JEHOVÁ miyek tlen yotechtlayokoli niman melak tiktlasojkamachiliaj pampa yejua techkauilia matiktlapejpenikan tlenon uelis ika toyolpaktiskej. Se itech yejon: vino. Biblia kijtoua ika “on iluitlakuajli para kueliliaj, niman on vino para tiyolpakis ipan monemilis” (Ecl. 10:19; Sal. 104:15). San ika, kanaj yotikitakej ika sekimej tlaltikpakchanejkej melak kuelitaj koniskej alcohol. Noijki, pampa tlamantik kampa ualeuaj niman tlen kichiuaj, miyekej tlaltikpakchanejkej tlamantik ken tlanemiliaj itech kech noneki koniskej alcohol. ¿Kenon titlanemiliaj akin tikchiuaj ken Cristo ijkuak titlajtouaj itech alcohol?

Ijkuak itlaj nonekis tiktlapejpeniskej, maka matikchiuakan ijkon ken oksekimej kichiuaj kampa tiualeuaj, yej matitlanemilikan ijkon ken toTajtsin kita alcohol. Tla ijkon tikchiuaj, melak tiyolpakiskej.

Kanaj yotikitakej ika nochiuiyan nemij miyekej tlaltikpakchanejkej akin kuelitaj koniskej miyek alcohol. Sekimej konij alcohol niman ijkon noseuiskej, oksekimej konij niman ijkon kilkauaskej tlen kixnamikij. Noijki, ipan seki kalpamej nemij akin konij miyek alcohol niman ijkon kiteititiskej ika youejueyiyakej niman yolchikaujkej.

San ika, akin tikchiuaj ken Cristo, toyekanaj ika tlen techijlia toTajtsin akin otexchijchiuj. Ipan iTlajtol techijlia ika tla tikonij miyek alcohol, xkuajli tlen topan nochiuas. Ken tlen kijtoua ipan Proverbios 23:​29-35. Ompa kiteneua yakaj akin melak tlauani niman kenon nokalaktia ipan tlauejli. a Daniel, se tlayekanketl akin chanti Europa, techijlia tlenon ipan onochiuj achto ika nochiuaskia iteixpantijkauj Jehová. Yejua kijtoua: “Pampa melak nikoniya alcohol, oniktlapejpeni miyek tlen xkuajli. Niman yejon okichiuj melak manitlajyoui”.

¿Tlenon techpaleuis matiktlapejpenikan tlen kuajli niman ijkon xtikoniskej miyek alcohol niman xtokalaktiskej ipan tlauejli? Matitlanemilikan ijkon ken toTajtsin ijkuak itlaj nonekis tiktlapejpeniskej.

Matikitakan tlenon kijtoua Biblia itech alcohol niman tleka sekimej kuelitaj koniskej.

ITlajtol toTajtsin xkijtoua tla xkuajli tla tikonij achijtsin alcohol. Ompa kijtoua ika tikonis alcohol uelis kichiuas xyolpaki, pampa ipan Eclesiastés 9:7 kijtoua: “Xpakatlakua; xpakaoni movino, pampa Dios kita kuajli on tlen tikchiua”. Noijki, Biblia kiteneua kenon Jesús niman oksekimej itekipanojkauan Jehová kemantika noijki okonikej achijtsin vino (Mat. 26:​27-29; Luc. 7:34; 1 Tim. 5:23).

San ika, xsan noijki tikonis achijtsin alcohol niman titlauanis. Biblia kuajli kijtoua: “Maka sa xtlauanikan” (Efes. 5:18). Noijki, kijtoua ika akin tlauanij “xkalakiskej kampa Dios tlamandaroua” (1 Cor. 6:10). Ken tikitaj, Jehová kintlauelita akin konij miyek alcohol niman tlauanij. Ika yejon, tejuamej xnoneki titlanemiliskej ijkon ken oksekimej, yej noneki tokojtiliskej titlanemiliskej ijkon ken toTajtsin niman tikchiuaskej tlen yejua kuelita.

