1, 2. a) ¿Tlenon kijtosneki tlajtlakojli, niman kenijki uelis timakisaskej itech tlajtlakojli? (Noijki xkita nota “Tlen noneki matikmatikan”). b) ¿Tlenon tikitaskej ipan yejuin tlamachtijli niman ipan on okseki tlen kinuajkui yejuin revista Amatl Tekakistilijketl? (Noijki xkita kampa kijtoua “Tlen noneki tikmatis” ipan yejuin revista).

 ¿TIKUELITASKIA tikmatis kenijki melak mitstlasojtla Jehová? Tla kema, uelis timomachtis itech tlen Jehová yokichiuj mopampa niman ijkon mitsmakixtis itech tlajtlakojli niman mikilistli. Tlajtlakojli a se totlauelikniuj tlen xuelis tiktlaniskej. Tinochimej titlajtlakolejkej niman mojmostla titlajtlakouaj, ika yejon, timikij (Rom. 5:12). San ika, onka itlaj tlen techyolseuiya: kuajli tikmatstokej ika Jehová techmakixtis itech tlajtlakojli niman mikilistli.

² Jehová melak kintlasojtla tlaltikpakchanejkej, ika yejon, kanaj 6,000 xiuitl yokinuajpaleuijtiaj mauelikan iuan manouikakan maski tlajtlakolejkej. ToTajtsin melak techtlasojtla pampa yejua otexchijchiuj, yejua ika, miyek tlemach yokichiuj niman ijkon techpaleuis. Jehová kimatstok ika tlajtlakojli kichiua matimikikan, san ika, yejua xkineki matimikikan, yejua kineki nochipa matinemikan (Rom. 6:23). ¡Niman toTajtsin noijki kineki ika tejua xnemi! Ipan yejuin tlamachtijli, tikinnankiliskej yeyi tlajtoltilistin: 1) ¿tlenon okichiuj Jehová niman ijkon techmakas se tlamachialistli?, 2) ¿tlenon okichiujkej yeuejkaui sekimej tlakamej niman ijkon kiyolpaktiskej Jehová maski tlajtlakolejkej katkaj? niman 3) ¿tlenon okichiuj Jesús niman ijkon techmakixtis itech tlajtlakojli niman mikilistli?

 ¿TLENON OKICHIUJ JEHOVÁ NIMAN IJKON TECHMAKAS SE TLAMACHIALISTLI?

3. ¿Kenijki Adán niman Eva okipixkej tlajtlakojli?

³ Ijkuak Jehová okinchijchiuj Adán niman Eva, kinekiya melak mayolpakikan. Ika yejon, okintlali kampa melak tlakualtsinkan, okinnamikti niman okimijli makinpiyakan inkoneuan niman ijkon makitemiltikan tlaltikpaktli. Noijki okimijli makikualtsintilikan nochi tlaltikpaktli. San ika, Jehová san se tlanauatijli okinmakak niman okimijli ika tla xkitlakamatiyaj, mikiskiaj. Niman yetikmatij tlenon opanok: se xkuajli iluikaktekitketl, akin xkitlasojtlaya Jehová niman xkintlasojtlaya Adán niman Eva, okintlatlatak, niman yejuamej xotlaneltokakej itech toTajtsin, ika yejon, okichiujkej tlen yejuin iluikaktekitketl okimijli niman otlajtlakojkej. Kuakon, opanok tlen Jehová yokimijlijka panos: opeuj ueuentsintiaj niman omikkej (Gén. 1:​28, 29; 2:​8, 9, 16-18; 3:​1-6, 17-19, 24; 5:5).

4. ¿Tleka Jehová kitlauelita tlajtlakojli, niman tleka techpaleuiya iuan matouikakan maski titlajtlakolejkej? (Romanos 8:​20, 21).

