1. ¿Tlenon mitspaleuis tla xmás tikuelita timomachtis teotlajtoltin?

 BEN, se tokniuj akin telpochtli, okijto: “Melak nikuelita ninomachtis teotlajtoltin tlen uajlauej ipan Biblia”. ¿Tejua noijki tikuelita timomachtis teotlajtoltin? ¿Noso tiknemilia ika ouijtika niman tetlatsiuiti? Tla ijkon tiknemilia, kuakon mitspaleuis tla tikasikamati tleka Jehová okichiuj manotlalikan teotlajtoltin ipan iTlajtol.

2. ¿Tlenon tikitaskej ipan yejuin tlamachtijli?

² Ipan yejuin tlamachtijli, tikitaskej tleka noneki kuajli tikimixmatiskej teotlajtoltin tlen uajlauej ipan Biblia niman tlenon uelis techpaleuis matikinmasikamatikan. Sakin, tikimitaskej ome teotlajtoltin tlen uajlauej ipan libro tlen okijkuilo Daniel niman noijki tikitaskej kenon techpaleuiya tla tikinmasikamatij.

3. ¿Tlenon noneki tikchiuaskej tla tiknekij tikinmasikamatiskej teotlajtoltin tlen uajlauej ipan Biblia?

³ Noneki yakaj matechpaleui tla tiknekij tikinmasikamatiskej teotlajtoltin tlen uajlauej ipan Biblia. Xnemili ika tiauj kampa xtitlaixmati, san ika, mouan yauj se moamigo akin kema tlaixmati. Moamigo kuajli kimati kanon ninnemij niman kimati kanon teuikaj ojtin. ¡Melak kuajli ika moamigo mouan oyaj! Ijkon ken yejon toamigo kuajli kimati kanon tinemij, Jehová noijki kuajli kimatstok tlenon nochiujtok niman tlenon nochiuas ika  tlayekapan. Kuakon, tla tiknekij tikinmasikamatiskej teotlajtoltin tlen uajlauej ipan Biblia, noneki tiktlajtlaniliskej Jehová matechpaleui (Dan. 2:28; 2 Ped. 1:19, 20).

4. ¿Tleka Jehová okichiuj manotlalikan teotlajtoltin ipan iTlajtol? (Jeremías 29:11; noijki xkita tlaixkopinajli).

⁴ Ijkon ken nochimej tajtin, Jehová kineki ika ikoneuan kuajli manemikan ika tlayekapan (xpoua Jeremías 29:11). San ika, Jehová ueli kijtoua tlenon panos ika tlayekapan, xijkon ken tajtin. Okichiuj ika ipan iTlajtol manoijkuilokan teotlajtoltin niman ijkon matikmatikan tlenon panos ika tlayekapan (Is. 46:10). Kuakon, uelis tikijtoskej ika teotlajtoltin yeskiaj kentla tetlayokoliltin tlen toTajtsin techinmaka pampa techtlasojtla. San ika ¿kenon uelis tikmatiskej ika yemelak nochiuaskej?

5. ¿Tlenon kinmachtia telpokamej tlen ipan onochiuj Max?

⁵ Ipan escuela, telpokamej akin iteixpantijkauan Jehová nemij imiuan tlaltikpakchanejkej akin achijtsin kitlakaitaj Biblia noso nion achijtsin xkitlakaitaj. Kanaj tlen kichiuaj niman kijtouaj uelis kichiuas ika tokniuan maometlamatikan. Matikitakan tlen ipan onochiuj tokniuj Max. Yejua kijtoua: “Ijkuak nitelpochtli katka, xok más nikneltokaya tla notajuan nechmachtijtoyaj ipan religión tlen melauak niman tla Biblia melauak ualeuaya itech toTajtsin”. ¿Tlenon okichiujkej itajuan? Max kijtoua: “Nejua nikmatstoya ika kinmajmanaya ken nitlanemiliaya, san ika, xokualankej”. Itajuan okitekitiltijkej Biblia niman ijkon kipaleuiskej makasikamati tlen notlajtoltiaya. San ika, Max noijki itlaj okichiuj. Yejua kijtoua: “Opeuj ninomachtia itech teotlajtoltin tlen uajlauej ipan Biblia niman opeuj nikimijlia oksekimej telpokamej akin nemiyaj ipan notlanechikol tlen niueltiaya”. ¿Kenon okipaleui yejuin? Max kijtoua: “Sakin ika onikchiuj yejon, onikasikamat ika Biblia yemelak ualeua itech toTajtsin”.

