1. ¿Tlenon uelis kichiuas Jehová niman ijkon kinnankilis iteoyouan itekipanojkauan?

 ¿TIKMATSTOK tlenon uelis kichiuas Jehová niman ijkon kinankilis iteoyouj se tokniuj? Yejua uelis kichiuas ika tejua xpaleui yejuin tokniuj. Maski tla titlayekanketl, titlapaleuijketl, tiprecursor, titenojnotsketl, titelpochtli noso tla itiueyi, noso tla titlakatl noso tisiuatl, yejua uelis kichiuas ika tejua xkinpaleui tokniuan. Ijkuak se tokniuj akin kitlasojtla Jehová kitlajtlanilia makipaleui, toTajtsin miyekpa kichiua ika tokniuan tlayekankej noso oksekimej tokniuan makiyoltlalikan yejuin tokniuj (Col. 4:11). Melak techyolpaktia tikpaleuiskej Jehová niman noijki tikinpaleuiskej tokniuan. Niman uelis ijkon tikchiuaskej ijkuak onias se ueyi kokolistli, ijkuak itlaj san totoka panos noso ijkuak techtlaueltokaskej.

2. ¿Tleka ouijtika tikitaj tikinpaleuiskej tokniuan ijkuak onka se ueyi kokolistli?

² Ijkuak uajnesi se ueyi kokolistli, kanaj más ouijtika tikitaj tikinpaleuiskej oksekimej. Kanaj tikuelitaskiaj tikomintlajpaloskej tokniuan, san ika, xtiuelij pampa tla tikisaj, noijki ueliskia tikualoskej. Noso kanaj tikuelitaskiaj ika tokniuan akin xmás kipiyaj tomintsin matlakuatij tochan, san ika, xueli tikinnotsaj pampa xueli tosentlaliaj. Kanaj tikuelitaskiaj titepaleuiskej, san ika, tochanejkauan noijki noneki yakaj makinpaleui pampa noijki tlajyouijtokej. Maski ijkon, tiknekij tikinpaleuiskej tokniuan, niman Jehová kiyolpaktia ijkuak kita ika tikchiuaj nochi tlen tiuelij (Prov. 3:27; 19:17). Kuakon, ¿tlenon uelis tikchiuaskej?

3. ¿Tlenon techmachtia tlen okichiujkej tlayekankej akin nemij ipan itlanechikol Desi? (Jeremías 23:4).

³ Tlen uelis kichiuaskej tokniuan tlayekankej. Tla tejua titlayekanketl, kuajli xkimixmati tokniuan akin nemij ipan motlanechikol (xpoua Jeremías 23:4). Desi, akin otikteneujkej ipan tlamachtijli tlen youajpanok, kijtoua: “Tokniuan tlayekankej miyekpa yotenojnotskaj nouan niman imiuan oksekimej  tokniuan, niman kemantika itlaj kichiuayaj niman ijkon touan noyolpaktiskej”. b Pampa tlayekankej ijkon okichiujkej, xouijtika okitakej kipaleuiskej Desi ijkuak opeuj pandemia niman ijkuak omijkej sekimej ichanejkauan ipampa COVID-19.

4. ¿Tleka tlayekankej ouelkej okipaleuijkej Desi, niman tlenon kinmachtia tlayekankej?

⁴ Desi kijtoua: “Tlayekankej inoamigos katkaj, ika yejon, xouijtika onikitak nikimijlis tlen nikmachiliaya niman tlen nechajmanaya”. ¿Tlenon kinmachtia tlayekankej? Ika noneki kuajli kintlajpiyaskej tokniuan niman kuajli imiuan nouikaskej achto itlaj panos. Tla kemantika uajnesi se kokolistli niman xuelis tikomintlajpalos tokniuan, xkita kenon uelis imiuan timonojnotsas. Desi techijlia: “Kemantika, sekimej tlayekankej nechuajnotsayaj noso nechinuajtitlaniliayaj mensajes san ipan se tonajli. Tlaxeloltin tlen nechimilnamiktiayaj ajsiyaj ipan noyojlo maski nejua inikimixmatiya yejon tlaxeloltin”.

5. ¿Kenon tokniuan tlayekankej ueliskej kimatiskej tlen kinpoloua tokniuan, niman kenon uelis kinpaleuiskej?

