1, 2. ¿Tleka seki tajtin najmanaj ijkuak inkoneuan kinekij nosentemakaskej niman noapolaktiskej?

NOCHI xiujtin melak miyekej akin nomachtiaj Biblia nosentemakaj itech Jehová niman noapolaktiaj. Miyekej intech yejuamej san kemach telpokamej akin onoskaltijkej kampa inchanejkauan kichiuaj ken Cristo, niman aman yokitlapejpenijkej nemilistli tlen melak kuajli (Sal. 1:1-3). Kuajli tikmatstokej ika tajtin akin iteixpantijkauan Jehová melak kinekij mayejko tonajli ijkuak inkoneuan noapolaktiskej (uelis tikitas 3 Juan 4).

² San ika uelis onias seki tlen kinmajmana yejuin tajtin. Kanaj yokimixmatkej seki telpokamej akin onoapolaktijkej, san ika, sakin opeujkej ometlamatij itech tla yemelak kinpaleuiya kitlakamatiskej itlanauatiluan toTajtsin. Sekimej hasta xok kitekichiuiliaj Jehová. Ika yejon, tajtin kanaj kinmojtia ika sakin ika inkoneuan yonoapolaktijkej, makipatlakan tlen kineltokaj niman makikauakan intlasojtlalis itech tlen melauak. Yejon tlen opanok ipan tlanechikojli  Éfeso ipan kachtopa siglo. Jesús okijli: “Xok tinechtlajsojtla ken achtoj otinechtlajsojtlak” (Rev. 2:4). ¿Tlenon uelis kichiuaskej tajtin niman ijkon maka panos yejuin niman inkoneuan makiselikan “temakixtilistli”? (1 Ped. 2:2). Matikitakan ineskayo Timoteo.

3. a) ¿Kemanon Timoteo opeuj kichiua ken Cristo, niman tlenon okichiuj ika tlen ouel? b) ¿Tlenon yeyi tlemach okijlikej Timoteo?

³ Timoteo kanaj okixmat itlamachtiluan Jesús ipan xiuitl 47, ijkuak Pablo kemach kachtopa okitlajpaloto kalpan Listra. Maski ijkuakon kanaj san telpokaua katka, kuajli tikmatij ika kichiuaya tlen kimachtiayaj, niman ome xiuitl sakin opeuj yauj iuan Pablo ijkuak komintlajpalouaya kalpamej. Kanaj 16 xiujtin sakin, Pablo okitlajkuilouili: “Xtlakamati melajki tlinon omitsmachtijkej niman yejuan tikneltoka [‘omitstlaneltokiltijkej’, TNM], pampa tejua tikmatstikaj akinomej omitsmachtijkej. Niman desde tikonetl katka tikixmati on iYektlajkuilol Dios yejuan uelis mitstlamachilistis niman mitsuikas itech on temakixtilistli itechkopa motlaneltok itech Cristo Jesús” (2 Tim. 3:14, 15). Matikitakan yejuin yeyi tlemach tlen okijli: 1) “tikixmati on iYektlajkuilol Dios”, 2) “yejuan tikneltoka [ʻomitstlaneltokiltijkejʼ, TNM]” niman 3) “yejuan uelis mitstlamachilistis niman mitsuikas itech on temakixtilistli itechkopa motlaneltokil itech Cristo Jesús”.

4. ¿Tlenon ika yotimopaleui ijkuak tikinmachtia mokoneuan akin pitentsitsintin? (Xkita tlaixkopinajli kampa peua tlen tomachtijtokej).

⁴ Tajtin akin kichiuaj ken Cristo kinekij ika inkoneuan makixmatikan “iYektlajkuilol Dios”, tlen aman kipiya Tlajkuiloltin ika hebreo niman Tlajkuiloltin ika griego. Maski kokonej akin pitentsitsintin, san kech iuelij kasikamatij, uelis kixmatiskej tlen xouijtika intech akin tlajtoua Biblia niman itech tlen kijtoua ika opanok. Ikalpan Jehová yokikixti miyek amoxtin, amatlajkuiloltin niman videos ipan miyek tlajtoltin tlen tajtin uelis kitekitiltiskej niman ijkon kinpaleuiskej inkoneuan. ¿Katlejuamej uelis tikinteneuas tejua? Matikilnamikikan ika san uelis kuajli touikaskej iuan Jehová tla tikixmatij tlen kijtoua Biblia.

5. a) ¿Tlenon kijtosneki mitstlaneltokiltiskej? b) ¿Tleka uelis tikijtoskej ika Timoteo kuajli kineltokaya ika Jesús katka Mesías?

