1. ¿Tleka Jehová okichijchiuj nochi tlen onka?

YEUEJKAUI, Jehová san iselti nemiya, san ika, xkeman onajman. Xnonekiya yakaj iuan manemi niman ijkon yolpakis, maski ijkon, okinek ika miyekej noijki manemikan niman mayolpakikan. Jehová melak tetlasojtla, ika yejon, opeuj tlachijchiua (Sal. 36:9; 1 Juan 4:19).

2. ¿Kenon onomachilijkej Jesús niman iluikaktekitkej ijkuak Jehová otlachijchiuj?

² Kachtopa, Jehová okichijchiuj iKoneuj, Jesús. Sakin, Jesús okipaleui Jehová niman ijkon okichijchiujkej “nochi tlen onkaj”, ken iluikaktekitkej (Col. 1:16). Jesús oyolpak pampa otekit iuan iTaj (Prov. 8:30). Niman iluikaktekitkej noijki oyolpakej pampa kuajli okitakej kenon Jehová niman Jesús okichijchiujkej iluikak niman tlaltikpaktli. ¿Kenon onomachilijkej iluikaktekitkej? Biblia kijtoua ika otsajtsikej “ikan paktli”, niman tikmatstokej ika nochipa ijkon okiueyichiujkej Jehová hasta ijkuak otlan tlachijchiua. Iluikaktekitkej noijki ijkon okichiujkej ijkuak Jehová okinchijchiuj tlaltikpakchanejkej (Job 38:7; Prov. 8:31). Nochi tlen okichijchiuj Jehová kiteititia ika yejua tetlasojtla niman ika melak tlamachilise (Sal. 104:24; Rom. 1:20).

3. Ken kijtoua 1 Corintios 15:21, 22, ¿kenon techpaleuiya ika Jesús okitemakak inemilis topampa?

³ Jehová kinekiya ika nochipa matinemikan ipan yejuin kualtsin tlaltikpaktli. San ika, pampa Adán iuan Eva okixnamijkej toTajtsin, xok ouelkej onenkej ipan yejuin tlaltikpaktli. Yejuamej otlajtlakojkej, ika yejon, nochimej ikoneuan noijki tlajtlakolejkej  yeskiaj niman mikiskiaj (Rom. 5:12). ¿Tlenon okichiuj Jehová? Nimantsin okijto kenon kinpaleuiskia tlaltikpakchanejkej (Gén. 3:15). Okijto ika kuajtitlaniskia iKonetsin niman ijkon kinmakixtiskia itech tlajtlakojli niman mikilistli nochimej akin ualeuayaj itech Adán iuan Eva. Yejuin itlaj tlen melak kualtsin pampa akin kitlapejpeniskiaj kitekichiuiliskej Jehová, ueliskiaj kiseliskej se nemilistli tlen xkeman tlamis (Juan 3:16; Rom. 6:23; xpoua 1 Corintios 15:21, 22).

4. ¿Tlenon tiknankiliskej ipan yejuin tlamachtijli?

⁴ ToTajtsin techijlia ika kinyolitis akin yomijkej, yejon kichiua matotlajtoltikan: ¿kanaj kenon yes ijkuak Jehová teyolitis?, ¿tikimixmatiskej akin nokuiteuaskej?, ¿tleka melak tiyolpakiskej ijkuak yoliuiskej akin yomijkej? niman ¿tleka tikijtouaj ika yoliuilistli techpaleuiya matiktlasojkamatikan ika Jehová tetlasojtla, tlamachilise niman ika teijyouiya? Matikitakan.

5. ¿Tleka uelis tikijtoskej ika xnochimej nimantsin yoliuiskej?