⁵ Tlayekankej uelis kimatiskej tlenon kinpoloua tokniuan tla kintlajtoltiaj, san ika, noneki notlajpiyaskej maka itlaj kintlajtoltiskej tlen ueliskia kichiuas mapinauikan (Prov. 20:5). Ueliskia notlajtoltiskej: “¿Tokniuan kipiyaj tlen kikuaskej noso tlen ika nopajtiskej, noso okseki tlen noneki? ¿Ueliskia kinkixtiskej kampa chantij noso kampa tekitij? ¿Kanaj nonekis matikinpaleuikan makichiuakan tlen tekiuaj kintlajtlanilia niman ijkon uelis kinpaleuis?”. Sekimej tokniuan okipaleuijkej Desi pampa okimakakej tlen kipolouaya. San ika, yejua kijtoua ika más okipaleui ijkuak tokniuan tlayekankej okiyolchikaujkej ika Biblia niman ijkuak okititijkej ika kitlasojtlaj. Yejua kijtoua: “Tlayekankej nouan kichiuayaj teoyotl. Xnikilnamiki tlenon kijtouayaj, san ika, kema nikilnamiki kenon ninomachiliaya. Nikmachiliaya kentla Jehová nechijlitoskia: ‘Xsan moselti tinemiʼ” (Is. 41:10, 13).

6. ¿Kenon ueliskia topaleuiskej imiuan tokniuan ipan totlanechikol? (Xkita tlaixkopinajli).

⁶ Tlen nochimej tokniuan uelis kichiuaskej. Tikmatstokej ika ijkuak tokniuan itlaj kixnamikij, tokniuan tlayekankej nimantsin kinpaleuiyaj. San ika, Jehová tinochimej techtlajtlanilia matikinyolchikauakan tokniuan niman matikinpaleuikan (Gál. 6:10). Ijkuak se tokniuj akin kualo kita ika tiknekij tikyolchikauaskej niman tikpaleuiskej, yejua melak kitlasojkamati. Kokonej ueliskia itlaj kijkuilouiliskej se tokniuj ipan se amatsintli noso kichijchiuiliskej se dibujito niman  ijkon kiyolchikauaskej. Telpokamej ueliskia kontlakouiliskej se tokniuj siuatl, noso kipaleuiskej ika itlaj okse. Oksekimej tokniuan ueliskiaj kitlakualchijchiuiliskej se tokniuj akin kualo niman konkauiliskej ichan. Tikmatstokej ika ijkuak onka se ueyi kokolistli, tinochimej noneki matechyolchikauakan. Ika yejon, kuajli yeskia tla xnimantsin tiualeuaj ijkuak tiauej ipan totlanechikoluan niman ijkon uelis tonojnotsaskej imiuan tokniuan. Noso tla tikinpiyaj totlanechikoluan ipan internet, maka nimantsin matikisakan. Niman tlayekankej noijki noneki makinyolchikauakan. Yejuamej kipiyaj miyek tekitl, niman más ijkuak uajnesi se ueyi kokolistli, ika yejon, sekimej tokniuan kinchijchiuiliaj se amatsintli kampa kimijliaj ika melak kitlasojkamatij tlen kichiuaj. Melak kuajli tla tikchiuaj tlen kijtoua yejuin tlaxelojli: “Xmoyoleuakan iuan cada se, niman xmoyolchikauakan ikan tlaneltoktli iuan oksekimej ijki ken nenkichiuaj” (1 Tes. 5:11).

7. ¿Tlenon ueliskia topan nochiuas ijkuak san totoka itlaj panoua?

⁷ Ijkuak itlaj san totoka panoua, uelis nochi nopatlas. Kanaj yakaj ueliskia kipolos tlen kipiya, ikal noso ueliskia nomijkatis. Niman tla se tokniuj ijkon ipan nochiua, ¿kenon uelis tikpaleuiskej?

8. ¿Tlenon noneki kichiuaskej tlayekankej niman tajtin achto itlaj panos?

