1, 2. a) ¿Kenon kimita Jehová akin kichiuaj se tlajtlakojli niman xnoyolkuepaj? b) ¿Tlenon kineki Jehová?

 JEHOVÁ xkuelita tlajtlakojli niman xkitekauilia san tlenon manochiua ipan ikalpan (Sal. 5:​4-6). Yejua kineki matikintlakamatikan itlanauatiluan tlen yotechinmakak ipan Biblia. San ika, xkichia maka keman matopopolokan pampa kimatstok ika titlajtlakolejkej (Sal. 130:​3, 4). Aman tej, Jehová xkinselia on tlakamej akin kichiuaj tlen xkuajli niman ika notlamiyaj ika Jehová kintlapojpoluis pampa kipiya ueyi tetlasojtlalistli (Jud. 4). Biblia hasta kijtoua ika toTajtsin kinpopolos “nochimej on xyolchipajkej tlakamej” ipan se guerra tlen itoka Armagedón (2 Ped. 3:7; Apoc. 16:16).

² Aman tej, Jehová xkineki nion se mapopoliui. Ipan okseki tlamachtiltin, otikitakej ika Biblia kuajli kijtoua ika Jehová kineki “nochimej ma noyolpatlakan” (2 Ped. 3:9). Tlayekankej kichiuaj ijkon ken Jehová. Yejuamej xnosiaujkauaj ijkuak kinpaleuiyaj akin yokichiujkej se ueyi tlajtlakojli manoyolkuepakan niman oksejpa kuajli manouikakan iuan Jehová. San ika, xnochimej kinokauiliaj makinpaleuikan (Is. 6:9). Sekimej xkinekij nopatlaskej maski tlayekankej miyekpa kiyejyekouaj kinpaleuiskej manoyolkuepakan. ¿Tlenon noneki nochiuas ijkuak ijkon panos?

 “XKIXTIKAN NEMOTSAJLAN ON XKUAJLI TLAKATL”

3. a) Ijkon ken kijtoua Biblia, ¿tlenon noneki nochiuas ijkuak yakaj akin okichiuj se ueyi tlajtlakojli xnoyolkuepa? b) Tla yakaj xnoyolkuepa, ¿tleka tikijtouaj ika san no yejua okitlapejpeni makikixtikan itech tlanechikojli?

³ Tla yakaj kichiua se ueyi tlajtlakojli niman xnoyolkuepa, tlayekankej noneki kichiuaskej ken kijtoua 1 Corintios 5:​12, 13: “Xkixtikan nemotsajlan on xkuajli tlakatl”. Uelis tikijtoskej ika akin otlajtlako san no yejua okitlapejpeni makikixtikan itech tlanechikojli, tlen ipan panotok san no yejua okinotejtemouili (Gál. 6:7). ¿Tleka? Pampa xkinokauilia makipaleuikan tlayekankej maski miyekpa yokiyejyekojkej kipaleuiskej (2 Rey. 17:​12-15). Tlen kichiujtika kiteititia ika xkineki kitlakamatis Jehová (Deut. 30:​19, 20).

4. Ijkuak kikixtiaj yakaj itech tlanechikojli, ¿tleka notemaka se anuncio?

⁴ Ijkuak kikixtiaj itech tlanechikojli yakaj akin okichiuj se ueyi tlajtlakojli pampa xnoyolkuepa, notemaka se anuncio ipan tlanechikojli kampa noijtoua ika xok iteixpantijkauj Jehová. a Yejuin anuncio xnotemaka para kipijpinaujtiskej akin otlajtlako, yej para tokniuan makichiuakan tlen kijtoua Biblia, ika xnoneki iuan nosentlaliskej nion iuan tlakuaskej (1 Cor. 5:​9-11). Jehová otechmakak yejuin tlanauatijli pampa kineki kuajli matinemikan. Apóstol Pablo ijkin okijkuilo: “San achijtsin tlaxokolilistli kajkokui nochi on tixtli de harina” (1 Cor. 5:6). Tla xnokixtia itech tlanechikojli akin xnoyolkuepa, oksekimej tokniuan ueliskia kinemiliskej ika xnoneki nokojtiliskej kitlakamatiskej Jehová (Prov. 13:20; 1 Cor. 15:33).

5. ¿Kenon noneki tikitaskej akin xok iteixpantijkauj Jehová, niman tleka?

