1. ¿Tleka melak noneki timoapolaktis? (Xkita tlaixkopinajli kampa peua tlen tomachtijtokej).

NOCHI xiujtin, melak miyekej akin nomachtiaj Biblia noapolaktiaj. Miyekej intech yejuamej san telpokamej noso hasta kokonej. Kanaj sekimej onoskaltijkej intech inchanejkauan akin kichiuaj ken Cristo. Niman tejua, ¿yotimoapolakti? Tla ijkon, melak kuajli tlen otikchiuj. Yejuin itlaj tlen nochimej akin kichiuaj ken Cristo melak noneki kichiuaskej niman ijkon nomakixtiskej (Mat. 28:19, 20, TNM; 1 Ped. 3:21, TNM).

2. ¿Tleka timosentemakas xkipiya mitsmojtis noso timoteltis tikchiuas?

² Maski timoapolaktis mitskauilis xpiya miyek tlateochiualistin, noijki onias tlen nonekis tikchiuas. ¿Tleka? Pampa ijkuak otimoapolakti tejua otikijto kema ijkuak omitstlajtoltijkej: “Ipampa imikilis Jesucristo, ¿yotimoyolkuep itech motlajtlakoluan niman yotimosentemakak itech Jehová niman ijkon tikchiuas tlen Yejua kineki?”. Moapolaktilis oteasikamachilti ika yotimosentemakak, tlen kijtosneki ika otikmakak Jehová motlajtol ika tiktlasojtlas niman tikchiuas kachtopa ipan monemilis tlen yejua kineki.  ¿Noneki timotlajtolkuepas itech yejuin tlen otikijto tikchiuas? Ka. Tiktlalis monemilis ipan imauan Jehová nochipa yes tlen melak kuajli otikchiuj. Yejuin ijkon pampa, ¿tlenon okse uelis tiktlapejpenis? Tla xtiktekichiuilia Jehová, kuakon Satanás mitsyekantos. Niman yejua nion xkineki xmomakixti. Yejua kineki xtlakamati niman ijkon maka xpaleui itekiuajyo Jehová niman xpolo motlamachialis ika tinemis nochipa.

3. ¿Tlen tlateochiualistin yotikseli pampa monemilis yotiksentemakak Jehová?

³ Xtlanemili itech tlateochiualistin tlen yotikinseli pampa otimosentemakak niman otimoapolakti. Aman ika yotikmakak Jehová monemilis, uelis kuajli tikmatstos niman tikijtos: “Jehová nouan nemi; xninomojtis. ¿Tlenon uelis nexchiuilis tlakatl?” (Sal. 118:6). Xonka okse ijkon ueyi tlateochiualistli ken tinemis iuan toTajtsin niman ika yejua mamitsseli.

4, 5. a) ¿Tleka tikijtouaj ika timosentemakas yejua itlaj tlen sa no tejuamej noneki tikchiuaskej? b) ¿Tlenon tikixnamikij tinochimej akin tikchiuaj ken Cristo maski san kech xiuitl matikpiyakan?

⁴ Tla yotimoapolakti, xkipiya tiknemilis ika timouikas iuan Jehová sa no ijki ken se tlajli tlen mochanejkauan uelis mitspanoltiliskej. Niman maski tla ok tichanti iuan motajuan, sa no tejua noneki timomakixtis, xyejuamej. ¿Tleka melak noneki xkilnamiki yejuin? Pampa xtikmati tlen tlaueltin uelis tikimixnamikis tlayekapan. Se neskayotl, kanaj otimoapolakti ijkuak san tikonetl katka. San ika, aman ika titelpochtli noso tiichpochtli, tikmachilia niman tikixnamiki tlen yeuejkaui ka. Se ichpochtli ijkin okineskayoti: “Miyekpa, ijkuak san tikonetl, xmitspajsolos ika pampa tiiteixpantijkauj Jehová xouel otijkua se pastel ipan kaltlamachtijli ijkuak yakaj okajxilti xiuitl. San ika, ijkuak timoskaltis niman ueyiya ika tiknekis timotekas iuan yakaj, noneki melak kuajli tikmatstos ika tiktlakamatis itlanauatiluan toTajtsin yejon tlen melak kuajli”.

⁵ Noijki melauak ika xsan telpokamej kixnamikij yenkuikej tlaueltin. Akin noapolaktiaj ijkuak iuejueyimej noijki kixnamikij tlen nion xkichiayaj ika makitlatlata intlaneltokil. Uelis yejuin yes itech innamiktilis, intekiyo noso ika kualoj. Yemelak, maski san kech xiuitl matikpiyakan, tinochimej tikixnamikij tlen kitlatlata tomelajkanemilis itech Jehová (Sant. 1:12-14).

