika oksekimej uelij kichiuaj tlen tejuamej xtiuelij. Ijkon ken okijto Pablo, hasta uelis tiknemiliskej ika xtitepaleuijkej ipan tlanechikojli. ¿Tlenon uelis techpaleuis maka ijkon matitlanemilikan?
15. Itech tlen kijtoua 1 Corintios 12:4-11, ¿tlenon xnoneki tikilkauaskej itech tlen tiuelij tikchiuaj?
15 Matikonnemilikan yejuin: ipan kachtopa siglo, Jehová okikuik iespíritu santo niman ijkon sekimej tokniuan mauelikan makichiuakan tlen temojkatlachialti, san ika, xnochimej san no yejua tlemach ueliyaj kichiuayaj (xpoua 1 Corintios 12:4-11). Maski tlatlamantik tlen yejuamej ueliyaj kichiuayaj, Jehová nochimej kinpatiojkaitaya. Melauak, aman xtiuelij tikchiuaj tlen yejuamej ueliyaj kichiuayaj, maski ijkon, Jehová kita ika tinochimej titepaleuijkej. Kema, maski tejuamej xsan noijki tlen tiuelij tikchiuaj, Jehová tinochimej techpatiojkaita.
16. ¿Tlenon okijto apóstol Pablo ika noneki tikchiuaskej?
16 Maka san matikitstokan kenon oksekimej kichiuaj tlen tejuamej xtiuelij, yej matikchiuakan tlen okijto apóstol Pablo: “Cada se sano yejua ma notlat[l]ata tla kuajli nouika. Tla kuajli nouika ipan inemilis, pakis niman xnoneki kinemilis ika yejua más ueyixtikaj xken okse tlakatl” (Gál. 6:4).
17. ¿Tlenon panos tla tikchiuaj tlen okijto Pablo?
17 Tla tikchiuaj tlen okijto Pablo niman kuajli tikitaj nochi tlen tikchiujtokej, kanaj tikitaskej ika tiueltokej tikchiuaj itlaj tlen oksekimej xuelij. San matikonnemilikan yejuin, kanaj se tokniuj tlayekanketl xmás kuajli ken kipanoltia se tlamachtijli ipan tlanechikojli, san ika, kanaj kema melak kuajli temachtia itech Biblia. Noso kanaj xmás kuajli tlayejyektlalia ijkon ken oksekimej tlayekankej akin nemij ipan itlanechikol, san ika, kanaj tokniuan kixmatstokej ika melak tetlasojtla niman kitlajtlaniliaj makinpaleui ika Biblia. Noso kanaj tokniuj melak kuelita kitemakas tlen kipiya (Heb. 13:2, 16). Ijkuak tikitaskej tlenon tiuelij tikchiuaj, tiyolpakiskej pampa tikitaskej ika kema titepaleuijkej ipan tlanechikojli. Niman yejuin noijki uelis techpaleuis maka matikinnexikolitakan tokniuan.
18. ¿Kenon uelis más kuajli titemachtiskej?
18 Maski san katlejua tekitl tikpiyaskej ipan tlanechikojli, tinochimej noneki tokojtiliskej más kuajli titenojnotsaskej niman titemachtiskej. Ipampa yejon, Jehová techmachtia itechkopa ikalpan. Matikonnemilikan yejuin, tlen tomachtiaj itlajkotian semana ipan tlanechikojli techpaleuiya más kuajli matitenojnotsakan. ¿Tikchiuaj ijkon ken ompa techmachtiaj?
19. ¿Tlenon uelis tikchiuaskej niman ijkon tikseliskej Tlamachtijli tlen kiseliaj Akin Tenojnotsaj itech iTekiuajyo toTajtsin?
19 Jehová noijki kinmachtia itekipanojkauan itechkopa Tlamachtijli tlen kiseliaj Akin Tenojnotsaj itech iTekiuajyo toTajtsin. Yejuin tlamachtijli uelis kiseliskej akin precursores niman kipiyaj desde 23 hasta 65 xiuitl. ¿Tiknemiliaj ika xkeman uelis tikseliskej yejuin tlamachtijli? Maka san matiknemilijtokan tleka xuelis tiaskej ipan yejuin tlamachtijli, yej matiknemilikan tleka tiknekij tiaskej ipan yejuin tlamachtijli. Sakin, matikitakan tlenon uelis tikchiuaskej niman ijkon uelis tikseliskej yejuin tlamachtijli. Tla tokojtiliaj tikchiuaskej tlen noneki, Jehová techpaleuis matikselikan tlen tiknemiliayaj ika xueliskia tikseliskej.
MATITLAPALEUIKAN IPAN TLANECHIKOJLI IKA TLEN TIUELIJ TIKCHIUAJ
20. ¿Tlenon tiuelij itech Romanos 12:6-8?
20 Ipan Romanos 12:6-8 (xpoua) tiknextiaj on ika yeyi tlemach tlen tiuelij itech tlen okijto apóstol Pablo. Ipan yejuin tlaxeloltin, yejua oksejpa kijtoua ika tinochimej ipan tlanechikojli sesejneka tlemach tlen tiuelij tikchiuaj. San ika, aman techijlia matikinyolchikauakan niman matikinchikauilikan intlaneltokil tokniuan ika nochi yejon tlen tiuelij tikchiuaj.
