1. ¿Tleka uelis tikijtoskej ika melauak nochiuaskia tlen Abrahán kichiatoya?

 JEHOVÁ okijli iamigo Abrahán ika kipiyaskia se ikoneuj, niman ika ipampa yejua miyekej tlaltikpakchanejkej kinteochiuaskia (Gén. 15:5; 22:18). Pampa Abrahán melak tlaneltokaya itech toTajtsin, kuajli kimatstoya ika tlen yokijlika yemelak nochiuaskia. San ika, ijkuak Abrahán ikipiaya kanaj 100 xiuitl niman Sara 90 xiuitl, yejuin itekipanojkauan toTajtsin ok xkipiayaj nion se inkoneuj (Gén. 21:​1-7). Maski ijkon, Biblia kijtoua ika Abrahán “okichix niman okineltokak ika Dios okitlalij tajtli ipan miyek países [ . . . ] ken okiprometerouilij” (Rom. 4:18). Niman ken tikmatij, yejon tlen kichiatoya, onochiuj. Abrahán niman Sara okipixkej inkoneuj, Isaac, yejon konetsintli akin kichiatoyaj manemi. ¿Tleka Abrahán kuajli kimatstoya ika Jehová kichiuaskia tlen yokijlika?

2. ¿Tleka Abrahán kuajli kimatstoya ika Jehová kichiuaskia tlen yokijlika?

² Pampa Abrahán kuajli kixmatstoya Jehová, “ikan nochi iyojlo kimatstikatka” ika kichiuaskia tlen yokijlika (Rom. 4:21). Pampa otlaneltokak, okiyolpakti Jehová niman yejua okitak ken se tlakatl akin yolmelajki (Sant. 2:23). Ijkon ken kijtoua Romanos 4:​18, Abrahán melak tlaneltokaya niman kuajli kimatstoya ika nochiuaskia tlen kichiaya. Aman matikitakan  tlen kijtoua apóstol Pablo itech tlen tikchiaj tikseliskej ipan Romanos capítulo 5.

3. ¿Tlenon okijto Pablo itech tlen tikchiaj tikseliskej ika tlayekapan?

³ Pablo okijto ika uelis tikmatstoskej ika “ticselisquej on tlen techmelajcaijlia” toTajtsin (Rom. 5:​5, IY). Noijki, techpaleuiya matikasikamatikan kenon uelis más tikneltokaskej tlen tikchiaj tikseliskej. Ijkuak tikitstiaskej tlen kijtoua Romanos 5:​1-5, xnemili kenon uelis más tikneltokas ika yemelak nochiuas tlen tikchia tikselis. Kachtopa titlajtoskej itech tlen Pablo okijto ika kiseliskej sekimej tokniuan.

4. ¿Itech tlenon tlajtoua Romanos 5:​1, 2?

⁴ (Xpoua Romanos 5:​1, 2). Pablo okimijkuilouili yejuin tlajtoltin tokniuan akin nemiyaj ipan tlanechikojli de Roma. Yejuamej yonomachtijkaj itech Jehová niman Jesús, yokiteititijkaj ika tlaneltokaj niman yonochiujkaj inomachtijkauan Cristo. Ika yejon, toTajtsin okimitak ken akin yolmelajkej ipampa intlaneltok niman okintlapejpeni ika iespíritu santo. Ijkuakon, yejuamej ueliskia kiseliskiaj se nemilistli tlen xkeman tlamis ne iluikak.

5. ¿Tlenon kiseliskej tokniuan tlapejpeniltin?

⁵ Sakin, Pablo okimijli tokniuan tlapejpeniltin de Éfeso ika kiseliskiaj se “herencia yejuan Dios kinmaka on yejuan tlaneltokaj” (Efes. 1:18). Niman tokniuan colosenses okinteneuili kanon kiseliskiaj yejuin tetlayokolijli tlen kichiatoyaj. Yejua okimijli: “Yejyejtikaj para nemejuamej ne ipan iluikak” (Col. 1:​4, 5). Kuakon, tokniuan tlapejpeniltin sa kichiatokej yoliuiskej niman nochipa nemiskej ne iluikak kampa tekiuajtiskej iuan Cristo (1 Tes. 4:​13-17; Apoc. 20:6).

