1. ¿Tlenon okimijli apóstol Pedro tokniuan akin onenkej ipan kachtopa siglo, niman tleka kemantika ouijtika tikitaj tiktlakamatiskej?

TINOCHIMEJ, maski tla tiaskej iluikak noso tokauaskej nikan ipan tlaltikpaktli, melak techpaleuis tla tomachtiaj tlen apóstol Pedro okimijli tokniuan akin onenkej ipan kachtopa siglo. Yejua okimijli: “Xchipajtiakan de nochi tlen nenkichiuaskej ken Dios chipauak yejuan omechnots [...]. Dios kijtoua ipan on Yektlajkuilojli: ‘Nemejuamej xchipajtiakan pampa nejua nichipauak’” (1 Ped. 1:15, 16). ¿Tlenon techmachtia tlen okijto Pedro? Ika kema uelis tichipaujkanemiskej ijkon ken Jehová, akin sajnoye chipauak. Kuakon, maski titlajtlakolejkej, kema uelis niman noneki nochipa tichipaujkanemiskej. Apóstol Pedro miyekpa onopopolo, san ika, tlen okichiuj techititia ika tejuamej uelis tichipaujkanemiskej.

2. ¿Tlenon tiknankiliskej ipan yejuin tlamachtijli?

² Ipan yejuin tlamachtijli tiknankiliskej yejuin: ¿tlenon kijtosneki tichipaujkanemis?, ¿tlenon techmachtia Biblia itech ken Jehová chipauak?, ¿kenon uelis nochipa tichipaujkanemiskej? niman ¿kenon techpaleuiya más kuajli matouikakan iuan Jehová tla tichipaujkanemij?

3. ¿Tlenon kinemiliaj miyekej itech yakaj akin chipauak noso yektli, niman kanon uelis tiknextiskej tlen melauak?

³ Miyekej kinemiliaj ika yakaj akin chipauak noso yektli san nochipa yauj teopan, xkeman noyolpaktia niman nochipa  san najmantok. San ika, yejon xmelauak pampa Biblia kijtoua ika Jehová, akin chipauak, se toTajtsin akin nochipa paktika (1 Tim. 1:11, TNM). Noijki, kijtoua ika akin kiueyichiuaj yolpakij (Sal. 144:15). Niman Jesús okijto ika xkuajli tlen kichiujtoyaj akin tlakenueueyakej katkaj niman kichiuayaj tlen kuajli san para oksekimej makimitakan (Mat. 6:1; Mar. 12:38). Akin tiktekichiuiliaj toTajtsin, tikmatij tlenon kichiuaj akin chipaujkanemij ipampa tlen Biblia kijtoua. Niman tikmatstokej ika, toTajtsin akin chipauak niman tetlasojtlani, xkeman techtlajtlaniliskia matikchiuakan itlaj tlen xtiueliskej. Jehová techijlia matichipaujkej pampa yejua kimatstok ika uelis ijkon tikchiuaskej. Kuakon, tla tiknekij tichipaujkej yeskej, kachtopa noneki kuajli tikasikamatiskej tlenon kijtosneki tichipaujkanemis.

4. ¿Tlenon kijtosneki tlajtojli chipauak niman chipaujkanemi?

⁴ ¿Tlenon kijtosneki tichipaujkanemis? Ipan Biblia, ijkuak kitekitiltia tlajtojli chipauak noso chipaujkanemi tlajtotika itech itlaj noso yakaj akin xtsokuiltik, yakaj akin chipaujkanemi ipan nochi tlen kichiua niman itech ken kiueyichiua toTajtsin. Noijki uelis noijtos ika yakaj chipauak noso chipaujkanemi pampa yokitlapejpenijkej para kitekichiuilis toTajtsin. Kijtosneki ika uelis tichipaujkanemiskej tla tokojtiliaj tichipaujkej yeskej ipan nochi tonemilis, tla tikueyichiuaj Jehová ijkon ken yejua techtlajtlanilia niman tla kuajli iuan touikaj. Techmojkatlachialtia ika maski titlajtlakolejkej ueli touikaj iuan Jehová, akin melak chipauak.

5. ¿Tlenon kiteititia tlen okijtokej iángeles Jehová?

