1. ¿Tlenon noneki tikchiuaskej para chikaujtos totlaneltokil?

 MELAK temojkatlachialti kenon nimantsin noskaltia se konetsintli maski xitlaj kichiua. San ika, akin tikchiuaj ken Cristo noneki itlaj tikchiuaskej niman ijkon chikaujtos totlaneltokil (1 Cor. 13:11; Heb. 6:1). b Tla tiknekij machikaujto totlaneltokil, noneki kuajli touikaskej iuan Jehová. Noijki noneki ika iespíritu santo matechpaleui matikchiuakan tlen kuajli, matikitakan kenon kuajli tikchiuaskej se tekitl niman matikchiuakan tlen techpaleuis ika tlayekapan (Prov. 1:5).

2. ¿Tlenon techmachtia Génesis 1:​27, niman tlenon tikitaskej ipan yejuin tlamachtijli?

² Ijkuak Jehová okichijchiuj nochi tlen onka, yejua okichijchiuj se tlakatl niman se siuatl (xpoua Génesis 1:27). Tikmatij ika tlakamej niman siuamej tlamantik ken tlachijchiujtin, san ika, xsan yejon. Jehová yokinmakak tlamantik tekitl, niman para kuajli kitlakamatiskej tlen kinnauatia noijki noneki tlamantik tlemach kichiuaskej (Gén. 2:18). Ipan yejuin tlamachtijli, tikitaskej kenon tokniuan ichpokamej uelis kichikauaskej intlaneltokil. Niman ipan okse tlamachtijli tikitaskej kenon tokniuan telpokamej noijki uelis ijkon kichiuaskej.

3, 4. ¿Tlenon uelis kichiuaskej tokniuan ichpokamej niman ijkon kichikauaskej itlaneltokil? (Noijki xkita tlaixkopinajli).

³ Biblia kinteneua miyekej siuamej akin chikauak okitekichiuilijkej Jehová niman melak okitlasojtlakej (xkita tlamachtijli  “¿Qué aprendemos de las mujeres de la Biblia?”, tlen onka ipan jw.org). Ken kijtoua tlaxelojli kampa onokixti yejuin tlamachtijli, yejuamej kuajli noyekanayaj niman nochipa yolmelajkanemiyaj. Kuajli tikmatstokej ika ipan motlanechikol noijki nemij miyekej tokniuan siuamej akin chikauak kipiyaj intlaneltokil, niman uelis miyek mitsmachtiskej.

⁴ Tla tejua tiichpochtli, xtlanemili intech tokniuan akin chikaujtok itlaneltokil niman xmokojtili xchiua ijkon ken yejuamej. Para uelis ijkon tikchiuas, xkita tlen kuajli kichiuaj niman xkita kenon noijki uelis ijkon tikchiuas. Ipan okseki párrafos tikitaskej yeyi tlemach tlen noneki kichiuaskej tokniuan akin kinekij kipiyaskej chikauak intlaneltokil.

5. ¿Tleka tokniuan akin chikauak kipiyaj intlaneltokil noneki yolyemankej yeskej?

⁵ Nochimej akin kichiuaj ken Cristo noneki yolyemankej yeskej. Se siuatl akin yolyemanki kuajli nouika iuan Jehová niman noijki imiuan oksekimej (Sant. 4:6). Pampa yolyemanki, kitlasojtla toTajtsin niman kintlakamatij akin Jehová yokintekitlali ipan tlanechikojli niman ipan ifamilia (1 Cor. 11:3). c

6. ¿Kenon ichpokamej uelis yolyemankej yeskej ijkon ken Rebeca?

⁶ Matitlajtokan itech Rebeca. Yejua tlamachilise katka niman kimatstoya kemanon kichiuas itlaj niman kenon nonekiya kichiuas (Gén. 24:58; 27:​5-17). San ika, noijki tetlakaitaya niman tetlakamatiya (Gén. 24:​17, 18, 65). Tla tejua tiyolyemanki ijkon ken Rebeca niman tiktlakamati tlen Jehová tlanauatia, tikinpaleuis mochanejkauan niman noijki tlanechikojli.

7. ¿Kenon ichpokamej uelis kichiuaskej ijkon ken Ester?

⁷ Itekipanojkauan toTajtsin akin chikauak kipiyaj intlaneltokil xnoneki noueyimatiskej. Biblia kijtoua ika “yejuan noknelia kipiya tlamatkilistli” (Prov. 11:2). Matitlajtokan itech Ester. Ijkuak yejua okitlalijkej ken tekiuaj, xopeuj noueyimati. Yejua ok kikakiya tlen kijliaya iprimo, Mardoqueo (Est. 2:​10, 20, 22). Tejua noijki uelis tikchiuas ijkon ken yejua  tla tikintlajtlanilia oksekimej mamitsijlikan tlenon uelis tikchiuas niman tla tikchiua tlen mitsijliaj (Tito 2:​3-5).