⁵ Itechkopa iKoneuj, Jehová kinyolitis melak miyekej tlaltikpakchanejkej. San ika, kanaj xnochimej nimantsin yoliuiskej. ¿Tleka ijkon tikijtouaj? Pampa tla ijkon yeskia, melak timiyekiyaskiaj niman xkualtsin ken tinemiskiaj. Niman Jehová kineki nochi kuajli maonia, pampa kimatstok ika san ijkon uelis ika yolseuilistli tinemiskej (1 Cor. 14:33). Jehová okiteititi tlamachilistli niman ika xnosiaujkaua ijkuak otexchijchiuili yejuin tlaltikpaktli. Yejua iuan Jesús xnochi nimantsin okichiujtiuetskej. Niman Jesús noijki kiteititis ika tlamachilise niman ika xnimantsin nosiaujkaua ijkuak tekiuajtis mil xiuitl. Jesús noijki kinpaleuis akin makisaskej ipan Armagedón makiyektlalikan tlaltikpaktli niman ijkon kinseliskej akin yoliuiskej.

6. Ken kijtoua Hechos 24:15, ¿akinomej noijki yoliuiskej?

 ⁶ Akin makisaskej ipan Armagedón kipiyaskej se ueyi tekitl: kinmachtiskej itech iTekiuajyo toTajtsin niman itech itlanauatiluan nochimej akin yoliuiskej. ¿Tleka nonekis ijkon kichiuaskej? Pampa Biblia kijtoua ika noijki yoliuiskej akin noixmatij ken “xyolmelajkej” (xpoua Hechos 24:15). Yejuamej nonekis kipatlaskej innemilis tla kinekij ika toTajtsin makinteochiua niman makinmaka se kualtsin nemilistli. Kuakon, tikpiyaskej se ueyi tekitl, pampa tikinmachtiskej miyekej tlaltikpakchanejkej akin xkixmatij Jehová. ¿Inseselti tikinmachtiskej, ijkon ken aman tikchiuaj? ¿Kintitlaniskej ipan tlanechikoltin niman kinmachtiskej niman ijkon yejuamej noijki uelis kinmachtiskej akin sakin yoliuiskej? Noneki titlamachiaskej niman ijkon tikmatiskej. San ika, kema tikmatij ika ijkuak Jesús tlamis tekiuajtis mil xiuitl, “ipan nochi tlaltikpaktli” kixmatiskej toTajtsin (Is. 11:9). ¡Ipan yejon mil xiuitl chikauak titekitiskej niman panos tlen melak kualtsin!

7. ¿Tleka itekipanojkauan toTajtsin kuajli kimasikamatiskej akin yoliuiskej?

⁷ Ipan yejon mil xiuitl, nochimej itekipanojkauan toTajtsin nonekis itlaj kipatlaskej ipan innemilis niman ijkon kiyolpaktiskej Jehová. Ika yejon, yejuamej kimasikamatiskej akin yoliuiskej ijkuak kinpaleuiskej makitlakamatikan toTajtsin niman maka makichiuakan tlen xkuajli (1 Ped. 3:8). Ijkuak yejuamej kitaskej ika itekipanojkauan toTajtsin yolyemankej niman ika nokojtiliaj kitlakamatiskej Jehová, noijki kinekiskej kitlakamatiskej toTajtsin (Filip. 2:12).

8. ¿Tleka tiknemiliaj ika kema tikimixmatiskej akin yoliuiskej?

⁸ Onka miyek tlemach tlen techititia ika tikimixmatiskej akin yoliuiskej. San matikonnemilikan yejuin, ijkuak tikitaj ipan Biblia tlenon opanok ijkuak oyoliujkej sekimej tlaltikpakchanejkej, nesi ika Jehová oksejpa kinchijchiuas tlaltikpakchanejkej ijkon ken yeuejkaui tlachiayaj, kema, yejuamej san noijki ken tlachiaskej, ken tlajtoskej niman ken tlanemiliskej. Niman matikilnamikikan ika Jesús okijto ika ijkuak se miki, kentla san kochtoskia, niman ijkuak se kiyolitiaj, kentla san kitlachialtiskiaj (Mat. 9:18, 24; Juan 11:11-13). ¿Xmelak ika ijkuak tikochij niman uajmostla tiuajtlanextiliaj, san noijki ken titlajtouaj, ken titlachiaj niman san noijki tlen tikilnamikij? Matitlanemilikan itech Lázaro. Ijkuak Jesús okiyoliti, ikipiaya naui tonajli ika yomijka, kuakon, itlalnakayo yopeujka ijtlakaui. San ika, ikniuan nimantsin okixmatkej, niman Lázaro noijki okimilnamik ikniuan (Juan 11:38-44; 12:1, 2).

