1. ¿Tlenon noneki kichiuaskej tokniuan tlakamej niman ijkon kuajli onkisaskej?

 TEKIUAJ David okijli Salomón: “Xmoyolchikaua niman xmouika ken sen kuajli tlayekanketl” (1 Rey. 2:​1-3). Melak kuajli tla tokniuan tlakamej ijkon kichiuaj. Tla kinekij kuajli onkisaskej, noneki kintlakamatiskej itlanauatiluan Jehová niman nochipa kichiuaskej tlen kijtoua Biblia (Luc. 2:52). ¿Tleka melak noneki ika tokniuan telpokamej makiteititikan ika chikauak kipiyaj intlaneltok?

2, 3. ¿Tleka melak noneki ika tokniuan telpokamej makipiyakan chikauak itlaneltok?

² Tokniuan tlakamej noneki kichiuaskej miyek tekitl ipampa inchanejkauan niman ipan tlanechikojli. Tla tejua titelpochtli, kanaj yotiknemili tlen tekitl tikneki tikselis ika tlayekapan. Kanaj yotikijto timochiuas precursor, tlapaleuijketl niman sakin tlayekanketl. Noso kanaj tikneki timonamiktis niman tikinpiyas mokoneuan (Efes. 6:4; 1 Tim. 3:1). Tla tikneki tikchiuas yejuin niman kuajli tonkisas, noneki chikauak tikpiyas motlaneltok. b

³ ¿Tlenon mitspaleuis xpiya chikauak motlaneltok? ¿Tlenon noneki tiuelis niman kuajli tikchiuas? Niman ¿tlenon uelis tikchiuas desde aman niman ijkon kuajli tikchiuas tekitl ika tlayekapan? Matikitakan.

4. ¿Kanon uelis tikinnextis akin mitspaleuiskej xchiua tlen kuajli? (Noijki xkita tlaixkopinajli).

⁴ Xchiua ijkon ken akin kuajli kichiuaj. Uelis tikchiuas ijkon ken miyekej tlakamej akin Biblia kinteneua: akin omelajkanenkej, melak okitlasojtlakej toTajtsin niman noijki kuajli okiyekankej ikalpan Jehová. Tla ipan mofamilia noso motlanechikol nemij akin chikauak kipiyaj intlaneltok, xchiua ken yejuamej (Heb. 13:7). Noijki, mitspaleuis tla tikita tlen okichiuj Jesucristo, akin xkipiaya tlajtlakojli (1 Ped. 2:21). Sakin ika yotikitak tlen yokichiujkej, xnemili tlenon más otikuelitak itech yejuamej (Heb. 12:​1, 2). Niman xkita tlenon uelis tikpatlas para noijki ijkon tikchiuas.

5. ¿Tlenon mitspaleuis kuajli xtlanemili, niman tleka melak noneki ijkon xchiua? (Salmo 119:9).

⁵ Nochipa kuajli xtlanemili (Prov. 3:21). Tlakamej akin kinekij ijkon kichiuaskej kixelouaj tiempo achto itlaj kitlapejpeniskej. Ika yejon, xmokojtili kuajli xtlanemili niman nochipa ijkon xchiua. ¿Tleka? Pampa ipan yejuin tonaltin nemij miyekej telpokamej akin noyekanaj san ika tlen kinemiliaj niman tlen kimachiliaj (Prov. 7:7; 29:11). Noijki, pampa uelis mitsijtlakos televisión, películas, internet niman redes sociales. Kuakon, ¿tlenon mitspaleuis kuajli xtlanemili? Kachtopa, noneki timomachtis tlanauatiltin tlen uajlauej ipan Biblia niman tiknemilis tleka tlen kijtoua Jehová melak mitspaleuis. Sakin, ika tlen yotimomachti, xtlapejpeni tlen makiyolpakti Jehová (xpoua Salmo 119:9). Tla timomajmachtia kuajli titlanemilis, mitspaleuis xchikaua motlaneltok (Prov. 2:​11, 12; Heb. 5:14). Aman tikitaskej kenon tla kuajli titlanemilia mitspaleuis xkita 1) kenon timouikas iuan tokniuan ichpokamej niman 2) xtlapejpeni kenon timotlakentis niman timokualnextis.

6. ¿Kenon kiteititia se telpochtli akin kuajli tlanemilia ika kintlakaita tokniuan siuamej?