8. ¿Kenon uelis kiteititiskej ichpokamej ika chikauak kipiyaj itlaneltokil ijkuak kitaskej kenon notlakentiskej noso nokualnextiskej? (1 Timoteo 2:​9, 10).

⁸ Matikitakan kenon más okiteititi Ester ika xonoueyimat. Maski yejua “sanoyej ixkualtetsin katka niman no kualtetsin katka nochi itlalnakayo”, xkeman okinek kichiuas ika oksekimej makinemilikan ika yejua ueyixtoya (Est. 2:​7, 15). ¿Kenon noijki uelis ijkon tikchiuas? Tla tikchiua tlen kijtoua 1 Timoteo 2:​9, 10 (xpoua). Ompa, apóstol Pablo kimijlia tokniuan siuamej ika noneki melak kuajli makitlapejpenikan kenon notlakentiskej. Tlajtoltin ika griego tlen yejua okintekitilti, kiteititia ika tokniuan noneki kitaskej ika intlaken maka makichiua ika oksekimej makinemilikan tlen xkuajli noso xkuajli manomachilikan. ¡Melak tiyolpakij ijkuak tikitaj ika miyekej tokniuan kiteititiaj ika chikauak intlaneltokil ipampa ken notlakentiaj!

9. ¿Tlenon tiuelij itech Abigaíl?

⁹ Akin chikauak kipiyaj intlaneltokil noijki nokojtiliaj kuajli tlanemiliskej. Kijtosneki ika kuajli kitaj tlenon kuajli niman tlenon xkuajli, niman ijkon kitlapejpeniskej tlen kinamiki. Matitlajtokan itech Abigaíl. Iueuentsin okitlapejpeni kichiuas itlaj tlen xkuajli, niman Abigaíl okitak ika tlen yokitlapejpenijka ueliskia kichiuas ika nochimej akin imiuan chantiyaj makixnamikikan tlen xkuajli. Yejua nimantsin itlaj okichiuj, niman tlen okitlapejpeni kichiuas otlapaleui maka makinmiktikan miyekej akin imiuan chantiyaj (1 Sam. 25:​14-23, 32-35). Tla kuajli titlanemiliaj, noijki techpaleuis matikitakan kemanon titlajtoskej niman kemanon xnoneki titlajtoskej, noijki, techpaleuis matikimititikan oksekimej ika yemelak tiknekij tikinpaleuiskej (1 Tes. 4:11).

10, 11. ¿Kenon mitspaleuis tla kuajli titlaamapoua niman kuajli titlajkuiloua? (Noijki xkita tlaixkopinajli).

¹⁰ Melak kuajli tla se tokniuj siuatl nomajmachtia kenon uelis kichiuas se tekitl, pampa tlen kichiua ijkuak san ichpokatsin uelis kipaleuis ika tlayekapan. Matikitakan seki tlen uelis nomajmachtiskej.

¹¹ Xmomachti kuajli titlaamapouas niman kuajli titlajkuilos. Ipan seki kalpamej, kinemiliaj ika siuamej xnoneki ueliskej tlaamapouaskej nion tlajkuiloskej. San ika, tinochimej akin tikchiuaj ken Cristo tikmatstokej ika noneki matiuelikan yejon (1 Tim. 4:13). d Kuakon, xmokojtili kuajli titlaamapouas niman titlajkuilos. ¿Kenon mitspaleuis yejuin? Mitspaleuis más nimantsin xnexti se tekitl niman ijkon uelis tikpiyas tlen ika timopanoltis. Noijki,  mitspaleuis kuajli xmomachti niman kuajli xtemachti iTlajtol toTajtsin. Niman pampa kuajli tikamapouas Biblia niman itech titlanemilis, mitspaleuis kuajli xmouika iuan Jehová (Jos. 1:8; 1 Tim. 4:15).

12. ¿Tlenon mitsmachtia Proverbios 31:26?

¹² Xyejyeko kuajli timonotsas imiuan oksekimej. Yejuin itlaj tlen noneki tikchiuaskej akin tikchiuaj ken Cristo. Santiago, inomachtijkauj Jesús, okijto yejuin: “Cada se de nemejuamej noneki nemis listo para nentlakakiskej. Pero no xmatikan ika xmechtocaroua nimantsin nentlajtoskej” (Sant. 1:19). Tla kuajli tijkakij akin technojnotstika, tikititiskej ika tikasikamatij (1 Ped. 3:8). Tla xmás otikasikamat tlen mitsijlitika akin mitsnojnotstika, itlaj xtlajtolti. San ika, xchiua ika tlakaitalistli niman achto titlanankilis kuajli xnemili tlenon tikijtos (Prov. 15:28). Xmotlajtolti: “¿Tlen nikijtos melauak niman teyolchikaua? ¿Kiteititia ika nitetlakaita niman ika niteiknelia?”. Xtlanemili intech tokniuan akin chikauak kipiyaj intlaneltokil niman kuajli nonotsaj imiuan oksekimej, niman xchiua ijkon ken yejuamej (xpoua Proverbios 31:26). Kuajli xkinkaki kenon tlajtouaj. Xmomajmachti kuajli titenotsas niman tikitas ika más kuajli timouikas imiuan oksekimej.

