1, 2. ¿Tleka tinochimej akin tikchiuaj ken Cristo noneki matikmatikan kenon yoliuiskej akin yaskej ne iluikak?

TINOCHIMEJ akin tiktekichiuiliaj Jehová tiknekij tikmatiskej kenon yoliuiskej akin yaskej ne iluikak. Tlapejpeniltin akin ok nemij ipan yejuin tlaltikpaktli melak kinekij kasikamatiskej yejuin pampa yejuamej nemiskej ne iluikak. San ika ¿tleka akin nemiskej ipan tlaltikpaktli noijki kinekij kimatiskej yejuin? Pampa tlen inpan nochiuas tlapejpeniltin noijki kinpaleuis. Kema, ipampa yejuin, yejuamej kiseliskej miyek tlateochiualistin.

² ToTajtsin okichiuj ika sekimej inomachtijkauan Jesús akin onenkej ipan kachtopa siglo makijkuilokan ika oniaskia se yoliuilistli ne iluikak. Apóstol Juan okijto: “Aman ye titekoneuan itech Dios. Hasta aman xtechititia kenijki tinemiskej. Pero tikmatstokej ika ijkuak Cristo uajlas, tinemiskej ken yejua” (1 Juan 3:2). Kuakon tlapejpeniltin xkimatij kenon nemiskej ne iluikak nion xkimatij kenon yeskej ijkuak nokuepaskej espíritus. San ika, kema kuajli kimatstokej ika, ijkuak yoliuiskej, kitaskej Jehová. Biblia xtechijlia nochi tlen panoua ijkuak yoliuij akin tlapejpeniltin, san ika, onka seki tlemach tlen kema techijlia. San seki matikteneuakan. Apóstol Pablo okijto ika tlapejpeniltin inemiskej iuan Cristo ijkuak yejua “kinxoxotonis on yejuan tlayekankej, on yejuan kipiyaj tekiuajyotl, niman on yejuan kipiyaj poder”, niman noijki ijkuak kipopoloskej “on mikilistli, yejuan nochi tlak[a]tl itlauelikniu”. Sakin, tlapejpeniltin niman Cristo san no yejuamej notemaktiliskej itech toTajtsin niman noijki kimaktiliskej nochi tlen onka (1 Cor. 15:24-28). ¡Melak kualtsin tlen panos! *

3. Itech tlen kijtoua 1 Corintios 15:30-32, ¿tlenon ouel okixiko Pablo pampa kineltokaya ika yoliuiskej akin yomijkej?

 ³ Pablo ouel okixiko nochi tlen okixnamik pampa kineltokaya ika yoliuiskej akin yomijkej (xpoua 1 Corintios 15:30-32). Okimijli tokniuan corintios: “Mojmostla nechmiktisnekij”. Niman noijki okimijli: “Ipan in ueyikalpan itoka Éfeso oninoxixikoj inuan on tlakamej ken ninoxixikoskia inuan on temojtijkej yolkej” (2 Cor. 1:8; 4:10; 11:23). Ijkuak Pablo okijto ika onoxixiko imiuan sekimej tlakamej akin yeskiaj ken “on temojtijkej yolkej”, kanaj kinteneujtoya yejon tlakamej judíos akin kitlaueltokayaj (Hech. 19:26-34; 1 Cor. 16:9). Maski Pablo okixnamik tlen ouijtika, yejua nochipa okineltokak ika toTajtsin kiteochiuaskia ika tlayekapan (2 Cor. 4:16-18).

4. ¿Tleka miyekej tokniuan ueli kitekichiuiliaj Jehová maski kixnamikij miyek tlemach tlen xkuajli? (Xkita tlaixkopinajli tlen onka ixpan yejuin revista).

⁴ Aman tejuamej noijki tikixnamikij tlen xkuajli. Miyekej tokniuan melak tlajyouiyaj pampa kinchiuiliaj tlen xkinamiki. Oksekimej chantij kampa onka guerra. Niman oksekimej chantij kampa xnotekauilia manotenojnotsa. San ika, nochimej yejuin tokniuan kitekichiuilijtokej Jehová maski kimatij ika uelis kinchiuiliskej tlen xkuajli, ika uelis kintsakuaskej noso hasta uelis kinmiktiskej. Yejuamej xnomojtiaj pampa kimatij ika, maski mikiskej, toTajtsin kinteochiuas ika tlayekapan.