⁵ Kuakon, ¿kenon noneki tikitaskej akin xok iteixpantijkauj Jehová? Maski xok iuan tosentlaliaj, tejuamej xtiknemiliaj tla xok keman uelis uajnokuepas ipan tlanechikojli, yej tikitaj ken se borreguito akin yopoliuj niman ika uelis oksejpa uajnokuepas imiuan iborreguitos toTajtsin. Maka matikilkauakan ika yejua onosentemakaka itech Jehová. Teajman ika aman xok kichiua tlen okijto ijkuak onosentemakak itech Jehová, niman yejon melak kijtlakojtika (Ezeq. 18:31). Chika ok onka tiempo niman Jehová kinektok teiknelis, uelis tikchiaskej ika akin otlajtlako oksejpa mauajnokuepa ipan tlanechikojli. Kuakon, ¿kenon tlayekankej uelis kipaleuiskej akin yokikixtijkej itech tlanechikojli?

KENON TLAYEKANKEJ KINPALEUIYAJ AKIN YOKINKIXTIJKEJ ITECH TLANECHIKOJLI

6. ¿Tlenon kichiuaj tlayekankej niman ijkon kipaleuiskej akin yokikixtijkej itech tlanechikojli?

⁶ Ijkuak yakaj kikixtiaj itech tlanechikojli, ¿tlenon kichiuaj tlayekankej? ¿San ijkon ompa kikauaj niman xkiyejyekouaj kipaleuiskej manokuepa itech Jehová? ¡Ka, xijkon kichiuaj! Ijkuak comité itech tlayekankej kijliaj akin otlajtlako ika xok teuan yes ipan tlanechikojli, noijki kijliaj tlenon noneki kichiuas para uelis uajnokuepas. San ika, xsan yejon, noijki kijliskej ika tla yopanok seki metstin kuelitaskiaj oksejpa iuan nosentlaliskej, ijkon, tlayekankej uelis kitaskej tla yonopatlak. Tla kijtoua ika kema, ijkuak oksejpa iuan nosentlaliskej, tlayekankej kiyolchikauaskej manoyolkuepa niman manokuepa ipan tlanechikojli. San ika ¿tlenon panoua tla ijkuakon ok xnopatla? Tlayekankej kiyejyekojtiaskej iuan nosentlaliskej.

7. ¿Kenon tlayekankej uelis teikneliskej ijkon ken Jehová teiknelia ijkuak tlajtouaj iuan akin yokikixtijkej itech tlanechikojli? (Jeremías 3:​12, TNM).

⁷ Ijkuak tlayekankej tlajtoskej iuan yakaj akin xok teuan itech tlanechikojli, noneki teikneliskej ijkon ken Jehová teiknelia. Yeuejkaui,  ijkuak israelitas xtetlakamatiyaj, Jehová xsan kinchiatoya itech manokuepakan, yejua yej kitaya kenon uelis kinpaleuis niman ijkon itech manokuepakan maski yejuamej nion achijtsin xkiteititiayaj ika yonoyolkuepkaj. Ken otikitakej ipan ika ome tlamachtijli itech yejuin revista, Jehová okitekitilti teotlajtojketl Oseas niman ijkon kiteititis ika yejua melak teiknelia. Okijli Oseas oksejpa makiseli isiuauj maski yejua ok tlajtlakojtoya (Os. 3:1; Mal. 3:7). Ijkon ken Jehová, tlayekankej ika nochi inyojlo kinekij ika akin otlajtlako manoyolkuepa niman manokuepa ipan ikalpan, niman kajsikamachiltiaj ika xouijtika uajnokuepas (xpoua Jeremías 3:​12, TNM). b

8. ¿Kenon techpaleuiya neskayotl itech tekoneuj akin yopoliujka matikajsikamatikan kenon Jehová melak teiknelia? (Lucas 15:7).

⁸ Matikilnamikikan neskayotl itech tekoneuj akin yopoliujka tlen otikteneujkej ipan ika ome tlamachtijli itech yejuin revista. Ijkuak itaj okontak, yejua “onotlaloj, okinamikito, okinapaloj niman okitenkuaj” (Luc. 15:20). Tajtli xokichiak ika ikoneuj makitlajtlanili makitlapojpolui, yej yejua nimantsin okinamiktiuetsito, ijkon ken se tajtli tetlasojtlani kichiuaskia. Tlayekankej noijki ijkon kichiuaj imiuan borreguitos akin yopoliujkej niman nokojtiliaj kinpaleuiskej “oksejpa mauajnokuepakan” (Luc. 15:​22-24, 32). Ijkuak se akin yotlajtlako uajnokuepa, melak yolpakilo ne iluikak. . . ¡niman nikan ipan tlaltikpaktli noijki! (Xpoua Lucas 15:7).

9. ¿Tlenon kimijlia Jehová akin yokichiujkej se ueyi tlajtlakojli?