⁶ Tla kuajli titlanemilia, mitspaleuis xkintlakaita tokniuan siuamej. Matikonnemilikan ika se tokniuj telpochtli kuelita se tokniuj ichpochtli niman kineki kixmatis. Yejon  xkijtosneki tla xkuajli. San ika, se telpochtli akin kuajli tlanemilia xkijtos noso xkijkuilos itlaj tlen makitlanemililti tokniuj ika kuelita tla xkinemilijtika iuan nonamiktis (1 Tim. 5:​1, 2). Niman tla noixmatstika iuan se tokniuj, xnoneki san iselti iuan nemis, ijkon xkichiuas makitejteneuakan. Noneki inuan nemis se tokniuj akin chikauak itlaneltok (1 Cor. 6:18).

7. ¿Kenon nokualnextia se tokniuj telpochtli akin kuajli tlanemilia?

⁷ Tokniuj telpochtli noijki uelis kiteititis ika tlanemilia ken Jehová tla kuajli kita kenon notlakentis niman kenon nopetsos. Miyekej akin kinchijchiuaj tlakentin xkitlakaitaj Jehová niman auilnemij. Ika yejon, tlakentin tlen kinchijchiuaj melak pitstikej noso kichiuaj ika tlakamej manesikan ken siuamej. Se telpochtli akin nokojtilijtika kichikauas itlaneltok, noneki kitas tlen kijtoua Biblia niman tlenon kichiuaj tokniuan ipan tlanechikojli ijkuak kitlapejpenis kenon notlakentis niman kenon noyektlalis. Kanaj uelis notlajtoltis: “¿Tlen niktlapejpenia kiteititia ika kuajli nitlanemilia niman ika nikintlakaita oksekimej? ¿Ken ninotlakentia kiteititia ika niktekichiuilia toTajtsin?” (1 Cor. 10:​31-33; Tito 2:6). Telpokamej akin kuajli tlanemiliaj xsan kichiuaj makintlakaitakan oksekimej tokniuan, noijki kichiuaj ika Jehová makintlakaita.

8. ¿Kenon se telpochtli kiteititis ika uelis itech tlaneltokaskej?

⁸ Motech matlaneltokakan. Yejon kijtosneki ika noneki tikchiuas nochi tekitl tlen mitsnauatiaj (Luc. 16:10). Xtlanemili itech Jesús, yejua okichiuj nochi tlen Jehová okitlajtlanili maski ouijtika katka. Kintlasojtlaya tlaltikpakchanejkej, más akin inomachtijkauan niman hasta okinek kitemakas inemilis inpampa (Juan 13:1). Ijkon ken Jesús, nochipa xmokojtili tikchiuas tekitl tlen mitsnauatiaj. Niman tla xtikmati kenon tikchiuas, xteititi ika tiyolyemanki niman xkijli yakaj akin ueltok mamitspaleui. Maka san achijtsin xchiua tla tikmati ika uelis más tikchiuas (Rom. 12:11). Xtlami tekitl tlen mitstlajtlaniliaj niman xchiua “para toTEKO niman xpara on tlakamej” (Col. 3:23). Yemelak, xnochi uelis kuajli tikchiuas, ika yejon, xteititi ika tiyolyemanki niman xseli ijkuak timopopolos (Prov. 11:2).

9. ¿Tleka se tokniuj telpochtli noneki nomajmachtis kuajli kichiuas seki tekitl?

⁹ Tla tikneki tikchikauas motlaneltok, noneki timomajmachtis kenon tikchiuas seki tekitl. Yejuin mitspaleuis kuajli xtlapaleui ipan tlanechikojli, xpiya se tekitl niman ijkon uelis tikinmakas mofamilia tlen kimpoloua, niman noijki mitspaleuis kuajli xmouika imiuan oksekimej. Matikitakan seki tlen uelis tikchiuas.

10, 11. ¿Kenon se tokniuj uelis kinpaleuis tokniuan tla kuajli tlajkuiloua niman tlaamapoua? (Salmo 1:​1-3; noijki xkita tlaixkopinajli).

¹⁰ Xmomachti kuajli titlaamapouas niman kuajli titlajkuilos. Biblia kijtoua ika, tla se  tlakatl kineki yolpaktos niman kuajli onkisas ipan inemilis, noneki mojmostla kiamapouas iTlajtol toTajtsin niman itech tlanemilis (xpoua Salmo 1:​1-3). Ijkon, uelis kimatis kenon tlanemilia Jehová, niman yejon kipaleuis kuajli matlanemili (Prov. 1:​3, 4). Ipan tlanechikoltin nonekij tlakamej akin ijkon makichiuakan. ¿Tleka?