⁵ Xsan noneki tikinnotsas niman tikinmachtis mokoneuan intech akin tlajtoua Biblia noso itech tlen kijtoua opanok. Timoteo noijki okitlaneltokiltijkej. Ipan tlajtojli tlen ika onoijkuilo, yejuin kijtosneki “kuajli tikmatstos ika itlaj kema yemelak”. Timoteo kixmatstoya Tlajkuiloltin ika Hebreo ijkuak san konetl katka. San ika, seki xiujtin sakin, okitak miyek tlen okitlaneltokilti ika Jesús katka Mesías. Niman pampa melak kuajli kimatstoya yejuin, okichiuj manoapolakti niman oyaj iuan Pablo ipan itekiyo ken misionero.

6. ¿Kenon se tajtli uelis kipaleuis ikoneuj kuajli makineltoka tlen ueli itech Biblia?

⁶ ¿Kenon se tajtli uelis kipaleuis ikoneuj kuajli matlaneltoka, ijkon ken Timoteo? Kachtopa, noneki kipiyas ijyouilistli. Mokoneuj xtlaneltokas san ipan se teotlak, nion xkichiuas san pampa itajuan melak kuajli tlaneltokaj. Tekoneuan san ueliskej kuajli tlaneltokaskej itech tlen melauak itech Biblia tla “kitekitiltiaj intlamachilis”, kijtosneki, ika sa no yejuamej tlanemiliaj (xpoua Hebreos 5:14, TNM). * Tajtin noneki makinpaleuikan inkoneuan itech yejuin, niman melak noneki ijkuak kintlatlajtoltiaj. Matikitakan se neskayotl.

7, 8. a) ¿Kenon se tajtli akin kichiua ken Cristo kiteititia ijyouilistli ijkuak kiskaltia iichpochkatsin? b) ¿Kemanon yononek tikteititis ijyouilistli iuan mokoneuan?

 ⁷ Se tokniuj itoka Thomas kipiya se iichpokatsin akin kipiya 11 xiuitl. Yejua kijtoua ika kemantika iichpochkatsin kitlajtoltia yejuin: “¿Kanaj Jehová okitekitilti evolución ijkuak okichiuj maonia nemilistli ipan tlaltikpaktli?” niman “¿Tleka xtikintlapejpeniaj tekiuajkej niman tikchiuaj itlaj tlen makiyektlali kampa tichantij?”. Kemantika, Thomas, noneki nokamateltis niman ijkon xkinankilis ika tlen xok itlaj uelis kijlis. Kimati ika kuajli tiktlaneltokiltis yakaj tla tiktekitiltiaj miyek tlamachtiltsitsintin, itlaj tlen xkichiua san se ueyi tlamachtijli.

⁸ Ijyouilistli melak noneki intech akin kichiuaj ken Cristo. Niman Thomas kimati ika noneki kipiyas yejuin kualneskayotl ijkuak kiskaltia iichpokatsin (Col. 3:12). Yejua kasikamati ika noneki tiempo niman miyekpa tlajtoskej. Noneki kichiuas matlanemili iichpokatsin niman ijkon makineltoka ika tlen ueli itech Biblia yejua tlen melauak. Thomas kijtoua: “Nosiuauj niman nejua tiknekij tikmatiskej tla toichpokatsin yemelak kineltoka tlen ueltiuj niman tla kita ika kema ijkon, yejuin noneki ipan tlamachtiltin tlen ueyi kijtosnekij. Niman kuajli ika techtlatlajtoltia. Nikselia ika nechajmanaskia tla san nochi kiseliskia niman xtlaj tetlajtoltiskia”.

9. ¿Kenon tajtin uelis kuajli kimititiskej inkoneuan tlen melauak itech Biblia?

⁹ Ijkuak tajtin kipiyaj ijyouilistli, inkoneuan ika yolik kasikamatstiuej kenon “patlauak, niman ueyak, niman uejkatlan, niman tlakpak on” tlaneltokijli (Efes. 3:18). Ijkuak kinmachtiskej noneki kitaskej kech xiuitl kipiyaj inkoneuan niman kech kasikamatij. Ijkuak kokonej melak kuajli kineltokaj tlen kinmachtijtiuej, yejuin kinpaleuis kijtoskej ipan kaltlamachtijli niman ixpan oksekimej tleka ijkon tlaneltokaj (1 Ped. 3:15). Se neskayotl, ¿uelij kitetomiliaj ika Biblia tlenon panoua ijkuak timikij? ¿Kinemiliaj tleka yejuin melauak ijkon? * Kuajli nesi ika noneki ijyouilistli niman ijkon kuajli tikimititis mokoneuan itlamachtiluan Biblia, san ika, melak kinpaleuis (Deut. 6:6, 7).

10. ¿Tlenon melak noneki makichiuakan tajtin?