6. ¿Tlenon okijto tokniuj Frederick Franz itech tlen kiseliskia?

⁶ Tokniuan akin tlapejpeniltin melak  kipatiojkaitaj tlen kichiaj kiseliskej. Ipan 1991, tokniuj Frederick Franz, okijto yejuin: “Tlen tikchiaj tikseliskej yemelak nochiuas. Akin titeuamej itech 144,000, sa tikchiatokej tikseliskej tlen toTajtsin yokijto techmakas. Xitlaj onka ijkon ken tlen yejua kineki techmakas”. ¿Kenon onomachili sakin ika chikauak yokitekichiuilijka toTajtsin? Yejua techijlia: “Tejuamej ok xtosiaujkauaj niman más tikpatiojkaitaj tlen tikseliskej. Maski tla uejkauiskia, tiknektokej tikchiatoskej”.

7, 8. ¿Tlenon kichiaj kiseliskej miyekej itekipanojkauan toTajtsin? (Romanos 8:​20, 21).

⁷ Miyekej akin kitekichiuiliaj Jehová ipan yejuin tonaltin noijki kichiaj itlaj kiseliskej. Yejuin san noijki ken tlen kiseliskia Abrahán. Yejuamej kichiaj nemiskej para nochipa ipan yejuin tlaltikpaktli tlen kiyekanas iTekiuajyo toTajtsin (Heb. 11:​8-10, 13). Pablo noijki otlajto itech yejuin tlen tikseliskiaj ika tlayekapan (xpoua Romanos 8:​20, 21). Ijkuak tejua otiuel itech tlen Biblia kijtoua panos ika tlayekapan, ¿tlenon más otikuelitak? ¿Otikuelitak ijkuak otijkak ika xok tikpiyaskia tlajtlakojli? ¿Omitsmojkatlachialti ijkuak otikmat ika mochanejkauan akin yomijkej oksejpa yoliuiskej niman nemiskej ipan xochitlalpan? Pampa Jehová techijlia ika techmakas yejuin, tejua uelis kualtsin tinemis ika tlayekapan.

⁸ Tinochimej tikchiaj tikseliskej tlen melak techyolpaktis, maski tla tinemiskej para nochipa ne iluikak noso nikan ipan tlaltikpaktli. ¿Kenon uelis más tikneltokaskej ika tikseliskej tlen tikchiaj? Uelis tikmatiskej tla tikitaj tlen Pablo okijkuilo. Itlajtoluan techpaleuiskej más matikneltokakan ika kema tikseliskej tlen tikchiaj ika tlayekapan.

9, 10. Ijkon ken Pablo, ¿tlenon tikmatstokej ika topan nochiuas? (Romanos 5:3; noijki xkimita tlaixkopinaltin).

⁹ (Xpoua Romanos 5:3). Pablo okijto ika ijkuak tikixnamikij tlen ouijtika, uelis más titlaneltokaskej itech tlen tikchiaj tikseliskej.  Kuajli tikmatstokej ika tinochimej akin tikchiuaj ken Cristo tikixnamikiskej tlen ouijtika. Matitlanemilikan itech tlen Pablo okimijli tokniuan de Tesalónica. Yejua okijto: “Ijkuak sanken nemouan tinemiyaj, otemechijlijkej ika tikpiyaskej miyek tlayouilistli, niman ijki onochiu ken nenkimatstokej” (1 Tes. 3:4). Niman tokniuan corintios okimijkuilouili: “Tiknekij xmatikan on tlen temojtij tlajyouilistli otikpixkej. [ . . . ] Hasta xok ueliya tikxikouaj niman hasta tiknemiliayaj ompa timikiskej” (2 Cor. 1:8; 11:​23-27).

¹⁰ Ipan yejuin tonaltin, akin tikchiuaj ken Cristo kuajli tikmatstokej ika tikixnamikiskej tlen ouijtika (2 Tim. 3:12). ¿Tlenon yotikixnamik tejua ijkuak opeuj titlaneltoka itech Jesús niman opeuj tikchiua ken yejua? Kanaj moamigos noso mochanejkauan opeuj mitspijpinaujtiaj noso hasta omitschiuilijkej tlen xkuajli. ¿Kampa titekiti mitstlauelitaj pampa tejua xtitlakajkayaua? (Heb. 13:18). ¿Gobierno mitstlaueltoka pampa tikimijlia oksekimej tlen tikneltoka? Maski san tlenon tikixnamikiskej, Pablo kijtoua ika noneki tiyolpakiskej. ¿Tleka?