6. a) ¿Tlenon kijtosneki ika ijkuak otimosentemakak itech Jehová otikijto ika tiktekichiuilis maski san tlenon mapano? b) ¿Tlenon mitsmachtia Filipenses 4:11 niman 12?

⁶ Itlaj tlen mitspaleuis tiyolmelaujkanemis maski san tlenon tikixnamikis yejua tla tikilnamiki ika ijkuak otimosentemakak itech Jehová otikijto ika tikchiuas nochi tlen mitstlajtlanilis. Yejuin kijtosneki ika yotikmakak motlajtol akin Tekiuaj itech tlen onka ika tiktekichiuilis maski san tlenon mapano, maski tla motajuan noso akin inuan timouika kikajkauaskej (Sal. 27:10). Maski san tlenon mopan panotos, uelis tiktlajtlanilis Jehová ika mamitspaleui tikpiyas chikaualistli tlen ika tikchiuas tlen otikijto ijkuak otimosentemakak (xpoua Filipenses 4:11, 12; 2 Corintios 4:7).

7. ¿Tlenon kijtosneki xmotekimaka ipampa momakixtilis ika “yolyemanilistli niman nemojtijli”?

⁷ Jehová kineki ika tejua iuan xmouika. San ika, nonekis timokojtilis niman ijkon iuan timouikas, niman titekitis ika tikpiyas momakixtilis. Ijkon kijtoua Filipenses 2:12: “Xmotekimakatiakan itech nemomakixtilis ikan yolyemanilistli niman nemojtijli”. Yejuin tlajtoltin teititiaj ika noneki kuajli tiknemilis tlenon tikchiuas niman ijkon tiktlajpiyas ken timouika iuan Jehová niman itech tiyolmelaujkanemis maski onias miyek tlauejli. Niman maka san tikonilkauas. Xkilnamiki  ika hasta akin miyek xiuitl yokitekichiuilijkaj toTajtsin okichiujkej tlen xkuajli. Kuakon, ¿tlenon mitspaleuis titekitis ipampa momakixtilis?

8. ¿Tlenon kijtosneki moselti timomachtis, niman tleka melak noneki?

⁸ Tla tiknekij touikaskej iuan Jehová, noneki tijkakiskej niman iuan titlajtoskej. Uelis tijkakiskej tlen techijlia, tla tomachtiaj Biblia toselti. Yejuin kijtosneki tikpouaskej iTlajtol toTajtsin niman amatlajkuiloltin tlen itech nokixtiaj, noijki titlanemiliskej itech tlen tikpoujtiuej. Ijkuak tikchiuas, xkilnamiki ika timomachtis Biblia xkijtosneki san tiktekitiltis motsontekon, kentla tiknekiskia tikilnamikis itlaj niman ijkon titlanankilis ijkuak mitstlatlajtoltiskej ipan kaltlamachtijli. Timomachtis Biblia yeskia kentla kanaj tias tikontejtemos niman ijkon tikixmatis okseki itech ikualneskayouan Jehová. Tikchiuas yejuin mitspaleuis xnisiui, niman yejua noijki mitsnisiuis (Sant. 4:8).

9. ¿Tlenon yotiktekitilti tlen yomitspaleui ijkuak moselti timomachtia?

⁹ Ikalpan Jehová yotechmakak miyek tlen uelis tiktekitiltis niman ijkon kuajli timomachtis. Matikitakan seki tlen uelis tiknextis ipan jw.org. Ipan sección “Jóvenes”, tiknextis tlen itoka “Actividades para estudiar la Biblia”, tlen uelis mitsmachtiskej tlen mitspaleuis itech tlen kijtoua Biblia. Ipan yejuin sección, noijki tikinnextis guías de estudio tlen intoka “¿Qué enseña realmente la Biblia?”, yejuin mitspaleuiskej xchikaua motlaneltokil niman xueli xtetomili tlen tikneltoka. Niman, ipan revista ¡Despertad! itech abril 2009, tiknextis okseki tlen uelis tikchiuas ijkuak timomachtis ipan “Los jóvenes preguntan. ¿Cómo disfrutar la lectura de la Biblia?”. Timomachtis niman titlanemilis melak noneki pampa yejuin mitspaleuiya xmotekimaka ipampa motemakixtilis (xpoua Salmo 119:105). *

10. ¿Tleka akin yonoapolakti melak noneki makichiua teoyotl?