5. ¿Tlenon uelis kichiuas maka sa matikneltokakan ika yoliuiskej akin yomijkej?

⁵ Pablo okimijli tokniuan corintios manotlajpiyakan maka tlanemiliskej ijkon ken akin kijtouayaj: “Tla [...] on mikatsitsimej xyoliskej [...,] ‘ma titlakuakan niman ma titlaonikan, pampa mostla timikiskej’”. Miyekej akin onenkej yeuejkaui, noijki ijkon tlanemiliayaj. Ijkuak Pablo okimijli yejuin tlajtoltin tokniuan corintios, kanaj kiteneujtoya tlen ijkuiliujtika ipan Isaías 22:13, kampa kijtoua ika israelitas nochipa san noyolpaktijtoyaj niman xkinekiyaj kitlakamatiskej toTajtsin. Ipan yejuin tonajli, miyekej noijki ijkon kichiuaj ken israelitas, yejuamej san kitejtemouaj kenon noyolpaktiskej pampa kijtouaj ika xnochipa yoltoskej. San ika, itikmatij kenon xkuajli okisatoj israelitas pampa ijkon tlanemiliayaj (2 Crón. 36:15-20).

6. ¿Tlenon panos tla yemelak tikneltokaj ika yoliuiskej akin yomijkej?

⁶ ¿Tlenon panos tla yemelak tikneltokaj ika yoliuiskej akin yomijkej? Kuajli tikintlapejpeniskej akin imiuan touikaskej. Tokniuan akin chantiyaj Corinto xnonekiya nosentlaliskej imiuan akin xtlaneltokayaj itech yoliuilistli. ¿Tlenon techmachtia yejuin? Tla tejuamej melak touikaj imiuan akin xtlaneltokaj itech yoliuilistli niman imiuan akin san kinekij noyolpaktiskej, xkuajli tonkisaskej, pampa kanaj xok tiknekiskej toyekanaskej ken toTajtsin kineki niman kanaj hasta tikchiuaskej tlen toTajtsin kitlauelita. Ika yejon, Pablo techijlia: “Xmelajkatlalikan nemotlamachilis niman maka sa xchiuakan tlajtlakojli” (1 Cor. 15:33, 34).

7. Itech tlen kijtoua 1 Corintios 15:35-38, ¿kanaj tlenon ueliskia tetlajtoltis akin kinekiskia tetlaneltokiltis ika xyoliuiskej akin yomijkej?

⁷ (Xpoua 1 Corintios 15:35-38). Yakaj akin kinekiskia tetlaneltokiltis ika xyoliuiskej akin yomijkej, kanaj ueliskia tetlajtoltis: “¿Kenijki tej, yoliskej niman nokuiteuaskej on mikatsitsimej? ¿Katlejua on tlalnakayotl kipiyaskej?”. Melak kuajli tla tikitaj tlen okijto Pablo itech yejuin, pampa aman miyekej tlatlamantik tlen kinemiliaj itech mikilistli  niman yoliuilistli. San ika ¿tlenon techmachtia Biblia?

8. ¿Katlejua neskayotl techpaleuiya más matikasikamatikan kenon yoliuiskej akin yaskej iluikak?

⁸ Ijkuak yakaj miki, itlalnakayo palani. San ika, Jehová, akin okichijchiuj nochi universo, uelis oksejpa kiyolitis niman kimakas itlalnakayo “ken noneki para kipiyas” (Gén. 1:1; 2:7). Ijkuak Pablo kiteneujtoya kenon yoliuiskej tlapejpeniltin ne iluikak, okitekitilti se neskayotl niman ijkon kiteititis ika toTajtsin uelis kinmakas intlalnakayo “ken yejua kineki”. Yejua okijto ika, ijkuak kitokaj ipan tlajli se “xinachtli”, sakin ixua ken se yenkuik planta. Tla tikitaj, yejon xinachtli tlen okitokakaj onokuep se planta niman aman tlamantik nesi.

9. ¿Kenon 1 Corintios 15:39-41 techititia ika nochi tlen toTajtsin okichijchiuj melak tlatlamantik?