⁴ Melak teajman tlen opanok, san ika, Jehová okichiuj manoijkuilo yejuin ipan Biblia pampa kineki matikitakan tleka melak kitlauelita tlajtlakojli. Tlajtlakojli kichiua maka matiuelikan iuan matouikakan niman kichiua matimikikan (Is. 59:2). Xkuajli iluikaktekitketl, Satanás, kitlauelita Jehová niman kintlauelita tlaltikpakchanejkej, ika yejon, okintlatlatak Adán niman Eva niman hasta aman ok techtlatlata. Satanás kanaj okinemili ika otetlan ijkuak okinkajkayauj Adán niman Eva ne ipan jardín de Edén. San ika, xkajsikamatiya kenijki Jehová melak tetlasojtla. ToTajtsin xkeman okipatlak ken kinekiya manemikan inkoneuan Adán niman Eva pampa melak kintlasojtla, ika yejon, nimantsin okimijli tlenon kichiuaskia inpampa (xpoua Romanos 8:​20, 21). Jehová kimatstoya ika sekimej tlaltikpakchanejkej kitlasojtlaskiaj niman kinekiskiaj kitlakamatiskej. Niman Jehová, akin se kuajli Tajtli, kinpaleuiskia mauelikan itech manonisiuikan niman makitlanikan tlajtlakojli niman mikilistli. San ika ¿kenijki kichiuaskia yejuin?

5. ¿Kemanon niman kenijki Jehová okinmakak se tlamachialistli tlaltikpakchanejkej? (Génesis 3:15).

⁵ (Xpoua Génesis 3:15). Ijkuak Jehová okijto ika kipopoloskia Satanás, okinmakak se tlamachialistli nochimej tlaltikpakchanejkej. ToTajtsin otlajto itech se teuejkakoneuj akin kikuatepaxoskia Satanás niman kipopoloskia, ijkon kiyektlaliskia nochi tlen xkuajli opeuj nochiua ijkuak Adán niman Eva xotetlakamatkej ipan jardín de Edén (1 Juan 3:8). San ika, Satanás kitlajyouiltiskia yejuin teuejkakoneuj niman kimiktiskia. Yejuin melak kiyolkokoskia Jehová, maski ijkon, yejua okinek ijkon mapano pampa kimatstoya ika yejon kinpaleuiskia miyekej tlaltikpakchanejkej mamakisakan itech tlajtlakojli niman mikilistli.

¿KENIJKI ITEKIPANOJKAUAN JEHOVÁ OUEL OKIYOLPAKTIJKEJ MASKI TLAJTLAKOLEJKEJ KATKAJ?

6. ¿Tlenon okichiujkej sekimej tlakamej akin otlaneltokakej ken Abel niman Noé niman ijkon nonisiuiskej itech Jehová?

⁶ ¿Kenijki tlaltikpakchanejkej ueliskiaj nonisiuiskej itech Jehová tla tlajtlakolejkej? Desde yeuejkaui, Jehová ika yolik yokuajteititijtia kenijki ueliskia itech nonisiuiskej. Sakin ika Adán niman Eva xotetlakamatkej, on ika ome inkoneuj, Abel, yejua akin kachtopa otlaneltokak itech Jehová. Yejua kitlasojtlaya Jehová niman kinekiya kitlakamatis niman itech nonisiuis, ika yejon, okinek kitlauentlalilis. Yejua tlajpixketl katka, ika yejon, okiuentlalili seki borreguitos “yejuan achtoj otlakatkej”.  ¿Niman tlenon okichiuj toTajtsin? “Okuelitak on uentli yejuan okimakak Abel, niman okiselilij” (Gén. 4:4). Sakin, Jehová noijki okinselili inuen sekimej tlakamej akin okitlasojtlakej niman itech otlaneltokakej, ken Noé (Gén. 8:​20, 21). Yejuin okiteititi ika tlaltikpakchanejkej ueliskiaj kiyolpaktiskej Jehová niman itech nonisiuiskej maski tlajtlakolejkej. b

7. Abrahán kinektoya kiuentlalis ikonetsin, ¿tlenon techmachtia yejon itech Jehová?

⁷ Jehová okitlajtlanili Abrahán, se tlakatl akin melak tlaneltokaya, makichiua itlaj tlen melak ouijtika: makiuentlali ikoneuj, Isaac. San matikonnemilikan kenijki melak onoyolkoko Abrahán ijkuak Jehová okitlajtlanili yejuin, maski ijkon, kinektoya kitlakamatis Jehová. Niman ijkuak yekimiktiskia, Jehová okitelti. San ika, tlen okichiuj Abrahán, itlaj kimititia akin tlaneltokaj itech Jehová: Jehová melak kintlasojtla tlaltikpakchanejkej pampa kinektoya kitemakas iKonetsin inpampa (Gén. 22:​1-18).

