1. Ken kijtoua Hebreos 12:1, ¿tlenon noneki tikchiuaskej para tiktlamiltiskej yejuin ojtli kampa totlalojtokej?

 BIBLIA kijtoua ika nochimej akin tiktekichiuiliaj toTajtsin kentla yopeuj totlalouaj ipan se ojtli. Akin ajsij kampa tlami yejuin ojtli kiseliaj nemilistli tlen xkeman tlamis (2 Tim. 4:7, 8). Aman ika itinemij más nisiuj kampa ontlami yejuin ojtli, noneki más matotlalokan. Apóstol Pablo, akin otlan notlaloua, techijlia tlenon uelis techpaleuis para xtosiaujkauaskej. Okijto: “Okse lado ma tikontlalikan on tlen techteltia […] chika titotlalouaj ipan on ojtli yejuan tikpiyaj toyakapan” (xpoua Hebreos 12:1).

2. ¿Tlenon okijtosnek Pablo ijkuak okijto “okse lado ma tikontlalikan on tlen techteltia”?

² ¿Tlenon okijtosnek Pablo ijkuak okijto “okse lado ma tikontlalikan on tlen techteltia”? Yejua xkijtotoya tla xtlaj noneki tikitkiskej chika totlalouaj, kijtojtoya maka matikitkikan tlen xok noneki. Pampa tla melak totlamamaltiaj yolik tiaskej niman tisiauiskej. Tla tiknekij ok totlalojtoskej ipan yejuin ojtli, noneki tikitaskej tla tikitkij itlaj tlen xnoneki niman tokixtiliskej. San ika, onka okseki tlemach tlen noneki tikmamajtiaskej niman xnoneki tokixtiliskej. Pampa tla tokixtiliaj, techkixtiskej ipan ojtli kampa totlalojtokej (2 Tim. 2:5). Matikitakan tlenon yejon tlen kema noneki tikmamajtiaskej.

3. a) ¿Tlenon okijto Pablo ipan Gálatas 6:5? b) ¿Tlenon tikitaskej ipan yejuin tlamachtijli, niman tleka?

 ³ (Xpoua Gálatas 6:5). Ipan yejuin tlaxelojli, Pablo okijto ika “cada se noneki kinomamaltis on tlajtlamach pajsolouilistli yejuan ipan uajlau”. ¿Tlenon yejon “tlajtlamach” tlen kiteneujtoya ipan yejuin tlaxelojli? Nochi tekitl tlen tikchiuaj ipampa toTajtsin, itlaj tlen xakaj uelis kichiuas topampa. Ipan yejuin tlamachtijli tikitaskej katlejua tekitl xakaj uelis kichiuas topampa niman tlenon techpaleuis matikchiuakan. Noijki titlajtoskej itech seki tlemach tlen xnoneki tikmamajtiaskej niman tlenon uelis tikchiuaskej para tokixtiliskej. Maka sa matotlamamaltikan, niman san matikitkikan tlen noneki, ijkon uelis tajsiskej itlamiyan yejuin ojtli niman tikseliskej nemilistli tlen xkeman tlamis.

4. ¿Tleka tikijtouaj ika tlen otikijlikej Jehová ijkuak itech otosentemakakej xyetik para tomamaltiskej? (Noijki xkita tlaixkopinajli).

⁴ Tlen otikijlikej Jehová ijkuak itech otosentemakakej. Ijkuak otosentemakakej itech  Jehová, otikijlikej ika san yejua tikueyichiuaskej niman tikchiuaskej tlen kineki. Noneki tikchiuaskej tlen yotikijlikej. Yejuin yeskia kentla itlaj tlamamajli tlen xyetik. ¿Tleka ijkon tikijtouaj? Pampa Jehová otexchijchiuj para matikchiuakan tlen kineki (Apoc. 4:11). Okichiuj matiknekikan matikixmatikan niman matikueyichiuakan. Noijki, okichiuj matiuelikan matikchiuakan ijkon ken yejua. Yejua ika, ueli tiknisiuiyaj niman tiyolpakij ijkuak tikchiuaj tlen kineki (Sal. 40:8). San ika, xsan yejon, ijkuak tikchiuaj tlen Jehová kineki niman tikchiuaj ijkon ken iKoneuj, tiyolseuij (Mat. 11:28-30).

5. ¿Tlenon mitspaleuis xchiua tlen otikijto ijkuak otimosentemakak itech toTajtsin? (1 Juan 5:3).

