Ijkuak Jehová okimijli tlaltikpakchanejkej “xtemiltikan in tlaltikpaktli”, okiteasikamachilti ika ajsiskia se tonajli ijkuak nochi tlaltikpaktli yeskia se xochitlalpan (Gén. 1:28). Akin nochipa nemiskej ipan tlaltikpaktli, nonekis kikuepaskej tlaltikpaktli se xochitlalpan. Pampa xochitlalpan Edén youejkauj ika opopoliuj, tlaltikpakchanejkej nonekis kikualtsintiliskej tlaltikpaktli niman ijkon kikuepaskej se xochitlalpan sakin tla yopanok Armagedón. Nonekis tlachipauaskej kampa tlaltikpakchanejkej melak yotlaixpolojkej. ¡Melak ueyi tekitl kipiyaskej!

Israelitas ijkon okichiujkej ijkuak okiskej de Babilonia niman onokuepkej Jerusalén, kampa ouejkauj 70 xiuitl ika xakaj ompa chantiya. San ika, san ueliskia kiyektlaliskej yejon país tla Jehová kinpaleuiaya, ijkon ken Isaías okijto: “Maski semi tlaxoxotontok, nikauas ken sen kualtsin xochitlan, kenon xochitlan yejuan onkatka  ne Edén” (Is. 51:3). Israelitas okikualtsintilijkej kampa chantiyaj. Akin nochipa chantiskej ipan tlaltikpaktli noijki ijkon kichiuaskej, kikualtsintiliskej tlaltikpaktli niman kikuepaskej se xochitlalpan pampa Jehová kinpaleuis. Niman desde aman onka tlen uelis tikchiuas niman ijkon tikteititis ika tikneki titlapaleuis ipan yejon tekitl.

Onka miyek tlen uelis tikchiuas, uelis titlachipauas niman titlayektlalis mochan niman iyeualiujyan. Niman yejon uelis tikchiuas maski akin ompa nisiuj chantij xijkon kichiuaj. Noijki uelis titlapaleuis ijkuak nochipauas niman noyektlalis Kajli kampa tosentlaliaj niman Kajli kampa tikpiyaj Toueyitlanechikol. Niman tla tejua tiueli, uelis tikominpaleuis tokniuan kampa tlaixpoliui. Ijkon tikteititis ika yemelak tikneki tikinpaleuis tokniuan. Xmotlajtolti: “¿Ueliskia itlaj ninomajmachtis tlen nechpaleuis ipan yenkuik tlaltikpaktli tla Jehová nechkauilia ompa maninemi?”.

Ijkuak Jesús okiyoliti iichpokatsin Jairo, otlanauati makitlakualtikan (Mar. 5:42, 43). Kanaj xouijtika okitakej kitlakualtiskej se ichpokatsin akin kipiaya 12 xiuitl. San ika, tejuamej kema tikpiyaskej miyek tekitl ijkuak Jesús kichiuas yejuin: “On mikatsitsimej kakiskej notlajtol niman kisaskej ipan intlalkon” (Juan 5:28, 29). Maski Biblia xkijtoua, uelis tiknemiliskej ika akin yoliuiskej nonekis kintlakualtiskej, kinmakaskej intlaken niman kintejtemouiliskej kampa chantiskej. ¿Uelis tikteititis aman ika tikneki titlapaleuis ijkuak nochiuas yejuin tekitl? Xtlanemili itech yejuin.

Ijkuak ipan motlanechikol kijtouaj ika mechtlajpalos tlayekanketl ipan circuito, ¿tikteijlia ika tikneki tiktlakualtis? Kanaj se tokniuj kisa de Betel niman oksekan kontitlanij noso se tokniuj xok tlapaleuiya ken tlayekanketl ipan circuito, ¿ueliskia tikintejtemouilis kanon chantiskej? Tla nopanoltis se ueyi tlanechikojli kampa tichanti, ¿ueliskia titlapaleuis achto ika  nopanoltis noso sakin ika yonopanolti, noso ueliskia tikinselis akin oksekan ualeuaj?

Tlen kijtoua Hechos 24:15 techasikamachiltia ika melak miyekej mijkatsitsintin yoliuiskej. Miyekej xouelkej okixmatkej Jehová ijkuak yoltoyaj, san ika, ipan yenkuik tlaltikpaktli kema uelis kixmatiskej. a Akin youejkaujkej kitekichiuiliaj Jehová kinmachtiskej akin yoliuiskej ipan tlaltikpaktli (Is. 11:9). Charlotte, se tokniuj akin yotenojnots Europa, Sudamérica niman África, melak yolpaki ijkuak tlanemilia itech yejuin niman sa kinektika mayejko yejon tonajli. Yejua kijtoua: “Sa niknektika nikinmachtis akin yoliuiskej. Ijkuak ninomachtia itech yakaj akin yeuejkaui onen, niknemilia: ‘Tla yejua kixmatiskia Jehová, kuajli nemiskia’. Sa nikchiatika tonajli ijkuak uelis nikinnojnotsas itech Jehová akin yoliuiskej niman nikimijlis ika tla kitekichiuiliaj, melak kuajli nemiskej”.

Hasta itekipanojkauan Jehová akin itech omelajkanenkej niman omijkej ijkuak Jesús xiuajlaya ipan tlaltikpaktli noijki nonekis tikinmachtiskej. San xkonnemili kenon melak tiyolpakis ijkuak tikijlis Daniel kenon onochiujkej teotlajtoltin tlen yejua okimijkuilo niman tlen xokimasikamat (Dan. 12:8). ¡Yejon se kualtsin tlateochiualistli! Noso xkonnemili kenon melak teyolpakti yes tikimijlis Rut niman Noemí ika se inuejkachanejkauj okitlapejpenijkej ken Mesías. Ipan yejon tonajli xok itlaj onias tlen techajmanas, ika yejon, ika toyojlo tikinmachtiskej akin yoliuiskej.

¿Kenon uelis tikteititis ika tikneki tikinmachtis akin yoliuiskej? Uelis tikteititis tla timokojtilia más kuajli titemachtis niman tla nochipa titenojnotsa maski xok miyek ueli tikchiua pampa itiueyi noso pampa itlaj tikixnamiktok (Mat. 24:14). Tla tejua tikchiua nochi tlen tiueli, tikteititis ika iuelis tikinmachtis akin yoliuiskej.

San ika ¿yemelak tikneki nochipa tinemis ipan tlaltikpaktli? ¿Sa tiknektika mayejko on tonajli ijkuak tikualtsintilis tlaltikpaktli niman ijkon manokuepa se xochitlalpan? ¿Sa tiknektika tikinpaleuis niman tikinmachtis akin yoliuiskej? Tla desde aman tikchiua tekitl tlen nochiuas ipan Xochitlalpan, tikteititis ika iuelis ompa tinemis.