1, 2. ¿Tlenon noneki kichiuaskej tatajtin ijkuak inkoneuan kintlajtoltiskej itlaj itech tlen tikneltokaj?

 MIYEKEJ tlaltikpakchanejkej kijtouaj ika tikinpiyas mokoneuan se ueyi tekitl. Ika yejon, tla tejua tikinpiya mokoneuan akin ok pipitikej niman timokojtilijtika tikinchikauilis intlaneltok, xmatsto ika melak kuajli tlen tikchiujtok (Deut. 6:​6, 7). Ijkuak noskaltijtiaskej mokoneuan, kanaj peuas mitstlajtoltiskej seki itech tlen tikneltokaj, ken tleka Jehová xtechkauilia matikchiuakan seki tlemach.

² Kanaj tejua ueliskia tiknemilis ika mokoneuan xok más tlaneltokaj itech toTajtsin niman itech Biblia pampa peua mitstlatlajtoltiaj. San ika, más kuajli tla tetlajtoltiaj pampa yejon kinpaleuis más manoskalti intlaneltok (1 Cor. 13:11). Kuakon, maka xmajmana ijkuak itlaj mitstlajtoltiskej, yej xkinpaleui más kuajli matlanemilikan para ijkon más tlaneltokaskej itech toTajtsin niman itech Biblia.

3. ¿Tlenon tikitaskej ipan yejuin tlamachtijli?

³ Ipan yejuin tlamachtijli tikitaskej kenijki tatajtin uelis kinpaleuiskej inkoneuan más machikaui intlaneltok itech toTajtsin niman itech Biblia, makitakan kenijki melak tepaleui tlen technauatia Biblia niman makiteijlikan tlen kineltokaj. Noijki tikitaskej tleka melak kuajli tla kokonej tetlajtoltiaj niman tlenon uelis kichiuaskej tatajtin imiuan inkoneuan para tlajtoskej itech tlen tikneltokaj.

XKINPALEUI MOKONEUAN MÁS MACHIKAUI INTLANELTOK ITECH TOTAJTSIN NIMAN BIBLIA

4. ¿Tlenon ueliskia notlajtoltiskej nemokoneuan, niman tleka?

⁴ Ijkuak tejua otitlakat xetitlaneltokaya itech Jehová, niman mokoneuan noijki ijkon, yejuamej xuelis tlaneltokaskej itech  toTajtsin san pampa tejua titlaneltoka. Ika yejon, ijkuak más noskaltijtiaskej, ueliskia ijkin notlajtoltiskej: “¿Kenijki nikmati ika toTajtsin yemelak nemi? ¿Uelis nikneltokas tlen kijtoua Biblia?”. Niman melak kuajli tla ijkon notlajtoltiaj pampa hasta Biblia techijlia kuajli matiktekitiltikan totlamachilis niman kuajli matikitakan tla melauak tlen tikneltokaj (Rom. 12:1; 1 Tes. 5:21). Aman tej, ¿kenijki uelis nenkinpaleuiskej nemokoneuan makichikauakan intlaneltok?

5. ¿Kenijki uelis tikinpaleuis mokoneuan más matlaneltokakan itech Biblia? (Romanos 12:2).

⁵ Xkinpaleui makitakan ika tlen tikneltokaj melauak (xpoua Romanos 12:2). Ijkuak mokoneuan itlaj mitstlajtoltiskej, xkinpaleui makitejtemokan tlen kinekij kimatiskej ipan Índice de las publicaciones Watch Tower. Noijki uelis kitejtemoskej ipan amoxtli Tlen kinpaleuiya ika nomachtiaj iteixpantijkauan Jehová, uelis yaskej kampa kijtoua “Biblia” niman kitejtemoskej sección “Ualeua itech toTajtsin” kampa techijlia tleka tikijtouaj ika Biblia xsan se amoxtli tlen tlakamej okijkuilojkej, yej “iTlajtol Dios” (1 Tes. 2:13). Uelis más kuajli nemomachtiskej itech kalpan Nínive. Yeuejkaui sekimej ixtlamatkej kijtouayaj ika yejuin kalpan xkeman onkatka. San ika, ipan xiuitl 1850 ononexti seki tlen onokauj itech Nínive, tlen okiteititi ika tlen kijtoua Biblia itech yejon kalpan melauak (Sof. 2:​13-15). Noijki uelis nemomachtiskej itech kenijki onochiujkej teotlajtoltin itech Nínive ipan sección tlen itoka “¿Itikmatiya?” itech Amatl Tekakistilijketl de noviembre de 2021. Ijkuak nemokoneuan kitaskej ika notlajtolnamiki tlen temachtiaj toamatlajkuiloluan iuan tlen kijtouaj okseki enciclopedias, kinpaleuis más matlaneltokakan itech tlen kijtoua Biblia.