¹⁰ Melauak, tajtin akin kinekij ika inkoneuan makineltokakan tlen melauak, noijki noneki yejuamej makinmakakan se kuajli neskayotl. Stephanie, akin kipiya yeyi ichpoch, kijtoua: “Ijkuak ok pitentsitsintin katkaj, ninotlajtoltiaya: ‘¿Nikinmasikamachiltia tleka nejua kuajli nikmatstika ika nemi Jehová niman ika yejua melajki niman tetlasojtlani? ¿Kuajli kitaj ika nejua yemelak niktlasojtla?’. Xuelis nikchias nokoneuan matlaneltokakan tla nejua xnitlaneltoka”.

11, 12. ¿Tlenon kijtosneki tlamachilistli, niman tleka uelis tikijtoskej ika xsan kipiyaj akin iuejueyimej?

¹¹ Ijkon ken yotikitakej, Timoteo 1) kixmatiya “iYektlajkuilol Dios” niman 2) kuajli kimatiya ika melauak tlen kineltokaya. San ika, ¿tlenon okijtosnek Pablo ijkuak okijli ika iTlajtol toTajtsin “uelis mitstlamachilistis niman mitsuikas itech on Temakixtilistli”?

¹² Ipan Perspicacia Volumen 2, tetomilia ika ipan Biblia, tlamachilistli noijki kijtosneki “tiuelis kuajli tiktekitiltis tlen tikixmati niman tlen tikasikamati niman ijkon tikyektlalis tlaueltin, tiktlalkauis noso tikteltis tlen teijtlakoua, tikonajsis tlen yotiknemili noso tikinyolchikauas oksekimej noijki ijkon makichiuakan. Kijtosneki titlamachilise  yes”. Biblia kijtoua ika se telpokatl xtlamachilise (Prov. 22:15). San ika, akin kipiya tlamachilistli kiteititia ika kuajli titlanemilia. Aman tej, kuajli titlanemilis xualeua itech kech xiuitl tikpiyas, ualeua itech tikmojkaitas Jehová niman tiknekis tiktlakamatis itlanauatiluan (xpoua Salmo 111:10). *

13. ¿Kenon se telpokatl uelis kiteititis ika tlamachilise itech temakixtilistli?

¹³ Telpokamej akin yopeuj chikaui intlaneltokil xnimantsin “kipatlatetsij intlamachilis” ipampa tlen kileuiyaj noso ipampa tlen oksekimej kinchiualtiaj makichiuakan (Efes. 4:14). Pampa yokimachtijkej intlamachilis youelkej “kasikamatij tlen kuajli niman tlen xkuajli” (Heb. 5:14, TNM). Kiteititiaj ika yopeujkej kuajli tlanemiliaj ijkuak ika tlamachilistli kitlapejpeniaj tlen kichiuaskej maski ijkuak intajuan noso oksekimej akin iuejueyimej xkimitstokej (Filip. 2:12). Yejuin tlamachilistli melak noneki itech temakixtilistli (xpoua Proverbios 24:14). * ¿Tlenon uelis kichiuas se tajtli ika kinpaleuis ikoneuan manochiuakan tlamachilisejkej? Melak noneki kuajli kimititis ikoneuan ika noyekana ika Biblia. Tlen tajtli kijtoua niman kichiua kipiya kimititis ika noyekana ika itlanauatiluan iTlajtol toTajtsin (Rom. 2:21-23).

14, 15. a) ¿Itech tlenon noneki tlanemiliskej telpokamej akin kinekij noapolaktiskej? b) ¿Kenon tejua ken tajtli uelis tikpaleuis mokoneuj matlanemili itech ken kipaleuiya kitlakamatis itlanauatiluan Biblia?

¹⁴ Maski ijkon, xsan noneki ika tajtin makimijlikan inkoneuan tlenon kuajli niman tlenon xkuajli. Melak kinpaleuis tla kintlajtlaniliaj matlanemilikan itech yejuin tlajtoltilistin: “¿Tleka Biblia kijtoua maka matikchiuakan itlaj tlen uelis tikuelitaskej? ¿Tlenon mitstlaneltokiltia ika itlanauatiluan Biblia nochipa mitspaleuiya?” (Is. 48:17, 18).

