1-3. a) Itech tlen tikneltokaj, ¿katlejua se tlen tikueyiitaj? b) ¿Tleka melak ueyi kijtosneki? (Xkita tlaixkopinajli kampa peua tlen tomachtijtokej).

TLA yakaj techtlajtoltiskia tlenon tikueyiitaj itech tlen tikneltokaj, ¿tlenon tiknankiliskiaj? Tikmatstokej ika tikteneuaskiaj ika Jehová yejua Tlachijchiujketl niman ika otechmakak tonemilis. Noijki tikijtoskiaj ika titlaneltokaj itech Jesucristo, akin omik ipampa totlajtlakoluan. Niman kanaj noijki tikijtoskiaj ika tlayekapan tinemiskej nochipa ipan se Xochitlalpan. San ika ¿tikteneuaskiaj yoliuilistli?

² Maski tla tejuamej tikneltokaj ika timakisaskej itech ueyi tlajyouilistli niman tinemiskej nochipa ipan tlaltikpaktli, tikpiyaj miyek tlen ika tikueyiitaskej yoliuilistli. Apóstol Pablo okiteititi tleka yejuin tlamachtijli melak ueyi kijtosneki: “Tla on mimikej xuelis yoliuiskej niman noketsteuaskej, tla ijkon nion Cristo xoyoliu niman xonoketsteu ne ipan itlalkon”. Tla Jesús xyoliuiskia, yejua xtekiuajtijtoskia aman niman nion xtlaj kijtosnekiskia tlen titemachtiaj itech itekiuajyo (xpoua 1 Corintios 15:12-19). San ika, kuajli tikmatstokej ika kema oyoliuj. Tejuamej xtitlanemiliaj ken Saduceos, sekimej tlayekankej judíos ipan teopan, akin kuajli kijtouayaj ika akin yomijkej xueliskej yoliuiskej. Tejuamej titlajtouaj itech yejuin tlamachtijli maski oksekimej techpijpinaujtiaj (Mar. 12:18; Hech. 4:2, 3, TNM; 17:32; 23:6-8).

 ³ Ijkuak Pablo otlajkuilo itech tlaneltokiltin tlen xouijtika tikasikamatiskej itech Cristo noijki teuan okiteneuj tlamachtijli ika yoliuiskej akin yomijkej (Heb. 6:1, 2, TNM). Niman kuajli okiteititi ika yejua tlaneltokaya itech yoliuilistli (Hech. 24:10, 15, 24, 25). San ika, pampa yejuin tlamachtijli yejua se itech tlen xouijtika tikasikamatis xuelis noijtos tla xueyi kijtosneki (Heb. 5:12). ¿Tleka ka?

4. ¿Tlenon ueliskia tetlajtoltis yakaj itech yoliuilistli?

⁴ Ijkuak tipeuaj tomachtiaj Biblia, tikpouaj itech yoliuilistin tlen onochiujkej yeuejkaui, ken itech Lázaro. Tiuelij ika Abrahán, Job niman Daniel kuajli kimatstoyaj ika tlayekapan oksejpa yoliuiskej akin yomijkej. San ika yakaj ueliskia tetlajtoltis: ¿Ok uelis tikneltokaskej tlen onoijto itech yoliuilistli maski melak youejkauj ika onoijto? Noijki, ¿yemelak kiteititia Biblia kemanon nochiuas yoliuilistli? Ken nonankiliskej kichikauaskej totlaneltokil. Ika yejon, matikitakan tlenon kijtoua iTlajtol toTajtsin.

5. ¿Itech tlenon titlajtoskej kachtopa?

⁵ Kanaj xouijtika tikseliskej ika yakaj uelis yoliuis ijkuak xiuejkaui ika omik (Juan 11:11; Hech. 20:9, 10). San ika ¿uelis titlaneltokaskej itech yoliuilistli maski melak miyek xiujtin kipiya ika onoijto? ¿Uelis titlaneltokaskej itech yejon maski se tlaltikpakchane xiuejkaui noso youejkauj ika omik? Ika melak, tinochimej titlaneltokaj itech se yoliuilistli tlen onochiuj melak miyek xiujtin sakin ika onoijtoka ika panoskia. ¿Katlejua? Niman ¿kenon yejuin techontlanemililtia itech tlamachialistli tlen tikpiyaj itech yoliuilistli?