6. ¿Tlenon noneki tikchiuaskej tla tiometlamatij, niman tleka?

⁶ Tla ijkon ken Max, xok más tikneltoka tla Biblia temachtia tlen melauak, ¿tlenon uelis tikchiuas? Maski xnoneki timoyolkokos, noneki itlaj tikchiuas. Ijkuak peua tiometlamatij, yeskia kentla ijkuak itlaj teposkisa. Tla itlaj tlen melak patioj peua teposkisa, ijtlakauis tla xtikyektlaliaj. ¿Tlenon uelis tikchiuas tla tikita ika motlaneltok yopeuj ijtlakaui? Kachtopa xmotlajtolti: “¿Nikneltoka tlen Biblia kijtoua itech tlen panos ika tlayekapan?”. Tla achijtsin tiometlamati, noneki xmomachti teotlajtoltin tlen yonochiujkej. ¿Tlenon mitspaleuis kuajli xkimasikamati?

7. ¿Tlenon okipaleui Daniel makimasikamati teotlajtoltin? (Daniel 12:10; noijki xkita tlaixkopinajli).

⁷ Tla tiknekij tikimasikamatiskej teotlajtoltin, noneki tikitaskej tlen okichiuj Daniel. Yejua kuajli nomachtiaya pampa kinekiya kimatis tlen melauak. Noijki, ouel okimasikamat teotlajtoltin pampa yolyemanki katka. Kimatstoya ika Jehová kinmaka tlamachilistli akin kixmatij niman kintlakamatij itlanauatiluan (Dan. 2:27, 28; xpoua Daniel 12:10). Okiteititi ika yolyemanki katka ijkuak okitlajtlanili  Jehová makipaleui (Dan. 2:18). Daniel kuajli onomachti iTlajtol toTajtsin. Kuajli kitaya tlen kijtouayaj amatlajkuiloltin tlen ionkatkaj ijkuak yejua nemiya (Jer. 25:11, 12; Dan. 9:2). ¿Kenon uelis tikchiuaskej ijkon ken yejua?

8. ¿Tleka sekimej nomachtiaj Biblia, niman tlenon noneki tikchiuaskej tejuamej?

⁸ Xkita tleka tikneki tikinmasikamatis teotlajtoltin. ¿Tikchiuasneki pampa tikneki tikixmatis tlen melauak? Tla kema, Jehová mitspaleuis (Juan 4:23, 24; 14:16, 17). San ika, sekimej nomachtiaj Biblia pampa kinekij kinextiskej itlaj tlen makiteititi ika xualeua itech toTajtsin. Kinekij san no yejuamej kijtoskej tlenon kuajli niman tlenon xkuajli, niman ijkon kichiuaskej tlen yejuamej kuelitaj. Kuakon, tejuamej noneki tomachtiskej teotlajtoltin pampa tiknekij tikmatiskej tlen melauak. Noijki, para tikimasikamatiskej noneki tikchiuaskej itlaj okse.

9. ¿Tlenon noneki tikchiuaskej para tikimasikamatiskej teotlajtoltin tlen uajlauej ipan Biblia, niman tleka?

