¿Kuajli yotikinpouj revistas tlen san kemach yokiskej itech Amatl Tekakistilijketl? Xkita tla uelis tikinnankilis yejuin tlajtoltilistin:

¿Tleka tajtin akin ualeuaj oksekan noneki kitaskej tlen tlajtojli kuajli kasikamatij inkoneuan ijkuak kinpaleuiskej ipan intlaneltokil?

Tekoneuan kanaj nomachtiskej tlajtojli tlen tlajtouaj kampa chantij aman ipan kaltlamachtijli niman itech oksekimej. Ijkuak se konetl nomachtia tlajtoua xsan ipan se tlajtojli, melak kipaleuiya. Tajtin kipiya kitaskej kanon inkoneuan kuajli kasikamatiskej tlen melauak temachtia Biblia niman kanon kiueyiliskej intlaneltokil, tla nosentlaliaj ipan se tlanechikojli kampa kikuij tlajtojli tlen tlajtouaj kampa chantij aman, noso kampa kikuij tlajtojli tlen inkoneuan opeujkej tlajtouaj. Tajtin akin kichiuaj ken Cristo noneki kachtopa tlanemiliskej itech tlen kinpoloua inkoneuan niman maka san itech tlen yejuamej kinekij (w17.05, páginas 9-11).

Jesús okitlajtolti Pedro: “¿Más tinechtlajsojtla xken yejuamej in?”. ¿Tlenon kiteneujtoya ijkuak okijto “yejuamej in”? (Juan 21:15)

Nesi ika Jesús kiteneujtoya yejon michimej tlen ompa onkatkaj noso itekiyo ika michtlajtlamas. Sakin ika Jesús omik, Pedro oksejpa opeuj tekiti ken michtlamajketl. Akin kichiuaj ken Cristo kipiya kitaskej kech kitlasojtlaj intekiyo ipan inyojlo (w17.05, páginas 22 niman 23).

¿Kenon Elias Hutter ika tlamachilistli okinpaleui inomachtijkauan mauelikan hebreo?

Yejua kinekiya ika inomachtijkauan nimantsin makitakan itech tlajtojli hebreo katlejua katkaj tlajkuiloltin tlen intech kisayaj okseki tlajtoltin niman katlejua katkaj prefijos niman sufijos. Ika yejon, okinkapotstili tlajkuiloltin tlen intech kisayaj okseki tlajtoltin, niman tlajkuiloltin tlen katkaj prefijos niman sufijos xokintemilti. Traducción del Nuevo Mundo de las Santas Escrituras (con referencias) noijki kitekitiltia itlaj ken yejuin ipan notas tlen kipiya itsintlan páginas (wp17.2, páginas 11 niman 12).

¿Tlenon noneki kinemilis se tokniuj akin kimatisneki tla kinamiki kipiyas se arma tlen ika tlatoponiaj niman ika notlajpiyas itech oksekimej tlaltikpakchanejkej?

Ixpan Jehová, inemilis se tlaltikpakchane melak tlasojti. Jesús xokimijli inomachtijkauan makitejtemokan se espada niman ika manotlajpiyakan (Luc. 22:36, 38). Itekipanojkauan toTajtsin kinkuepaj inespadas ika “rejas tlen kipiya arado”. Inemilis se tlaltikpakchane melak ueyi kijtosneki xijkon ken tlemach tlen tikpiyaj. Noneki tiktlakaitaskej intlamachilis oksekimej niman tokojtiliskej tiktemakaskej se kuajli neskayotl (2 Cor. 4:2) (w17.07, páginas 31 niman 32).

¿Tleka xsan noijki tlen kijtouaj Mateo niman Lucas itech Jesús ijkuak san konetl katka?

Mateo kijtoua tlen opanok iuan José. Se neskayotl, kijtoua tlenon okichiuj ijkuak okimat ika María koneua katka niman ijkuak se iluikaktekitketl okijli mauiya Egipto niman sakin manokuepa. Lucas kijtoua tlen ipan onochiuj María. Se neskayotl, kijtoua tlenon opanok ijkuak okitato Elisabet niman tlenon okichiuj ijkuak Jesús onokauj ipan teopan (w17.08, página 32).

¿Itech tlenon yomakis iTlajtol toTajtsin?

Tlen kijtosnekiyaj tlajtoltin tlen onotekitiltijkej ipan Biblia yonopatlatiajkej. Tekiuajkej kitlaliaj okse tlajtojli. Xkitekauiliayaj ika Biblia manotlajtolkuepa ipan tlajtojli tlen tlajtouaj tlaltikpakchanejkej (w17.09, páginas 19-21).

¿Katlejua tlasojtlalistli ueyixtika?

Ijkuak ualeua itech tlen melauak, agápe yejua tlasojtlalistli tlen ueyixtika. Maski ika yejuin tlasojtlalistli uelis tikmachiliskej ika yakaj tiknekij, miyekpa, noteititia ika tlen tikchiuaj inpampa oksekimej maski xtechpaleuiya tejuamej (w17.10, página 7).