1. ¿Tleka tikuelitaj touikaskej imiuan akin teijyouiyaj niman xnosiaujkauaj?

 TINOCHIMEJ tikuelitaj touikaskej imiuan akin teijyouiyaj niman xnosiaujkauaj. ¿Tleka? Pampa melak tikintlakaitaj akin ueli tlamachiaj. Niman tikinpatiojkaitaj akin techijyouiyaj maski miyekpa topopolouaj. Noijki, melak tiktlasojkamachiliaj akin otechmachti itech Biblia pampa xonosiaujkauj ijkuak ouijtika tikitayaj itlaj tikasikamatiskej noso ijkuak xnimantsin tikchiuayaj tlen tiueltiayaj. Niman más tiktlasojkamachiliaj Jehová pampa melak techijyouiya (Rom. 2:4).

2. ¿Kemanon uelis ouijtika tikitaskej tikteititiskej ika xtosiaujkauaj niman titeijyouiyaj?

² Tinochimej tiktlasojkamatij ika oksekimej matechijyouikan. San ika, ouijtika tikitaj ijkuak tejuamej noneki titeijyouiskej. San matikonteneuakan yejuin: kanaj ouijtika tikitaj titlamachiaskej tla tinemij ipan se ueyak fila, niman más tla xok tikpiyaj tiempo. Kanaj titlauelmikij ijkuak yakaj techkualania. Niman kemantika kanaj uelis tiknemiliskej ika Jehová youejkauj ika xtlayektlalia ipan tlaltikpaktli. ¿Xmelak ika tinochimej tikuelitaskiaj más titeijyouiskej niman xtosiaujkauaskej? Ipan yejuin tlamachtijli tikitaskej tlenon kichiuaj akin teijyouiyaj niman xnosiaujkauaj, niman tleka melak noneki ijkon matikchiuakan. Noijki, tikitaskej seki tlen techpaleuis más matiteijyouikan niman maka matosiaujkauakan.

3. ¿Tlenon kichiua yakaj akin xnosiaujkaua niman teijyouiya ijkuak kikualanisnekij?

³ Matikitakan tlenon kichiua akin teijyouiya niman xnosiaujkaua. Kachtopa, xnimantsin kualani. Yejua nokojtilia yolseujtos ijkuak oksekimej kikualanisnekij niman xtetlakuepiltia. Ipan Éxodo 34:6 ijkin noijtoua itech Jehová: “¡NiJehová! ¡NimoDios yejuan nitetlasojtla niman niteiknelia! Xnimantsin nikualani. Sanoyej nitetlasojtla, niman nochipa nikchiua on tlen nikijtoua”.

4. ¿Tlenon kichiua yakaj akin xnosiaujkaua niman teijyouiya?

⁴ Ika ome, akin tlamachia ika yolseuilistli xnosiaujkaua tla itlaj uejkaui (Mat. 18:26, 27). ¿Kemanon nonekis tikteititiskej ika xtosiaujkauaj? Ijkuak yakaj itlaj techtlajtlajtouilia, noneki kuajli tijkakiskej niman xtiktlajtolkotonaskej (Job 36:2). Noijki, xnoneki tosiaujkauaskej para tikpaleuiskej yakaj makasikamati tlen tikmachtiaj itech Biblia noso makikajkaua itlaj tlen xkuajli.

5. ¿Kenon más uelis tikteititiskej ika titeijyouiyaj niman xtosiaujkauaj?

⁵ Ika yeyi, kuajli tlanemilia achto itlaj kichiuas. Melauak ika kemantika noneki itlaj nimantsin nochiuas. San ika, ijkuak noneki nochiuas se tekitl tlen ueyi kijtosneki, akin teijyouiya niman xnosiaujkaua xsan kisiujkachiua. Yejua kikaua tiempo para kinemilis kenon kichiuas niman para kuajli kichiuas yejon tekitl.

6. ¿Tlenon kichiua yakaj akin teijyouiya niman xnosiaujkaua ijkuak kixnamiki itlaj tlen ouijtika?