⁹ Xteititi ika tiyolyemanki. Jehová yokijto kinpaleuis akin yolyemankej (Sant. 4:6). Yejua ika, tla tiknekij tikinmasikamatiskej teotlajtoltin tlen uajlauej ipan Biblia, noneki tiktlajtlaniliskej matechpaleui. Tla tiyolyemankej, noijki tokauiliskej matechpaleui tekitketl yolmelauak niman tlamachilise, tlen Jehová kitekitiltia para texchikauilis totlaneltok (Luc. 12:42). Pampa Jehová se toTajtsin akin kuelita nochi kuajli manochiua, kitekitiltia yejuin tekitketl para techpaleuis matikasikamatikan tlen melauak temachtia Biblia (1 Cor. 14:33; Efes. 4:4-6).

10. ¿Tlenon tiueli itech Esther?

¹⁰ Kuajli xmomachti iTlajtol toTajtsin. Uelis peuas timomachtis itech se teotlajtojli tlen melak tikuelita. Yejon tlen okichiuj se tokniuj akin itoka Esther. Yejua kinuelitaya teotlajtoltin tlen tlajtouayaj itech Mesías. Esther kijtoua: “Ijkuak nikpiaya 15 xiuitl, niknekiya kuajli nikasikamatis tla yejon teotlajtoltin yemelak onoijkuilojkej achto ika Jesús mauajla ipan tlaltikpaktli”. Kuakon, ¿tlenon okichiuj? Opeuj kuajli nomachtia itech Rollos del mar Muerto, niman tlen okinexti okipaleui maka maometlamati. Yejua kijtoua: “Seki de yejon rollos onoijkuilojkej achto ika Jesús uajlaskia ipan tlaltikpaktli. Kuakon, yejon teotlajtoltin tlen ompa nonextiaj ualeuaj itech toTajtsin”. San ika, Esther noijki kijtoua: “Seki ononek miyekpa nikamapouas niman ijkon nikasikamatis”. Maski ijkon, yejua kijtoua ika melak okipaleui niman ika sakin ika kuajli onomachti miyekej teotlajtoltin, san no yejua okitak ika Biblia temachtia tlen melauak.

11. ¿Kenon techpaleuiya tla tikasikamatij ika Biblia temachtia tlen melauak?

¹¹ Ijkuak tikitaj kenon yonochiujkej seki teotlajtoltin tlen uajlauej ipan Biblia, más titlaneltokaj itech Jehová niman itech tlen technauatia. Noijki, teotlajtoltin techpaleuiyaj matikchiakan tlen uajlauj ika tlayekapan niman kuajli matitlanemilikan maski san tlenon mapano. Amantsin, tikimitaskej ome teotlajtoltin tlen uajlauej ipan libro tlen okijkuilo Daniel niman inochiujtokej ipan yejuin tonaltin. Tla tikinmasikamatij, techpaleuis matiktlapejpenikan tlen kuajli.

12. ¿Tlenon kineskayotiaj ikxiuan tlamachijchiuajli? (Daniel 2:41-43).

¹² (Xpoua Daniel 2:41-43). Tekiuaj Nabucodonosor okitemik se ueyi tlamachijchiuajli tlen ikxiuan tlachijchiujtli katkaj ika “hierro nelijtikatka iuan tlalajmojli”. Ijkuak tikimitaj teotlajtoltin tlen uajlauej ipan libro tlen okijkuilo Daniel niman Apocalipsis, tikasikamatij ika ikxiuan tlamachijchiuajli kineskayotiaj Estados Unidos niman Reino Unido, akin aman tikimitaj ika uejueyixtokej. Ijkuak Daniel okijli Nabucodonosor tlenon kijtosneki yejon tlamachijchiuajli tlen okitemik, noijki okijto: “On reino kojtik yes pero no xkojtik yes”. ¿Tleka okijto ika noijki xkojtik yeskia? Pampa tlaltikpakchanejkej tlen Estados Unidos niman Reino Unido kinyekanaj, tlen yeskiaj kentla “tlalajmojli” noso sokitl, xkinkauiliaj nochi makiyekanakan. b

13. ¿Tlenon tikasikamatij ika tlen okitak Daniel itech tlamachijchiuajli?