⁸ Tlen uelis kichiuaskej tokniuan tlayekankej. Tlayekankej, xkinpaleuikan tokniuan makimatikan tlenon kichiuaskej ijkuak san totoka itlaj panos. Kuajli xkitakan ika nochimej tokniuan akin nemij ipan nemotlanechikol makimatstokan tlenon noneki kichiuaskej niman ijkon uelis makisaskej. Niman noijki xkitakan ika nochimej makipiyakan nemonúmero de teléfono. Margaret, akin otikteneujkej ipan tlamachtijli tlen youajpanok, kijtoua: “Ipan tlamachtijli Tlen noneki ipan tlanechikojli, tlayekankej otechilnamiktijkej ika kampa tichantiyaj ok ueliskia tlachichinauis niman ika tla tekiuajkej techijliayaj ika nonekiya tikisaskej noso tla tikitayaj ika yopeujka más tlachichinaui, nonekiya nimantsin tikisaskej”. Melak kuajli ika tokniuan okipanoltijkej yejon tlamachtijli, pampa sa opanok makuijli semana niman opeuj tlachichinaui kampa chantiyaj tokniuan. Tajtin, ijkuak nenkiueyichiuaskej toTajtsin imiuan nemochanejkauan, xtlajtokan itech tlenon uelis nenkichiuaskej ijkuak san totoka itlaj panos. Tla nemejuamej niman nemokoneuan nenkimatstokej tlenon nenkichiuaskej, xok más nemojkamikiskej ijkuak itlaj panos.

9. ¿Tlenon noneki kichiuaskej tokniuan tlayekankej achto itlaj panos niman sakin tla yopanok?

⁹ Tla tejua titlayekanketl ipan mogrupo, achto itlaj panos xkimijli tokniuan mamitsijlikan kanon chantij niman xkintlajtlanili innúmero de teléfono. Xchijchiua se lista, niman tla se tokniuj nochanpatla noso kipatla inúmero de teléfono, xkijli oksejpa mamitsmaka. Tla ijkon tikchiua, ijkuak itlaj panos uelis tikominotsas tokniuan niman tikitas tla itlaj kinpoloua. Xkonijli tokniuj akin kixeloua tekitl itech tlayekankej kenon nemij tokniuan akin nemij ipan mogrupo, niman yejua konijlis tlayekanketl ipan circuito. Tla ijkon nemopaleuiyaj, más kuajli nenkinpaleuiskej tokniuan. Ijkuak otlachichinauj kampa chantiya Margaret niman oksekimej tokniuan, tokniuj tlayekanketl ipan circuito xokoch 36 horas pampa kitstoya ika tokniuan tlayekankej makominnotsakan niman makinpaleuikan 450 tokniuan akin oksekan onopaleuitoj (2 Cor. 11:27). Pampa ijkin okichiujkej, nochimej tokniuan akin xkipiayaj kanon kochiskej okiminextilijkej kampa ueliskiaj nokauaskej.

10. ¿Tleka melak noneki ika tlayekankej makintlajpiyakan tokniuan? (Juan 21:15).

¹⁰ Tlayekankej noneki kinyolchikauaskej tokniuan ika Biblia niman noijki noneki kinyolseuiskej tokniuan akin melak noyolajmanaj (1 Ped. 5:2). Ijkuak itlaj panos, tlayekankej noneki kitaskej tla tokniuan nemij kampa uelis makisaskej, tla kipiyaj  kampa kochiskej niman tla kipiyaj tlen kikuaskej niman tlen ika notlakentiskej. Ijkuak yakaj ipan nochiua tlen xkuajli, xnimantsin kilkaua, ika yejon, maski yopanokej seki metstin, tlayekankej ok noneki kinyolchikauaskej ika Biblia niman kinyolseuiskej tokniuan akin otlajyouijkej (xpoua Juan 21:15). Harold, akin nemi ipan Grupo akin Tlayekana ipan se Sucursal niman miyekpa yotlajtoka imiuan miyekej akin yokixnamijkaj tlen xkuajli, techijlia: “Tokniuan uejkauij ika noyolkokojtinemij. Maski peuaj kichiuaj tlen kichiuayaj, kemantika oksejpa kilnamikij inchanejkauj akin omik, kilnamikij ika okipolojkej itlaj tlen melak kipatiojkaitayaj noso kilnamikij kenon melak xkuajli tlen inpan opanok. Ijkuak tokniuan peuaj kilnamikij yejuin, oksejpa peuaj noyolkokouaj. Nochimej akin kixnamikij tlen ouijtika uelis ijkon nomachiliskej, san ika, yejon xkijtosneki tla xchikauak intlaneltok”.

11. ¿Kenon tlayekankej uelis kinpaleuiskej familias?