8. ¿Tlenon okiteititijkej uentin tlen nochiuayaj ijkuak notlakamatiya Tlanauatijli tlen okimakakej Moisés? (Levítico 4:​27-29; 17:11).

⁸ Ijkuak Jehová okinmakak israelitas Tlanauatijli, okinnauati makinuentlalikan yolkamej niman ijkon kintlapojpoluilis intlajtlakoluan (xpoua Levítico 4:​27-29; 17:11). Yejuin uentin okiteititijkej ika Jehová kitemakaskia se uentli tlen más kuajli yeskia pampa kinmakixtiskia tlaltikpakchanejkej itech tlajtlakojli. ToTajtsin okichiuj ika teotlajtojkej makijtokan ika se teuejkakoneuj, isenteKonetsin toTajtsin, tlajyouiskia niman mikiskia. Yejuin teuejkakoneuj yeskia ken se borreguito akin kitemakayaj ken uentli (Is. 53:​1-12). San xnemili: Jehová kitemakaskia itlasojkaKonetsin ken se uentli niman ijkon kinmakixtis tlaltikpakchanejkej itech tlajtlakojli niman mikilistli. Kema, toTajtsin mopampa okitemakak itlasojkaKonetsin.

¿TLENON OKICHIUJ JESÚS NIMAN IJKON TECHMAKIXTIS?

9. ¿Tlenon oteajsikamachilti Juan Teapolaktijketl? (Hebreos 9:22; 10:​1-4, 12).

⁹ Ipan xiuitl 29, Juan Teapolaktijketl okitak Jesús akin ualeuaya Nazaret, niman okijto: “Xkitakan on tlakatl. Yejua kiuentlaliskej ken sen borreguito para Dios kintlapojpoluilis intlajtlakoluan nochimej on tlaltikpaktlakamej” (Juan 1:29). Juan okiteajsikamachilti ika Jesús yejua katka teuejkakoneuj akin toTajtsin yokijtojka uajlaskia. Jesús kitemakaskia inemilis ken se uentli. Aman tlaltikpakchanejkej más kuajli kimatstoskiaj ika melauak nochiuas tlen kichiaj: kitlaniskej tlajtlakojli niman mikilistli (xpoua Hebreos 9:22; 10:​1-4, 12).

10. ¿Kenijki okiteititi Jesús ika okinpaleuiko akin tlajtlakolejkej?

¹⁰ Jesús kachtopa kinpaleuiaya akin melak xkuajli nomachiliayaj pampa yotlajtlakojkaj niman kimijliaya manochiuakan inomachtijkauan. Kimatstoya ika tlajtlakojli kichiua matlajyouikan tlaltikpakchanejkej. Ika yejon, yejua okinpaleui tlakamej niman siuamej akin xkuajli kimitayaj pampa kichiuayaj tlen xkuajli. Yejua hasta ijkin okijto: “Para on yejuan xkualoj xnoneki sen tepajtijketl, pero para on yejuan kualoj kemaj”. Noijki okijto: “Nejua xoniuajlaj para nikinnotsas on yejuan yolmelajkej, yej para nikinnotsas on yejuan tlajtlakolejkej” (Mat. 9:​12, 13). Niman ijkon okichiuj. Sejpa okitlapojpolui se siuatl akin okiikxipajpak ika ixayo (Luc. 7:​37-50). Noijki okimachti se samaritana maski kimatstoya ika auilnemiya (Juan 4:​7, 17-19, 25, 26).  Jehová hasta okimakak Jesús kojtilistli niman ijkon makinyoliti tlakamej, siuamej niman kokonej niman ijkon uelis kitlanis on tlajtlakojli tlen kichiua matimikikan (Mat. 11:5).

11. ¿Tleka akin tlajtlakolejkej katkaj kuelitayaj nemiskej iuan Jesús?

¹¹ Hasta akin kichiuayaj se ueyi tlajtlakojli kuelitayaj nemiskej iuan Jesús. Yejuin xtechmojkatlachialtia pampa Jesús kimajsikamatiya niman kimikneliaya (Luc. 15:​1, 2). Noijki kichiuaya tlen kuajli inpampa niman kimijliaya ika melak kuajli ika itech tlaneltokayaj (Luc. 19:​1-10). Jesús kuajli okiteititi ika melak teiknelia ijkon ken iTaj (Juan 14:9). Ika tlen okijto niman ika tlen okichiuj, Jesús otechititi ika Jehová melak techtlasojtla niman techiknelia niman kineki techmakixtis itech tlajtlakojli. Jesús okinpaleui akin tlajtlakolejkej katkaj makinekikan manopatlakan niman manochiuakan inomachtijkauan (Luc. 5:​27, 28).