13. ¿Tlenon uelis mitspaleuis xtekichiua ipan mochan? (Noijki xkita tlaixkopinajli).

¹³ Xyejyeko tikchiuas tekitl ipan mochan. Miyekan, siuamej akin kichiuaj tekitl tlen onka ipan se kajli. Kanaj monan noso se tokniuj akin chikauak kipiya itlaneltokil uelis mitsititis kenon titekichiuas. Se tokniuj akin itoka Cindy, kijtoua: “Melak niktlasojkamachilia nonan pampa onechititi ika mitsyolpaktis tla titekichiua. Pampa onechititi kenon nitlakualchiuas, nitlachipauas, nitlajtsomas niman kenon nitlakouas, onechpaleui más kuajli maniktekichiuili Jehová. Nonan noijki onechititi ika noneki kuajli niteselis, niman yejon yonechpaleui manikimixmati miyekej tokniuan akin miyek intech yoniuel” (Prov. 31:​15, 21, 22). Siuamej akin tekitkej, kuajli teseliaj niman kimatij kenon kichiuaskej intekiyo ipan inchan, melak kinpaleuiyaj inchanejkauan niman tlanechikojli (Prov. 31:​13, 17, 27; Hech. 16:15).

14. ¿Tlenon tiueli itech tlen kijtoua Crystal, niman tlenon noneki tikchiuas?

¹⁴ Xkita kenon timopanoltis. Nochimej akin tikchiuaj ken Cristo niman chikauak tikpiyaj totlaneltokil noneki san no tejuamej tikitaskej kenon topanoltiskej niman tiyolpakiskej ika tlen tikpiyaj (Filip. 4:11). Se tokniuj akin itoka Crystal, kijtoua: “Ijkuak niichpochtli katka niman ninomachtijtoya escuela, kemantika ueliya niktlapejpeniaya tlenon ninomachtis, niman notajuan onechijlikej maniktlapejpeni itlaj tlen sakin ueliskia nechpaleuis. Notaj onechijli ika ueliskia ninomachtis contabilidad, niman yejon melak yonechpaleui”. Xsan noneki itlaj tikchiuas para tiknextis se tekitl, noijki noneki tikitas kenon tiktekitiltis  motomin (Prov. 31:​16, 18). Tla tinemi san ika achijtsin niman xtiktlaneui tomin ijkuak xmás noneki, uelis tikchiuas tlen toTajtsin mitstlajtlanilia (1 Tim. 6:8).

15, 16. ¿Tleka melak tikinpatiojkaitaj tokniuan siuamej akin xinonamiktiaj? (Marcos 10:​29, 30).

¹⁵ Tla timokojtilia tikchiuas tlen Jehová kuelita niman timokojtilia kuajli tikchiuas motekiyo, más kuajli tinemis ika tlayekapan. Matikitakan seki tlemach tlen uelis tikchiuas.

¹⁶ Uelis tiktlapejpenis tla san moselti tinemis ipan seki tiempo. Ijkon ken Jesús okijto, nemij akin kitlapejpeniaj xnonamiktiskej maski kampa chantij kinchiualtisnekij manonamiktikan (Mat. 19:​10-12). Oksekimej, kitlapejpeniaj xnonamiktiskej ipampa okseki tlemach. Tla xitimonamiktia, uelis kuajli tikmatstos ika Jehová niman Jesús melak mitspatiojkaitaj. Ipan nochi tlaltikpaktli, tokniuan siuamej akin xinonamiktiaj melak tlapaleuiyaj ipan tlanechikoltin. Yejuamej kiteititiaj ika tetlasojtlaj niman kinekij kinpaleuiskej oksekimej, niman yejon kichiua ika oksekimej makimitakan kentla imikniuan niman kentla innanuan (xpoua Marcos 10:​29, 30; 1 Tim. 5:2).

17. ¿Tlenon uelis kinpaleuis tokniuan ichpokamej más chikauak makitekichiuilikan Jehová?