⁹ (Xpoua 1 Corintios 15:39-41). Pablo okijto ika nochi tlen toTajtsin yokichijchiuj melak tlatlamantik. Se neskayotl, uakaxtin, totomej niman michimej xsan noijki ken tlachijchiujtin. Yejua noijki okijto: “On tonaltsintli, on metstli niman on sitlalimej no oksekneka kualtsitsimej ikan impetlanalis. Niman sano yejuamej on sitlalimej cada se oksekneka kualtsin petlani”. Maski tejuamej xueli tikitaj, ixtlamatkej kijtouaj ika sitlalimej melak tlatlamantikej: seki uejueyimej, seki pitentsitsintin, seki chichiltikej, seki istakej niman seki kostikej, ijkon ken tonaltsintli. Pablo noijki okijto ika “onkaj iluikaknakayomej [...] niman tlaltikpaknakayomej”. ¿Tlenon okijtosnek? Ika akin tinemij ipan yejuin tlaltikpaktli tikpiyaj se totlalnakayo, san ika, akin nemij ne iluikak yejuamej nemij ken espíritus, ijkon ken iluikaktekitkej.

10. ¿Kenon yeskej akin yoliuiskej ne iluikak?

¹⁰ Sakin, Pablo okijto: “No ijkin nochiuas ijkuak on mikatsitsimej yoliskej niman nokuiteuaskej. On tlalnakayotl palani ijkuak kitlaltôkaj, pero ijkuak on tlalnakayotl yoliuis niman nokuiteuas, xok kaman palanis oksejpa”.  Yemelak, ijkuak se miki, itlalnakayo palani niman oksejpa nokuepa tlalpoktli (Gén. 3:19). Kuakon, ¿tlenon okijtosnek Pablo ijkuak okijto ika “ijkuak on tlalnakayotl yoliuis [...], xok kaman palanis”? Ipan yejuin tlaxelojli, Pablo xtlajtotoya itech yakaj akin oksejpa yoliui ipan tlaltikpaktli, ijkon ken yejon tlaltikpakchanejkej akin Elías, Eliseo niman Jesús okinyolitijkej yeuejkaui. Yejua kinteneujtoya akin yoliuij ken espíritus niman yauej iluikak (1 Cor. 15:42-44).

11, 12. ¿Kenon oyoliuj Jesús ijkuak oyaj ne iluikak, niman kenon yoliuiskej tlapejpeniltin?

¹¹ Ijkuak Jesús ouajla ipan tlaltikpaktli, okipix itlalnakayo. San ika, ijkuak oyoliuj, onokuep ken se espíritu niman oyaj ne iluikak. Noijki ijkon, akin tlapejpeniltin nokuepaskej ken espíritus ijkuak yoliuiskej. Pablo okijto: “Ijkon ken aman tikpiyaj on tlalnakayotl ken Adán okipix, se tonajli tikpiyaskej toiluikaknakayo ken iiluikaknakayo Cristo” (1 Cor. 15:45-49).

¹² Maka matikilkauakan ika Jesús xoyoliuj ika itlalnakayo. Pablo kuajli oteasikamachilti tleka Cristo xoyoliuj ika itlalnakayo, okijto: “Totlalnakayo yejuan tlachijchijtli ikan nakatl, ikan yestli, niman ikan omitl, xuelis kalakis kampa tlamandaroua Dios iluikak chanej” (1 Cor. 15:50). Kuakon, iapóstoles Jesús niman akin tlapejpeniltin noijki xueliskia yaskej ne iluikak ika intlalnakayo, tlen palani. San ika ¿kemanon yoliuiskiaj? Pablo okijto ika ijkuak yejuamej mikiskiaj, xnimantsin yoliuiskiaj ne iluikak. Ijkuak apóstol Pablo okijkuilo 1 Corintios, sekimej inomachtijkauan Cristo yomijkaj, ken apóstol Santiago. Niman, sakin on oksekimej apóstoles niman tlapejpeniltin noijki mikiskiaj (1 Cor. 15:6; Hech. 12:1, 2).

13. ¿Tlenon nochiuaskia ijkuak itekiuajtitoskia Cristo ne iluikak?