6. ¿Kenon onochiuj ipan Jesús tlen kijtoua Salmo 118?

⁶ Tiknextiaj yejuin yoliuilistli ipan Salmo 118, tlen kanaj okijkuilo David, kijtoua: “Jehová, xtechmakixti, timitstlajtlaniliaj, ¡timitstlatlaujtiliaj! [...] Tlateochiujtli akin uajlauj ika itokayo Jehová”. Kanaj tikilnamikij ika tlaltikpakchanejkej akin okitakej ijkuak Jesús kalakiya ipan Jerusalén ipan 9 itech nisán, achto kimiktiskiaj, okiteneujkej yejuin teotlajtojli itech Mesías (Sal. 118:25, 26; Mat. 21:7-9). San ika ¿tleka tikijtouaj ika yejuin salmo tlajtoua itech se yoliuilistli tlen panoskia miyek xiujtin sakin? Matikitakan ika noijki kijtoua ika “tetl tlen kalchijchiujkej xokiselijkej yonochiuj tetl tlen yakatstika” (Sal. 118:22).

7. ¿Tlenon okichiuilijkej Jesús sekimej judíos?

⁷ “Kalchijchiujkej” akin xokiselijkej Jesús, akin Mesías, katkaj tlayekankej judíos. Yejuamej xsan xokiselijkej ika yejua katka Cristo. Miyekej hasta okitlajtlankej makimiktikan (Luc. 23:18-23, TNM). Ika yejon, ijkuak okimiktijkej noijki intlajtlakol katka.

8. ¿Kenon ueliskia Jesús nochiuas “tetl tlen yakatstika”?

⁸ Tla Jesús xokiselijkej niman okimiktijkej, ¿kenon ueliskia nochiuas “tetl tlen yakatstika”? San tla yejua yoliuiskia. Jesús ijkon okijto ijkuak otlajto itech se tlakatl akin okintitlanili, inpampa oksekimej, seki tlajtoltin tokakej akin kitekichiuiliayaj. San ika, tokakej okinchiuilijkej tlen xkuajli. Noijki ijkon, israelitas okinchiuilijkej tlen xkuajli teotlajtokej akin toTajtsin okintitlanili. Sa ika nochi, yejon tlakatl, okititlan ikoneuj akin kitlasojtlaya, akin kiseliskia nochi tlen iyaxka, niman kichiaya ika tokakej kema makikakikan. San ika, yejon tokakej okimiktijkej. Ijkuak otlan tlajtoua itech yejuin, Jesús okiteneuj teotlajtojli tlen onka ipan Salmo 118:22 (Luc. 20:9-17). Apóstol Pedro okiteneuj yejon salmo ijkuak kinnojnotstoya “intlayekankauan on hebreos, on tlajtlajmatkej niman on temachtijkej ikan on tlanauatijli” akin onosentlalijkaj Jerusalén. Otlajto itech “Jesucristo yejuan ualeua Nazaret” akin yejuamej okipilojkej ipan  se kojtli melaktik, san ika, “Dios okiyoliuitij niman oketsteu ne ipan itlalkon”. Sakin, kuajli okimijli: “Yejua on Jesús, yejua ken se tetl yejuan nentepanchijkej [ʻnenkalchijchiujkejʼ, TNM] xonenkiselikej. Pero aman yejua yonochiu yakatstika” (Hech. 3:15; 4:5-11; 1 Ped. 2:5-7).

9. ¿Tlenon melak temojkatlachialti onoijto ika panoskia ipan Salmo 118:22?

⁹ Ken yotikitakej, ipan Salmo 118:22 onoijto ika oniaskia se yoliuilistli melak miyek xiujtin achto ika nochiuaskia. Mesías xkiseliskiaj niman kimiktiskiaj, san ika, oksejpa yoliuiskia niman nochiuaskia “tetl tlen yakatstika”. Sakin ika okiyolitijkej, iKoneuj toTajtsin onochiuj akin san itechkopa tiuelij timakisaj, “pampa Dios xokuajtitlan yakaj okse tlakatl ipan in tlaltikpaktli yejuan itechkopa uelis timakisaskej” (Hech. 4:12; Efes. 1:20).

10. a) ¿Tlen teotlajtojli onoteneuj ipan Salmo 16:10? b) ¿Tleka kuajli tikmatstokej ika yejuin salmo xonochiuj ipan tekiuaj David?