6. ¿Kenijki uelis tikinpaleuis mokoneuan makitejtemokan tlen makimititi ika Biblia xnopopoloua? Xkijto se neskayotl. (Noijki xkita tlaixkopinajli).

⁶ Xkinpaleui makitejtemokan tlen makinmititi ika Biblia xnopopoloua. Xkitakan kemanon uelis nentlajtoskej imiuan nemokoneuan itech Biblia niman itech toTajtsin. Uelis nenkichiuaskej yejuin ijkuak nenyaskej se parque, se museo noso ijkuak nenkonitaskej seki tlen onka ipan isucursales iteixpantijkauan Jehová. Noijki uelis nenkinamapouaskej libros noso nenkimitaskej seki videos kampa nesi noso noteneua itlaj tlen Biblia noijki kiteneua. Yejuin uelis kinpaleuis nemokoneuan más makineltokakan ika tlen kijtoua Biblia melauak. Noijki uelis tikinmachtis itech tetl moabita, ompa nestika itoka Jehová. Yejuin tetl ikipiya 3,000 xiuitl niman onka ipan  Museo del Louvre, ne París (Francia). Niman ne Warwick (Nueva York), ipan oficina kampa noyekanaj nochi sucursales, onka se museo tlen itoka “La Biblia y el nombre divino”, ompa kipiyaj yejon tetl moabita tlen san okixkopinkej. Ipan tetl moabita kijtoua ika tekiuaj Mesá, akin tekiuajtiya Moab, xok okitlakamat kalpan Israel, niman Biblia noijki ijkon kijtoua (2 Rey. 3:​4, 5). Ijkuak nemokoneuan sa no yejuamej kitaskej ika tlen kijtoua Biblia melauak, más chikauis intlaneltok (uelis tikitas 2 Crónicas 9:6).

7, 8. a) ¿Tlenon tiuelij itech ken nochi kualtsin tlachijchiujtli? Xkijto se neskayotl. (Noijki xkimita tlaixkopinaltin). b) ¿Katlejua tlajtoltilistin ueliskia kintlanemililtis mokoneuan?

⁷ Xkimijli makitakan tlen okichijchiuj toTajtsin. Ijkuak tias tepek imiuan mokoneuan noso ijkuak nemontekipanoskej mijla, xkimititi kenijki nochi kualtsin tlachijchiujtli. Miyek tlen tikitaj nesiskia kentla tla yakaj kualtsin kinneskayotiskia noso kinmachyotiskia. Yejon techititia ika yakaj akin tlamachilise ijkon okichijchiuj. Matiknemilikan yejuin, desde yeuejkaui miyekej ixtlamatkej yokualitstiakej ika miyek tlajtlamach kipiyaj kentla se neskayotl tlen malakaxtik noso yeyeualtik. Se ixtlamatki akin itoka Nicola Fameli kijtoua ika tla tomachtiskiaj kenijki tlachijchiujtli se tlajtlamach niman tikpoujtiaskiaj kechpatipan yeyeualtik ineskayo, tikitaskiaj ika on neskayomej ijkon nochijchiuaj pampa kualtsin ken notekpantiuej, yejuin notokayotia ken sucesión de Fibonacci. Niman ipan tlaltikpaktli niman iluikak tikitaj ika miyek tlajtlamach kipiyaj yejon neskayotl malakaxtik noso yeyeualtik, ken galaxias, ken uilakapitsin, noso, caracol, ken ixiujyo seki plantas niman ken ijtiyol girasol. a