¹⁰ Yotikitakej ika tijkakij Jehová ijkuak tomachtiaj Biblia. San ika, tla tiknekij iuan titlajtoskej, noneki tikchiuiliskej teoyotl. Akin tikchiuaj ken Cristo xkipiya tikitaskej teoyotl ken itlaj tlen san timomatis tikchiuas noso itlaj tlen mitspaleuis kuajli makisa tlen tikchiuas. Teoyotl yejua tlen ika tiuelij  tonojnotsaj iuan akin otexchijchiuj. Niman Jehová kineki mitskakis (xpoua Filipenses 4:6). Ijkuak itlaj mitsajmantos, xkilnamiki ika Biblia mitsijlia yejuin: “Xkontlajkali motlamamal ipan Jehová” (Sal. 55:22). ¿Yemelak tikneltoka ika yejuin uelis mitspaleuis? Melak miyekej tokniuan uelis kuajli mitsijliskej ika yejuin yokinpaleui. Niman tejua noijki uelis mitspaleuis.

11. ¿Tleka noneki nochipa xtlasojkamachili Jehová?

¹¹ Noneki nochipa tikchiuiliskej teoyotl Jehová, xsan ijkuak tiknekiskej matechpaleui. Biblia techijlia: “Xpiakan tetlajsojkamachilistli” (Col. 3:15). Uelis ika kemantika melak tajmanaj ipampa totlaueluan niman hasta tikilkauaj miyek tlateochiualistin tlen yotikselijkej. ¿Tleka xtikchiua ika mojmostla xnemili itech yeyi tlemach tlen ika tiktlasojkamachilis Jehová? Se ichpochtli itoka Abigail, akin onoapolakti ijkuak kipiaya 12 xiuitl, kijtoua: “Niknemilia ika xakaj ipan nochi tlaltikpaktli kinamiki melak matiktlasojkamachilikan ken Jehová. Kipiya nochipa tiktlasojkamachiliskej tlen yotechtlayokoli. Nikuelita nikilnamikis itlaj tlen onijkak: ‘Matiknemilikan ika ipan se kualkan tiuajtokuiteuaj niman san tikpiyaj yejon tlen yaloua otiktlasojkamachilijkej Jehová. ¿Kech tlemach tikpiyaskiaj?’”. *

12, 13. ¿Tleka noneki xtlanemili itech kenon tejua yotikitak ika Jehová yolkuajli?

¹² Jehová okipaleui tekiuaj David makixnamiki miyek tlen ouijtika. Ika yejon, David kimatstoya tlen kijtouaya ijkuak okijkuilo: “Xmatikan niman xkitakan ika Jehová yolkuajli; yolpaki se tlakatl akin itech nopaleuiya” (Sal. 34:8). Yejuin tlaxelojli kiteititia ika noneki sa no tejua xkita ika Jehová yolkuajli. Ijkuak tikpoua Biblia niman toamatlajkuiloluan, niman ijkuak tiauj tlanechikoltin, tiueli itech miyekej akin toTajtsin yokinpaleui mamelajkanemikan. San ika, ijkuak timoskaltijtiuj ken akin kichiua ken Cristo, nonekis sa no tejua xkita kenon Jehová mitspaleuiya ipan monemilis. ¿Kenon yotikitak sa no tejua ipan monemilis ika Jehová yolkuajli?

¹³ Onka itlaj tlen tinochimej akin tikchiuaj ken Cristo yotechititi ika Jehová yolkuajli. Yejua yotechnots matonisiuikan itech niman itech ikoneuj. Jesús okijto: “Xakaj ueli notech uajlau tla xkinotsa noTajtsin” (Juan 6:44). ¿Tikneltoka ika Jehová okichiuj itech xuajla? Se telpokatl uelis kinemilis: “Jehová okichiuj notajuan manonisiuikan itech, niman nejua san niauj imiuan”. San ika, ijkuak otimosentemakak niman otimoapolakti, otikteititi ika kuajli timouika iuan Jehová. Aman, yejua yemelak mitsixmati. Biblia kuajli techijlia: “Tla yakaj kitlajsojtla Dios, Dios kuajli kixmatstikaj” (1 Cor. 8:3). Xmochikaua nochipa tiktlasojkaitas ika tinemi ipan ikalpan Jehová.

14, 15. ¿Tleka tenojnotsalistli uelis kichikauas motlaneltokil?

¹⁴ Noijki tikita ika Jehová yolkuajli ijkuak mitspaleuiya xtlajto itech motlaneltokil kampa tontenojnotsa techajchan niman kampa timomachtia. Sekimej kitaj ouijtika kinnojnotsaskej akin inuan nomachtiaj ipan kaltlamachtijli. Kanaj mopan yopanok yejuin. Niman uelis melak ouijtika yes tla nonekis titlajtos imixpan miyekej. ¿Tlenon uelis mitspaleuis?

¹⁵ Kachtopa, xtlanemili itech tleka kuajli tikmatstika ika melauak tlen tikneltoka. Ipan jw.org, onka guías tlen ika timomachtis ipan miyek tlajtoltin tlen mitspaleuiskej xtlanemili itech tlenon tikneltoka, tleka tikneltoka niman kenon uelis tiktetomilis. ¿Tleka xtikxeloua  motiempo niman tikintejtemoua? Tla yemelak kuajli tikmatstika ika melauak tlen tikneltoka niman kuajli timoyektlalia, melak tiknekis titlajtos itech itokayo Jehová (Jer. 20:8, 9).