¹³ Tlen techijlia Daniel itech tlamachijchiuajli niman itech ikxiuan tlamachijchiuajli, techpaleuiya miyek matikasikamatikan. Kachtopa, ika Estados Unidos niman Reino Unido yokiteititijkej ika kojtikej. Ijkon tikijtouaj pampa melak otepaleuijkej ijkuak onochiuj Kachtopa niman ika Okpa Guerra ipan nochi tlaltikpaktli. San ika, tikmatij ika xok kojtik niman más xok kojtik yes, pampa akin ompa chantij kimixnamikij akin tlayekanaj. Ika ome, tikmatij ika yejuin ueyixtika tekiuaj sa ika tlami niman xok onias okse. ¿Tleka? Pampa iTekiuajyo toTajtsin kinpopolos nochimej gobiernos. Maski sekimej países kixnamikisnekiskej, xueliskej kitekipatlaskej. Ijkon tikasikamatij pampa teotlajtojli kijtoua ika iTekiuajyo toTajtsin, tlen yeskia kentla se “ueyi tetl”, kixoxotonis ikxiuan tlamachijchiuajli (Dan. 2:34, 35, 44, 45).

14. ¿Tlenon tikchiuaskej tla kuajli tikasikamatij teotlajtojli itech ikxiuan tlamachijchiuajli?

¹⁴ ¿Yemelak tikneltoka ika melauak tlen okijto Daniel itech ikxiuan tlamachijchiuajli? Tla kema, nimantsin nesis ipampa tlen tikchiua. Xtiknekis timotomintis ipan yejuin tlaltikpaktli tlen ikipopoloskej (Luc. 12:16-21; 1 Juan 2:15-17). Noijki, tla tikasikamati yejuin teotlajtojli, mitspaleuis más xtenojnotsa niman más xkinpaleui oksekimej manochiuakan inomachtijkauan Cristo (Mat. 6:33; 28:18-20). Kuakon, aman ika yotikitakej yejuin teotlajtojli, kuajli tla totlajtoltiaj: “¿Tlen nikchiua kiteititia ika kuajli nikmatstok ika iTekiuajyo toTajtsin kinpopolos nochi gobiernos?”.

15. ¿Aman akinon tekiuaj akin tlayekana norte niman akinon tekiuaj akin tlayekana sur? (Daniel 11:40).

¹⁵ (Xpoua Daniel 11:40, TNM). c Daniel capítulo 11 tlajtoua itech omemej tekiuajkej noso gobiernos akin san no yejuamej noixnamikij pampa kinekij tlayekanaskej ipan tlaltikpaktli. Pampa yotikitakej yejuin teotlajtojli niman okseki teotlajtoltin tlen uajlauej ipan Biblia, aman tikmatstokej ika Rusia niman akin kipaleuiyaj yejua tekiuaj akin tlayekana norte. Noijki yotikasikamatkej ika Estados Unidos niman Reino Unido yejua tekiuaj akin tlayekana sur. d

16. ¿Kenon tekiuaj akin tlayekana norte kintlajyouiltia itekipanojkauan toTajtsin?

¹⁶ Tekiuaj akin tlayekana norte kintlaueltokatikaj itekipanojkauan toTajtsin akin chantij  kampa yejua tlayekana. Sekimej iteixpantijkauan Jehová yokinuijuisojkej niman yokintsajkej ipampa tlen kineltokaj. San ika, tokniuan xkinmojtia tlen tekiuaj akin tlayekana norte kinchiuilia, yej más yochikauj intlaneltok. ¿Tleka? Pampa kimatstokej ika ipan libro tlen Daniel okijkuilo kijtoua ika kintlaueltokaskiaj (Dan. 11:41). e Tla nochipa tikilnamiktokej yejuin teotlajtojli, techpaleuis matitlamachixtokan niman matimelajkanemikan itech Jehová.

17. ¿Kenon tekiuaj akin tlayekana sur kintlaueltoka itekipanojkauan toTajtsin?

