1. ¿Tlenon okijli Jesús se tlakatl akin iuan pilkatoya? (Lucas 23:43, TNM; Lucas 23:39-42).

 JESÚS niman on xkuajkualtin tlakamej akin iuan pilkatoyaj, imiktoyaj (Luc. 23:32, 33). Yejuin omemej tlakamej kipijpinaujtijtoyaj Jesús, ika yejon, uelis tikijtoskej ika yejuamej xinomachtijkauan katkaj (Mat. 27:44; Mar. 15:32). San ika, se tlakatl xok ijkon okichiuj, niman okijli Jesús: “Jesús, xnechelnamiki ijkuak peuas titlamandaros ken Rey”. Niman Jesús okinankili: “Melauak nimitsijlia ipan yejuin tonajli: Nouan tinemis ipan Xochitlalpan” (Luc. 23:43, TNM; xpoua Lucas 23:39-42). Kanaj yejuin tlakatl yokikakka ika iTekiuajyo toTajtsin tekiuajtiskia ne iluikak, maski ijkon, yejua xonochiujka inomachtijkauj Cristo. Niman Jesús xkeman okijto ika tekiuajtiskia iuan yejuin tlakatl (Mat. 4:17). Jesús tlajtotoya itech Xochitlalpan tlen oniaskia nikan ipan tlaltikpaktli. ¿Kenon tikmatij?

2. ¿Tlenon techititia ika yejuin xkuajli tlakatl akin onoyolkuep judío katka?

² Kanaj yejuin xkuajli tlakatl akin onoyolkuep judío katka. Yejuin tlakatl ijkin okitlajtolti on okse xkuajli tlakatl akin noijki ompa pilkatoya: “¿Xtikmakajsi Dios, maski sano yejua castigo tikijyouiya?” (Luc. 23:40). Judíos kiueyichiuayaj san se toTajtsin, san ika, akin xjudíos katkaj tlaneltokayaj itech miyekej tajtsitsintin (Éx. 20:2, 3; 1 Cor. 8:5, 6). Tla yejuin xkuajkualtin tlakamej xjudíos yeskiaj, yejuin tlakatl ijkin tetlajtoltiskia: “¿Xtikinmakasi dioses?”. Noijki, matikilnamikikan ika Jesús xmás kinnojnotsaya akin xjudíos katkaj pampa yejua okuajtitlankej para makinpaleuiki judíos “yejuan ixpolijtokej” niman xokuajtitlankej para makinpaleuiki akin xjudíos katkaj (Mat. 15:24). Niman toTajtsin yokimijlika israelitas ika yejua kinyolitiskia akin yomijkej. Kanaj yejuin tlakatl akin yonoyolkuepka kimatstoya yejuin, ika yejon, okijli Jesús makilnamiki ijkuak tekiuajtiskia pampa kimatstoya ika Jehová kiyolitiskia Jesús niman ijkon matekiuajti ipan iTekiuajyo  toTajtsin. Yejuin tlakatl noijki kimatstoya ika toTajtsin ueliskia kiyolitis.

3. ¿Kanaj tlenon okinemili on xkuajli tlakatl akin onoyolkuep ijkuak Jesús okiteneuili se xochitlalpan? (Génesis 2:15).

³ Tla yejuin xkuajli tlakatl akin onoyolkuep judío katka, kuakon kimatstoya ika Jehová okitlalijka Adán iuan Eva ipan se xochitlalpan. Ika yejon, ijkuak Jesús okiteneuili se xochitlalpan, kanaj yejon tlakatl okinemili ika yejuin Xochitlalpan oniaskia nikan ipan tlaltikpaktli niman ika melak kualtsin yeskia (xpoua Génesis 2:15).

4. ¿Tlenon noneki techtlanemililtis tlen Jesús okijli on xkuajli tlakatl?