⁸ Ipan clases de Ciencias, nemokoneuan miyek kinmachtiskej. Kanaj kinmachtiskej itech kojtin. Miyek kojtin kipiyaj inmauan, niman inmiuan kipiyaj inmatsitsinuan niman ijkon noxexelojtiuej. Yejuin noixmati ken formas fractales. Niman ijkin panoua ipan okseki tlen onka ipan tlaltikpaktli. San ika ¿tleka ijkon noxexelojtiuj? ¿Akinon okichiuj ijkon mapano? Tla nemokoneuan notlajtoltiaj yejuin, más kineltokaskej ika toTajtsin yejua akin okichijchiuj nochi tlen onka (Heb. 3:4). Niman sakin uelis ijkin nenkintlajtoltiskej: “Tla toTajtsin yejua akin otechchijchiuj, ¿xmelak ika uelis tikijtoskej ika nochi tlen technauatia kichiua pampa kineki matiyolpakikan?”. Sakin uelis nenkimititiskej ika yejon tlanauatiltin nesij ipan Biblia.

 XKINPALEUI MOKONEUAN MAKITAKAN KENIJKI MELAK TEPALEUI TLEN TECHNAUATIA BIBLIA

9. ¿Tleka mokoneuan ueliskia notlajtoltiskej tla melauak tlen kijtoua Biblia?

⁹ Tla kemantika mokoneuan peua notlajtoltiaj tleka Biblia xtechkauilia matikchiuakan seki tlemach, xyejyeko xkajsikamati tleka ijkon notlajtoltiaj. ¿Ijkon notlajtoltiaj pampa xkineltokaj tlen kijtoua Biblia? ¿Noso kanaj san xkimatij kenijki kimijliskej oksekimej tlen kineltokaj? Maski san kenijki, uelis tikinpaleuis mokoneuan makajsikamatikan tleka melak kuajli tla tikintlakamatij itlanauatiluan Jehová. Melak mechpaleuis tla nemomachtiaj libro ¡Nochipa uelis tiyolpakis! b

10. ¿Kenijki uelis tikinpaleuis mokoneuan más manouikakan iuan Jehová?

¹⁰ Xkinpaleui más manouikakan iuan Jehová. Ijkuak timomachtis iuan mokoneuj, xkintekitilti tlajtoltilistin niman tlaixkopinaltin tlen uajnestiuej ipan amoxtli ¡Nochipa uelis tiyolpakis! para ijkon tikajsikamatis tlenon kinemilia (Prov. 20:5). San matikonteneuakan tlen kijtoua ipan tlamachtijli 8. Ompa kijtoua ika se akin touan nouika techilnamiktia tlenon noneki tikchiuaskej niman ijkon maka topan nochiuas tlen xkuajli. Jehová noijki ijkon kichiua. Tla yonenkitakej 1 Juan 5:​3, uelis tikijlis: “Jehová yejua toamigo akin melak techtlasojtla, kuakon, ¿tiknemilia ika kinamiki matikchiuakan tlen yejua technauatia?”. Kanaj tiknemilia ika yejuin tlajtoltilistli xouijtika, san ika, uelis kinpaleuis mokoneuan makitakan ika Jehová techijlia tlenon noneki tikchiuaskej pampa techtlasojtla (Is. 48:​17, 18).

11. ¿Tlenon uelis nenkichiuaskej para ijkon nemokoneuan más makinektokan kitlakamatiskej tlen kijtoua Biblia? (Proverbios 2:​10, 11).

¹¹ Xkitakan kenijki melak tepaleui tla tikintlakamatij itlanauatiluan Biblia. Ijkuak san sekan nenkamapouaskej Biblia niman texto tlen tikpouaj ika kualkan, xkijtokan kenijki yomechpaleui ipan nemofamilia pampa nenkitlakamatij tlen kijtoua Biblia. Xmotlajtolti: “¿Kajsikamatij nokoneuan kenijki melak tepaleui tla titekitkej niman tla xtitekajkayauaj?” (Heb. 13:18). Noijki uelis tikimijlis ika ijkuak tikintlakamatij itlanauatiluan Biblia, techpaleuiya maka sajnoye matikualokan niman kuajli matomachilikan (Prov. 14:​29, 30). Tla mokoneuj kajsikamati ika melak tepaleui tla tiktlakamatij tlen kijtoua Biblia, más kinektos kichiuas tlen ompa kijtoua (xpoua Proverbios 2:​10, 11).