¹¹ Nochimej akin nemij ipan tlanechikojli noneki ika tokniuan tlakamej makinmachtikan niman makinpaleuikan makasikamatikan iTlajtol toTajtsin (Tito 1:9). Tla tejua kuajli titlaamapoua niman kuajli titlajkuiloua, mitspaleuis kualtsin xkinyektlali motlamachtiluan niman kuajli xtlanankili, ijkon tikinyolchikauas oksekimej ika tlen tikijtos. Noijki, ijkuak timomachtis niman tikinkakis tlamachtiltin ipan totlanechikoluan niman toueyitlanechikoluan, uelis tikijkuilos tlen kichikauas motlaneltok niman tlen uelis kinyolchikauas oksekimej tokniuan.

12. ¿Tlenon mitspaleuis kuajli xmonotsa imiuan oksekimej?

¹² Xyejyeko kuajli timonotsas imiuan oksekimej. Yejuin melak noneki makichiuakan tokniuan tlakamej. Noneki kuajli tekakiskej niman kasikamatiskej tlen kinemiliaj niman kimachiliaj oksekimej (Prov. 20:5). Uelis tikmatis kenon yakaj nomachilia tla tijkaki kenon tlajtoua niman tla tikita kenon nesi ixayak ijkuak itlaj mitsijlia. San uelis ijkon tikchiuas tla tinemi imiuan tokniuan. Tla san nochipa tikinnotsa ipan teléfono, correos electrónicos niman mensajes, ouijtika tikitas titlajtos imiuan ijkuak tinemis imixpan. Kuakon, nochipa xkita kenon uelis titlajtos niman tinemis imiuan oksekimej (2 Juan 12).

13. ¿Tlenon más noneki uelis se tokniuj telpochtli? (1 Timoteo 5:8; noijki xkita tlaixkopinajli).

¹³ Xkita kenon timopanoltis. Se tokniuj akin chikauak itlaneltok kita ken nopanoltis niman kinpaleuiya ichanejkauan makipiyakan tlen kimpoloua (xpoua 1 Timoteo 5:8). Ipan seki kalpamej, telpokamej nomajmachtiaj kichiuaskej se tekitl tlen kichiua intaj noso okse inchanejkauj, niman ipan okseki kalpamej, telpokamej nomachtiaj ipan escuela niman ijkon itlaj ueliskej. Yejuin melak kinpaleuis makipiyakan tlen ika nopanoltiskej (Hech. 18:​2, 3; 20:34; Efes. 4:28). Chikauak xtekiti niman xtlamilti motekiyo. Tla ijkon tikchiua, kuajli tlajtoskej motech niman nochipa tikpiyas se tekitl. Nochi tlen yotikitakej noijki mitspaleuis kuajli xchiua motekiyo tlen tikpiyas ika tlayekapan. Matikitakan seki itech yejon.

14. ¿Tlenon kipaleuis se tokniuj telpochtli más chikauak makitekichiuili Jehová?

¹⁴ Uelis más chikauak tiktekichiuilis Jehová. Miyekej tokniuan akin aman kipiyaj chikauak intlaneltok, onochiujkej precursores ijkuak telpokamej katkaj. Tla tejua timochiua precursor, timomajmachtis titekitis imiuan tlatlamantikej tokniuan niman tiuelis kuajli tiktekitiltis motomin (Filip. 4:​11-13). ¿Tleka xtimochiua precursor auxiliar? Yejon yokinpaleui miyekej sakin manochiuakan precursores regulares. Niman yejon uelis kichiuas más chikauak xtekichiuili toTajtsin: uelis titlapaleuis kampa nochijchiuaj kaltin kampa tikueyichiuaj Jehová noso tontlapaleuis Betel.

15, 16. ¿Tlenon noneki kichiuas se tokniuj telpochtli tla kineki nochiuas tlapaleuijketl noso tlayekanketl?

¹⁵ Uelis timochiuas tlapaleuijketl noso tlayekanketl. Nochimej tokniuan tlakamej noneki nokojtiliskej niman ijkon nochiuaskej tlayekankej ipan tlanechikojli. Biblia kijtoua ika “sanoyej kuajli [ . . . ] kichiuas” akin ijkon tlapaleuiya (1 Tim. 3:1). Tla tikneki timochiuas tlayekanketl, kachtopa noneki timochiuas tlapaleuijketl. Tokniuan tlapaleuijkej melak kinpaleuiyaj tlayekankej ipan intekiyo. Tlayekankej niman tlapaleuijkej akin yolyemankej, kinpaleuiyaj imikniuan niman chikauak tenojnotsaj. Se tokniuj telpochtli uelis nochiuas tlapaleuijketl maski san kipiyas kanaj 17 noso 19 xiuitl. Niman se tlapaleuijketl uelis nochiuas tlayekanketl tla kuajli tekiti, maski san makipiya 20 xiuitl.