⁶ Ika naui, nokojtilia tlaxikos niman xsan kijtotika tlen xkuajli ipan nochiua. Kuakon, akin teijyouiya niman xnosiaujkaua noijki ueli tlaxikoua. Yejuin xkijtosneki tla xkuajli tla tikijliaj se toamigo kenon tomachiliaj ijkuak tikixnamiktokej tlen xkuajli. San ika, akin teijyouiya niman xnosiaujkaua nokojtilia tlanemilis itech tlen kuajli niman kitekichiuilia Jehová ika  pakilistli (Col. 1:11). Akin tiktekichiuiliaj toTajtsin noneki tokojtiliskej ijkon tikchiuaskej. Matikitakan tleka.

7. Ijkon ken kijtoua Santiago 5:7, 8, ¿tleka melak noneki matiteijyouikan niman maka matosiaujkauakan? (Noijki xkita tlaixkopinajli).

⁷ Tla tiknekij timakisaskej, melak noneki matiteijyouikan niman maka matosiaujkauakan. Ijkon ken itekipanojkauan toTajtsin akin yeuejkaui onenkej, noneki titlamachiaskej ika yolseuilistli hasta mayejko tonajli ijkuak toTajtsin kichiuas tlen yokijto (Heb. 6:11, 12). Biblia kijtoua ika tejuamej tiyeskiaj kentla yakaj akin toka (xpoua Santiago 5:7, 8). Akin toka, chikauak tekiti niman katekiya tlen okitokak maski xkimati kemanon tlakis. Kuakon, yejua tlamachia hasta ijkuak kipixkas tlen yokitokak. Noijki ijkon kichiuaj akin kitekichiuiliaj toTajtsin: chikauak tekitij maski xkimatij kemanon yejkos inTeko (Mat. 24:42). Kema, titlamachiaj ika yolseuilistli pampa tikmatij ika ajsis tonajli ijkuak Jehová kichiuas nochi tlen yokijto. Tla tosiaujkauaskiaj, peuaskia tiktlalkauiskiaj tlen melauak. Noijki, kanaj peuas tikchiuaskej tlen san aman uelis techyolpaktis. San ika, tla xtosiaujkauaj, titlaxikoskej hasta ijkuak toTajtsin tlayektlalis niman techmakixtis (Miq. 7:7; Mat. 24:13).

8. ¿Kenon tla titeijyouiyaj techpaleuis kuajli matouikakan imiuan oksekimej? (Colosenses 3:12, 13).

⁸ Tla titeijyouiyaj, kuajli touikaskej imiuan oksekimej niman kuajli tikinkakiskej ijkuak tlajtouaj (Sant. 1:19). Noijki, titlapaleuiskej maonia yolseuilistli, kuajli tiknemiliskej tlenon tikchiuaskej niman xtikijtoskej itlaj tlen uelis teyolkokos. Tla yakaj techyolkokoua, xnimantsin tikualantiuetsiskej nion xtikchiuiliskej tlen yejua otexchiuili. Yej tokojtiliskej tikimijyouiskej oksekimej niman ika nochi toyojlo tikintlapopoluiskej (xpoua Colosenses 3:12; Colosenses 3:13, TNM). b

9. ¿Kenon tla xtosiaujkauaj techpaleuiya ijkuak itlaj tiktlapejpeniaj? (Proverbios 21:5).

⁹ Tla xtosiaujkauaj, techpaleuis matiktlapejpenikan tlen kuajli. Xnoneki nimantsin tikchiujtiuetsiskej itlaj, noneki tikxeloskej tiempo niman ijkon tikitaskej tla techpaleuis noso techijtlakos tlen tiktlapejpeniskej (xpoua Proverbios 21:5). San matikonnemilikan tlenon tikchiuaskiaj tla tiktejtemojtokej se tekitl. Kanaj tiknekiskej tikselijtiuetsiskej san katlejua tekitl, maski kanaj xok uelis tiaskej tlanechikoltin noso xok uelis chikauak titenojnotsaskej. San ika, tla xtosiaujkauaj, kuajli tiknemiliskej kanon onka yejon tekitl, kech horas nonekis titekitiskej, tla kijtlakos tofamilia niman tla kijtlakos ken touikaj iuan Jehová. Tla xtosiaujkauaj, xtitlajyouiskej ipampa tlen tiktlapejpeniskej.

10. ¿Tlenon uelis tikchiuaskej para xnimantsin tosiaujkauaskej niman más titeijyouiskej?