9. ¿Tleka tikijtouaj ika akin yoliuiskej ok kipiyaskej tlajtlakojli?

⁹ Jehová techijlia ika ijkuak Cristo tlanauatis, xakaj kijtos: “Nikualo” (Is. 33:24; Rom. 6:7). Kuakon, ijkuak toTajtsin oksejpa kinchijchiuas akin yomijkej, intlalnakayo kuajli onias. San ika, yejuin xkijtosneki ika xok kipiyaskej tlajtlakojli, pampa tla ijkon yeskia, inchanejkauan xok kimixmatiskiaj. Nesi ika ijkuak Cristo tekiuajtis mil xiuitl, ika yolik kistias totlajtlakol. Ijkuak tlamis yejon mil xiuitl, Jesús kikuepilis iTaj on Tekiuajyotl. Ijkuakon, yejuin tekiuajyotl tekikisas pampa yokichiuj ika tlaltikpakchanejkej maka sa makipiyakan tlajtlakojli (1 Cor. 15:24-28; Apoc. 20:1-3).

10. ¿Tlenon tikmachiliskej ijkuak yoliuiskej akin yomijkej?

¹⁰ Matikonnemilikan tlenon tikmachiliskej ijkuak oksejpa tikimitaskej akin tikintlasojtlaj. ¿Tiuetskaskej? ¿Tipakachokaskej? ¿Tijkuikatiliskej  Jehová pampa melak tipakiskej? Xtikmatij tlenon panos ipan yejon tonajli, san ika, kema tikmatstokej ika melak tiktlasojtlaskej toTajtsin niman iKonetsin pampa kinyolitiskej akin yomijkej.

11. Ijkon ken okijto Jesús ipan Juan 5:28, 29, ¿tlenon kipiyaskej akin kitlakamatiskej itlanauatiluan toTajtsin?

¹¹ Noijki matikonnemilikan kenon melak yolpakiskej akin yoliuiskej ijkuak kipatlaskej innemilis niman ijkuak kitlakamatiskej itlanauatiluan toTajtsin. Akin ijkon kichiuaskej, kipiyaskej “nemilistli yejuan para nochipa”, san ika, akin kixnamikiskej toTajtsin, xkinkauiliskej matlaijtlakokan ipan xochitlalpan (xpoua Juan 5:28, 29; Is. 65:20).

12. ¿Kenon kinteochiuas Jehová nochimej akin chantiskej ipan tlaltikpaktli?

¹² Ijkuak tlayekantos iTekiuajyo toTajtsin, itekipanojkauan Jehová kitaskej ika melauak tlen kijtoua Proverbios 10:22. Itech Traducción del Nuevo Mundo, yejuin texto kijtoua: “Itlateochiualis Jehová yejon tlen kichiua se melak kuajli manemi, niman yejua xiuan kitemaka tlen tekoko”. Iespíritu Jehová techpaleuis matikchiuakan ken Cristo niman mapopoliujtiuj totlajtlakol (Juan 13:15-17; Efes. 4:23, 24). Mojmostla tikitstiaskej kenon techkojtilijtiuj Jehová. ¡Melak tiyolpakiskej! (Job 33:25). Aman tej, ¿kenon techpaleuiya tla titlanemiliaj itech kenon yoliuiskej akin yomijkej?