⁹ Nochi tlen yotikitakej yotechpaleui matikajsikamatikan ika Jehová xkuelita ika ok manemi ipan ikalpan yakaj akin yokichiuj se ueyi tlajtlakojli niman xnoyolkuepa. San ika, yejua xkitlalkauiya pampa yejua kineki ika oksejpa itech manokuepa. Ipan Oseas 14:​4, tikitaj kenon Jehová kimita akin yonoyolkuepkej: “Nejua nenmechpajtis ikan notetlapojpoluilis ipampa on nemotlajtlakol ika onennechtlalkauijkej. [ . . . ] Nemechtlajsojtlas maski xmechmelauaya ma nemechtlajsojtla, pampa noueyitlauel yonejkuanij nemotech”. ¡Melak noneki ika tlayekankej makitstokan tlenon kichiuaj akin yotlajtlakojkej niman ijkon kitaskej tla yopeujkej noyolkuepaj! ¡Niman melak noneki ika akin yokikaujkej Jehová totoka makichiuakan tlen kinpaleuis oksejpa itech mauajnokuepakan!

10, 11. ¿Kenon tlayekankej uelis kinpaleuiskej akin yeuejkaui okinkixtijkej itech tlanechikojli?

¹⁰ ¿Kenon tlayekankej uelis kinpaleuiskej akin yeuejkaui okinkixtijkej itech tlanechikojli? Sekimej akin otlajtlakojkej kanaj xok kichiuaj tlajtlakojli tlen ika okinkixtijkej niman oksekimej kanaj hasta xok kilnamikij tleka okinkixtijkej. Maski san kenon, tlayekankej kiyejyekoskej komontaskej nochimej akin yokinkixtijkej itech tlanechikojli. Ijkuak komontaskej, kimijliskej ika kuelitaskiaj imiuan kichiuaskej teoyotl niman noijki kinyolchikauaskej oksejpa manokuepakan ipan tlanechikojli. Tla se melak youejkauj ika xok nemi ipan tlanechikojli, itlaneltok xok chikaujtok, ika yejon, tla kijtoua ika kineki nokuepas, tlayekankej uelis kijliskej se tokniuj makimachti itech Biblia maski tla xeuajnokuepa ipan tlanechikojli. Tlayekankej noneki kitlapejpeniskej akinon kimachtis.

¹¹ Tlayekankej kinekij teikneliskej ijkon ken Jehová teiknelia, ika yejon, nokojtiliaj kintejtemoskej akin yokinkixtijkej itech tlanechikojli para kimijliskej manokuepakan itech Jehová. Tla yakaj kiteititia ika yonoyolkuep niman xok kichiua tlajtlakojli tlen ika okikixtijkej, uelis nimantsin  nokuepas ipan tlanechikojli (2 Cor. 2:​6-8).

12. a) ¿Kemanon tlayekankej noneki melak kuajli kitaskej tla akin otlajtlako melauak yonoyolkuep? b) ¿Tleka xnoneki nimantsin tiknemilijtiuetsiskej ika sekimej akin okichiujkej se ueyi tlajtlakojli xkeman uelis kimiknelis Jehová? (Noijki xkita nota).

¹² Kemantika sekimej kichiuaj se ueyi tlajtlakojli, kanaj kinajnauiltiaj se konetl, kixnamikij ikalpan toTajtsin, noso, kichiuaj apostasía, noso kichiuaj itlaj para kikauaskej imixnamik, kanaj auilnemij. Tla yakaj okichiuj se tlajtlakojli ken yejuin, tlayekankej noneki melak kuajli kitaskej tla melauak yonoyolkuep achto oksejpa kiseliskej ipan tlanechikojli (Mal. 2:14; 2 Tim. 3:6). Yejuamej noneki kintlajpiyaskej iborreguitos Jehová. San ika, noneki tikajsikamatiskej ika Jehová oksejpa kinselia ipan ikalpan akin melauak noyolkuepaj niman xok kichiuaj tlen melak xkuajli kichiuayaj. Aman tej, maski tlayekankej nonekis melak kuajli kitaskej tla melauak yonoyolkuepkej akin okichiujkej tlen sajnoye xkuajli niman  sajnoye oteyolkokojkej, xnoneki kinemilijtiuetsiskej ika Jehová xkeman uelis kimiknelis (1 Ped. 2:10). c

TLENON UELIS KICHIUASKEJ TOKNIUAN IPAN TLANECHIKOJLI

13. ¿Tlenon tikchiuaj imiuan akin kinchiuiliaj censura, san ika, tlenon tikchiuaj imiuan akin kinkixtiaj itech tlanechikojli?