⁴ Tlen Jesús okijli yejuin xkuajli tlakatl kipiya ika techtlanemililtis itech kenon tichantiskej ipan Xochitlalpan. Ijkuak titlanemiliaj itech kenon israelitas melak yolseujtoyaj ijkuak tekiuajtitoya Salomón, techpaleuiya matitlanemilikan itech kenon yes ijkuak Jesús tekiuajtitos. Biblia kijtoua ika Jesús “más ueyixtikaj xken Salomón”. Kuakon, uelis kuajli tikmatstoskej ika ijkuak Jesús niman akin iuan tekiuajtiskej tlayekanaskej ipan tlaltikpaktli, melak kualtsin tinemiskej (Mat. 12:42). “Oksekimej borregos” noneki ueliskej tlen noneki kichiuaskej niman ijkon uelis chantiskej ipan Xochitlalpan (Juan 10:16).

5. ¿Kenon tiknemilia tinemiskej ipan Xochitlalpan?

⁵ ¿Kenon tiknemilia tinemiskej ipan Xochitlalpan? Kanaj tiknemilia ika melak kualtsin yes ijkon ken xochitlalpan Edén (Gén. 2:7-9). Noso kanaj tikilnamiki ika teotlajtoketl Miqueas okijto ika itekipanojkauan toTajtsin notlaliskej “inseselti itsintlan ikojyo uva niman itsintlan ikojyo higo” (Miq. 4:3, 4, TNM). Niman kanaj noijki tikimilnamiki seki tlaxeloltin kampa kijtouaj ika onias miyek tlen tijkuaskej (Sal. 72:16; Is. 65:21, 22). Kuakon, kanaj tontlanemilia ika tinemi ipan se kualtsin xochitlalpan niman ika mixpan onka se mesa kampa onka miyek tlen tijkuas. Xkonnemili ika kampa tinemi tikimita miyek xochimej niman melak tlaajuiyakan. Noso xkonnemili ika tikinkaki moamigos niman mochanejkauan, yejuamej ompa uetskatokej niman kualtsin nonojnotstokej. Kanaj sekimej yokinyolitijkej. Yejuin xsan tikontemikij, yejuin yemelak nochiuas. Noijki, ipan Xochitlalpan techyolpaktis totekiyo.

6. ¿Tlenon tikchiuaskej ipan Xochitlalpan? (Xkita tlaixkopinajli).

⁶ Tikuelitaj titekitiskej pampa toTajtsin ijkon otexchijchiuj (Ecl. 2:24). Ijkuak Jesús tekiuajtitos Mil xiuitl, chikauak titekitiskej. Akin makisaskej itech ueyi tlajyouilistli niman nochimej akin yoliuiskej nonekis kichijchiuaskej intlaken, tlen kikuaskej niman kampa chantiskej. Kuakon onias miyek tekitl, san ika, melak tikuelitaskej tlen tikchiuaskej. Ijkon ken Adán niman Eva okitlajpixkej xochitlalpan Edén, tejuamej noijki titlapaleuiskej para tlaltikpaktli manokuepa  se xochitlalpan. Noijki xkonnemili kenon melak kualtsin yes tikinmachtiskej akin yoliuiskej, kanaj miyekej xmás okixmatkej Jehová nion xokimatkej tlen kinekiya kichiuas. Noijki tikimixmatiskej miyekej itekipanojkauan Jehová akin itech omelajkanenkej niman omijkej achto ika Jesús uajlaskia ipan tlaltikpaktli, niman uelis tikimijliskej tlen kinekiskej kimatiskej.

7. ¿Tlenon uelis kuajli tikmatstoskej, niman tleka?

⁷ Uelis kuajli tikmatstoskej ika ipan Xochitlalpan xtlaj techpolos, kualtsin tinemiskej niman tikpiyaskej yolseuilistli. ¿Tleka? Pampa Jehová yotechititi kenon tinemiskej ijkuak iKoneuj tlayekanas ipan tlaltikpaktli. Ipan Biblia okitlali kenon nemiyaj israelitas ijkuak tekiuajtitoya Salomón.

8. ¿Kenon onochiuj tlen David okijkuilo ipan Salmo 37:10, 11, 29? (Xkita ipan yejuin revista tlamachtijli “Tlen notlajtoltiaj akin kitaj revistas”).