Nemij akin kijtouaj: “Nejua uelis nikonis miyek alcohol niman xnitlauanis”. San ika, melak xkuajli akin ijkon tlanemiliaj. Biblia kijtoua ika tlakamej niman siuamej akin konij miyek alcohol, uelis kichiuaskej se tlajtlakojli niman xok kuajli nouikaskej iuan Jehová (Tito 2:3;  Prov. 20:1). Jesús okijto ika akin konij miyek alcohol xnemiskej ipan xochitlalpan (Luc. 21:​34-36). Akin tikchiuaj ken Cristo, ¿tlenon uelis techpaleuis maka matokalaktikan ipan tlauejli san ipampa alcohol?

Ken yotikitakej, uelis melak techijtlakos tla titlanemiliaj ijkon ken tlanemiliaj kampa tiualeuaj ijkuak nonekis tiktlapejpeniskej tla tikoniskej alcohol. Ika yejon, akin tikchiuaj ken Cristo tikchiuaj tlen kuelita Jehová ijkuak nonekis tiktlapejpeniskej tlenon tikuaskej niman tlenon tikoniskej. Biblia techijlia yejuin: “Tla nemejuamej nentlakuaj, noso nentlaonij, noso itlaj okse nenkichiuaj, nochi xchiuakan para Dios ma kiseli ueyilistli” (1 Cor. 10:31). Matikimitakan seki tlajtoltilistin niman tlaxeloltin itech Biblia tlen noneki tikilnamiktoskej ijkuak nonekis tiktlapejpeniskej itlaj.

¿Nikoni alcohol san pampa nikneki ninouikas imiuan akin ijkon kichiuaj? Éxodo 23:2 kijtoua: “Maka xmokalakti iminuan”. Ipan yejuin tlaxelojli, Jehová kimijlitoya israelitas ika maka makichiuakan ijkon ken akin kichiuayaj tlen xkuajli. Tlen okijto ok techpaleuiya akin tikchiuaj ken Cristo ipan yejuin tonaltin. Tla peua titlanemiliaj niman tikchiuaj ijkon ken oksekimej, xok tikintlakamatstoskiaj itlanauatiluan Jehová niman xok iuan touikaskiaj (Rom. 12:2).

¿Nikoni alcohol niman ijkon nikteititis ika niyolchikauak? Ipan seki kalpamej xkitaj tla xkuajli tla yakaj koni miyek alcohol (1 Ped. 4:3). San ika, matikitakan tlenon techijlia 1 Corintios 16:​13, ompa kijtoua: “Xtlachixtiakan tej, niman xmelajkanemikan ipan nemotlaneltok. Xmoyolchikauakan niman xpiyakan chikaualistli”. Kuajli nesi ika tikonis miyek alcohol xkichiua xyolchikaui, yej kichiua xtlamachilispoliui niman xtlapejpeni tlen xkinamiki. Kuakon, tla tikoni alcohol, xmitsyolchikauas. Isaías 28:7 kijtoua ika akin konij miyek alcohol “hasta papatiliuij niman kintlamachilispoloua”.

Tla tiknekij tiyolchikaujkej yeskej niman tikchiuaskej tlen kuajli, noneki topaleuiskej itech Jehová niman tokojtiliskej titlatlachixtoskej niman timelajkanemiskej (Sal. 18:32). Ika  yejon, noneki tikitaskej tlenon xnoneki tikchiuaskej tlen uelis kijtlakos ken touikaj iuan Jehová. Yejon tlen okichiuj Jesús. Ijkuak yejua ouajlajka ipan tlaltikpaktli, okiteititi ika melak yolchikauak katka niman ika nochipa kichiuaya tlen kuajli.

¿Nikoni alcohol niman ijkon nikilkauas tlen nikixnamiktika? Se salmista okijli Jehová: “Ijkuak sa tlajtlamach ika ninotenmatiya, tejua otinechyoltlalij, niman otinechyolpaktij” (Sal. 94:19). Tla kemantika itlaj mitsajmana, xmopaleui itech Jehová niman maka xkoni alcohol. San uelis itech timopaleuis tla nochipa tiknotsa. Miyekej yokintlajtlanilijkej tokniuan akin nemij ipan intlanechikol niman chikauak kipiyaj intlaneltok, makinpaleuikan. Niman tikmatstokej ika ijkuak yakaj koni alcohol niman ijkon kixnamikis tlen ouijtika, xok yolchikauak niman uelis kitlapejpenis tlen xkuajli (Os. 4:11). Daniel, akin kachtopa otikteneujkej, kijtoua: “Nikoniya alcohol niman ijkon nikilkauas tlen nikixnamiktoya niman tlen nechtlajyouiltijtoya. San ika, yejon kichiuaya ika más maninajmana, manikinpolo noamigos niman maka manechtlakaitakan”. ¿Tlenon okipaleui Daniel? Yejua kijtoua: “Onikitak ika nonekiya ninopaleuis itech Jehová niman xnikonis alcohol. Pampa ijkon onikchiuj ouel onikxiko tlen xkuajli nikixnamiktoya”. Maka matikilkauakan ika Jehová techpaleuis ika tlen tikixnamikij niman ika tlen tikitaj ouijtika (Filip. 4:​6, 7; 1 Ped. 5:7).