12. ¿Tlenon kichiuaj Steve niman isiuauj para kajsikamachiltiskej inkoneuj ika melak tepaleui tla tiktlakamatij tlen Jehová technauatia?

¹² Steve, akin chanti Francia, kijtoua ika yejua iuan isiuauj yokipaleuijkej inkoneuj, Ethan, makajsikamati ika nochi tlen technauatia Jehová techilia pampa techtlasojtla. Tokniuj Steve kijtoua: “Tejuamej ijkin tiktlajtoltiaj tokoneuj: ‘¿Tleka Jehová techtlajtlanilia matiktlakamatikan yejuin tlaxelojli? ¿Kenijki techititia yejuin tlaxelojli ika Jehová techtlasojtla? ¿Niman tlenon panoskia tla xtiktlakamatij yejuin tlaxelojli?’”. Pampa yejuamej ijkon kichiuaj, aman Ethan más kinektok kintlakamatis itlanauatiluan Jehová. Steve oksejpa kijtoua: “Tejuamej tiknekij ika Ethan makajsikamati ika tlen temachtia Biblia más tepaleui xijkon ken tlen tlaltikpakchanejkej kijtouaj”.

13. ¿Kenijki uelis tikinmachtis mokoneuan makitakan kenijki uelis kichiuaskej tlen kijtoua Biblia? Xkijto se neskayotl.

¹³ Xkinmachti makitakan kenijki uelis  kichiuaskej tlen kijtoua Biblia. Kemantika akin kinmachtiaj nemokoneuan ipan escuela kintlajtlaniliaj makiamapouakan se libro. Kanaj libro tlen kiamapouaj kinteneua sekimej akin auilnemij noso tlauelejkej, kanaj ken ijkuilijtika ipan libro nesi ika kuajli tlen kichiuaj, niman kichiua ika sekimej makinekikan kichiuaskej ken akin noteneuaj ipan libro. Kuakon, uelis tikijlis mokoneuj matlanemili kenijki nomachilia Jehová ijkuak kita ika tlaltikpakchanejkej kichiuaj tlen ompa noteneua (Prov. 22:​24, 25; 1 Cor. 15:33; Filip. 4:8). Yejuin uelis kipaleuis mokoneuj makita ika melak kuajli tla tiktlakamatij Jehová. Niman tla imaestro niman oksekimej akin imiuan nomachtia kitlajtoltiaj tlenon kinemilia itech yejon, uelis kijtos tlen kineltoka.

XKINPALEUI MOKONEUAN MAKITEIJLIKAN TLEN KINELTOKAJ

14. ¿Kanaj itech tlenon kimojtia tlajtos se telpochtli, niman tleka?

¹⁴ Kanaj sekimej telpokamej nomojtiaj kiteijliskej tlen kineltokaj. Kanaj pinauij kiteijliskej tleka tejuamej xtitlaneltokaj itech evolución. ¿Tleka? Pampa miyekej maestros kijtouaj ika evolución yemelak opanok. ¿Kenijki uelis nenkinpaleuiskej nemokoneuan makijtokan ika yolchikaualistli tlen kineltokaj?

15. ¿Tlenon kinpaleuis telpokamej más kuajli makimatstokan ika melauak tlen kineltokaj?

¹⁵ Xkinpaleui más kuajli makimatstokan ika melauak tlen kineltokaj. Nemokoneuan xnoneki pinauiskej pampa kineltokaj ika nemi yakaj akin otexchijchiuj (2 Tim. 1:8). Miyekej ixtlamatkej noijki kajsikamatij ika nochi tlen onka xsan ijkon onesiko. Ijkuak kitaj kenijki nochi melak kualtsin tlachijchiujtli kajsikamatij ika nemi yakaj akin melak tlamachilise akin otlachijchiuj, ika yejon, xtlaneltokaj itech evolución maski ipan miyek escuelas ijkon temachtiaj. Noijki nemokoneuan uelis más kineltokaskej ika yakaj otechchijchiuj tla kintlajtoltiaj oksekimej tokniuan tlenon okinpaleui makineltokakan ika yakaj otechchijchiuj. c

16. ¿Kenijki uelis tikinpaleuis mokoneuan makiteijlikan ika kineltokaj ika yakaj otexchijchiuj? (1 Pedro 3:15; noijki xkita tlaixkopinajli).