⁸ Jehová okichiuj ika David makijkuilo itech kenon nemiskiaj israelitas ijkuak tekiuajtiskia se tekiuaj akin tlamachilise yeskia niman akin kichiuaskia tlen kuajli (xpoua Salmo 37:10, 11, 29). Ijkuak tikinnojnotsaj oksekimej itech Xochitlalpan, miyekpa tikinpouiliaj Salmo 37:11. Niman melak kuajli tla ijkon tikchiuaj pampa Jesús noijki okiteneuj yejuin texto ipan Tlamachtijli ipan Tepetl. Yejon techititia ika yejuin tlajtoltin nochiuaskej ika tlayekapan (Mat. 5:5). San ika, tlen okijkuilo tekiuaj David noijki okiteititi kenon nemiskiaj israelitas ipan itonaluan Salomón. Ipan yejon tonaltin, israelitas ika inyojlo nemiyaj pampa chantiyaj ipan se “tlajli kampa sanoyej tlatlaki[ya] niman xitlaj poliui[ya]”. ToTajtsin okimijlika: “Tla nenkintlakamatij noleyes, [...] nejua nikchiuas para nemoyolika xnemikan. Niman ijkuak nenkochiskej xitlaj nenkimakajsiskej, pampa nejua nemechmanauis ipan on país” (Lev. 20:24; 26:3, 6). Nochi yejuin onochiuj ijkuak tekiuajtitoya Salomón (1 Crón. 22:9; 29:26-28). Niman Jehová okimijli israelitas ika xok nemiskiaj akin kichiuayaj tlen xkuajli (Sal. 37:10). Kuakon, uelis tikijtoskej ika tlen kijtoua Salmo 37:10, 11, 29 yonochiuj niman noijki nochiuas ika tlayekapan.

9. ¿Tlenon okijto siuatekiuaj de Saba itech itekiuajyo Salomón?

⁹ Siuatekiuaj de Saba okitekakili ika israelitas  nemiyaj ika inyojlo niman ika melak kualtsin chantiyaj. Niman maski yejua uejka chantiya, oyaj Jerusalén pampa kinekiya kitas tla melauak tlen okijlijkaj (1 Rey. 10:1). Sakin ika okitak kenon tlayekanaya Salomón, okijli: “Nion tlajkotipan xoajsik on tlen onechtlajtlajtouilijkej [...]. ¡Sanoyej ueyi paktli kiseliaj on mosiuauan niman motekitkauan, pampa yejuamej nochipa kaktokej on tlen tikijtoua ikan miyek tlamatkilistli!” (1 Rey. 10:6-8). Tlen opanok ijkuak tekiuajtitoya Salomón, techititia ika Jehová kichiuas ika tlaltikpakchanejkej noijki kuajli manemikan ijkuak Jesús tekiuajtis ipan tlaltikpaktli.

10. ¿Tleka Jesús más ueyixtika xijkon ken Salomón?

¹⁰ Jesús más ueyixtika xijkon ken Salomón. Salomón tlajtlakole katka. Miyekpa onopopolo niman ipampa yejon, israelitas melak otlajyouijkej. San ika, Jesús xtlajtlakole niman xkeman nopopoloua (Luc. 1:32; Heb. 4:14, 15). Noijki, omelajkanen itech Jehová ijkuak Satanás okitlatlatak. Cristo yokiteititi ika xkeman tlajtlakos niman ika xkeman kichiuas itlaj tlen ueliskia kimijtlakos akin kinyekanas. ¡Melak tiktlasojkamachiliaj toTajtsin ika okitlali Jesús ken toTekiuaj!

11. ¿Imiuan akinomej nopaleuis Jesús?

¹¹ Jesús niman 144,000 akin iuan tekiuajtiskej nopaleuiskej niman san sekan kintlajpiyaskej tlaltikpakchanejkej. Yejuamej kichiuaskej tlen Jehová kineki manochiua nikan ipan tlaltikpaktli (Apoc. 14:1-3). Pampa yejuin tekiuajkej okixnamijkej tlen melak ouijtika ijkuak nemiyaj ken tlakamej niman siuamej nikan ipan tlaltikpaktli, melak kuajli techasikamatiskej. Kuakon, ¿tlenon kichiuaskej 144,000?

12. ¿Tlen tekitl Jehová kinmakas 144,000?