21, 22. ¿Tlenon tiuelij itech tlen inpan onochiuj tokniuan Robert niman Felice?
21 Matikitakan tlen ipan onochiuj se tokniuj tlayekanketl akin tiktokayotiskej Robert. Sakin ika yotlapaleuijka ipan okse país, okijlikej mauajnokuepa ipan ipaís niman ijkon tlapaleuiskia Betel. Maski okijlikej ika xokipatlakej pampa itlaj xkuajli okichiujka, yejua okijto: “Ipan miyek metstin, melak xkuajli onitlanemili, nikmachiliaya ika xtlaj ika nitepaleuiaya. Kemantika hasta niknekiya nijkauas Betel”. ¿Tlenon okipaleui oksejpa mayolpaki? Se tlayekanketl okilnamikti ika tlen Jehová yotechmachti kampa kachtopa otitlapaleuijkej, uelis techpaleuis más kuajli matiktekichiuilikan Jehová kampa aman titlapaleuijtokej. Robert okasikamat ika xnoneki san tlanemilijtos itech tlen yeuejkaui kichiuaya, yej nonekiya tlanemilis itech tlen aman ueliskia kichiuas.
22 Noijki ijkon onomachilijka tokniuj Felice Epíscopo. Ipan 1956, yejua niman isiuauj okiselijkej iTlamachtil Galaad niman otlapaleuijkej ipan circuito ne Bolivia. Ipan 1964 okipixkej se inkoneuj. Tokniuj Felice, okijto: “Melak otechtekiyomakak tijkauaskej kampa titlapaleuijtoyaj. Opanok se xiuitl san ninajmantinemiya. San ika, Jehová onechpaleui maninopatla niman manikita kenon kuajli nitajtli yeskia”. ¿Tomachiliaj ijkon ken Robert niman Felice? ¿Toyolajmanaj pampa xok tikpiyaj se tekitl tlen kachtopa tikpiayaj? Tla ijkon topan nochiua, más tiyolpakiskej tla titlanemiliaj itech tlen aman uelis tikchiuaskej ipampa itekiyo Jehová niman inpampa tokniuan. Nochipa matiktekichiuilikan toTajtsin niman matikinpaleuikan oksekimej ika tlen tiuelij tikchiuaj. Melak tiyolpakiskej tla tikinyolchikauaj tokniuan ipan tlanechikojli.
23. a) ¿Tlenon noneki tikchiuaskej? b) ¿Tlenon tikitaskej ipan okse tlamachtijli?
23 Jehová kinpatiojkaita nochimej itekipanojkauan. Yejua kineki matinemikan ipan ikalpan. Tla tokojtiliaj tikxeloskej tiempo niman ijkon tiknemiliskej kenon uelis tikinyolchikauaskej tokniuan niman tokojtiliaj ijkon tikchiuaskej, más kuajli tikitaskej ika kema titepaleuijkej ipan tlanechikojli. Aman tej, ¿tlenon tiknemiliaj intech oksekimej? ¿Kenon uelis tikteititiskej ika tikinpatiojkaitaj? Ipan okse tlamachtijli, tikitaskej yejuin.
TLAKUIKAJLI 24 Xuajlakan ipan itepeuj Jehová
^ párr. 5 Tinochimej tiknekij matechpatiojkaita Jehová. San ika, kanaj kemantika totlajtoltiaj kenon más kuajli tiktekichiuiliskej. Ipan yejuin tlamachtijli, tikitaskej ika tinochimej titlapaleuiyaj ipan tlanechikojli.
^ párr. 3 TLEN NONEKI MATIKMATIKAN: Ijkuak tikijtouaj ika toseselti tikpiyaj se tekitl ipan tlanechikojli, tikijtosnekij ika tinochimej uelis itlaj tikchiuaskej niman ijkon tikinchikauiliskej intlaneltokil tokniuan. Yejuin uelis tikchiuaskej maski oksekan tiualeuaj, maski tla tikpiyaj noso xtikpiyaj tomin niman maski tla miyek otomachtijkej ipan escuela noso xmiyek otomachtijkej.
^ párr. 62 TLEN NESI IPAN TLAIXKOPINAJLI: Yeyi tlaixkopinaltin kiteititiaj tlenon panoua ijkuak xipeua se tlanechikojli, ijkuak yopeuj, niman ijkuak yotlan. Tlaixkopinajli 1: Se tlayekanketl kuajli kitlajpaloua akin kemach yauj tlanechikojli, se telpochtli kiyektlalia sonido tlen kikuiskej ipan tlanechikojli, niman se tokniuj tlajtlajtoua iuan se tokniuj akin lamajtsin. Tlaixkopinajli 2: Nesi kenon tokniuan akin telpokamej niman akin iuejueyimej nomateketstokej niman ijkon tlanankiliskej ijkuak nomachtiaj Amatl tekakistilijketl ipan tlanechikojli. Tlaixkopinajli 3: Se tokniuj iuan isiuauj tlapaleuiyaj ijkuak kichipauaj Kajli kampa tosentlaliaj. Se nantli kipaleuiya iichpokatsin makitlali tomin ipan cajita. Se telpokatl nemi kampa kintemakaj amatlajkuiloltin. Niman se tokniuj kiyolchikaua se tokniuj akin lamajtsin.