12. ¿Tlenon otemachti Jesús itech imikilis?

¹² Jesús kuajli kimatstoya tlenon ipan panoskia. Miyekpa okimijli inomachtijkauan ika kitemaktiliskiaj, kipiloskiaj niman kimiktiskiaj (Mat. 17:22; 20:​18, 19). Noijki kimatstoya ika imikilis kikixtiskia tlajtlakojli, ijkon ken yokijtojka Juan niman oksekimej teotlajtojkej. Niman otemachti ika sakin ika mikiskia, “nochi tlakatl” kinisiuiskia (Juan 12:32). Akin tlaneltokaskiaj itech Jesús niman kichiuaskiaj ijkon ken yejua, ueliskiaj kiyolpaktiskej Jehová niman makisaskej itech tlajtlakojli (Rom. 6:​14, 18, 22; Juan 8:32). Para uelis  techmakixtis, Jesús melak onoyolchikauj niman okinek tlajyouis niman mikis (Juan 10:​17, 18).

13. ¿Kenijki okimiktijkej Jesús, niman tlenon techmachtia itech Jehová imikilis Jesús? (Noijki xkimita tlaixkopinaltin).

¹³ Melak xkuajli tlen okichiuilijkej Jesús: okitemaktilijkej, okajsikej, okiuijuikaltijkej, okitlajtolchijchiuilijkej, okijtojkej ika kimiktiskej niman melak okitlajyouiltijkej. Sakin, sekimej soldados okipilojkej ipan se kojtli melaktik niman ijkon okimiktijkej. Jesús otlaxiko niman omelajkanen. San ika, Jehová melak okiyolkoko ijkuak okitak nochi tlen okichiuilijkej iKoneuj. Maski melak kitlasojtlaya iKonetsin niman ueliskia kipaleuiskia, xokipaleui. ¿Tleka? Pampa melak techtlasojtla. Jesús okijto: “Dios sanoyej okintlajsojtlak on tlaltikpaktlakamej, hasta okitemakak isenteKonetsin para nochi on akin kineltokas xpoliuis, yej kipiyas nemilistli para nochipa” (Juan 3:16).

14. ¿Tlenon mitsmachtia imikilis Jesús?

¹⁴ Imikilis Jesús techititia ika Jehová melak kintlasojtla iuejkakoneuan Adán niman Eva. Yejon kijtosneki ika tejua noijki melak mitstlasojtla. ¿Xmitsmojkatlachialtia kenijki toTajtsin okinek kijyouis miyek tlemach niman ijkon mitsmakixtis itech tlajtlakojli niman mikilistli? (1 Juan 4:​9, 10). Yejua kineki tinochimej techpaleuis niman ijkon matiktekichiuilikan maski titlajtlakolejkej. Noijki, ika tlayekapan, yejua kineki kuajli kikixtis tlajtlakojli.

15. ¿Tlenon noneki tikchiuaskej tla tiknekij matechpaleui imikilis Jesús?

¹⁵ ToTajtsin itlaj otechtlayokoli: okitemakak isenteKonetsin topampa, niman yejon kichiua makintlapojpolui totlajtlakoluan. San ika, tla tiknekij matechpaleui imikilis Jesús, noneki itlaj tikchiuaskej. Juan Teapolaktijketl niman Jesucristo okijtojkej tlenon noneki tikchiuaskej: “Xkajkauakan ika nenkichiuaj on tlen xkuajli, pampa yeuajlauj on tonaltin ijkuak Dios tlamandaros nikan ken tlamandaroua ne iluikak” (Mat. 3:​1, 2; 4:17). Kuakon, tla tiknekij tiktekichiuiliskej toTajtsin maski titlajtlakolejkej niman itech tonisiuiskej, melak noneki matoyolkuepakan. San ika ¿tlenon kijtosneki timoyolkuepas, niman kenijki yejon techpaleuiya matikyolpaktikan Jehová maski titlajtlakolejkej? Ipan okse tlamachtijli tiknankiliskej yejuin.