1, 2. ¿Kenon Jehová kuelita kitemakas tlen kipiya?

JEHOVÁ se toTajtsin akin kuelita kitemakas. Nochi tlen tikpiyaj itech ualeua. Yejua iyaxka nochi oro, plata niman okseki tlen onka ipan tlaltikpaktli, niman kitemaka nochi tlen noneki niman ijkon maonia nemilistli (Sal. 104:13-15; Ageo 2:8). Biblia kiteititia ika Jehová okintekitilti yejuin tlemach ipan milagros niman ijkon kinmakas itekipanojkauan tlen kinpolouaya.

² Se neskayotl, Jehová okinmakak israelitas maná niman atl ijkuak onenkej 40 xiujtin ipan tlaluaktli (Éx. 16:35). Ipampa yejuin, “yejuamej xtlaj okinpolo” (Neh. 9:20, 21). Itechkopa teotlajtoketl Eliseo, Jehová okichiuj se milagro kampa okimiyekili iaceite se siuakauajli akin yolmelaujki katka. Ipampa yejuin, yejon siuatl ouel okitlaxtlauj nochi tlen kiteuikiliaya niman ok onokauj itomintsin tlen ika nopanoltiskej yejua niman ikoneuan (2 Rey. 4:1-7). Niman noijki, Jehová okimakak Jesús kojtilistli tlen ika kichiuas milagro ika kitemakas tlakuajli niman hasta tomintsin ijkuak ononek (Mat. 15:35-38; 17:27).

3. ¿Tlenon tiknankiliskej ipan yejuin tlamachtijli?

³ Jehová uelis kitekitiltis tlen yejua kinekis niman ijkon kuajli matekiti nochi tlen yokichijchiuj ipan tlaltikpaktli. Maski ijkon, yejua kinyolchikaua itekipanojkauan makipaleuikan ikalpan ika tlen  kipiyaj (Éx. 36:3-7; xpoua Proverbios 3:9). * ¿Tleka kichia Jehová matikmakakan tlen patioj tikpiyaj tlen itech oualeuj? ¿Kenon itekipanojkauan toTajtsin akin yeuejkaui onenkej okipaleuijkej tlaneltokijli tlen melauak ika tomintsin? ¿Kenon kitekitiltia ikalpan toTajtsin tomintsin tlen kiselia? Ipan yejuin tlamachtijli, tiknankiliskej yejuin.

4. ¿Tlenon tikititiaj Jehová ijkuak tikpaleuiyaj ikalpan?

⁴ ¿Tleka tikmakaj Jehová tlen tikpiyaj? Pampa tiktlasojtlaj niman tiktlasojkamatij nochi tlen kichiua topampa. Toyojlo paki ijkuak titlanemiliaj ipan yejuin. Tomachiliaj ijkon ken tekiuaj David akin otetomili tlenon nonekiya ijkuak nochijchiuaskia teopan. Yejua okijto ika nochi tlen tikpiyaj ualeua itech Jehová niman, ika yejon, nochi tlen tikmakaj ualeua itech tlen yejua yotechmakak (xpoua 1 Crónicas 29:11-14). *

5. ¿Kenon kiteititia Biblia ika tiktemakas niman xtikchias mamitskuepilikan melak noneki ijkuak tikueyichiuaj Jehová?

⁵ Okse tlen ika tikmakaj Jehová tlen tikpiyaj yejua pampa ijkon tikueyichiuaj. Ipan se tlatlachalistli, apóstol Juan okinkak itekipanojkauan toTajtsin ipan iluikak kijtouayaj: “ToTeko Dios, tejua mitsmelaua para tikselis ueyilistli, tetlakaitalistli, niman poder, pampa tejua nochi tlajtlamach otiktlalij niman ken tejua otiknek otikintlalij niman onokej” (Apoc. 4:11). Yemelak, Jehová kinamiki nochi ueyilistli niman tetlakaitalistli, ika yejon, noneki tikmakaskej tlen melak kuajli itech tlen tikpiyaj. Ipan itonaluan Israel, Jehová okinauati yejuin kalpan itechkopa Moisés makichiuakan yeyi iluitl ipan se xiuitl. Tlanauatijli kijtouaya: “Niman nion se xkipiya san mapijpilkatias ijkuak yas ixpan Jehová” (Deut. 16:16). Ken tikitaj, kimakaskej Jehová tlen kipiayaj ipan yejuin iluimej noijki ijkon kiueyichiuayaj. Amanin, tiktemakas niman xtikchias mamitskuepilikan noijki ijkon tikueyichiuaj Jehová. Ijkuak tikchiuaj, tikteititiaj ika tikpatiojkaitaj niman tikpaleuiyaj tekitl tlen kichiua ikalpan Jehová ipan tlaltikpaktli.

6. ¿Tleka techpaleuiya tikuelitaskej tiktemakaskej tlen tikpiyaj? (Xkita tlaixkopinajli kampa peua tlen tomachtijtokej).

⁶ Techpaleuiya ijkuak tikuelitaj tiktemakaskej niman xsan titlaseliskej (xpoua Proverbios 29:21). * Se neskayotl, matiknemilikan ika se konetl kintlayokolia intajuan itlaj ika tomin tlen yejuamej kimakanij. ¿Xmelak ika melak kitlasojkamatiskej? Noso matitlanemilikan ipan se telpochtli akin precursor niman chanti iuan itajuan, yejua kinmaka tomin niman ijkon tlapaleuis ipan tlen nonekis ipan ichan. Tajtin kanaj xkichiaj makinmaka tomin, san ika, kanaj kiseliliaj pampa ijkon inkoneuj kimititia ika kitlasojkamati tlen yokichiujkej ipampa. Noijki ijkon, Jehová kimati ika techpaleuiya tla tikmakaj itech tlen patioj tikpiyaj.