⁵ San Jehová akin más chipauak. Yejon tlen okijtokej sekimej serafines, ángeles akin nemij nisiuj kampa yeuatika Jehová. Okijtokej: “Yektli, yektli, yektli yejua toTEKO, yejuan nochi ueli kichiua” (Is. 6:3). Yejuin ángeles kuajli nouikaj iuan toTajtsin akin chipauak pampa yejuamej chipaujkej. Ika yejon, ijkuak se iángel Jehová uajlaya ipan tlaltikpaktli kampa yejkoya nokuepaya chipauak. Yejon tlen opanok ijkuak Moisés ononisiui itech se “tlakotepajsojli” tlen tlikuitikatka (Éx. 3:2-5; Jos. 5:15).

6, 7. a) Itech tlen kijtoua Éxodo 15:1, 11, ¿kenon okiteititi Moisés ika toTajtsin chipauak? b) ¿Tlenon kinpaleuiaya israelitas makilnamikikan ika Jehová chipauak? (Xkita tlaixkopinajli tlen onka ixpan yejuin revista).

⁶ Sakin ika israelitas yokipanauijkaj mar Rojo, Moisés okimijli ika inTajtsin Jehová chipauak (xpoua Éxodo 15:1, 11). Ken egipcios kinueyichiuayaj intajtsitsinuan nion achijtsin xchipauak katka. Noijki ijkon kichiuayaj akin kinueyichiuayaj tajtsitsintin tlen kintekitiltiayaj akin chantiyaj Canaán. Yejuamej kinuentlaliliayaj inkoneuan on tajtsitsintin niman imixpan auilnemiyaj (Lev. 18:3, 4, 21-24; Deut. 18:9, 10). San ika, Jehová xsan noijki ken on tajtsitsintin, pampa yejua xkeman techtlajtlanilis matikchiuakan itlaj tlen melak tsokuiltik. Jehová melak chipauak. Yejuin kuajli nesiya ipampa tlen kijtouaya se placa tlachijchiujtli ika oro tlen ueyi teopixki kipiaya ixkuatipan. Ompa kijtouaya: “Jehová chipauak” (Éx. 28:36, TNM; Éx. 28:37, 38).

⁷ Akin kitayaj yejon placa kuajli kasikamatiyaj ika Jehová sajnoye chipauak. ¿Kijtosneki ika tla se israelita xkitaya yejon placa pampa xueliya kinisiuiaya ueyi teopixki xkimatiya ika Jehová chipauak? Ka. Nochimej israelitas kimatiyaj ika Jehová chipauak pampa kinpouiliayaj tlanauatiltin nochimej tlakamej, siuamej niman kokonej (Deut. 31:9-12). Tla ompa tinemiskiaj, tikinkakiskiaj yejuin tlajtoltin: “Nejua ninemoTEKO Dios. Nemejuamej  noneki nenchipajkanemiskej nixpan, pampa nejua nemoDios niyektli” niman “xmochipauakan nixpan, pampa nejua nemoTEKO niyektli” (Lev. 11:44, 45; 20:7, 26).

8. ¿Tlenon techmachtia tlen kijtoua Levítico 19:2 niman 1 Pedro 1:14-16?

⁸ Nochimej israelitas kinpouiliayaj tlen kijtoua Levítico 19:2. Achijtsin matikitakan tlen ompa kijtoua. Jehová okijli Moisés: “Ijkin xkinmijli on israelitas: ‘Xmochipauakan nixpan, pampa nejua nemoDios niyektli’”. Kanaj apóstol Pedro kiteneujtoya yejuin tlaxelojli ijkuak okimijli tokniuan: “Nemejuamej xchipajtiakan” (xpoua 1 Pedro 1:14-16). Melauak ika xok toyekanaj ika tlanauatiltin tlen Jehová okinmakaka Moisés, san ika, tlen apóstol Pedro okijkuilo techpaleuiya más matikasikamatikan tlen kijtoua Levítico 19:2. Ompa techasikamachiltia ika Jehová chipauak niman ika akin kitlasojtlaj noneki nokojtiliskej chipaujkanemiskej. Yejuin itlaj tlen tinochimej noneki tikchiuaskej, maski tla tikchiaj tiaskej ne iluikak noso tichantiskej ipan se kualtsin xochitlalpan nikan ipan tlaltikpaktli (1 Ped. 1:4; 2 Ped. 3:13).

