1, 2. a) ¿Tlenon okinnauatijkej yeyimej iapóstoles Jesús, niman tlenon okichiujkej? b) ¿Tlenon tikitaskej ipan yejuin tlamachtijli?

SAKIN ika yokipanoltijkaj Pascua ipan xiuitl 32, apóstol Pedro, Santiago niman Juan okitakej itlaj tlen melak temojkatlachialti. Ipan se ueyi tepetl, kanaj ipan tepetl Hermón, Jesús imixpan onixpatlak. Biblia kijtoua: “Ixayak onokau petlanki ken tonaltsintli, niman itlaken sanoyej kualtsin opetlankaistayak” (Mat. 17:1-4). Itlamiyan tlatlachalistli, apóstoles okikakkej ika toTajtsin okijto: “In yejua notlajsojkaKoneu yejuan nechpaktia. Yejua xtenkakikan” (Mat. 17:5). Yejuin yeyi apóstoles okiteititijkej ika okitenkakkej Jesús pampa okichiujkej tlen okinnauati, niman tejuamej noijki ijkon tiknekij tikchiuaskej.

² Ipan okse tlamachtijli, otikitakej ika tiktenkakij Jesús ijkuak xok tikchiuaj seki tlemach. Aman, ipan yejuin tlamachtijli tikitaskej ome tlemach tlen Jesús okijto ika noneki tikchiuaskej.

3. Itech tlen kijtoua Mateo 7:13, 14, ¿tlenon noneki tikchiuaskej?

³ (Xpoua Mateo 7:13, 14, TNM). * Ken tikitaj, Jesús okijto  ika onkatij san ome puertas: se tlen teuika ipan se ojtli “pitsauak” niman se tlen teuika ipan se ojtli “patlauak”. San yejon ojtin onkatij. Toseselti noneki tiktlapejpeniskej ipan katlejua puerta tikalakiskej pampa san ijkon uelis tikpiyaskej nemilistli tlen xkeman tlamis.

4. Xkijto kenon on ojtli tlen “patlauak”.

⁴ Melak noneki matikitakan kanon teuikaj yejuin ome ojtin. Miyekej kitlapejpeniaj yaskej kampa ojtli “koyauak” pampa xouijtika ompa tias. Teyolkoko ika miyekej ompa yauej san pampa miyekej ijkon kichiuaj. Yejuamej xkitaj ika Satanás, noso akin noijki noixmati ken Diablo, yejua akin kineki ika mauiyan ipan yejon ojtli tlen teuika ipan tlapopolouilistli (1 Cor. 6:9, 10; 1 Juan 5:19).

5. ¿Tlenon yokichiujkej sekimej para kinextiskej ojtli tlen “pitsauak” niman ipan yaskej?

⁵ San ika, Jesús okijto ika xmiyekej yaskiaj ipan on ojtli tlen “pitsauak”. ¿Tleka? Sakin ika Jesús okijto yejuin tlaxelojli, otechnauati matotlajpiyakan itech on teotlajtokej akin tlakajkayauaj (Mat. 7:15). Onkatij melak miyek religiones tlen kijtouaj ika temachtiaj tlen melauak. Ipampa yejon, melak miyekej xok kimatij katlejua religión tlen melauak niman xok nokojtiliaj kitejtemoskej on ojtli tlen teuika ipan nemilistli. San ika, uelis kinextiskej pampa Jesús okijto: “Tla nenmelajkanemiskej ipan on tlen nemechijlia, nenmochiuaskej melauak nennomachtijkauan. Nenkixmatiskej tlen melauak, niman on tlen melauak yejua mechmanauis” (Juan 8:31, 32). Melak kuajli ika tejua xotikchiuj ijkon ken oksekimej, yej otiktejtemo tlen melauak. Opeuj más kuajli timomachtia Biblia para tikitas tlenon techtlajtlanilia toTajtsin niman otijkak tlen Jesús otemachti. Otikitak ika Jehová xkineki matikchiuakan tlen xmelauak temachtiaj okseki religiones niman ika xnoneki tikinchiuaskej iluimej noso costumbres tlen kinchiuaj religiones tlen xmelajkej. Noijki, otikitak ika kemantika ouijtika tikitas tiktlakamatis Jehová niman tijkajkauas tlen yejua xkuelita (Mat. 10:34-36). Kanaj tejua ouijtika otikitak timopatlas, san ika, pampa tiktlasojtla toTajtsin niman tiknekiya tikyolpaktis, xotimosiaujkauj. Jehová melak yolpaki ipampa tlen otikchiuj (Prov. 27:11).