⁵ ¿Tlenon mitspaleuis ijkon xchiua? Kachtopa, xmokojtili más xtlasojtla Jehová. Tla titlanemilia itech nochi tlen yokichiuj mopampa niman kenon mitsteochiuas ika tlayekapan, más tiktlasojtlas. Niman tla más tiktlasojtla toTajtsin, más xouijtika tikitas tiktlakamatis (xpoua 1 Juan 5:3). Ika ome, xchiua ijkon ken Jesús. Yejua ouel okichiuj tlen toTajtsin kineki pampa nochipa kitlajtlaniliaya makipaleui niman tlanemiliaya itech tlen kiseliskia (Heb. 5:7; 12:2). Ijkon ken Jesús, xtlajtlanili Jehová mamitspaleui niman maka xkilkaua ika yejua mitsmakas nemilistli tlen xkeman tlamis. Tla más tiktlasojtla Jehová niman tikchiua ijkon ken Cristo, uelis tikchiuas tlen otikijli toTajtsin ijkuak itech otimosentemakak.

6. ¿Tleka noneki tikinpaleuiskej tochanejkauan? (Noijki xkita tlaixkopinajli).

⁶ Matikinpaleuikan tochanejkauan. Chika totlalouaj ipan ojtli tlen teuika ipan nemilistli, noneki más tiktlasojtlaskej Jehová niman Jesús xijkon ken tochanejkauan (Mat. 10:37). San ika, yejon xkijtosneki tla xnoneki tikinpaleuiskej niman tikimitaskej kentla itlaj tlen techtsakuilia para kuajli tiktekichiuiliskej Jehová. Tla tiknekij tikyolpaktiskej Jehová niman Jesús, noneki tikinpaleuiskej tochanejkauan (1 Tim. 5:4, 8). Tla ijkon tikchiuaj, más tiyolpakiskej. Tikmatstokej ika Jehová okichiuj ika familias mayolpakikan. Niman uelis yolpakiskej, tla akin yononamiktijkej notlasojtlaj niman notlakaitaj, tla tajtin kintlasojtlaj niman kinmachtiaj inkoneuan niman tla tekoneuan kintlakamatij intajuan (Efes. 5:33; 6:1, 4).

7. ¿Tlenon uelis tikchiuas niman ijkon tikinpaleuis mochanejkauan?

⁷ ¿Tlenon mitspaleuis ijkon xchiua? Xtlaneltoka itech tlen Biblia kijtoua. Maka xchiua san tlen tejua tiknemilia ika kuajli, tlen omitsititijkej ijkuak omitsiskaltijkej noso tlen kijtouaj ixtlamatkej (Prov. 24:3, 4). Xkinamapoua toamatlajkuiloluan, ompa tiknextis tlen mitspaleuis xchiua tlen Biblia kijtoua. Akin yononamiktijkej, tajtin, telpokamej niman ichpokamej uelis kitekitiltiskej libro ¡Nochipa uelis tiyolpakis!, niman amatlajkuilojli Mochanejkauan uelis pakiskej para kitaskej tlenon kichiuaskej. b Maski tla oksekimej mochanejkauan xkinekij kichiuaskej tlen Biblia kijtoua, tejua kema xchiua. Tikitas ika nochimej mochanejkauan kinpaleuis, niman Jehová mitsteochiuas (1 Ped. 3:1, 2).

8. ¿Kenon uelis techpaleuis noso techijtlakos tlen tiktlapejpeniaj tikchiuaskej?

⁸ Tlen tikixnamikij ipampa tlen tiktlapejpeniaj. Jehová techkauilia matiktlapejpenikan tlen tikchiuaskej niman yejua kineki matiyolpakikan ijkuak tiktlapejpeniaj tlen kuajli. San ika, xkichiua maka matitlajyouikan ijkuak tiktlapejpeniaj tlen xkuajli (Gál. 6:7, 8).  Ika yejon, tikseliaj tlen panoua tla tiktlapejpeniaj itlaj tlen xkuajli, tla itlaj tikijtojtiuetsij noso itlaj tikchiujtiuetsij. Kemantika kanaj melak totlajtlakoltiskej noso melak tajmanaskej. Yejuin tlen tikmachiliaj, techpaleuiya pampa techyolmapeua matikijtokan tlen xkuajli otikchiujkej, tikyektlaliaj tlen xkuajli tikchiujtokej niman tokojtiliaj xok ijkon tikchiuaskej. Tla ijkon tikchiuaj, ok totlalojtoskej ipan ojtli tlen teuika kampa nemilistli.

9. ¿Tlenon mitspaleuis tla yotiktlapejpeni itlaj tlen xkuajli? (Noijki xkita tlaixkopinajli).

