¿Kuajli yotikinpouj revistas tlen san kemach yokiskej itech Amatl Tekakistilijketl? Xkita tla uelis tikinnankilis yejuin tlajtoltilistin:

¿Tlenon noneki tikchiuaskej niman ijkon tikyenkuiliskej totlamachilis? (Rom. 12:2).

Xsan noneki tikchiuaskej seki tlemach tlen kuajli. Noneki tikitaskej tlen tikpiyaj ipan toyojlo niman tla tikitaj ika itlaj xkuajli tikchiujtokej, nimantsin topatlaskej para tikyolpaktiskej Jehová (w23.01, páginas 8 niman 9).

¿Kenon uelis kuajli titlanemiliskej ijkuak tikitaskej tlen panoua ipan nochi tlaltikpaktli?

Tikuelitaj tikmatiskej tlen panotika ipan tlaltikpaktli niman ijkon tikitaskej tla nochiujtika se teotlajtojli. San ika, xtiknekij tikijtoskej tlen tejuamej tiknemiliaj pampa yejon ueliskia kinxelos tokniuan (1 Cor. 1:10) (w23.02, página 16).

¿Tleka tlen Jesús okichiuj ijkuak onoapolakti xsan noijki ken tlen kichiuaj inomachtijkauan ijkuak noapolaktiaj?

Jesús xononek nosentemakas itech Jehová pampa onemiko ipan se kalpan tlen yonosentemakaka itech toTajtsin. Yejua xononek noyolkuepas itech itlajtlakoluan nion xononek kitlajtlanilis toTajtsin makimaka se chipauak tlamachilistli pampa yejua xtlajtlakole katka (w23.03, página 5).

¿Tlenon uelis tikchiuaskej niman ijkon oksekimej tokniuan uelis tlanankiliskej?

Tla tiknekij ika miyekej tokniuan matlanankilikan, xnoneki tiuejkauiskej ijkuak tejuamej titlanankiliskej niman xnoneki nochi tikijtoskej tlen uajlauj ipan párrafo (w23.04, página 23).

¿Tlenon kineskayotia yejon “yekojtli” tlen noteneua ipan Isaías 35:8?

Yeuejkaui yejuin kineskayotiaya on ojtli tlen peuaya desde Babilonia niman ajsiya Israel. ¿Jehová noijki yokiyektlali se ojtli kampa yaskej itekipanojkauan ipan yejuin tonaltin? Kema. Achto peuaskia xiuitl 1919, opeuj noyektlalia yejon ojtli, noijki opeuj notlajtolkuepa niman nokixtiaj miyek copias itech Biblia. Yejuin ojtli techpaleuiya matikueyichiuakan Jehová ipan ikalpan, niman noijki techpaleuis matikueyichiuakan ijkuak tekiuajtitos ipan tlaltikpaktli (w23.05, páginas 15-19).

¿Itech akinomej omemej siuamej tlajtoua Proverbios capítulo 9?

Proverbios tlajtoua itech se siuatl akin “xtlamatki” niman kijtoua ika akin kikakij “onxinij miktlan”. Noijki, tlajtoua itech se siuatl akin kineskayotia tlamachilistli niman kijtoua ika akin kikakij tlamachilisejkej yeskej niman kipiyaskej nemilistli (Prov. 9:​1, 6, 13, 18) (w23.06, páginas 22-24).

¿Kenon Jehová okiteititi ika yolyemanki niman teiknelia ijkuak otlajto iuan Lot?

Jehová okijli Lot macholo itech Sodoma niman mauiya kampa tepeyoj. Lot okitlajtlanili Jehová makikauili yejua niman ifamilia mauiyan ne Zóar, niman yejua okikauili (w23.07, página 21).

¿Tlenon uelis kichiuas se siuatl tla iueuentsin kita pornografía?

Xnoneki notlajtlakoltis. Melak kipaleuis tla nokojtilia más kuajli nouikas iuan toTajtsin niman noijki tla kinemilia kenon Jehová okinyolseui sekimej siuamej akin okixnamijkej tlen melak ouijtika. Uelis kipaleuis iueuentsin maka makichiua itlaj tlen uelis kichiuas oksejpa makita pornografía (w23.08, páginas 14-17).

¿Kenon tla kuajli titlanemiliaj techpaleuis matiyolyemankej ijkuak yakaj techtlajtoltis itlaj itech tlen tikneltokaj?

Matikilnamikikan ika tlen techtlajtoltiaj techpaleuis matikmatikan tlenon kinemilia noso kajmana akin iuan titlajtotokej. Yejon techpaleuis matiknankilikan ika yolyemanilistli (w23.09, página 17).

¿Tlenon tiuelij itech tlen María okichiuj niman ijkon tlaxikos?

Ijkuak María okimat ika kinemitiskia Jesús, iKoneuj toTajtsin, yejua onopaleui intech oksekimej. Ángel Gabriel niman Elisabet okiyolchikaujkej ika tlen kijtoua iTlajtol toTajtsin. Tejuamej noijki uelis techyolchikauaskej tokniuan (w23.10, página 15).

¿Kenon Jehová kinnankilia toteoyouan?

Jehová kijtoua ika kinkakis toteoyouan niman kita tla tlen tiktlajtlaniliaj tlapaleuis manochiua tlen kineki (Jer. 29:12). Ijkuak itlaj tiktlajtlaniliaj Jehová, tlamantik ken uelis technankilis, san ika, yejua xkeman techkauas (w23.11, páginas 21 niman 22).

Tla ipan Romanos 5:2 Pablo yotlajtoka itech tlen tikchiaj tikseliskej, ¿tleka oksejpa okiteneuj ipan Romanos 5:4?

Ijkuak yakaj kachtopa kinojnotsaj itech iTlajtol toTajtsin, yejua kanaj uelis nemis para nochipa ipan yejuin tlaltikpaktli tlen nokuepas se xochitlalpan. Maski kixnamikis tlen ouijtika, tla melajkanemi niman kimati ika kiyolpaktia Jehová, kipaleuis más makineltoka ika uelis kiselis tlen kichiatikaj (w23.12, páginas 12 niman 13).