6. Itech tlen kijtoua Salmo 119:9, 10, 45, 133, ¿tlenon techpaleuis maka matikisakan itech ojtli “pitsauak”?

⁶ Tla itinemij ipan ojtli tlen “pitsauak”, ¿tlenon techpaleuis nochipa matinejnentiakan ipan yejon ojtli? Para tikasikamatiskej, matikteneuakan yejuin: ipan seki países, carreteras tlen onkatij ipan tepetl melak pitsajkej. Ika yejon, innajnakastlan yejuin carreteras kintlaliliaj se tepostli. Yejuin tepostli kipaleuiya akin tlanejnemiltia niman noijki icarro para maka manonisiui itenpan carretera niman ijkon xonuetsis. ¿Xmelak ika xakaj kualaniskia pampa onkatij yejon tepostin? Noijki ijkon, itlanauatiluan Jehová tlen tikinnextiaj ipan Biblia yeskiaj ken on tepostin pampa techpaleuiyaj maka matikisakan itech ojtli tlen “pitsauak” (xpoua Salmo 119:9, 10, 45, 133).

7. ¿Kenon noneki kitaskej telpokamej noso ichpokamej on ojtli tlen pitsauak?

⁷ Telpochtli noso ichpochtli, ¿kemantika tiknemilia ika melak ouijtika tlen Jehová mitstlajtlanilia xchiua? Yejon tlen Satanás kineki xnemili. Kineki xkita ika akin yauej ipan ojtli tlen patlauak nesi kentla  yemelak noyolpaktiaj. Kineki xnemili ika xtimoyolpaktia ijkon ken akin imiuan tiauj ipan escuela niman akin uajnesij ipan internet, niman ika tlen Jehová mitsnauatia xmitskauilia xmoyolpakti. * San ika, xkilnamiki ika Satanás xkimijlia kenon onkisaskej akin yauej ipan ojtli patlauak. Jehová xijkon kichiua, yejua kuajli mitsijlia ika tla tiauj ipan ojtli pitsauak tikpiyas se nemilistli tlen xkeman tlamis (Sal. 37:29; Is. 35:5, 6; 65:21-23).

8. ¿Tlenon kimititia telpokamej niman ichpokamej tlen okichiuj tokniuj Olaf?

⁸ Xnemili tlenon mitsmachtia tlen ipan onochiuj se tokniuj telpochtli akin itoka Olaf. * Akin imiuan nomachtiaya kijliayaj maauilnemi. Ijkuak yejua okimijli ika iteixpantijkauj Jehová katka niman ika nokojtiliaya kitlakamatis tlen kijtoua Biblia,  miyekej ichpokamej akin iuan nomachtiaya opeuj más kichiualtiaj imiuan maauilnemi. San ika, yejua nochipa onokojtili kichiuas tlen kuajli. Niman xsan yejon okixnamik, yejua kijtoua: “Nomaestros nexchiualtisnekiyaj maniuiya universidad, pampa kijtouayaj ika yejon nechpaleuiskia manechueyikaitakan niman manikpiya se kuajli tekitl”. ¿Tlenon okipaleui Olaf matlaxiko? Yejua kijtoua: “Kuajli onikintejtemo akin imiuan ninouikas ipan tlanechikojli. Yejuamej onochiujkej ken nofamilia. Noijki, opeuj más kuajli san noselti ninomachtia Biblia. Ijkuak más ninomachtiaya, más nikneltokaya ika yejuin religión tlen melauak niman nechpaleuiaya más manikneki maniyolmelaujkanemi itech Jehová”.

9. ¿Tlenon noneki tikchiuaskej tla nochipa tiknekij tinemiskej ipan ojtli pitsauak?

⁹ Satanás kineki matikisakan ipan ojtli tlen teuika ipan nemilistli niman kineki matiuiyan imiuan akin yauej ipan ojtli patlauak tlen teuika ipan tlapopolouilistli (Mat. 7:13, TNM). San ika, tla nochipa kuajli tijkakij tlen Jesús techijlia niman tikitaj ika ojtli tlen pitsauak techpaleuis, xkeman tiktlalkauiskej yejuin ojtli. Aman matikitakan tlenon más okijto Jesús ika noneki tikchiuaskej.