¹⁵ Ijkuak se tekoneuj kijtoua ika kineki noapolaktis, itajuan kipiya kipaleuiskej  matlanemili itech tlen noneki kichiuaskej akin yonoapolaktijkej. ¿Tlenon kinemilia itech tlen aman nonekis kichiuas? ¿Tlen tlateochiualistin kiselis? ¿Tlenon ouijtika kixnamikis? ¿Tleka tlateochiualistin tlen kiselis miyek yes xijkon ken tlen ouijtika kixnamikis? (Mar. 10:29, 30). Melak noneki ika tekoneuj matlanemili itech yejuin tlajtoltilistin achto noapolaktis. Tla tajtin kipaleuiyaj matlanemili itech kenon kipaleuiya tetlakamatis niman tlenon xkuajli ipan nochiuas tla xkichiua, uelis kipaleuis kuajli makimatsto ika kitlakamatis itlanauatiluan Biblia yejon tlen nochipa melak kuajli (Deut. 30:19, 20).

16. ¿Tlenon uelis kichiuaskej tajtin tla inkoneuj peua ometlamati itech itlaneltokil sakin ika onoapolakti?

¹⁶ ¿Tlenon uelis kichiuaskej tajtin tla inkoneuj peua ometlamati itech itlaneltokil sakin ika onoapolakti? Se neskayotl, se telpokatl uelis peuas kiyoltilanas tlen onka ipan tlaltikpaktli noso peuas notlajtoltis tla kitlakamatis itlanauatiluan Biblia yejon tlen yemelak kuajli (Sal. 73:1-3, 12, 13). Tajtin noneki kitaskej ika tlen kichiuaskej ijkuak panos yejuin, uelis kichiuas inkoneuj ok makitekichiuili Jehová noso ka. Maski tla inkoneuj itelpochtli noso ok pitentsin, kipiya kiyejyekoskej maka iuan nokualaniskej. Kipiya kuajli kimachiltiskej ika kitlasojtlaj niman ika kinekij kipaleuiskej.

17, 18. Tla se telpokatl ometlamati, ¿tlenon uelis kichiuaskej itajuan niman ijkon kipaleuiskej?

¹⁷ Kema, yejon telpokatl akin yonoapolakti yokijto kitlasojtlas niman kichiuas achtopa tlen Jehová kineki (xpoua Marcos 12:30). ToTajtsin kita melak ueyi kijtosneki yejuin tlen yakaj kijlia kichiuas, niman noijki noneki ijkon kitaskej akin yonosentemakakej itech (Ecl. 5:4, 5). Tajtin noneki kitejtemoskej kemanon kinamikis kimilnamiktiskej inkoneuan yejuin ika tlasojtlalistli. San ika, achtopa nonekis nomachtiskej tlen ikalpan Jehová yokimijkuilouili tajtin. Yejuin kinpaleuis kuajli makimititikan ika ueyi kijtosneki niman kuajkui tlateochiualistin tiyes se iteixpantijkauj Jehová akin yonosentemakak niman yonoapolakti.

¹⁸ Se neskayotl, tajtin kinextiskej tlen kinpaleuis ipan apéndice “Los padres preguntan” itech amoxtli Los jóvenes preguntan, volumen 1. Ompa kijtoua: “Maka niman xnemili ika mokoneuj xok itlaj kineki itech nemotlaneltokil. Miyekpa panoua, ika telpokatl san noneki kiyektlalis itlaj tlen kitsontekonpasoloua”. Uelis ijkon nemis pampa oksekimej itlaj kichiualtiaj makichiua, nomachilia iselti noso kimachilia ika oksekimej telpokamej totoka noskaltia intlaneltokil ipan tlanechikojli. Apéndice sakin kijtoua: “Yejuin tlen kitsontekonpasoloua xkixnamikij itlaj itech itlajtolyekanalisuan Biblia. Miyekpa, yejuin panoua pampa telpochtli kixnamiki tlen kichiuaj makitekiyomaka kichiuas tlen kineltoka, hasta amantsin”. Sakin, apéndice kimijlia tajtin tlenon uelis kichiuaskej tla inkoneuj ometlamati itech tlen melauak.

19. ¿Kenon tajtin uelis kinpaleuiskej inkoneuan manochiuakan tlamachilisejkej itech makixtilistli?

¹⁹ Tajtin kipiyaj ueyi tekitl niman noijki se tlateochiualistli ika kimiskaltiskej inkoneuan itech “melajkatlalilistli de innemilis niman ikan machtilistli” tlen ualeua itech Jehová (Efes. 6:4). Ken yotikitakej, xsan noneki kinmachtiskej tlen kijtoua Biblia, noijki noneki kinpaleuiskej kuajli makineltokakan tlen ueltiuej. Tekoneuan noneki kipiyaskej chikauak intlaneltokil tlen makinyolmapeua manosentemakakan itech Jehová niman makitekichiuilikan ika nochi inyojlo. Makinpaleui nemokoneuan iTlajtol Jehová, iespíritu santo niman tlen nenkichiuaj ken tajtin niman ijkon manochiuakan tlamachilisejkej itech makixtilistli.