¹³ Ken otikitakej ipan okse tlamachtijli, kemantika ipan tlanechikojli notemaka se anuncio kampa kijtouaj ika yakaj yokichiuilijkej censura. Ijkuak yakaj censurado noso censurada, ok ueli iuan tosentlaliaj pampa tikmatstokej ika yonoyolkuep niman xok kichiua tlen xkuajli kichiuaya (1 Tim. 5:20). Yejua ok teuan ipan tlanechikojli niman noneki ika tokniuan makiyolchikauakan para ok makichiujto tlen kuajli (Heb. 10:​24, 25). San ika, ijkuak yakaj kikixtiaj itech tlanechikojli, xok iuan tosentlaliaj nion xok iuan titlakuaj (1 Cor. 5:11).

14. ¿Tlenon noneki toseselti tiktlapejpeniskej itech akin yokinkixtijkej itech tlanechikojli? (Noijki xkimita tlaixkopinaltin).

¹⁴ ¿Nochi yejuin kijtosneki ika ijkuak kikixtiaj yakaj itech tlanechikojli semi xnoneki tiknotsaskej? Ka, xyejon tlen kijtosneki. Kuajli tikmatstokej ika xnoneki iuan tosentlaliskej. San ika, tinochimej uelis tiktekitiltiskej totlamachilis tlen yotikmajmachtijkej ika Biblia para tiktlapejpeniskej tla tikyolchikauaskej akin yokikixtijkej, kanaj se tochanejkauj noso se akin totlasojkaikniuj katka, mauiya tlanechikojli. ¿Niman tlenon tikchiuaskej tla yauj tlanechikojli? Yeuejkaui nion xtiktlajpaloskiaj, san ika, aman noneki tiktekitiltiskej totlamachilis tlen yotikmajmachtijkej ika Biblia niman ijkon toseselti tiktlapejpeniskej tlenon tikchiuaskej. Sekimej kanaj kitlapejpeniskej kitlajpaloskej noso kinotsaskej ijkuak ajsis ipan tlanechikojli. Aman tej, xnoneki melak tiuejkauiskej iuan tonojnotsaskej noso xnoneki iuan tosentlaliskej.

15. ¿Itech akinomej tlajtoua 2 Juan 9-11? (Noijki xkita recuadro “ ¿Tlajtojtoyaj itech san noijki tlajtlakojli Juan niman Pablo?”).

¹⁵ Kanaj totlajtoltiaj: “¿Xkijtoua Biblia ika  akin kitlajpaloua yejuin tlaltikpakchane ‘nochiuas ken iuan kimati on tlen xkuajli kichiua’?” (xpoua 2 Juan 9-11). Tla tikimitaj nochi tlaxeloltin, tikitaskej ika ompa tlajtojtika intech akin kixnamikij ikalpan toTajtsin, noso, apóstatas, niman akin kinyolchikaujtinemij tokniuan makichiuakan tlen xkuajli (Apoc. 2:20). Kuakon, tla se tlaltikpakchane kinyolchikaujtinemi tokniuan makixnamikikan ikalpan toTajtsin noso makinchiuakan okseki tlajtlakoltin, tlayekankej xkonitaskej. Yejuin tlaltikpakchane ok uelis nopatlas, san ika, ijkuak xenopatla, xnoneki tiktlajpaloskej nion xtikyolchikauaskej mauiya tlanechikoltin.

MATITEIKNELIKAN KEN JEHOVÁ

16, 17. a) ¿Tlenon kineki Jehová makichiuakan akin yotlajtlakojkej? (Ezequiel 18:​31, 32). b) ¿Kenon tlayekankej uelis tekitiskej iuan Jehová?

¹⁶ Ipan yejuin makuijli tlamachtiltin, yotiuelkej ika Jehová xkineki yakaj mapopoliui (xpoua Ezequiel 18:​31, 32). Yejua kineki ika akin yotlajtlakojkej oksejpa iuan manouikakan (2 Cor. 5:20). Ika yejon, desde yeuejkaui Jehová kintlajtlanilia akin yokitlalkauijkej manoyolkuepakan niman oksejpa itech manokuepakan. Tlayekankej kipiyaj se kualtsin tekitl ipan tlanechikojli: tekitij iuan Jehová niman ijkon kinpaleuiskej akin yokichiujkej se ueyi tlajtlakojli manoyolkuepakan (Rom. 2:4; 1 Cor. 3:9).

¹⁷ ¡Melak kualtsin tikonnemilis kenon sajnoye yolpakilo ne iluikak ijkuak se akin otlajtlako noyolkuepa! ToTaj iluikakchane, Jehová, melak yolpaki ijkuak se iborreguito akin yopoliujka oksejpa nokuepa ipan tlanechikojli. Nochipa matitlanemilikan itech kenon Jehová teiknelia niman tetlasojtla, tla ijkon tikchiuaj, más peuas tiktlasojtlaskej (Luc. 1:78).