10. Itech tlen kijtoua Mateo 5:23, 24, ¿tlenon okijto Jesús ika noneki tikchiuaskej?

¹⁰ (Xpoua Mateo 5:23, 24). Ipan yejuin tlaxeloltin, Jesús kiteneujtoya itlaj tlen melak ueyi kijtosnekiya para akin judíos katkaj. Matikonnemilikan ika se judío nemi teopan niman sa achijtsin poliui para kimakas teopixki on yolki tlen kiuentlalis. Tla ijkuakon kilnamiki ika kipiya se tlauejli iuan yakaj, nonekiya ompa kikaujteuas iyolkauj niman kontejtemos akin iuan kipiya tlauejli. ¿Tleka? ¿Tlen xmás ueyi kijtosneki tikuentlalilis Jehová? Jesús kuajli okijto: “Achtopa iuan xmoyoltlaliti [mokniuj]”.

11. ¿Tlenon okichiuj Jacob niman ijkon noyolseuis iuan Esaú?

¹¹ Tla tomachtiaj itech tlen okichiuj Jacob, tikitaskej kenon uelis titetlapopoluiskej. Ijkuak Jacob kipiaya kanaj 20 xiuitl ika xok chantiya ichan, se iiluikaktekitkauj toTajtsin okijli manokuepa (Gén. 31:11, 13, 38). San ika, ikniuj Esaú, akin yenkuiyotl katka, kinekiya kimiktis (Gén. 27:41). Jacob “sanoyej onomojtij, niman opeu sanoyej notenmati”, pampa kinemiliaya ika ikniuj ok kitlauelitstoya (Gén. 32:7). ¿Tlenon okichiuj Jacob niman ijkon noyolseuis iuan ikniuj? Kachtopa, ika nochi iyojlo okichiuili se teoyotl Jehová. Ika ome, okontitlanili Esaú se ueyi tetlayokolijli (Gén. 32:9-15). Ika yeyi, ijkuak Jacob okitak Esaú, nimantsin okititi ika kitlakaita. Yejua chikometipan ixpan onotlakuantelkets. Ika yolyemanilistli niman tlakaitalistli, Jacob onoyolseui iuan ikniuj (Gén. 33:3, 4).

12. ¿Tlenon tiuelij itech Jacob?

¹² Melak techpaleuis tla tikitaj tlen okichiuj Jacob achto konnamikis ikniuj niman kenon okinots ijkuak okinamik. Kachtopa, ika yolyemanilistli okitlajtlanili Jehová makipaleui. Sakin, okichiuj tlen okitlajtlanili toTajtsin ipan iteoyouj niman onokojtili kichiuas nochi tlen noneki para xnokualaniskia iuan ikniuj Esaú ijkuak iuan nonextiskia. Niman, ijkuak okinamik, xopeuj iuan nokamauisoki. Yejua kinekiya noyolseuis iuan ikniuj. ¿Kenon uelis tikchiuaskej ijkon ken Jacob?

13, 14. ¿Tlenon noneki tikchiuaskej tla yotikyolkokojkej se tokniuj?

¹³ Tla tiknekij nochipa tiaskej ipan ojtli tlen teuika ipan nemilistli, noneki kuajli touikaskej imiuan tokniuan (Rom. 12:18). Kuakon, ¿tlenon noneki tikchiuaskej tla tikitaj ika yotikyolkokojkej se tokniuj? Ijkon ken Jacob, ika nochi toyojlo matikchiuilikan se teoyotl Jehová niman matiktlajtlanilikan matechpaleui kuajli matoyolseuikan iuan yejon tokniuj.

¹⁴ Noijki, noneki tikxeloskej tiempo niman ijkon tikitaskej tlen tejuamej tikchiujtokej. Kanaj uelis totlajtoltiskej: “¿Niknektika ninoyolyemanilis, niktlajtlanilis akin yonikyolkoko manechtlapopolui niman iuan ninoyolseuis? ¿Kenon nomachiliskej Jehová niman Jesús tla kitaj ika ninokojtilia ninoyolseuis iuan nokniuj?”. Ken tiknankiliskej yejuin, techpaleuis matiktenkakikan Jesús niman ika yolyemanilistli matoyolseuikan iuan tokniuj. Tlen okichiuj Jacob techpaleuis matoyolseuikan iuan tokniuj.