¹⁶ Xkinmachtikan makijtokan tleka kineltokaj ika yakaj otechchijchiuj (xpoua 1 Pedro 3:15). Uelis san sekan nenkimitaskej tlamachtiltin  “¿Creación o evolución?” tlen onka ipan jw.org, ipan sección “Los jóvenes preguntan”. Sakin xkintlajtolti tlenon uelis kimijliskej oksekimej niman ijkon kintlaneltokiltiskej ika yakaj otexchijchiuj niman imiuan xmomajmachti. Xkimijli ika xnoneki teuan nokualaniskej, san ika, tla yakaj kineki más kimatis, uelis kijliskej itlaj tlen makitlanemililti. Kanaj se akin iuan nomachtia, uelis kijlis: “Nejua san nikneltoka tlen nikita, niman toTajtsin xkeman nikita”. Niman mokoneuj uelis ijkin kijlis: “Xkonnemili ika tiauj ipan tepetl kampa xtlaj onka niman ompa tiknextia se kualtsin kajli, ¿tikijtoskia ika san ijkon onesiko? Kuakon, tla se kajli ononek yakaj kichijchiuas, nochi tlen onka noijki ononek yakaj kichijchiuas”.

17. ¿Kenijki uelis tikinpaleuis mokoneuan makitakan kemanon uelis tlajtoskej itech Biblia? Xkijto se neskayotl itech tlenon ueliskia se telpochtli kitlajtoltis akin iuan nomachtia.

¹⁷ Xkinpaleui mokoneuan makitejtemokan kemanon uelis tlajtoskej itech Biblia (Rom. 10:10). Titlajtos itech Biblia, yeskia ken ijkuak se konetl pitentsin peua nejnemi. Kachtopa, ueli peua notelketsa, sakin peua yolik nejnentiuj. Noijki ijkon, ijkuak peuas tikteijliskej tlen tikneltokaj, kachtopa uelis san tikteijliskej tlen xouijtika. Kanaj se tokniuj telpochtli ueliskia ijkin kitlajtoltis akin iuan nomachtia: “¿Tikmatiya ika miyek tlen kichijchiuaj ixtlamatkej san kixkopinaj itech tlen onka ipan tlaltikpaktli? Manimitsititi yejuin video”. Sakin, uelis kititis video tlen uajlauj ipan serie “¿Yakaj okichijchiuj?”, niman uelis kitlajtoltis: “Tla se ixtlamatki kiueyiteneuaj ipampa itlaj tlen san okixkopin, ¿akinon noneki tikueyiteneuaskej pampa okichijchiuj tlen onka ipan tlaltikpaktli?” Tla mokoneuj ijkin kiteijlia, akin iuan nomachtia kanaj hasta uelis más kinekis kimatis.

OK XKINCHIKAUILIJTOKAN INTLANELTOK

18. ¿Kenijki tatajtin uelis kinpaleuiskej inkoneuan más machikaui intlaneltok?

¹⁸ Aman miyekej tlaltikpakchanejkej xtlaneltokaj itech Jehová (2 Ped. 3:3). Ika yejon, tatajtin, ijkuak nemomachtiskej imiuan nemokoneuan, xkinyolchikauakan manomachtikan tlen más kinpaleuis matlaneltokakan itech iTlajtol toTajtsin niman makitakan ika melak techpaleuiya tla tiktlakamatij tlen ompa kijtoua. Xkinyolchikauakan makitakan nochi tlen Jehová yokichijchiuj niman itech matlanemilikan. Noijki xkinpaleuikan makajsikamatikan kenijki yonochiujkej teotlajtoltin tlen uajlauej ipan Biblia. Niman melak kinpaleuis tla imiuan nenkichiuaj teoyotl niman tla nenkichiuaj teoyotl inpampa. Tatajtin, kuajli xmatstokan ika Jehová kiteochiuas nochi tlen nenkichiuaj para nenkinchikauiliskej intlaneltok nemokoneuan (2 Crón. 15:7).