¹⁰ Matiktlajtlanilikan Jehová matechpaleui más matiteijyouikan niman maka matosiaujkauakan. San akin kipiyaj iespíritu santo toTajtsin uelis teijyouiskej niman xnosiaujkauaskej (Gál. 5:22, 23). Kuakon, matiktlajtlanilikan Jehová matechmaka iespíritu santo niman ijkon uelis titeijyouiskej niman xtosiaujkauaskej. Tla tikixnamiktokej itlaj kampa noneki tikteititiskej ika titeijyouiyaj niman xtosiaujkauaj, matiktlajtlanilikan Jehová más matechmaka iespíritu santo (Luc. 11:9, 13). Noijki  uelis tiktlajtlaniliskej Jehová matechpaleui matikitakan nochi ijkon ken yejua kita. Niman tla yotikchiujkej teoyotl, mojmostla matokojtilikan tikteititiskej ika titeijyouiyaj niman xtosiaujkauaj. Tla nochipa tiktlajtlaniliaj Jehová matechpaleui niman tla tokojtiliaj tikchiuaskej ijkon ken tiktlajtlaniliaj ipan toteoyouj, tikitaskej ika más titeijyouiskej niman xtosiaujkauaskej.

11, 12. ¿Kenon yokiteititi Jehová ika teijyouiya niman xnosiaujkaua?

¹¹ Matitlanemilikan intech akin Biblia kinteneua. Ipan Biblia tikinnextiaj miyekej akin okiteititijkej ika teijyouiyaj niman xnosiaujkauaj. Tla titlanemiliaj itech tlen okichiujkej, noijki uelis tikchiuaskej ijkon ken yejuamej. Achto titlajtoskej intech yejuamej, titlajtoskej itech yakaj akin más kuajli yokiteititi ika teijyouiya niman xnosiaujkaua: Jehová.

¹² Ipan xochitlalpan Edén, Satanás okitsokuijloti itoka Jehová niman okichiuj makinemilikan ika xkuajli tlayekana niman xtetlasojtla. Jehová kimatstoya ika nonekiya tiempo niman ijkon kiteititis ika san yejua kuajli tlayekana. Ika yejon, xokipopolojtiuets Satanás niman okiteititi ika xnosiaujkaua niman ueli noteltia. Aman ika kichiatika mayejko tonajli ijkuak kiteititis ika san yejua kinamiki matlayekana, kijyouijtika makitsokuijlokan itoka. San ika, pampa Jehová teijyouijtika, miyekej yokixmatkej niman uelis kiseliskej nemilistli tlen xkeman tlamis (2 Ped. 3:9, 15). Tla tiknemiliaj kenon melak yotepaleui pampa Jehová teijyouiya, xmás ouijtika tikitaskej titlamachiaskej hasta matlayektlali.

13. ¿Kenon okiteititi Jesús ika kichiua ijkon ken iTajtsin ijkuak ouajlajka ipan tlaltikpaktli? (Noijki xkita tlaixkopinajli).

¹³ Ijkuak ouajla ipan tlaltikpaktli, Jesús noijki okiteititi ika teijyouiya niman xnosiaujkaua  ijkon ken iTajtsin. Tikmatstokej ika ouijtika okitak ijkon kichiuas. Más ijkuak tlajtouaya imiuan escribas niman fariseos, akin omexayakyejke katkaj (Juan 8:25-27). San ika, ijkon ken iTajtsin, Jesús xnimantsin kualaniya. Yejua xokinuijuikalti itlauelikniuan ijkuak kikualanisnekiyaj (1 Ped. 2:23). Jesús otlaxiko niman xtlaj okijto. Ika yejon, Biblia techijlia: “Xtlanemilikan itech Jesús, yejuan sanoyej okijyouij nochi on tlajtlamach yejuan okichiuilijkej on tlajtlakolejkej” (Heb. 12:2, 3). Kuajli matikmatstokan ika Jehová techpaleuis matikxikokan maski san tlenon tikixnamikiskej.

14. ¿Tlenon techmachtia tlen ipan onochiuj Abrahán? (Hebreos 6:15; noijki xkita tlaixkopinajli).