9. ¿Kenon techpaleuis tla tomachtiaj Levítico capítulo 19?

⁹ Pampa tiknekij tikyolpaktiskej toTajtsin, tiknekij tikmatiskej kenon uelis tichipaujkej yeskej ijkon ken yejua. Jehová techijlia kenon uelis tichipaujkanemiskej. Seki tlen techijlia uajlauj ipan Levítico capítulo 19. Se ixtlamatki itech hebreo akin itoka Marcus Kalisch, okijkuilo: “Yejuin capítulo tlen más ueyi kijtosneki itech nochi amoxtli Levítico niman itech nochi on kachtopa makuijli amoxtin tlen uajlauej ipan Biblia”. Matikimitakan seki itlaxeloluan capítulo 19 tlen uelis techpaleuiskej ipan tonemilis. Ijkuak tikimitstiaskej, matikilnamikikan ika ipeujyan yejuin capítulo kijtoua ika noneki tichipaujkej yeskej.

10, 11. ¿Tlenon technauatia Levítico 19:3, niman tleka melak noneki tiktlakamatiskej?

¹⁰ Sakin ika Jehová yokimijlika israelitas ika nonekiya chipaujkej yeskej, okimijli: “Cada se de nemejuamej ma kitlakaita inanaj niman itataj. [...] Nejua nemoTEKO Dios nikijtoua” (Lev. 19:2, 3).

 ¹¹ Kuajli nesi ika melak noneki matikintlakaitakan totajuan, ijkon ken kijtoua yejuin tlanauatijli. Matikilnamikikan ika sejpatipan, se telpochtli okitlajtolti Jesús: “¿Tlinon kuajli nikchiuas para nikselis on nemilistli yejuan para nochipa?”. Ijkuak Jesús okinankili, noijki okijli ika nonekiya kitlakaitas itaj niman inan (Mat. 19:16-19). Jesús hasta okinchikajkanots fariseos niman escribas pampa xkitlakamatiyaj yejuin tlanauatijli. Yejua ika, Jesús okimijli: “Nemejuamej yonenkuepkej ken xitlaj kijtosneki on itlanauatil Dios” (Mat. 15:3-6). Ijkuak Jesús okimijli ika yokikuepkaj “itlanauatil Dios”, kijtosneki ika xkitlakamatiyaj on ika makuijli tlanauatijli tlen Jehová okinmakaka israelitas. Tlen noijki uajlauj ipan Levítico 19:3 (Éx. 20:12). Maka matikilkauakan ika ipeujyan Levítico capítulo 19 kijtoua: “Xmochipauakan nixpan, pampa nejua nemoDios niyektli”. Niman sakin kijtoua ika noneki tikintlakaitaskej totajuan.

12. Itech tlen kijtoua Levítico 19:3, ¿tlenon noneki totlajtoltiskej?

¹² Matotlajtoltikan: “¿Nikintlakaita notajuan ijkon ken kijtoua Levítico 19:3?”. Tla tikitaj ika techpoloua más tikimititiskej ika tikintlakaitaj, matipeuakan matikchiuakan. Yemelak ika xuelis tikyektlaliskej tlen xkuajli yotikuajchiujtiajkej, san ika, aman uelis tipeuaskej más tikintlakaitaskej niman tikinpaleuiskej totajuan. Kanaj uelis tikxeloskej más tiempo niman ijkon imiuan tinemiskej. ¿Uelis tikinpaleuiskej más makichikauakan intlaneltok, tikinmakaskej tlen kinpoloua niman tikinyolchikauaskej? Tla ijkon tikchiuaj, tiktlakamatstoskej tlen Jehová otechnauati ipan Levítico 19:3.

13. a) ¿Tlenon más technauatia Levítico 19:3? b) Itech tlen kijtoua Lucas 4:16-18, ¿kenon uelis tikchiuaskej ijkon ken Jesús?