¹⁶ Ipan Biblia uajlauj nochi tlen noneki kichiuaskej telpokamej niman ijkon nochiuaskej tlapaleuijkej noso tlayekankej. Seki tlen ompa kitlajtlani kijtoua ika noneki kitlasojtlas Jehová, ifamilia niman tlanechikojli (1 Tim. 3:​1-13; Tito 1:​6-9; 1 Ped. 5:​2, 3). Melak mitspaleuis tla timokojtilia tikasikamatis tleka notlajtlani seki tlemach, niman noijki tla tiktlajtlanilia Jehová mamitspaleui ijkon xchiua. c

17. ¿Tlenon uelis kichiuas se telpochtli niman ijkon yes se kuajli teueuentsin niman kuajli kinyekanas ichanejkauan? (Noijki xkita tlaixkopinajli).

¹⁷ Uelis timonamiktis niman tikinyekanas mochanejkauan. Jesús okijto ika nemij tokniuan tlakamej akin kipiyaj chikauak intlaneltok niman yokitlapejpenijkej xnonamiktiskej (Mat. 19:12). San ika, tla tejua tiktlapejpenia timonamiktis, xmatsto ika nonekis timochiuas se kuajli teueuentsin niman nonekis tikitas kenon tikinyekanas mochanejkauan (1 Cor. 11:3). Jehová kichia ika teueuentsin makitlasojtla isiuatsin, makipaleui ika tlen kipoloua,  ika tlen kimachilia niman makipaleui machikaujto itlaneltok (Efes. 5:​28, 29). Kuakon, ipan yejuin tlamachtijli yotikitakej ika noneki kuajli titlanemilis, tikintlakaitas tokniuan siuamej niman tikchiuas motech matlaneltokakan. Nochi yejuin melak mitspaleuis kuajli xchiua motekiyo ken teueuentsin niman kuajli xkinyekana mochanejkauan.

18. ¿Tlenon uelis kichiuas se telpochtli niman ijkon yes se kuajli tajtli?

¹⁸ Uelis tikinpiyas mokoneuan. Tla timonamiktia, kanaj uelis nenkinpiyaskej nemokoneuan. Tlen okichiuj Jehová uelis mitspaleuis kuajli xchiua motekiyo ken tajtli (Efes. 6:4). Jehová xopinauj kijlis ikoneuj, Jesús, ika melak kitlasojtlaya niman ika kiyolpaktiaya (Mat. 3:17). Tla tikinpiya mokoneuan, kuajli tla nochipa tikimijlia ika tikintlasojtla niman tikimijlia ika tiyolpaki ipampa itlaj tlen kuajli okichiujkej. Tajtin akin kichiuaj ijkon ken Jehová, kinpaleuiyaj inkoneuan makichikauakan intlaneltok. ¿Tlenon uelis tikchiuas desde aman niman ijkon tiyes se kuajli tajtli? Uelis timomajmachtis tla kuajli tikinnotsa mochanejkauan niman tokniuan ipan tlanechikojli, noijki tla tikimijlia ika tikintlasojtla niman tikinpatiojkaita (Juan 15:9). Yejuin xsan mitspaleuis ijkuak tejua tiknekis timonamiktis niman tikinpiyas mokoneuan, noijki, mitspaleuis mamitspatiojkaita Jehová, mofamilia niman motlanechikol.

19, 20. ¿Tlenon noneki kichiuas se tokniuj telpochtli niman ijkon kichikauas itlaneltok? (Xkita tlaixkopinajli tlen nesi ixpan yejuin revista).

¹⁹ Tla tejua titelpochtli, xkilnamiki ika motlaneltok xsan iselti chikauis. Noneki tiktlapejpenis tikchiuas ijkon ken akin kichiuaj tlen kuajli, kuajli titlanemilis, tikchiuas motech matlaneltokakan, timomajmachtis tikchiuas seki tekitl niman tiuelis tlen mitspaleuis ika tlayekapan.

²⁰ Ijkuak titlanemilia ipan nochi tlemach tlen noneki tikchiuas, kanaj tikmachilia ika xtiuelis. San ika, maka xmosiaujkaua, ¡tejua uelis tikchiuas! Maka xkilkaua ika Jehová kinektika mitspaleuis (Is. 41:​10, 13). Niman tokniuan tlakamej niman siuamej akin nemij ipan motlanechikol noijki mitspaleuiskej. Tla tikchiua tlen Jehová kineki, nochipa tiyolpakis. Telpochtli, kuajli xmatsto ika melak timitstlasojtlaj niman tiktlajtlaniliaj Jehová nochipa mamitsteochiua pampa timokojtilia tikchikauas motlaneltok (Prov. 22:4).