16. ¿Tlenon uelis mitspaleuis maka xmomojti titlajtos itech tlen tikneltoka?

¹⁶ Maski ijkon, ok uelis mitsmojtis titlajtos itech tlen tikneltoka maski kuajli yotimoyektlali. Se ichpochtli akin kipiya 18 xiuitl niman onoapolakti ijkuak kipiaya 13, kiselia yejuin: “Nikmatstika tlen nikneltoka, san ika kemantika ouijtika nikita nikteijlis”. ¿Kuakon tlenon kichiua? Yejua kijtoua ika kiyejyekoua tlajtos itech tlen melauak ijkon ken tlajtoskia itech itlaj okseki. Kijtoua: “Akin inuan ninomachtia kuajli kijtouaj tlen kichiuaj. ¿Tleka nejua xuelis noijki ijkon nikchiuas? Kuakon, ijkuak itlaj nikimilijtika, nikitojtikisa: ‘Se tonajli nitemachtijtoya itech Biblia niman...’. Sakin, oksejpa nitlajtoua itech tlen nikimilijtoya. Maski xnitlajtoua itech Biblia ijkuak nikinnojnotsa, sekimej kinekij kimatiskej okseki niman kemantika nechtlajtoltiaj tlenon nikchiua ijkuak nitemachtia itech Biblia. Pampa miyekpa nikchiua yejuin, xok ouijtika nikita nitlajtos inuan oksekimej. Niman melak kuajli ninomachilia ijkuak nitlajtoua itech tlen melauak”.

17. ¿Tleka melak noneki ika ijkuak titlajtoskej itech totlaneltokiluan manesi ika melauak tikneltokaj?

¹⁷ Tla tikintlakaita oksekimej niman timajmana inpampa, uelis yejuamej noijki ijkon mitschiuiliskej. Xkita tlenon kinemiliaya Olivia, se ichpochtli akin kipiya 17 xiuitl niman pitentsin katka ijkuak onoapolakti: “Nochipa onechmojti ika tla nikteneuaya Biblia ijkuak tononojtstoyaj makinemilikan ika xok ueli nitlajtoua itech itlaj okse”. Sakin opeuj kipiya okse tlanemilijli itech yejuin. Xok tlanemiliaya itech tlen kimojtiaya, yejua okinemili: “Miyekej telpokamej xtlaj kimatij itech iteixpantijkauan Jehová, niman san tejuamej techixmatstokej ken Teixpantijkej. Kuakon tlen tikchiuaj uelis kintlanemililtis tlen kuajli noso xkuajli totechkopa. Tla nion xtitlajtouaj itech tlen tikneltokaj noso tikijtouaj ika nemojtijli, kanaj kinemiliskej ika xtipakij ika tiTeixpantijkej. Hasta uelis xkuajli tlanemiliskej pampa kitaj ika xmelauak titlaneltokaj. San ika, tla tikimititiaj ika kuajli tikmatstokej tlen tikneltokaj niman titlajtouaj itech tlen melauak ken titlajtoskiaj itech itlaj okse, uelis kichiuas matechtlakaitakan”.

18. ¿Tlenon noneki tikchiuas niman ijkon timotekimakas ipampa momakixtilis?

¹⁸ Ken yotikitakej, sa no tejua timotekimakas ipampa momakixtilis melak ueyi kijtosneki. Ika yejon, kipiya timomachtis Biblia niman itech titlanemilis, tikchiuilis teoyotl toTajtsin niman titlanemilis ipan tlateochiualistin tlen yejua yomitsmakak. Nochi yejuin mitspaleuis kuajli xmatsto ika timouika iuan Jehová. Niman yejon kichiuas xtlajto itech tlen tikneltoka (xpoua Salmo 73:28). *

19. ¿Tleka melak kuajli tla tochikauaj tikpiyaskej makixtilistli?

¹⁹ Jesús okijto: “Tla yakaj kineki nouan yas, ma kelkaua on tlen kineki, ma nemi listo para tlajyouis noso mikis nopampa, niman ma nouan uiya” (Mat. 16:24). Kuajli nesi ika tikchiuas tlen okijto Jesús kijtosneki tiksentemakaskej tonemilis niman toapolaktiskej. Yejuin techkauilis matikselikan miyek tlateochiualistin aman niman noijki nemilistli tlen xkeman tlamis ipan yenkuik tlaltikpaktli tlen toTajtsin yokijto kuajkuis. Ika yejon, miyek tikpiyaj tlen techyolchikaua sa no tejuamej matotekimakatiakan ipampa tomakixtilis.