11. ¿Tleka noneki titlaxikoskej?

¹¹ Melak techyolpaktia ijkuak tikixnamikij tlen ouijtika pampa yejuin techpaleuiya matitlaxikokan. Romanos 5:3 kijtoua: “On tlajyouilistli techpaleuiyaj para tikxikouaj nochi tlen topan nochiua”. Pampa nochimej akin tikchiuaj ken Cristo tikixnamikij tlen ouijtika, nochimej noneki titlaxikoskej. Tla titlaxikouaj, tikseliskej tlen tikchiatokej. Xtiknekij tiyeskej ijkon ken tlaltikpakchanejkej akin Jesús okinteneuj ijkuak otlajto itech xinachtli tlen uetsi ipan tepetlayo kampa xmás onka tlajli. Yejuamej ika nochi inyojlo kiseliaj iTlajtol toTajtsin, san ika, “ijkuak impan uajlau on tlen tepajsoloj niman on tlen tetlajyouiltia [ . . . ] nimantsin kauaj intlaneltok” (Mat. 13:​5, 6, 20, 21). Yemelak, xakaj kuelita tlajyouis noso makitlaueltokakan, san ika, tla titlaxikouaj melak techpaleuis. Matikitakan tleka.

12. ¿Kenon techpaleuiya tla titlaxikouaj?

¹² Santiago, inomachtijkauj Jesús, okijkuilo: “Xkauilikan on xikoualistli ma tlami kipatla nemonemilis, para nenyolchikajkej yeskej niman xitlaj mechpolos” (Sant. 1:​2-4). Kuakon, ¿kenon techpaleuiya tla titlaxikouaj? Uelis techpaleuis más matitlamachiakan, machikaui totlaneltok niman más matitlaneltokakan itech toTajtsin. Niman, ¿kenon uelis más techpaleuis tla titlaxikouaj?

13, 14. ¿Tlenon panoua ijkuak titlaxikouaj, niman kenon yejon techpaleuiya más matitlaneltokakan itech tlen tikchiaj tikseliskej? (Romanos 5:4).

¹³ (Xpoua Romanos 5:4). Pablo okijto: “Ijkuak tikxikouaj on tlajyouilistli, Dios paki ken tikxikouaj on tlen topan nochiua”. San ika, yejon xkijtosneki tla Jehová yolpaki ijkuak titlajyouiyaj, yej yolpaki ijkuak kita ika titlaxikouaj niman timelajkanemij. ¿Xmelak ika yejon techyolchikaua? (Sal. 5:12).

¹⁴ Matitlanemilikan itech Abrahán, yejua okiyolpakti toTajtsin pampa otlaxiko ijkuak okixnamik tlen ouijtika. Jehová okitak ken iamigo niman okitak ken yakaj akin yolmelajki (Gén. 15:6; Rom. 4:​13, 22). Yemelak ika uelis tikyolpaktiskej toTajtsin ika tlen tikchiuaj para tiktekichiuiliskej niman tla kuajli tikchiuaj totekiyo ipan tlanechikojli. San ika, noijki uelis tikyolpaktiskej tla itech timelajkanemij niman titlaxikouaj. Yejon itlaj tlen nochimej uelis tikchiuaskej, maski tla tiuejueyimej noso tla tipipitikej, tla miyek tikpiyaj noso ka noso tla miyek tiuelij noso ka. ¿Tikixnamiktika itlaj tlen ouijtika ipan yejuin  tonaltin? Tla kema, kuajli xmatsto ika tikyolpaktis toTajtsin tla itech timelajkanemi. Pampa tikmatij ika tikyolpaktiaj Jehová, kichiua más matikneltokakan ika uelis tikseliskej tlen tikchiatokej.

15. ¿Tlenon más okijto Pablo, niman kanaj tlenon uelis totlajtoltiskej?