⁹ ¿Tlenon mitspaleuis ijkon xchiua? Xkasikamati ika xuelis tikpatlas tlen yotikchiuj, maka san xtlanemilijto itech yejon, maka xmoyolkokojto, maka xkintlajtlakolti oksekimej nion maka xyejyeko tikimijlis oksekimej tleka itlaj otikchiuj. Más kuajli tla tikasikamati ika otimopopolo niman tikyejyekoua tikyektlalis. Tla melak xkuajli timomachilia, xchiuili teoyotl Jehová, xkijli ika otimopopolo niman xtlajtlanili mamitstlapopolui (Sal. 25:11; 51:3, 4). Tla yakaj otikyolkoko, xkijli mamitstlapopolui niman tla nonekis, xkintlajtlanili tlayekankej mamitspaleuikan (Sant. 5:14, 15). Itlaj xueli itech tlen otikchiuj niman xmokojtili maka oksejpa ijkon tikchiuas. Xmatsto ika Jehová mitspaleuis niman mitsiknelis (Sal. 103:8-13).

10. ¿Tleka tikijtouaj ika tla tikchiaj itlaj tlen xkeman nochiuas yeskia kentla tikmamajtoskiaj itlaj tlen yetik? (Gálatas 6:4).

¹⁰ Maka matikchiakan tlen xkeman nochiuas. Ijkon ueliskia tikchiujtoskej tla san tikitstokej ika oksekimej ueli kichiuaj tlen tejuamej xtiuelij (xpoua Gálatas 6:4). Tla nochipa ijkon titlanemiliaj, kanaj uelis peuas totlatlaniskej imiuan oksekimej niman titenexikolitaskej (Gál. 5:26). Ijkuak tikyejyekouaj tikchiuaskej tlen oksekimej kichiuaj, kanaj tiknekiskej tikchiuaskej tlen xok tiuelij. Xtlanemili itech yejuin: Biblia kijtoua ika ijkuak yakaj uejkaui kichia itlaj, melak najmana (Prov. 13:12). Kuakon, más techajmanas tla tikchiaj itlaj tlen xkeman nochiuas. Yejon ueliskia techsiauitis niman kichiuas yolik matiakan ipan ojtli tlen teuika kampa onka nemilistli (Prov. 24:10).

11. ¿Tlenon mitspaleuis maka xchia tlen xkeman nochiuas?

¹¹ ¿Tlenon mitspaleuis ijkon xchiua? Maka xchiua tlen Jehová xok mitstlajtlanilia. Xkilnamiki ika yejua xkeman mitstlajtlanilis xmaka itlaj tlen xtikpiya (2 Cor. 8:12). Maka xmajmana, Jehová xsan kitstika tla xtiijkon ken oksekimej (Mat. 25:20-23). Yejua kipatiojkaita ika tejua tiktekichiuilia ika nochi moyojlo, ika itech timelajkanemi niman ika titlaxikoua. Kanaj aman nonekis tikasikamatis ika xok nochi uelis tikchiuas pampa itiueyi, pampa tikualo niman pampa itlaj yonopatlak. Xchiua ijkon ken Barzilái, maka xseli seki tekitl tla tikita ika xok uelis tikchiuas pampa tikualo (2 Sam. 19:35, 36). Noso xchiua ijkon ken Moisés, xmokauili mamitspaleuikan niman xkinkauili oksekimej makichiuakan motekiyo ijkuak nonekis (Éx. 18:21, 22). Ijkon, xtikchias tlen xkeman nochiuas niman titlaxikos ipan yejuin ojtli kampa totlalojtokej.

12. ¿Tejuamej tikpiyaj tlajtlakojli ipampa tlen oksekimej kitlapejpeniaj?

¹² Maka matotlajtlakoltikan ipampa tlen xkuajli kitlapejpeniaj oksekimej. Xuelis tikinchiualtiskej oksekimej makitlapejpenikan tlen kuajli niman ijkon xtlajyouiskej. Tajtin melak najmanaj ijkuak kitaj ika se inkoneuj kikaua Jehová. San ika, tajtin akin notlajtlakoltiaj ipampa tlen inkoneuj okichiuj, kentla kinomamaltiskiaj itlaj tlen melak yetik;  itlaj tlen Jehová xkineki makinomamaltikan (Rom. 14:12).

13. ¿Tlenon uelis kichiuas se tajtli tla ikoneuj kitlapejpenia tlen xkuajli?