¹⁷ Tekiuaj akin tlayekana sur noijki okixnamik ikalpan Jehová. Ijkon tikijtouaj pampa ijkuak panotoya Kachtopa Guerra ipan nochi tlaltikpaktli niman ika Okpa Guerra ipan nochi tlaltikpaktli, miyekej tokniuan okintsajkej, niman sekimej kokonej akin noijki iteixpantijkauan Jehová, okinkixtijkej ipan escuelas pampa omelajkanenkej itech toTajtsin. San ika, maski xnimantsin nesi, aman itekipanojkauan Jehová kintlaueltokaj pampa  kipaleuiyaj iTekiuajyo toTajtsin. San matikonteneuakan yejuin: ijkuak kintlapejpeniaj tekiuajkej, kanaj se tokniuj kinekis kipaleuis se partido noso se candidato. Maski kanaj xyas kontlalis ivoto, kanaj ipan itlamachilis niman ipan iyojlo kineki yakaj matetlani. San ika, tla tiknekij yemelak timelajkanemiskej itech Jehová xsan noneki totlajpiyaskej ika tlen tikchiuaj, noijki noneki totlajpiyaskej ika tlen tiknemiliaj niman ika tlen tikmachiliaj (Juan 15:18, 19; 18:36).

18. ¿Tlenon tikmachilia ijkuak tikita ika noixnamikij yejon omemej tekiuajkej? (Noijki xkita tlaixkopinajli).

¹⁸ Akin xtlaneltokaj itech teotlajtoltin tlen uajlauej ipan Biblia, kanaj melak ajmankamikij ijkuak kitaj ika tekiuaj akin tlayekana sur noixnamiki iuan tekiuaj akin tlayekana norte (Dan. 11:40, TNM). Ipampa nochi armas tlen kinpiyaj, yejuin omemej tekiuajkej ueliskia kinpopoloskej nochimej akin nemij ipan tlaltikpaktli, san ika, tikmatstokej ika Jehová xkinkauilis ijkon makichiuakan (Is. 45:18). Yejua ika, xtajmankamikij nion xtomojtiaj ijkuak tikitaj ika tekiuaj akin tlayekana norte niman tekiuaj akin tlayekana sur noixnamikij. Yej, más chikaui totlaneltok pampa yejon techititia ika iajsitika tonajli ijkuak toTajtsin tlapopolos.

19. ¿Tlenon xtikmatij itech teotlajtoltin?

¹⁹ Xtikmatij kenon nochiuaskej seki teotlajtoltin tlen uajlauej ipan Biblia. Nion teotlajtoketl Daniel xkasikamatiya seki tlen kijkuilouaya (Dan. 12:8, 9). San ika, maski xmás tikasikamatij kenon nochiuas se teotlajtojli, xkijtosneki tla xnochiuas. Kuajli tikmatstokej ika Jehová techijlis tlen noneki tikmatiskej ijkuak kitas ika noneki, ijkon ken yeuejkaui okichiuj (Amós 3:7).

20. ¿Katlejuamej teotlajtoltin sa achijtsin poliui para nochiuaskej, niman tlenon noneki tikchiujtoskej?

²⁰ Kalpamej kijtoskej: “Onkaj yolseuilistli niman xakaj nion itlaj uelis techmiktis” (1 Tes. 5:3). Ijkuak ijkon panos, gobiernos kimixnamikiskej tlaneltokiltin tlen xmelajkej niman kinpopoloskej (Apoc. 17:16, 17). Sakin, kixnamikiskej ikalpan toTajtsin (Ezeq. 38:18, 19). Niman sakin, peuas Armagedón (Apoc. 16:14, 16). Kuajli tikmatstokej ika sa achijtsin poliui para nochiuas yejuin. Aman ika xiyejko yejon tonajli, kuajli matikitakan kenon nochiuaj teotlajtoltin niman matikinpaleuikan oksekimej noijki ijkon makichiuakan. Tla ijkon tikchiuaj, tikititiskej toTajtsin Jehová ika tiktlasojkamatij nochi tlen kichiua topampa.