¹⁰ Matikitakan okse tlaxelojli kampa kijtoua ika oniaskia se yoliuilistli. Onoijkuilo ipantsin mil xiujtin achto ika nochiuas. Yejuin tlen opanok kichikauas totlaneltokil ika uelis nochiuas se yoliuilistli maski ikipiya miyek xiujtin ika onoijto. Ipan Salmo 16, tlen noneltoka okijkuilo David, kijtoua: “Pampa tejua xtinechkauas ipan Tlalkontli. Tejua xtitekauilis ika akin motech melajkanemi makita tlalkoyonki” (Sal. 16:10). Yejuin tlajtoltin xkijtosnekij ika David xkeman mikiskia noso ika xontlamiskia ipan Seol, tlen kineskayotia kampa noseuijtokej akin yomijkej. Itlajtol toTajtsin kuajli techijlia ika David oueuentsintiak, omik niman “okitokakej kampa iUeyikalpan David” iuan iuejkachanejkauan (1 Rey. 2:1, 10). Kuakon, ¿itech akinon tlajtoua Salmo 16:10?

11. ¿Kemanon okitetomili Pedro tlen kijtosneki Salmo 16:10?

¹¹ Ipantsin mil xiujtin sakin ika David okijkuilojka yejuin tlajtoltin, apóstol Pedro okitetomili itech akinon tlajtouaya. Yopanoka seki semanas ika omijka niman oyoliujka Jesús ijkuak apóstol okinmachti itech Salmo 16:10 miyekej judíos niman oksekimej akin onochiujkaj judíos (Hech. 2:29-32, TNM). Okimijli itlaj tlen akin kikaktoyaj kuajli kimatiyaj: ika David omijka niman okitokakaj. Sakin okijto ika David “okajsikamat tlinon nochiuas” niman “otlajtoj itech ika Cristo yoliuis niman noketsteuas ne ipan itlalkon”. Ken ompa noijtoua, yejon xakaj okijto tla xmelauak.

12. ¿Kenon onochiuj Salmo 16:10, niman tlenon techajsikamachiltia yejuin itech tlen yonoijto itech yoliuilistli?

¹² Pampa kuajli kiteititisnekiya tlen kijtotoya, Pedro okiteneuj itlajtoluan David ipan Salmo 110:1 (xpoua Hechos 2:33-35). Ken okintlanemililti, itech tlen kijtoua Biblia, okinpaleui nochimej makineltokakan ika Jesús “toTeko niman yejua Cristo” (Hech. 2:36). Nochimej okiselijkej ika Salmo 16:10 onochiuj ijkuak okiyolitijkej Jesús. Sakin, apóstol Pablo noijki ijkon okintlanemililti ijkuak okinnojnots seki judíos akin chantiyaj Antioquía de Pisidia. Yejuamej melak okinmojkatlachialti niman hasta okitlajtlanilijkej okseki makinmachti (xpoua Hechos 13:32-37, 42). Yejuin tlen okimijli noijki noneki matechtlaneltokilti ika yejon teotlajtoltin tlen kuajkui Biblia itech yoliuilistli, tlen nochiuaskej tlayekapan, uelis noneltokaskej maski yopanokej melak miyek xiujtin ika onoijtokej.

13. ¿Tlen tlajtoltilistin itech yoliuilistli uelis yakaj notlajtoltis?

¹³ Yemelak ika techyolchikaua tikmatiskej ika uelis nochiuas yoliuilistli miyek xiujtin sakin ika noijtoua. Maski ijkon, kanaj yakaj notlajtoltia: “¿Kijtosneki yejuin ika melak uejkaujtipan noneki nitlamachias niman ijkon oksejpa nikimitas nochanejkauan? ¿Kemanon  nochiuas yoliuilistli tlen nikchia?”. Matikilnamikikan ika Jesús okimijli itlatitlankauan ika onkatka seki tlen nion xkimatiyaj nion xueliskiaj ijkuakon kimatiskej. Onka seki itech tlen panos, tlen san toTajtsin “kipia tekiuajyotl para kijtoua kemanon nochiuas” (Hech. 1:6, 7; Juan 16:12). San ika, yejuin xkijtosneki ika xtlaj tikmatij itech kemanon nochiuas yoliuilistli.

14. ¿Tleka iyoliuilis Jesús xsan noijki ken tlen achtopa yonochiujkaj?