¹³ ¿Tlenon mitspaleuis ijkon xchiua? Xkilnamiki ika Jehová yotechkauili matiktlapejpenikan tlen tikchiuaskej niman noijki tla tiknekij tiktekichiuiliskej noso ka. Noijki, Jehová kimatstok ika tejua kemantika timopopoloua. Yejua san kineki xmokojtili kuajli xkimiskalti mokoneuan. Tla mokoneuj kikaua Jehová, xtejua tikpiya tlajtlakojli, yejua itlajtlakol (Prov. 20:11). Maski ijkon, kanaj tiknemilia ika nonekiya más kuajli tikmachtis. Xkijli Jehová kenon timomachilia niman xtlajtlanili mamitstlapopolui. Yejua kimatstika ika xok uelis nopatlas tlen yonochiuj. Noijki, Jehová xkichia xpaleui mokoneuj para maka makixnamiki tlen xkuajli ipampa tlen okitlapejpeni. San ika, xkilnamiki ika tla mokoneuj nokojtilia nokuepas itech Jehová, yejua kiselis ika tlasojtlalistli (Luc. 15:18-20).

14. ¿Tleka xnoneki sajnoye totlajtlakoltiskej?

¹⁴ Maka sajnoye matotlajtlakoltikan. Ijkuak tikchiuaj se tlajtlakojli, toyolkokouaj. San ika, Jehová xkineki ika yejon tlen tikmachiliaj manochiua kentla itlaj tlen melak yetik. ¿Kenon uelis tikmatiskej tla sajnoye totlajtlakoltijtokej? Tla yotikteijlikej tlen xkuajli otikchiujkej, yotoyolkuepkej niman tokojtilijtokej xok ijkon tikchiuaskej, uelis kuajli tikmatstoskej ika Jehová yotechtlapopolui (Hech. 3:19). Tla tikchiuaj tlen yonoteneuj, Jehová xok kineki sa matotlajtlakoltijtokan pampa kimatstok ika tla ijkon tikchiuaj uelis melak techijtlakos (Sal. 31:10). Tla melak tajmanaj, uelis tosiaujkauaskej niman xok totlaloskej ipan ojtli tlen teuika kampa onka nemilistli (2 Cor. 2:7).

15. ¿Tlenon mitspaleuis tla sajnoye timotlajtlakoltia? (1 Juan 3:19, 20; noijki xkita tlaixkopinajli).

¹⁵ ¿Tlenon mitspaleuis ijkon xchiua? Tla melak timajmana ipampa itlaj tlen xkuajli otikchiuj, xtlanemili itech kenon toTajtsin tetlapopoluiya  (Sal. 130:4). Ijkuak yakaj noyolkuepa ika nochi iyojlo, Jehová kichiua tlen kijtoua ipan Jeremías 31:34: “Xok kaman nikelnamikis imintlajtlakoluan”. Yejuin kijtosneki ika ijkuak Jehová mitstlapopoluiya xkilnamiktok tlen otikchiuj. Yemelak, motlajtlakol kichiuas xtlajyoui, san ika, yejon xkijtosneki tla Jehová xomitstlapopolui. Maka melak xmajmana tla otikpolo se tekitl tlen tikpiaya ipan tlanechikojli. Jehová xsan kilnamiktok tlen xkuajli otikchiuj, ¿tleka tejua noijki xijkon tikchiua? (Xpoua 1 Juan 3:19, 20).

16. ¿Tlenon noneki tikasikamatiskej tla ok tiknekij totlalojtoskej?

¹⁶ Tla tiknekij tikseliskej nemilistli tlen xkeman tlamis, noneki tikchiuaskej yejuin: “Xmotlalokan para nenkitlaniskej on premio yejuan Dios kineki mechmakas” (1 Cor. 9:24). Melak techpaleuis tla tikasikamatij tlenon noneki tomamaltiskej niman tlenon ka. San ika, Jesús noijki okijto yejuin: “Maka xmoyoltechikauakan ika on tlen xkuajli, nion maka xtlauantinemikan, nion itlaj xkomatstiakan on tlen ika nemotekipanoskej” (Luc. 21:34). Yejuin niman okseki tlaxeloltin techpaleuiskej matikitakan tlenon noneki tikpatlaskej para ok totlalojtoskej ipan ojtli tlen teuika kampa onka nemilistli.

17. ¿Tleka kuajli tikmatstokej ika uelis titetlaniskej?

¹⁷ Tejuamej ok totlalojtokej ipan ojtli tlen teuika kampa onka nemilistli niman tikmatstokej ika titetlaniskej pampa Jehová techpaleuis (Is. 40:29-31). Kuakon, maka xmosiaujkaua. Xchiua ken apóstol Pablo, akin onokojtili para tetlanis (Filip. 3:13, 14). Melauak, xakaj uelis notlalos mopampa, san ika, Jehová nochipa mouan nemis. Mitspaleuis xkitki tlen tikmamajtiuj niman xmokixtili tlen xnoneki tikitkis (Sal. 68:19). Pampa Jehová mitspaleuis, ¡xtimosiaujkauas niman uelis titetlanis!