13. Ijkon ken kijtoua Salmo 139:1-4, ¿kenon kiteititia yoliuilistli ika Jehová kuajli techixmatstok?

¹³ Ijkon ken yotikitakej, ijkuak Jehová kinyolitis akin yomijkej, yejua kichiuas oksejpa matlanemilikan ken yeuejkaui katka niman kichiuas makilnamikikan tlen yeuejkaui kilnamikiyaj. San matikonnemilikan tlenon kijtosneki yejon. Jehová melak techtlasojtla niman kuajli kimatstok tlen tiknemiliaj, tlen tikmachiliaj, tlen tikijtouaj niman tlen tikchiuaj. Kuakon, tla techyolitiskia, xouijtika kitaskia oksejpa texchijchiuas ken yeuejkaui katka. Tekiuaj David kimatstoya ika Jehová kuajli techixmatstok toseselti (xpoua Salmo 139:1-4). ¿Tlenon tikmachiliaj ijkuak tikasikamatij ika Jehová kuajli techixmatstok?

14. ¿Tlenon tikmachiliaj ijkuak tiknemiliaj ika Jehová kuajli techixmatstok?

¹⁴ Xkipiya ika techajmanas ika Jehová kuajli techixmati. ¿Tleka? Matikilnamikikan ika yejua melak techtlasojtla niman techpatiojkaita. Yejua kimatstok nochi tlenon topan yonochiuj yeuejkaui. ¿Xmelak ika yejon techyolseuiya? Maka keman san toselti matomachilikan, Jehová nochipa touan nemi niman kitstika kenon techpaleuis (2 Crón. 16:9).

15. ¿Kenon yoliuilistli kiteititia ika Jehová melak tlamachilise?

¹⁵ Akin Satanás kinyekana kimatstokej ika tinochimej tikmakasij timikiskej. Ika yejon, kimijliaj miyekej tlaltikpakchanejkej ika kinmiktiskej tla xkintlalkauiyaj iminamigos noso tla xkikajkauaj tlen kineltokaj. San ika, tejuamej xtomojtiaj ijkuak techijliaj ika techmiktiskej. Tikmatstokej ika, tla techmiktiaj, Jehová oksejpa techyolitis (Apoc. 2:10). Kuajli tikmatstokej ika maski san tlenon texchiuiliskej, xtechxeloskej itech toTajtsin (Rom. 8:35-39). Tikitaj ika Jehová melak tlamachilise pampa techijlia ika oksejpa uelis techmakas tonemilis. Ika yejon, Satanás xueli techmojtia niman más kuajli titlaneltokaj itech Jehová.

16. ¿Tlenon noneki totlajtoltiskej, niman kenon techpaleuis yejuin matikmatikan tla yemelak titlaneltokaj itech Jehová?

¹⁶ Tla akin techtlauelitaj techijliaj ika  techmiktiskej, ¿tikneltokaskej ika Jehová uelis techyolitis? Tla tiknekij tikmatiskej, matotlajtoltikan: “¿Tlenon niktlapejpenia mojmostla? ¿Nikteititia ika nitlaneltoka itech Jehová?” (Luc. 16:10). “¿Nikneltoka ika Jehová nechmakas tlen nechpolos tla kachtopa niktlapejpenia niktekichiuilis?” (Mat. 6:31-33). Tla otikijto kema, kijtosneki ika titlaneltoka itech Jehová, niman yejon mitspaleuis kuajli xkixnamiki maski san katlejua tlauejli (Prov. 3:5, 6).

17. a) ¿Tleka yoliuilistli kiteititia ika Jehová xnosiaujkaua? b) ¿Kenon uelis tikteititiskej ika tiktlasojkamatij ika Jehová xnimantsin nosiaujkaua?