¹³ San ika, xsan yejon tlen techmachtia Levítico 19:3. Ompa, Jehová noijki okimijli israelitas ika noijki nonekiya kitlakaitaskej tonajli sábado. Pampa tejuamej xok toyekanaj ika tlanauatiltin tlen okinmakakaj israelitas, xtoseuiyaj ipan tonajli sábado ijkon ken israelitas kichiuayaj. San ika, miyek tlen uelis tomachtiskej itech tlen kichiuayaj israelitas ipan yejon tonajli niman kenon toTajtsin kinteochiuaya pampa kitlakamatiyaj. Yejuamej xitlaj nonekiya kichiuaskej ipan yejon tonajli, san nonekiya kiueyichiuaskej Jehová. * Yejua ika, ipan yejon tonajli, Jesús yaya sinagoga niman kipouaya iTlajtol toTajtsin (Éx. 31:12-15; xpoua Lucas 4:16-18). Ijkuak Levítico 19:3 kijtoua ika noneki notlakaitas tonajli sábado, noneki techyolchikauas matikxelokan tiempo niman ijkon tikchikauaskej totlaneltok niman tikueyichiuaskej Jehová. ¿Tikitaj ika noneki más tokojtiliskej tiktlakamatiskej yejuin tlanauatijli? Tla tikxelouaj tiempo niman ijkon más tikchikauaskej totlaneltok, más kuajli touikaskej iuan Jehová. Yejuin itlaj tlen melak noneki para tichipaujkej yeskej.

14. ¿Tlenon noijtoua ipan nochi Levítico capítulo 19?

¹⁴ Ipan Levítico capítulo 19, miyekpa noteneua itlaj tlen techpaleuis matichipaujkanemikan. Itlamiyan tlaxelojli 4 kijtoua: “Nejua nemoTEKO Dios”. Yejuin tlajtoltin uajnestiuej 16 veces ipan yejuin capítulo. Yejuin techilnamiktia on kachtopa tlanauatijli tlen okinmakakej israelitas, kampa kijtoua: “Nejua nimoTEKO Dios [...]. Maka tikimpiyas oksekimej dioses, aparte de nejua” (Éx. 20:2, 3). Nochimej akin kinekij chipaujkanemiskej noneki kitaskej ika xakaj nion xitlaj noneki  kintsakuilis para san toTajtsin kitekichiuiliskej. Pampa techixmatij ken iteixpantijkauan Jehová, xtiknekij tikchiuaskej itlaj tlen makitsokuiloti itoka, tlen melak chipauak (Lev. 19:12; Is. 57:15).

15. ¿Tlenon techyolchikaua matikchiuakan Levítico 19:5-8, 21 niman 22?

¹⁵ Ijkuak israelitas kitlakamatiyaj tlen Jehová yokinnauatijka, kiteititiayaj ika kiseliayaj ken inTajtsin. Levítico 18:4 kijtoua: “Ika onkaj nenkitlakamatiskej nochi yejuan nejua noleyes, niman nenkitlakamatiskej nochi tlen kijtoua notlanauatiluan, pampa nejua nemoTEKO Dios nikijtoua”. Ipan capítulo 19 uajlauej seki itech yejuin tlanauatiltin tlen toTajtsin okimijli israelitas. Ipan Levítico 19:5-8, 21 niman 22 kijtoua kenon nonekiya kinuentlaliskej yolkamej. Ijkuak yejuamej tlauentlaliskiaj, nonekiya kitaskiaj maka makitsokuiloti nochi tlen iyaxka Jehová. Yejuin tlaxeloltin noneki techyolchikauaskej para tikueyichiuaskej Jehová ijkon ken yejua kuelita, ken kijtoua Hebreos 13:15.

16. ¿Tlenon techilnamiktia Levítico 19:19?

¹⁶ Tla tiknekij tichipaujkanemiskej, xnoneki tiyeskej ken akin xkitekichiuiliaj toTajtsin. Yejuin ouijtika, pampa kemantika akin imiuan tiauej escuela, akin imiuan titekitij noso tochanejkauan akin xnomachtiaj Biblia uelis texchiualtiskej matikchiuakan itlaj tlen kiyolkokos Jehová. Ijkuak yejuamej ijkon texchiuiliskej, melak nonekis kuajli matiktlapejpenikan tlenon tikchiuaskej. ¿Tlenon techpaleuis matiktlapejpenikan tlen kuajli? Matikitakan tlen kijtoua Levítico 19:19, kampa kijtoua: “Maka xtlalikan tlakentli yejuan tlachijchijtli ikan sesentlamantikej telas”. Yejuin tlanauatijli kichiuaya ika israelitas makiteititikan ika xsan noijki katkaj ken oksekimej kalpamej. Ipan yejuin tonaltin, xtlajtlakojli tla totlakentiaj “ikan sesentlamantikej telas” ken manta, mezclilla noso okse tlakentli. San ika, kema tlajtlakojli yeskia tla tikchiuaj ken akin xkitekichiuiliaj toTajtsin, maski tla imiuan tiauej escuela, titekitij noso tochanejkauan. Tejuamej tikintlasojtlaj tochanejkauan niman akin tikimixmatij. San ika, ijkuak noneki tiktlapejpeniskej itlaj tlen ueyi kijtosneki, noneki tikteititiskej ika iteixpantijkauan Jehová tlamantikej. Matikilnamikikan ika, tla tiknekij tichipaujkanemiskej, san Jehová noneki tikyolpaktiskej (2 Cor. 6:14-16; 1 Ped. 4:3, 4).