Tla tejua kemantika tikoni alcohol, mitspaleuis tla timotlajtoltia yejuin: “¿Se nochanejkauj noso se noamigo yonechijli ika noneki kuajli nikitas kech alcohol nikoni?”. Tla ijkon yomitsijlikaj, kijtosneki ika ipeujtika tikuelita tikonis miyek alcohol. Noijki kuajli tla timotlajtoltia: “¿Aman más yopeuj nikoni alcohol xijkon ken yeuejkaui?”. Yejon uelis techpaleuis matikitakan tla itiknekij nochipa tikoniskej alcohol. Sa ika tlami, noijki uelis timotlajtoltis: “¿Xika noyojlo ninemi tla uejkaui xnikoni alcohol?”. Tla ijkon panoua, kijtosneki ika yopeuj tikuelita miyek tikonis alcohol niman nonekis tiktlajtlanilis se ixtlamatki mamitspaleui.

Sekimej tokniuan xkonij nion achijtsin alcohol  pampa xkinekij peuas koniskej alcohol. Niman nemij oksekimej tokniuan akin xkonij alcohol pampa xkueliliaj kenon machisti. Tla tikixmatij yakaj akin ijkon yokitlapejpeni kichiuas, matiktlakaitakan niman maka matiktejteneuakan.

Oksekimej, kuajli yokinemilijkej tlenon kichiuaskej niman ijkon inselti noteltiskej ijkuak koniskej alcohol. Yejuamej, kanaj kitaj kech niman kechpa koniskej alcohol, noso san konij achijtsin alcohol ijkuak tlakuaj noso san sejpa ipan se semana. Noijki kinpaleuis tla kitaj tlen alcohol koniskej niman katlejua ka. Kanaj uelis kitlapejpeniskej koniskej achijtsin vino noso cerveza, san ika, xkoniskej okseki tlemach tlen kipiya más alcohol. Ijkuak kuajli toixmatij niman tikasikamatij kech alcohol uelis tikoniskej, xouijtika tikitaj toselti toteltiskej. Se tokniuj akin chikauak kipiya itlaneltokil niman nokojtilia kichiuas ijkon ken yokitlapejpeni, xkipiya ika pinauis.

Noijki, noneki titlanemiliskej intech oksekimej. Romanos 14:21 kijtoua: “Kuajli tikchiuas tla xtikuas nakatl, nion tikonis vino, nion tikchiuas itlaj yejuan ika najantikisas mokniu”. Kijtosneki ika noneki titlanemiliskej intech oksekimej niman tikimititiskej ika tikintlasojtlaj. Tla tikitaj ika se tokniuj noyolkokos pampa tejuamej tikonij alcohol, kuajli tla ijkuakon xtikonij. Ijkon, tikteititiskej ika tikintlakaitaj oksekimej niman ika xsan totech titlanemiliaj (1 Cor. 10:24).

Akin tikchiuaj ken Cristo noijki tikintlakamatij gobiernos ijkuak kijtouaj itlaj itech alcohol. Ken ijkuak kijtouaj ika akin ximás uejueyimej noso akin kinejnemiltiskej carro xnoneki koniskej alcohol (Rom. 13:​1-5).

Jehová melak miyek tlemach yotechtlayokoli niman noijki techkauilia san no tejuamej matiktlapejpenikan kenon tiktekitiltiskej tlen yotechmakak. Kuakon, tinochimej uelis tiktlapejpeniskej tlenon tikuaskej niman tlenon tikoniskej. ¡Nochipa matiktlapejpenikan tlen tikitaskej ika kiyolpaktis toTajtsin iluikakchane!