¹² Jesús niman 144,000 kipiyaskej más tekitl xijkon ken Salomón. Tekiuaj Salomón miyekej kinyekanaya ipan ipaís. San ika, akin tekiuajtiskej ipan iTekiuajyo toTajtsin más miyekej kinyekanaskej, niman tlayekanaskej ipan nochi tlaltikpaktli. ¡Melak kualtsin tekitl tlen Jehová kinmakas 144,000!

13. ¿Kenon 144,000 kinpaleuiskej tlaltikpakchanejkej?

¹³ Ijkon ken Jesús, on 144,000 yeskej tekiuajkej niman teopixkej (Apoc. 5:10). Ijkuak israelitas kitlakamatiyaj Tlanauatijli tlen okimakakej Moisés, teopixkej kintlajpiayaj israelitas. Yejuamej kinchikauiliayaj intlaneltok niman kitayaj maka makualokan. Niman pampa Tlanauatijli tlen okimakakej Moisés “san kixneskayotia on tlen kuajli tlajtlamach onyas”, uelis tiknemiliskej ika akin tlayekanaskej iuan Jesús kinpaleuiskej tlaltikpakchanejkej. ¿Kenon kinpaleuiskej? Kintlajpiyaskej itekipanojkauan toTajtsin: kinchikauiliskej intlaneltok niman kitaskej maka makualokan (Heb. 10:1). Ok xtikmatij kenon yejuin tekiuajkej niman teopixkej nonojnotsaskej imiuan akin chantiskej nikan ipan tlaltikpaktli. San ika, uelis kuajli tikmatstoskej ika Jehová kitas ika akin chantiskej ipan Xochitlalpan makipiyakan nochi tlen noneki (Apoc. 21:3, 4).

14. ¿Kenon tekitij on “oksekimej borregos” niman akin iuan tekiuajtiskej Cristo?

¹⁴ Jesús otlajto itech se grupo akin iuan tekiuajtiskia niman okijto ika xmiyekej yeskiaj (Luc. 12:32). Noijki otlajto itech okse grupo niman okintokayoti “oksekimej borregos”. Yejuin ome grupo san se tlajpixketl kipiyaj (Juan 10:16). On “oksekimej borregos” niman akin tekiuajtiskej iuan Cristo san sekan tekitij, niman ijkuak tlaltikpaktli yes se xochitlalpan, ok san sekan tekititoskej. Ijkuakon, akin tekiuajtiskej iuan Jesús inemiskej iluikak, niman on “oksekimej borregos” uelis nemiskej nochipa ipan tlaltikpaktli.  San ika, onka okseki tlemach tlen “oksekimej borregos” noneki kichiuaskej tla kinekij nochipa nemiskej ipan Xochitlalpan.

15. a) ¿Kenon “oksekimej borregos” kinpaleuiyaj ikniuan Cristo? b) ¿Kenon uelis tikchiuas ijkon ken tokniuj akin nesi ipan tlaixkopinajli?

¹⁵ On xkuajli tlakatl akin onoyolkuep xouel okiteititi ika kitlasojkamatiya tlen Jesús okichiuj ipampa. San ika, akin titeuamej intech on “oksekimej borregos” kema uelis tikteititiskej ika tiktlasojkamatij tlen Jesús okichiuj topampa. Tla tikinpaleuiyaj tokniuan tlapejpeniltin, tikteititiskej ika tiktlasojtlaj Jesús. Jesús okijto ika yejua kitaskia akinomej kinpaleuiyaj ikniuan tlapejpeniltin niman ijkon kimatis akinomej on “oksekimej borregos” (Mat. 25:31-40). Uelis tikinpaleuiskej ikniuan Cristo tla chikauak titenojnotsaj niman tla tikinpaleuiyaj oksekimej manochiuakan inomachtijkauan Cristo (Mat. 28:18-20). Ika yejon, tiknekij tiktekitiltiskej nochi tlen ikniuan Cristo techmakaj para tikinmachtiskej oksekimej itech Biblia, ken libro Nochipa uelis tiyolpakis. Tla tejua ok xakaj tikmachtia, ¿tleka xtikimijlia oksekimej tla kinekij nomachtiskej Biblia?

16. ¿Tlenon noneki tikchiuaskej desde aman tla tiknekij tichantiskej ipan Xochitlalpan?