¹⁴ ¿Tlenon techpaleuis matitlamachixtokan hasta mayejko itonal Jehová? Kanaj tiknemiliaj ika melak youejkauj niman ika xok tikitaskej. Matikitakan tlen ipan onochiuj Abrahán. Jehová okijli Abrahán: “Nikinmiyekilis mouejkakoneuan ipan in tlajli niman nochiuaskej sen ueyi país”. Ijkuak okijli yejuin, Abrahán kipiaya 75 xiuitl niman xkipiaya nion se ikoneuj (Gén. 12:1-4). ¿Abrahán ouel okitak kenon onochiuj nochi tlen Jehová okijli? Ka, san seki okitak. Sakin ika okipanaui atentli Éufrates ononek tlamachias 25 xiuitl para kitas seki tlen Jehová yokijlika. Kuakon, Jehová okichiuj ika yejua niman isiuauj makipiyakan se inkoneuj, akin okitokayotijkej Isaac. Niman 60 xiuitl sakin onenkej ixuiuan, Esaú niman Jacob (xpoua Hebreos 6:15). San ika, Abrahán xokitak tla ichanejkauan omiyekiyakej niman tla Jehová okinmakak yejon Tlajli tlen yokijtoka kinmakas. Maski ijkon, yejua kuajli onouikak iuan toTajtsin (Sant. 2:23). Xkonnemili kenon melak yolpakis Abrahán ijkuak yoliuis. Kitas ika pampa otlaneltokak niman  xonosiaujkauj, nochimej otikselijkej tlen melak kualtsin (Gén. 22:18). ¿Tlenon tiuelij? Ika kanaj aman xuelis tikitaskej kenon nochiua nochi tlen Jehová yotechijli. San ika, tla xtosiaujkauaj, ijkon ken Abrahán, uelis tikmatstoskej ika Jehová techteochiuas aman niman más techteochiuas ipan yenkuik tlaltikpaktli (Mar. 10:29, 30).

15. ¿Tlenon ueliskia toselti tomachtiskej?

¹⁵ Biblia kinteneua miyekej akin xonosiaujkaujkej (Sant. 5:10). ¿Tleka xtimomachtia intech yejuamej? c Matikonteneuakan David. Yejua melak telpochtli katka ijkuak okitlapejpenijkej para tekiuajtis Israel. San ika, ononek kichias miyek xiujtin para uelis tekiuajtis. Simeón niman Ana chikauak okitekichiuilijkej Jehová niman kichiatoyaj Mesías (Luc. 2:25, 36-38). Ijkuak timomachtis intech yejuamej, xmotlajtolti: “¿Tlenon okipaleui maka manosiaujkaua? ¿Kenon okipaleui pampa ijkon okichiuj? ¿Kenon noijki uelis ijkon nikchiuas?”. Noijki uelis miyek tomachtiskej intech akin onosiaujkaujkej (1 Sam. 13:8-14). Uelis totlajtoltiskej: “¿Tleka onosiaujkaujkej? ¿Kenon okimijtlako pampa ijkon okichiujkej?”.

16. ¿Kenon techpaleuiya tla titeijyouiyaj niman xtosiaujkauaj?

¹⁶ Matiknemilikan kenon techpaleuis tla titeijyouiyaj niman xtosiaujkauaj. Tla ijkon tikchiuaj, más tiyolpakiskej niman tiyolseujtoskej. Kuakon, tla titeijyouiyaj niman xtosiaujkauaj, techpaleuis maka matikualokan niman kuajli matomachilikan. Noijki techpaleuiya kuajli matouikakan imiuan oksekimej niman maka maonia tlauejli ipan tlanechikojli. Tla xnimantsin tikualanij ijkuak yakaj kichiua itlaj tlen xtikuelitaj, xueyiyas tlauejli (Sal. 37:8; Prov. 14:29). San ika, más techpaleuis pampa tikchiujtoskej ijkon ken toTajtsin niman itech tonisiuiskej.

17. ¿Tlenon noneki tikchiuaskej?

¹⁷ Ken yotikitakej, melak tepaleui tla titeijyouiyaj niman xtosiaujkauaj. Maski kemantika ouijtika ijkon tikchiuaskej, Jehová nochipa techpaleuis. Aman ika xiyejko itonal toTajtsin, uelis kuajli tikmatstoskej ika “toTEKO nochipa kincuidaroua yejuan kitlakaitaj niman yejuan kitlaliaj inyojlo ipan itetlajsojtlalis” (Sal. 33:18). Kuakon, tinochimej matokojtilikan titeijyouiskej niman xtosiaujkauaskej.