¹³ Jesús niman Pablo okijtokej ika ajsiskia  se tonajli ijkuak Cristo uajlaskia noso ijkuak peuaskia tekiuajtis ne iluikak. Ipan yejon tiempo oniaskiaj miyek guerras, apistli, tlalolinalistin niman okseki tlemach. Cristo opeuj tlayekana ne iluikak desde 1914. Jesús noijki okiteneuj tlenon más nochiuaskia. Okijto ika notenojnotsaskia “ipan nochi tlaltikpaktli [...], niman kuakon tlapopoliuis ipan yejuin tlaltikpaktli” (Mat. 24:3, 7-13, Mat. 24:14, TNM). Pablo noijki okijto ika, ijkuak Cristo itekiuajtitoskia, tokniuan tlapejpeniltin akin yomijkaj yoliuiskiaj ne iluikak (1 Tes. 4:14-16; 1 Cor. 15:23).

14. Aman ika itekiuajtitok Cristo, ¿tlenon inpan nochiua tlapejpeniltin ijkuak mikij?

¹⁴ Ipan yejuin tonaltin, tokniuan tlapejpeniltin akin mikij nimantsin yoliuij ne iluikak. ¿Kenon tikmatij? Ijkon tikijtouaj ipampa tlen Pablo okiteneuj ipan 1 Corintios 15:51, 52, kampa kijtoua: “Xtinochimej timikiskej, pero tinochimej techtlalnakayopatlaskej. Ijkuak kipitsaskej on sa ika nochi trompeta, tinochimej titotlalnakayopatlaskej san amanamantsin ken ijkuak se iijkopi”. Tlen nikan noijtoua inochiujtok ipan yejuin tonaltin. Ijkuak tlapejpeniltin yoliuiskej ne iluikak, yejuamej melak yolpakiskej pampa tekiuajtiskej “iuan toTEKO para nochipa” (1 Tes. 4:17).

15. ¿Tlenon kichiuaskej on tlapejpeniltin akin nimantsin yoliuij?

¹⁵ Biblia techijlia tlenon kichiuaskej on tlapejpeniltin akin nimantsin yoliuij “ken ijkuak se iijkopi”. Jesús kimijlia: “On yejuan tetlaniskej niman nochi innemilis nechtlakamatiskej, nikinmakas tekiuajyotl para kinmandaroskej nochi países, ijkon ken noTajtsin onechmakak on tekiuajyotl. Yejuamej  tej, kinmandaroskej on países ika on chikauak tekiuajyotl yejuan sanoyej uelis kinxixinis on países ken sen tlakatl ueli kuejkuechtilia sen kontli” (Apoc. 2:26, 27). Tlapejpeniltin kichiuaskej tlen Jesús kinnauatis niman kinyekanaskej nochi kalpamej ika “chikauak tekiuajyotl” (Apoc. 19:11-15).

16. ¿Tlenon inpan nochiuas akin yolmelajkanemiskej itech Jehová?

¹⁶ Ijkuak tlapejpeniltin yoliuiskej, yejuamej uelis kijtoskej: “On mikilistli yotiktlankej itechkopa toTEKO JesuCristo” (1 Cor. 15:54-57). Ipan Armagedón, tlapejpeniltin tlapaleuiskej ijkuak kipopoloskej nochi tlen xkuajli nochiua ipan yejuin tlaltikpaktli. Melak miyekej akin kichiuaj ken Cristo makisaskej itech “on ueyi tlajyouilistli” niman nemiskej ipan yenkuik tlaltikpaktli (Apoc. 7:14). Yejuamej kitaskej kenon yoliuiskej melak miyekej tlaltikpakchanejkej akin yeuejkaui omijkej. ¡San matikonnemilikan kenon melak yolpakiskej! (Hech. 24:15). Nochimej akin yolmelajkanemiskej itech Jehová xok keman mikiskej pampa xok kipiyaskej yejon tlajtlakojli tlen Adán okinpanoltili.

17. ¿Tlenon techijlia 1 Corintios 15:58 matikchiuakan?

¹⁷ Tinochimej melak tiktlasojkamatij tlen Pablo okimijkuilouili tokniuan akin chantiyaj Corinto. Aman más kuajli yotikasikamatkej ika melak noneki matikchiujtokan “itekiu toTEKO” (xpoua 1 Corintios 15:58). Tla nochipa tiktlakamatij Jehová niman tla tokojtiliaj kuajli tiktekichiuiliskej, uelis tikneltokaskej ika tikseliskej tlen melak kualtsin. Ijkuakon, tikitaskej ika xsan nenka otikchiujkej nochi tlen toTajtsin techtlajtlanilia.