¹⁶ Xnoneki tikchiaskej ika tlaltikpaktli manokuepa se xochitlalpan para tikchiuaskej tlen Jehová kuelita. Desde aman uelis tokojtiliskej xtitekajkayauaskej, tikchiuaskej tlen kuajli niman tinemiskej ken Jehová kuelita. Niman noijki noneki timelajkanemiskej itech Jehová, xtikajkayauaskej toueuentsin noso tosiuauj niman xtikintlalkauiskej tokniuan. Tla desde aman tikintlakamatij itlanauatiluan Jehová maski tinemij kampa nochiua tlen xkuajli, xok ouijtika tikmachiliskej tiktlakamatiskej Jehová ipan Xochitlalpan. Noijki uelis itlaj tomajmachtiskej niman tokojtiliskej tikinpiyaskej kualneskayomej tlen techpaleuiskej ijkuak tichantiskej ipan Xochitlalpan. Ipan tlamachtijli “¿Tikteititia ika iuelis tinemis ipan yenkuik tlaltikpaktli?” tlen onka ipan yejuin revista, techijlia seki tlen uelis tikchiuaskej.

17. ¿Tleka xnoneki totlajtlakoltijtoskej ipampa tlen xkuajli otikchiujkej?

¹⁷ Noijki noneki tokojtiliskej para xok totlajtlakoltijtoskej ipampa tlen xkuajli otikchiujkej. San ika, noijki xtiknekij tikchiuaskej tlen xkuajli  san pampa tikmatij ika Jehová uelis techtlapopoluis pampa Jesús omik topampa (Heb. 10:26-31). Niman, tla otikchiujkej itlaj tlen xkuajli niman yotoyolkuepkej, yotiktlajtlanilijkej Jehová matechpaleui, yotikimijlikej tlayekankej niman yotopatlakej, uelis kuajli tikmatstoskej ika Jehová yotechtlapopolui (Is. 55:7; Hech. 3:19). Matikilnamikikan tlen Jesús okimijli fariseos: “Nejua xoniuajlaj para nikinnotsas on yejuan yolmelajkej, yej para nikinnotsas on yejuan tlajtlakolejkej” (Mat. 9:13). Kema, pampa Jesús onotemakak topampa, uelis techintlapopoluiliskej totlajtlakoluan.

18. ¿Tlenon tikuelitaskia tiktlajtoltis yejuin xkuajli tlakatl akin okipilojkej iuan Jesús?

¹⁸ Xkonnemili ika tinemi ipan Xochitlalpan niman titlajtlajtojtika iuan on xkuajli tlakatl akin otlajto iuan Jesús. Kanaj nentlajtoskej itech kenon melak nenkitlasojkamatij ika Jesús omik topampa. Kanaj tejua tikijlis mamitsijli itech kenon nesiya Jesús ijkuak imiktoya niman kenon onomachili ijkuak Jesús okijli ika iuan nemiskia ipan Xochitlalpan. Niman yejua kanaj mitstlajtoltis itech kenon tinemiyaj ipan itlamiyan tonaltin, ijkuak Satanás tlayekantoya. Melak techyolpaktis tikmachtiskej yejuin tlakatl itech iTlajtol toTajtsin, niman noijki techyolpaktis tikinmachtiskej oksekimej (Efes. 4:22-24).

19. ¿Tlenon tiueliskej tikchiuaskej ipan Xochitlalpan? (Xkita tlaixkopinajli tlen nesi ixpan yejuin revista).

¹⁹ Ipan Xochitlalpan nochipa tikpiyaskej tlen tikchiuaskej. Nochipa nemiskej miyekej akin tiknekiskej imiuan titlajtoskej niman tikpiyaskej se tekitl tlen techyolpaktis. Niman más tiyolpakiskej pampa mojmostla más tikixmatstiaskej toTajtsin iluikakchane niman tikitaskej kenon melak techteochiua. Nochipa tiueliskej tlen yenkuik itech toTajtsin niman itech tlen okichijchiuj. Mojmostla más tiktlasojtlaskej toTajtsin. ¡Melak tiktlasojkamachiliaj Jehová niman Jesús pampa yotechijlikej ika uelis nochipa tinemiskej ipan Xochitlalpan!