¹⁴ Techpaleuis tikasikamatiskej yejuin tla tikilnamikij yoliuilistin tlen kijtoua Biblia ika nochiuaskej. Kema, yoliuilistli tlen melak ueyi kijtosneki yejua iyoliuilis Jesús. Tla xpanoskia, nion se itech tejuamej xueliskia kipiyas tlamachialistli ika oksejpa kimitas ichanejkauan. Nochimej akin oyoliujkej ijkuak xiyoliuiya Jesús, ken ipan itonaluan Elías niman Eliseo, xonenkej nochipa. Oksejpa omijkej, okintokakej niman onokuepkej tlalpoktli. San ika, xijkon ipan onochiuj Jesús, yejua “oyoliu niman onoketsteu ipan itlalkon” niman yejua “xokeman oksejpa mikis” niman “mikilistli” xok tlanauatia ipan yejua, aman, chanti ipan iluikak ika nemilistli tlen xkeman tlamis (Rom. 6:9; Rev. 1:5, 18, TNM; Col. 1:18, TNM; 1 Ped. 3:18, TNM).

15. ¿Tleka Jesús kitokayotiaj “yakatstikaj”?

¹⁵ Jesús oyoliuj niman ijkon nemis ken espíritu ipan iluikak. Yoliuilistli tlen ipan onochiuj, yejua tlen kachtopa ijkon onochiuj niman yejua tlen melak ueyi kijtosneki, san ika, oksekimej noijki ijkon yoliuiskiaj (Hech. 26:23). Jesús okimijli itlatitlankauan yolmelaujkej ika yaskiaj iluikak niman ijkon iuan tlanauatiskiaj (Luc. 22:28-30). Aman tej, yejuamej kachtopa mikiskiaj niman sakin, ijkon ken Jesús, kinyolitiskiaj ken espíritus niman ijkon kiseliskej yejuin tlateochiualistli. Pablo okijkuilo: “Cristo melauak oyoliu niman onoketsteu ipan itlalkon. Niman yejua yakatstikaj intech on mimikej yejuan yoliuiskej niman noketsteuaskej ipan intlalkon”. Sakin okiteititi ika, ijkon ken Jesús, oksekimej yoliuiskiaj niman ijkon nemiskej iluikak. Okijto: “Pero cada se ipan nochiuas ijkuak kontocaros. Achtoj Cristo oyoliu niman onoketsteu ken on uelik yejuan achtoj tlaki ipan kojtli. Kemaj ijkuak yejua uajlas [ʻtekiuajtitosʼ, TNM], [...] on yejuan iyaxkauan yoliuiskej niman noketsteuaskej” (1 Cor. 15:20, 23).

16. ¿Tlenon techajsikamachiltia Biblia itech kemanon nochiuaskia yoliuilistli ipan iluikak?

¹⁶ Yejuin tlajtoltin techasikamachiltiaj kemanon nochiuaskia yoliuilistli ipan iluikak: ijkuak Cristo tekiuajtitos. Iteixpantijkauan Jehová, ika Biblia youejkaujkej kiteititiaj ika Jesús opeuj tekiuajti ipan xiuitl 1914. Aman tinemij ipan tonaltin ijkuak tekiuajtitika, niman itlamiyan yejuin xkuajli tlaltikpaktli iyejkotika.

17, 18. ¿Tlenon inpan nochiuas sekimej tlapejpeniltin ijkuak Cristo itekiuajtitos?

 ¹⁷ Biblia techijlia okseki itech yoliuilistli ipan iluikak. Kijtoua: “Tiknekij xmatikan tlinon impan nochiua on mimikej [...]. Tikneltokaj ika Jesús omik niman onoyoliuitij niman onoketsteu. Yejua ika, tej, tikneltokaj ika Dios kinuikas iuan Jesús on tlaneltokakej yejuan yomikej”. Niman noijki kijtoua: “Tejuamej yejuan titokauaskej ikan tonemilis hasta ijkuak uajlas [ʻtekiuajtitosʼ, TNM] toTeko, xachtoj techuikas de on yejuan yomikej. Sa no toTeko uajtemos ne iluikak ikan tlajtojli de tekiuajketl”. Sakin tetomilia: “Ijkuakon on tlaneltokakej yejuan yomikej, [...] achtopa yejuamej kinyoliuitis niman kinketsteuas. Kemaj yejuan titokauaskej ikan tonemilis techuikas inuan yejuamej ne ipan moxtli para tikonnamikiskej toTeko ne ipan ajakatl. Ijkon tinemiskej iuan toTeko para nochipa” (1 Tes. 4:13-17).