¹¹ Melak noneki ika tlayekankej makichiuakan tlen kijtoua yejuin tlaxelojli: “Xchokakan inuan on yejuan chokaj” (Rom. 12:15). Tokniuan akin yokixnamijkej tlen xkuajli melak noneki makimilnamiktikan ika Jehová niman tokniuan melak kintlasojtlaj. Tlayekankej uelis kinpaleuiskej familias ok makitekichiuilikan Jehová, makichiuakan teoyotl, manomachtikan, mayakan tlanechikoltin niman matenojnotsatij; pampa tla ijkon kichiuaj, chikaujtos intlaneltok. Noijki uelis kimijliskej tajtin makimijlikan inkoneuan ika maski kemantika tlaixpoliui, toTajtsin xkeman kinkauas. Tajtin, xkimilnamiktikan nemokoneuan ika Jehová nochipa imiuan nouikas niman ika nochipa imiuan nemis. Xkimijlikan ika nochimej tokniuan tlakamej niman siuamej akin nemij ipan nochi tlaltikpaktli, nochipa kinektoskej kinpaleuiskej (1 Ped. 2:17).

12. ¿Tlenon uelis kichiuaskej tokniuan ipan tlanechikojli para tlapaleuiskej kampa tlaixpoliui? (Xkita tlaixkopinajli).

¹² Tlen nochimej tokniuan uelis kichiuaskej. Tla kampa nisiuj tichanti itlaj panoua, xkintlajtolti tlayekankej kenon uelis titepaleuis. Kanaj ueliskia tikinseuis tokniuan akin xok kipiyaj inchan noso tokniuan akin tlapaleuiyaj kampa tlaixpoliui. Noso kanaj noijki ueliskia tikominkauilis tokniuan tlen kikuaskej noso okseki tlen kinpoloua. Niman tla uejka nokaua kampa tlaixpoliui, noijki ueliskia titepaleuis. ¿Kenon? Tla tikchiua teoyotl inpampa tokniuan niman tla tiktemaka motomintsin niman ijkon tokniuan makinpaleuikan (2 Cor. 1:8-11; 8:2-5). Niman tla tiuelis tias kampa tlaixpoliui, xkintlajtolti tlayekankej kenon uelis titepaleuis. Tla mitsnotsaj,  mitsmachtiskej para más kuajli titepaleuis ijkuak nonekis niman kampa nonekis.

13. ¿Tlenon kixnamikij tokniuan akin chantij kampa kintlaueltokaj?

¹³ Tokniuan akin kintlaueltokaj más ouijtika tlen kixnamikij. Akin chantij ipan se país kampa tekiuajkej xkinkauiliaj makiueyichiuakan toTajtsin noijki kipiyaj tlauejli. Kemantika xmás kipiyaj tomintsin, kualoj noso kemantika nomijkatiaj. Niman pampa kintlaueltokaj, tlayekankej xmás uelij kominitaj tokniuan akin itlaj kixnamiktokej niman ijkon kominyolchikauaskej. Yejon tlen ipan opanok tokniuj Andréi, akin otikteneujkej ipan tlamachtijli tlen youajpanok. Se tokniuj siuatl akin nemi ipan igrupo xmás kipiaya tomintsin niman sakin okipix se accidente ipan carretera. Okichiuilijkej miyek operaciones niman xueliya tekitiya. Maski kintlaueltokatoyaj tokniuan niman maski onkatka kokolistli, tokniuan okipaleuijkej yejuin tokniuj siuatl hasta kampa ouelkej, niman Jehová noijki kitstoya tlen panotoya.

14. ¿Kenon kiteititiaj tlayekankej ika tlaneltokaj itech Jehová?

¹⁴ Tlen uelis kichiuaskej tokniuan tlayekankej. Andréi okichiuili teoyotl Jehová niman okichiuj nochi tlen ouel. ¿Niman kenon okinankili Jehová? Yejua okichiuj ika oksekimej tokniuan akin más ueliyaj kisayaj makipaleuitij tokniuj siuatl. Sekimej kuikayaj yejuin tokniuj kampa tlapajtijketl niman oksekimej kimakayaj tomintsin. Jehová okinteochiuj yejuin tokniuan pampa san sekan onopaleuijkej niman okiteititijkej ika yolchikaujkej (Heb. 13:16). Tlayekankej, ijkuak tekiuajkej xok techkauiliskej matikueyichiuakan Jehová, xkimijlikan oksekimej tokniuan mamechpaleuikan (Jer. 36:5, 6). San ika, más noneki xmopaleuikan itech Jehová. Yejua mechpaleuis para xkinpaleuikan tokniuan akin tlajyouiyaj.

15. ¿Tlenon noneki tikchiuaskej tla tiknekij kuajli touikaskej imiuan tokniuan ijkuak techtlaueltokaskej?