15. ¿Kenon techpaleuiya Efesios 4:2, 3 matoyolseuikan iuan se tokniuj?

¹⁵ ¿Tlenon panoskia tla Jacob xnoyolyemaniliskia ijkuak konitaskia ikniuj? Kanaj xueliskiaj noyolseuiskiaj. Noijki ijkon, ijkuak toyolseuiskej iuan se tokniuj, noneki toyolyemaniliskej (xpoua Efesios 4:2, 3). Proverbios 18:19 kijtoua: “Más ouijtikaj tikyoltlalis yakaj yejuan itlaj ika okikualanijkej, xken tikxoxotonis itepanchinanyo sen ueyikalpan”. Niman noijki kijtoua ika “on kualanilistli más kojtik” xken on tlen ika tsauktika se ueyi kalpan. Ijkuak ika yolyemanilistli tiktlajtlaniliaj matechtlapopolui akin yotikyolkokojkej, yejon techpaleuis iuan matoyolseuikan.

16. ¿Tlenon noneki kuajli tiknemiliskej, niman tleka?

¹⁶ Noijki, melak noneki kuajli tiknemiliskej tlenon niman kenon tikijliskej ijkuak iuan tonojnotsaskej. Niman ijkuak kuajli yotiknemilijkej nochi yejuin, matiknotsakan tokniuj niman iuan matoyolseuikan. Kanaj kachtopa yejua techijlis itlaj tlen techyolkokos. San ika, maka nimantsin matikualanikan niman maka matitetlajtlakoltikan pampa nochi yejon xtechpaleuis iuan matoyolseuikan. Matikilnamikikan ika más noneki toyolseuiskej iuan tokniuj xijkon ken tikteititiskej akinon onopopolo (1 Cor. 6:7).

17. ¿Tlenon mitsmachtia tlen okichiuj Gilbert?

 ¹⁷ Matikitakan tlenon okichiuj tokniuj Gilbert niman ijkon noyolseuis iuan se ichanejkauj. Yejua kijtoua: “Nikpiaya miyek tlauejli iuan nochpoch. Oniuejkauj ipantsin ome xiuitl nikyejyekojtinemi iuan ninoyolseuis niman oksejpa kuajli iuan ninouikas”. ¿Tlenon más okichiuj? “Achto iuan nitlajtos nikchiuaya teoyotl niman niknemiliaya tlenon nikchiuas tla nechijlia itlaj tlen nechyolkokos. Nikmatstoya ika nonekiya niktlapopoluis tla nechyolkokouaya. Oniuel ika xsan noneki notech nitlanemilis niman ika noneki ninoyolseuis imiuan oksekimej”. ¿Tlenon opanok? Gilbert kijtoua: “Aman ika noyojlo ninemi pampa kuajli ninouika imiuan nochimej nochanejkauan”.

18, 19. ¿Tlenon noneki tikchiuaskej tla yakaj yotikyolkokojkej, niman tleka?

¹⁸ Kuakon, ¿tlenon noneki tikchiuaskej tla tikitaj ika yotikyolkokojkej se tokniuj? Noneki iuan toyolseuiskej, ijkon ken Jesús otechijli. Matiknotsakan Jehová niman matiktlajtlanilikan iespíritu santo para matechpaleui matoyolseuikan iuan akin yotikyolkokojkej. Tla ijkon tikchiuaj, melak tiyolpakiskej niman tikteititiskej ika tiktenkakij Jesús (Mat. 5:9).

¹⁹ Melak tiktlasojkamatij pampa Jehová techyekana ika tlasojtlalistli itechkopa Jesucristo, akin “tlayekanki intech on yejuan kineltokaj” (Efes. 5:23). Ijkon ken apóstol Pedro, Santiago niman Juan nochipa matiknektokan tiktenkakiskej Jesús (Mat. 17:5). Yotikitakej ika tla tiknekij tiktenkakiskej, noneki toyolseuiskej imiuan akin yotikinyolkokojkej. Tla nochipa tinejnentiuej ipan ojtli tlen teuika ipan nemilistli, Jehová melak techteochiuas aman niman nochipa tiyolpakiskej.