¹⁸ Yoliuilistli ipan iluikak nochiuaskia seki tonaltin sakin ijkuak itekiuajtitos Cristo. Tlapejpeniltin akin ok yoltoskej ipan tlaltikpaktli ijkuak nochiujtos ueyi tlajyouilistli kinuikaskej ipan moxtli (Mat. 24:31). Biblia kijtoua ika akin kinuikaskej xkochiskej ipan mikilistli, kijtosneki ika xuejkaujtipan miktoskej. Nochimej nimantsin kintlalnakayopatlaskej “ken ijkuak se san ualijkopi”, ijkuak sa ika nochi “trompeta kipitsaskej” (1 Cor. 15:51, 52).

19. ¿Katlejua yoliuilistli “yejuan más kuajli” onias tlayekapan?

¹⁹ Miyekej akin kichiuaj ken Cristo ipan yejuin tonaltin niman melajkanemij xtlapejpeniltin nion xkinnotsaj matekiuajtitij iuan Cristo ipan iluikak. Yejuamej kichiaj matlami yejuin xkuajli tlaltikpaktli ipan “itonal Jehová”. Xakaj uelis kimatis kemanon yejkos yejon tonajli, san ika, miyek onka tlen techititia ika iyejkotika (1 Tes. 5:1-3, TNM). Sakin, onias se yoliuilistli tlen tlamantik yes. Melak miyekej tlaltikpakchanejkej yoliuiskej niman nemiskej ipan Xochitlalpan. Ijkuakon, kichiaskej xok tlajtlakolejkej yeskej niman xok keman mikiskej. Kuajli tikmatij ika yes se yoliuilistli “yejuan más kuajli” xijkon ken okiselijkej akin oyoliujkej yeuejkaui niman oksejpa omijkej (Heb. 11:35).

20. ¿Tleka uelis tikneltokaskej ika yoliuilistli tlen nochiuas tlayekapan kuajli nochiujtias?

²⁰ Biblia techijlia ika akin yoliuiskej ipan iluikak “cada se ipan nochiuas ijkuak kontocaros”, kijtosneki ika kuajli nochiujtias (1 Cor. 15:23). Ika yejon uelis tikneltokaskej ika yoliuilistli ipan tlaltikpaktli noijki kuajli nochiujtias. Yejuin uelis kichiuas matotlajtoltikan: “¿Kemanon yoliuiskej akin omijkej ipan totonaluan? ¿Yes ijkuak Cristo san kemach peujtias tekiuajtis Mil Xiuitl, niman ijkon kinseliskej inchanejkauan niman akin iuan nouikaj? Niman tlakamej akin oyolmelaujkanenkej yeuejkaui niman kuajli ken tlayekanayaj, ¿kachtopa yejuamej kinyolitiskej niman ijkon tlapaleuiskej ika kinyekanaskej itekipanojkauan toTajtsin? ¿Niman tlenon panos inuan akin xokitekichiuilijkej Jehová? ¿Kemanon niman kanon yoliuiskej?”. Melak miyek onka tlen uelis totlajtoltiskej, san ika, amantsin xnoneki matajmanakan ipampa nochi yejuin. Melak kuajli yes titlamachiaskej matikitakan. Yemelak, teyolpakti yes tikitaskej tlenon kichiuas Jehová.

21. ¿Tlen tlamachialistli tikpiyaj?

²¹ Kuakon, aman noneki matikchikauakan totlaneltokil itech Jehová. Yejua kuajli yotechijli itechkopa Jesús ika yoliuiskej akin nemij ipan itlanemililuan (Juan 5:28, 29; 11:23). Jesús okitemakak okse tlen teititia ika toTajtsin uelis kinyolitis akin yomijkej ijkuak okijto ika, Abrahán, Isaac niman Jacob, ixpan Jehová “nochimej kipiaj nemilistli” (Luc. 20:37, 38). Ijkon tej, tikpiyaj miyek tlen ika uelis tikijtoskej tlen Pablo okijto: “Nikpia tlamachalistli itech Dios [...]  ika on mimikej yoliuiskej” (Hech. 24:15).