¹⁵ Ken yotikitakej, Pablo okijto ika uelis tikyolpaktiskej toTajtsin tla titlaxikouaj. Aman matikitakan tlenon más okijto: “Ijkuak Dios paki, techmaka tlamachalistli” (Rom. 5:4). Niman noijki okijto ika “ticselisquej on tlen techmelajcaijlia” (Rom. 5:​5, IY). Ipan Romanos 5:​2, Pablo yokijtojka ika tokniuan akin chantiyaj Roma kichiatoyaj kiseliskej “ueyilistli” tlen toTajtsin kinmakaskia. Ika yejon, kanaj totlajtoltiaj: “Tla yejuin tokniuan ikichiatoyaj itlaj, ¿tleka Pablo oksejpa okiteneuj tlen kiseliskiaj?”.

16. Xkijto kenon uelis más tikneltokaskej ika yemelak nochiuas tlen kijtoua Biblia. (Noijki xkimita tlaixkopinaltin).

¹⁶ Tikasikamatiskej tlen Pablo kijtosnekiya, tla tikilnamikij ika uelis más tikneltokaskej ika yemelak nochiuas tlen tikchiaj. San matontlanemilikan itech yejuin: ijkuak kachtopa otechijlikej ika uelis tinemiskej nochipa ipan yejuin tlaltikpaktli, tlen nokuepas se xochitlalpan, kanaj otiknemilijkej ika xuelis nochiuas. San ika, aman ika itikixmatij Jehová niman tlen Biblia kijtoua, más tikneltokaj ika nochi tlen yokijto yemelak kichiuas.

17. Sakin ika otimoapolakti, ¿kenon más opeuj titlaneltoka itech tlen Jehová okijto?

¹⁷ Sakin ika otimoapolakti más opeuj tikneltoka tlen tikchia tikselis ika tlayekapan pampa más kuajli yotimomachti niman más yochikauj motlaneltokil (Heb. 5:13–6:1). Kanaj tejua noijki yotikixnamik miyek tlemach, ijkon ken kijtoua Romanos 5:​2-4. San ika, noijki yotikitak kenon Jehová yomitspaleui. Pampa tikmati ika tikyolpaktijtika  Jehová aman más tikneltoka ika kichiuas tlen yokijto. Ijkon tikteititia ipampa ken tikinnotsa mofamilia, ipampa tlen tiktlapejpenia tikchiuas niman ken tiktekitiltia motiempo.

18. ¿Tlenon kuajli yotechijli Jehová?

¹⁸ Sakin ika Pablo okijto ika tla tikyolpaktiaj toTajtsin titlaneltokaskej itech tlen yokijto techmakas, okijto ika uelis kuajli tikneltokaskej ika tlen tikchiaj yemelak nochiuas. ¿Tleka? Pampa Pablo yejuin okimijli tokniuan akin onenkej ipan kachtopa siglo: “Niman ticmatij ica ticselisquej on tlen techmelajcaijlia pampa Dios yoquitemitij toyojlo ican itetlajsojtlalis. Yejhua in oquichiu itechcopa on Espíritu Santo yejhuan otechmacac” (Rom. 5:​5, IY). Kuakon, uelis kuajli tikmatstos ika tlen tikchia yemelak nochiuas.

19. ¿Tlenon kuajli tikmatstokej?

¹⁹ Kuajli tla tikilnamikij tlen ipan onochiuj Abrahán. Yejua okiyolpakti toTajtsin niman yejua okijli ika itlaj kichiuaskia ipampa niman okitak ken iamigo. Niman tlen Abrahán kichiatoya onochiuj. Biblia kijtoua ika “Abraham iyolika okichix hasta ijkuak okiselij on tlen Dios okitlalij ipan ipromesa” (Heb. 6:15; 11:​9, 18; Rom. 4:​20-22). Ijkon ken Abrahán, tejuamej kuajli tikmatstokej ika tla timelajkanemij itech Jehová, yejua techteochiuas niman techmakas tlen tikchiatokej tikseliskej. ¡Melak tiyolpakij ika ijkon nochiuas! (Rom. 12:12). Pablo okijkuilo: “Ma Dios, yejuan kitemaka tlamachalistli, ma mechmaka nochi paktli niman yolseuilistli pampa nenkineltokaj para nenkipiyaskej miyek tlamachalistli itechkopa ipoder on Espíritu Santo” (Rom. 15:13).