¹⁵ Tlen nochimej tokniuan uelis kichiuaskej. Ijkuak techtlaueltokaskej, kanaj san uelis tosentlaliskej por grupos. Ika yejon, melak noneki kuajli matouikakan imiuan tokniuan. Matikixnamikikan Satanás, niman maka matikimixnamikikan tokniuan. Matikintlapopoluikan tokniuan, niman tla tikpiyaj se tlauejli iuan se tokniuj, nimantsin iuan matoyolseuikan (Prov. 19:11; Efes. 4:26). Nochipa xkitsto kenon uelis tikinpaleuis tokniuan (Tito 3:14). Tokniuan akin nemij ipan igrupo Andréi más kuajli opeuj nouikaj pampa san sekan okipaleuijkej tokniuj siuatl akin tlajyouijtoya. Yejuamej melak notlasojtlaj ken ikniujtin (Sal. 133:1).

16. Ijkon ken kijtoua Colosenses 4:3, 18, ¿kenon uelis tikinpaleuiskej tokniuan akin kintlaueltokaj?

 ¹⁶ Melak miyekej tokniuan kitekichiuiliaj Jehová maski tekiuajkej xkinkauiliaj. Sekimej tokniuan yokintsajkej. Matiktlajtlanilikan Jehová makinpaleui yejuin tokniuan niman noijki makinpaleui inchanejkauan. Noijki matikchiuakan teoyotl inpampa tokniuan akin kinpaleuiyaj tokniuan akin tsauktokej maski yejuamej noijki ueliskia kintsakuaskej. Yejuamej kinyolchikauaj nochipa matlaneltokakan itech Jehová, kinmakaj tlen kinpoloua niman kominpaleuiyaj ipan tribunales (xpoua Colosenses 4:3, 18). c Nochipa matikilnamiktokan ika uelis tikinpaleuiskej tokniuan akin kintlaueltokaj tla tikchiuaj teoyotl inpampa (2 Tes. 3:1, 2; 1 Tim. 2:1, 2).

17. ¿Tlenon uelis tikchiuaskej niman ijkon titlaxikoskej ijkuak techtlaueltokaskej?

¹⁷ ¿Tlenon uelis nenkichiuaskej tejua niman mochanejkauan niman ijkon uelis nentlaxikoskej ijkuak mechtlaueltokaskej? (Hech. 14:22). Maka xnemilikan tlen xkuajli ueliskia panos, yej más xmouikakan iuan Jehová niman xkinpaleuikan nemokoneuan noijki ijkon makichiuakan. Tla kemantika nenajmankamikij, xkijlikan Jehová kenon nemomachiliaj (Sal. 62:7, 8). Xtlajtokan imiuan nemokoneuan itech tleka nentlaneltokaj itech Jehová. d Melak kuajli tla nenkimijliaj nemokoneuan tlenon uelis kichiuaskej ijkuak itlaj san totoka panos. San ika, noijki melak kuajli yeskia tla noijki nenkimijliaj nemokoneuan tlenon uelis kichiuaskej niman ijkon tlaxikoskej ijkuak mechtlaueltokaskej, niman noijki xkinmachtikan matlaneltokakan itech Jehová. Tla ijkon nenkichiuaj, yejuamej yolchikaujkej yeskej niman xsajnoye nomojtiskej ijkuak mechtlaueltokaskej.

18. ¿Kenon tinemiskej ika tlayekapan?

¹⁸ Ijkuak toTajtsin techmaka iyolseuilis, xmás tomojtiaj ijkuak itlaj tikixnamikij (Filip. 4:6, 7). Ika yejuin yolseuilistli, Jehová techyolseuiya ijkuak onka se ueyi kokolistli, ijkuak itlaj san totoka panoua noso ijkuak techtlaueltokaj. Jehová kichiua ika tlayekankej makintlajpiyakan tokniuan, niman noijki kinkauilia nochimej tokniuan ipan tlanechikojli manopaleuikan. Yolseuilistli tlen aman tikpiyaj techpaleuis matikxikokan tlen tikixnamikiskej ika tlayekapan niman ueyi tlajyouilistli. Ipan ueyi tlajyouilistli, melak nonekis matiyolseujtokan niman noijki nonekis tikinpaleuiskej oksekimej noijki ijkon makichiuakan. San ika, tla yopanok ueyi tlajyouilistli, xok tinemiskej ijkon ken aman tinemij pampa xok onias tlen melak techajmankamiktia. Aman kema nochipa tiyolseujtoskej ijkon ken Jehová nochipa okinek (Is. 26:3, 4).