¹⁷ Uelis más chikauak tiktekichiuilis Jehová. Ipan nochi tlaltikpaktli más miyekej tokniuan siuamej akin tenojnotsaj (Sal. 68:11). ¿Uelis timokojtilis más chikauak tiktekichiuilis Jehová? Kanaj uelis timochiuas precursora, tontlapaleuis kampa nochijchiuaj kaltin kampa tikueyichiuaj Jehová noso tontlapaleuis Betel. ¿Tlenon mitspaleuis ijkon xchiua? Xnotsa Jehová, xtlajto imiuan akin ichikauak kitekichiuilijtokej niman xkita tlenon noneki tikchiuas. Xkijkuilo tlen tikita ika mitspaleuis más chikauak xtekichiuili Jehová. Tla ijkon tikchiua, tikitas ika melak mitsyolpaktis tla chikauak tiktekichiuilia toTajtsin.

18. ¿Tleka se tokniuj siuatl noneki kuajli kitlapejpenis akinon iuan nonamiktis? (Noijki xkita tlaixkopinajli).

¹⁸ Uelis tiktlapejpenis tla timonamiktis. Nochi tlen amantsin yotikonitakej ipan yejuin tlamachtijli, mitspaleuis xmochiua se kuajli tesiuauj. Yemelak, tla tikneki timonamiktis, noneki kuajli tiktlapejpenis iuan akinon. Pampa yejon uejkauis para nochi monemilis. Xkilnamiki ika yejon tlakatl akin iuan timonamiktis yejua mitsyekanas (Rom. 7:2; Efes. 5:​23, 33). Kuakon, xmotlajtolti: “¿Kiteititia ika chikauak  kipiya itlaneltokil? Ika tlen kichiua, ¿kiteititia ika más ueyi kijtosneki kichiuas tlen toTajtsin kineki? ¿Kuajli tlen kitlapejpenia? ¿Yolyemanki niman kasikamati ika kemantika noijki nopopoloua? ¿Kintlakaita siuamej? ¿Uelis nechpaleuis machikaujto notlaneltokil, nechmakas tlen nechpoloua niman nechpaleuis? Tla kipiya seki tekitl ipan tlanechikojli, ¿kuajli kichiua yejon tekitl?” (Luc. 16:10; 1 Tim. 5:8). Tla tikneki tiknextis se kuajli moueuentsin, noijki noneki timokojtilis tiyes se kuajli tesiuauj.

19. ¿Kijtosneki ika se siuatl xueyixtika pampa san tlapaleuijketl?

¹⁹ Biblia kijtoua ika se kuajli tesiuauj kipaleuiya iueuentsin (Gén. 2:18). ¿Kijtosneki ika xueyixtika pampa san tlapaleuijketl? Ka, pampa yejon se ueyi tekitl. Kemantika, Biblia noijki kijtoua ika Jehová se tlapaleuijketl (Sal. 54:4; Heb. 13:6). Se tesiuauj kuajli kichiua itekiyo ijkuak kipaleuiya iueuentsin niman ijkuak tlapaleuiya ika ifamilia makitlakamati tlen iueuentsin yokitlapejpeni. Noijki, pampa kitlasojtla Jehová, kichiua kuajli matlajtokan itech iueuentsin (Prov. 31:​11, 12; 1 Tim. 3:11). Tla tiknemilijtika timonamiktis, xmokojtili más tiktlasojtlas Jehová niman noijki más titlapaleuis ipan mochan niman ipan tlanechikojli.

20. ¿Kenon se nantli uelis kinpaleuis ichanejkauan?

²⁰ Uelis tikinpiyas mokoneuan. Tla timonamiktia, kanaj uelis nenkipiyaskej nemokoneuan (Sal. 127:3). Ika yejon, kuajli xnemili kenon uelis timochiuas se kuajli nantli. Kuajli tikmatstokej ika nochi tlen yotikitakej ipan yejuin tlamachtijli melak mitspaleuis. Tla titetlasojtla, titeiknelia, xnimantsin tikualani noso xtimosiaujkaua, tikinpaleuis mochanejkauan melak mayolpakikan, noijki mokoneuan kuajli noskaltiskej niman kimachiliskej ika kintlasojtlaj (Prov. 24:3).

21. ¿Tikinpatiojkaita tokniuan siuamej, niman tleka ijkon tikchiua? (Xkita tlaixkopinajli tlen nesi ixpan yejuin revista).

²¹ Tokniuan siuamej, melak timechtlasojtlaj ipampa tlen nenkichiuaj ipampa Jehová niman ikalpan (Heb. 6:10). Nemejuamej nemokojtiliaj nenkichikauaskej nemotlaneltok niman kuajli nenkichiuaskej tekitl tlen mechpaleuis niman tlen kinpaleuis oksekimej, niman ijkon kuajli nenkichiuaskej nemotekiyo ika tlayekapan. ¡Nochimej akin nemij ipan ikalpan Jehová melak mechpatiojkaitaj!