¹⁷ Jehová yokijto tlen tonajli niman tlen hora kipopolos nochi tlen xkuajli (Mat. 24:36). Maski Jehová melak kineki kinyolitijtiuetsis akin yomijkej, yejua tlamachias hasta ijkuak yokijto kichiuas, xnosiaujkauas (Job 14:14, 15). Kichiatika mayejko tonajli ijkuak nonekis kichiuas (Juan 5:28). Niman tiktlasojkamatij ika Jehová xnosiaujkaua pampa aman más miyekej yokixmatkej niman yonoyolkuepkej, ijkon ken tejuamej (2 Ped. 3:9). Jehová kineki ika miyekej makipiyakan nemilistli tlen xkeman tlamis. Kuakon, matikteititikan ika tiktlasojkamatij ika Jehová xnimantsin nosiaujkaua, matokojtilikan tikintejtemoskej akin melauak kinekij “kipiyaskej nemilistli tlen xkeman tlamis”. Noijki, matikinpaleuikan makitlasojtlakan Jehová niman makitekichiuilikan (Hech. 13:48, TNM). Ijkon yejuamej noijki kitaskej ika melak kuajli ika Jehová xnimantsin nosiaujkaua.

18. ¿Tleka melak kuajli tla xtosiaujkauaj?

¹⁸ Jehová tlamachixtos hasta ijkuak tlamis mil xiuitl, ijkuak xok tikpiyaskej tlajtlakojli. Niman aman ika xiajsi yejon tonajli, kinektika techtlapopoluis. Ika yejon, matikchiuakan ken toTajtsin, matikitakan tlen kuajli kichiuaj oksekimej niman maka matosiaujkauakan. Matikitakan tlenon ipan onochiuj se tokniuj siuatl. Iueuentsin melak opeuj ajmankamiki niman hasta okikauj ika yauj tlanechikoltin. Tokniuj siuatl kijtoua: “Tlen opanok melak onechyolkoko. Tlen yotikijtokaj tikchiuaskiaj, aman xok ueliskia tikchiuaskej”. Maski ijkon, tokniuj siuatl nochipa okitlasojtlak niman xonosiaujkauj chika kitlajpiaya iueuentsin. Nochipa okineltokak ika Jehová kipaleuiskia. Yejua okichiuj ken Jehová, xsan tlanemilijtoya itech tlauejli, noijki kitaya tlen kuajli kichiuaya  iueuentsin. Kijtoua: “Noueuentsin miyek tlen kuajli kichiua, niman kichiujtika nochi tlen ueli niman ijkon ika yolik pajtis”. Kuakon, ika toyojlo matikinpaleuikan tokniuan akin kixnamiktokej tlen ouijtika niman maka matosiaujkauakan.

19. ¿Tlenon noneki tikchiujtoskej?

¹⁹ Jesús niman iluikaktekitkej oyolpakej ijkuak onochijchiuj tlaltikpaktli. San matikonnemilikan kenon melak yolpakiskej ijkuak kitaskej ika ipan tlaltikpaktli san chantij akin xkipiyaj tlajtlakojli, akin kitlasojtlaj niman akin kitekichiuiliaj Jehová. Niman noijki matikonnemilikan kenon melak yolpakiskej akin tekiuajtiskej iuan Cristo ijkuak kitaskej ika yejuamej noijki otlapaleuijkej ika tlaltikpakchanejkej kuajli manemikan (Apoc. 4:4, 9-11; 5:9, 10). Noijki matikonnemilikan kenon tinemiskej ijkuak xok tiajmankachokaskej, yej tipakachokaskej, ijkuak xok tikualoskej, xok tajmanaskej niman xok timikiskej (Apoc. 21:4). Hasta ijkuak ajsis yejon tonajli, nochipa matikteititijtokan ika tikchiuaj ijkon ken Jehová: ika titetlasojtlaj, ika titlamachilisejkej niman ika xtosiaujkauaj. Tla ijkon tikchiuaj, maski san tlenon tikixnamikiskej, nochipa tiyolpakiskej (Sant. 1:2-4). Melak tiktlasojkamachiliaj Jehová ika “on mikatsitsimej yoliuiskej” (Hech. 24:15).