17, 18. ¿Tlenon techmachtia Levítico 19:23-25?

¹⁷ Ijkuak israelitas okikakkej: “Nejua nemoTEKO Dios”, okinpaleui makasikamatikan ika san Jehová kachtopa nonekiya kiyolpaktiskej. Yejuamej ueliskia ijkon kichiuaskiaj tla kitlakamatiyaj tlen kijtoua Levítico 19:23- 25 (xpoua). Matikonnemilikan kenon israelitas okichiujkej yejuin ijkuak inemiyaj ipan tlajli tlen toTajtsin yokimijlika kinmakas. Tla yakaj kitokaya se kojtlakilyotl, ipan yeyi xiuitl xnonekiya kikuas itlakilyo. Tlen tlakiya ipan ika naui xiuitl kiuentlaliliayaj Jehová. Hasta ipan ika makuijli xiuitl ueliskia kikuaskej itlakilyo yejon kojtlakilyotl. Yejuin tlanauatijli okinpaleui makasikamatikan israelitas ika xnonekiya yejuamej kachtopa noyolpaktiskej. Nonekiya kineltokaskej ika Jehová kinmakaskia tlen kinpolouaya niman ika yejua kachtopa nonekiya kitekichiuiliskej. ToTajtsin kichiuaskia maka makinpolo tlen kikuaskiaj. Noijki, okimijli ika ijkuak itlaj kiuentlaliliskiaj, nonekiya kichiuaskej ika nochi inyojlo.

¹⁸ Tlen kijtoua Levítico 19:23-25 techilnamiktia tlen Jesús okijto ipan tlamachtijli ipan tepetl, ompa okijto: “Maka xkomatstiakan on tlen nenkikuaskej niman on tlen nenkoniskej”. Niman sakin okijto: “NemoTajtsin iluikak chanej kimatstikaj ika nochi in mechpoloua”. Jehová techmakas nochi tlen techpoloua, ijkon ken kichiua iuan totomej (Mat. 6:25, 26, 32). Kuajli tikneltokaj ika Jehová techtlajpiyas. Noijki, ika toyojlo tikinpaleuiyaj akin kinpoloua niman tiktemakaj totomintsin ipan tlanechikojli. Jehová kita nochi tlen tikchiuaj niman yejua techteochiuas (Mat. 6:2-4). Tla ika nochi toyojlo tiktemakaj tlen tikpiyaj, tikteititiskej ika kuajli yotikasikamatkej tlen techmachtia Levítico 19:23-25.

19. ¿Kenon yomitspaleui tlen yotomachtijkej itech Levítico?

¹⁹ Ipan yejuin tlamachtijli yotikitakej ika Levítico capítulo 19 techmachtia miyek tlemach tlen techpaleuiya matichipaujkej ijkon ken Jehová. Ijkuak tikchiuaj ken Jehová, tikteititiaj ika tokojtiliaj tichipaujkej yeskej itech nochi tlen tikchiuaj (1 Ped. 1:15). Miyekej akin xkitekichiuiliaj Jehová, kitaj nochi tlen kuajli tikchiuaj. Niman sekimej hasta kiueyiteneuaj Jehová (1 Ped. 2:12). San ika, xsan yejon tlen techmachtia Levítico capítulo 19. Ipan okse tlamachtijli tikimitaskej okseki tlaxeloltin itech yejuin capítulo tlen noijki techpaleuiskej matikitakan kanon más uelis tichipaujkej yeskej, ijkon ken okijto apóstol Pedro.