7, 8. a) ¿Kenon otlapaleuijkej itekipanojkauan toTajtsin ipan tlen yononemilijka nochiuas? b) ¿Kenon kitemakayaj tlen kipiayaj itekipanojkauan Jehová itech ken kiueyichiuayaj?

⁷ Ipan Biblia tiknextiaj neskayomej tlen kiteititiaj ika itekipanojkauan Jehová kitemakayaj itech tlen kipiayaj. Kemantika, kitemakayaj ijkuak itlaj yononemilijka nochiuas. Se neskayotl, Moisés okinyolchikauj israelitas makitemakakan tlen kipiayaj niman ijkon nochijchiuas tabernáculo, niman tekiuaj David noijki okichiuj ijkon ijkuak  onochijchiuj teopan (Éx. 35:5; 1 Crón. 29:5-9). Ipan itonaluan tekiuaj Jehoás, teopixkej okiyektlalijkej ichan Jehová ika tomin tlen kalpan okitemakaka (2 Rey. 12:4, 5). Ipan kachtopa siglo, akin kichiuayaj ken Cristo okimatkej ika imikniuan nonekiya makinpaleuikan pampa onkatka se apistli ipan Judea. Biblia kijtoua ika nochimej inseselti otlapaleuijkej ika tlen kipiayaj (Hech. 11:27-30).

⁸ Noijki, itekipanojkauan toTajtsin okitemakakej tlen kipiayaj niman ijkon kinpaleuiskej akin kiyekanayaj ken noueyichiuaya Jehová. Ijkon ken kijtouaya Tlanauatijli tlen okimakakej Moisés, levitas xtlaj kiseliayaj, xijkon ken okseki tribus. Kuakon nochimej ipan kalpan kinpaleuiayaj levitas ijkuak kitemakayaj diezmo niman ijkon levitas ueliyaj kichiuayaj intekiyo ipan tabernáculo (Núm. 18:21). Seki xiujtin sakin, Jesús niman inomachtijkauan onopaleuijkej itech itlaj ken yejon ijkuak seki siuamej kinpaleuiayaj ika tlen kipiayaj (Luc. 8:1-3).

9. ¿Kanon ualeuaya tlen kitemakayaj itekipanojkauan toTajtsin akin yeuejkaui onenkej?

⁹ Nochi yejon tlen kitemakayaj miyekan ualeuaya. Se neskayotl, ijkuak nochijchiuaskia tabernáculo ipan tlaluaktli, israelitas okitemakakej tlen kipiayaj niman seki itech yejuin kanaj ualeuaya Egipto (Éx. 3:21, 22; 35:22-24). Ipan kachtopa siglo, sekimej akin kichiuayaj ken Cristo okinemakakej tlen kipiayaj, ken tlaltin noso kaltin, niman okimitkilijkej tomin apóstoles. Niman yejuamej, okinxexelouilijkej nochimej akin kinpolouaya (Hech. 4:34, 35). Oksekimej kixelojtiayaj seki intomintsin niman yonomatkaj kitemakayaj yejuin, ijkon kipaleuiayaj ken noueyichiua toTajtsin (1 Cor. 16:2). Ijkon tej, maski tla kipiayaj miyek tomin noso ka, nochimej akin kichiuayaj ken Cristo kitemakayaj san kech ueliyaj (Luc. 21:1-4).

10, 11. a) ¿Kenon uelis tikixkopinaskej ken kuelitayaj temakaskej itekipanojkauan Jehová akin yeuejkaui onenkej? b) ¿Kenon timomachilia tejua pampa ueli tikpaleuiya itekiyo Tekiuajyotl?

¹⁰ Amanin, uelis nonekis tomintsin ipan itlaj tlen yononemili nochiuas. Kanaj totlanechikol kinemilijtika kiyenkuilis itlaj ipan Kajli kampa Tosentlaliaj noso kichijchiuas se yenkuik. Noso kanaj techtomiliskej ika noneki tomintsin tlen ika itlaj noyenkuilis ipan sucursal, notlaxtlauas se ueyi tlanechikojli kampa tosentlaliaj noso tikinpaleuiskej tokniuan sakin ika opanok itlaj tlen tlaixpoloua. Tomintsin tlen tiktemakaj noijki ika nopaleuiyaj misioneros, precursores especiales, tlayekankej ipan circuito, niman tokniuan akin tekitij ipan oficina kampa noyekanaj nochi sucursales, niman ipan sucursales itech nochi tlaltikpaktli. Noijki, tikmatstokej ika totlanechikol yokijto kech tomin kititlantias nochi metstin ipan programa tlen ika nochijchiuaj Kaltin kampa Tosentlaliaj niman kampa nochiuaj uejueyimej tlanechikoltin, tlen kinpaleuiya tokniuan ipan nochi tlaltikpaktli.

¹¹ Tinochimej uelis tikpaleuiskej tekitl tlen kichiujtika Jehová ipan yejuin itlamiyan tonaltin. Miyek itech tomintsin tlen notemaka xnomati akinon kitemaka, pampa tikontlajkalij ipan cajas kampa notlalia tomin tlen onka ipan Kajli kampa Tosentlaliaj noso tiktitlanij itech jw.org. Kanaj tiknemiliskej ika pampa xmiyek kech tiktemakaj xueyi tlapaleuiya. San ika, miyek itech tomintsin tlen notemaka amanin xualeua itech tlen ueyi notemaka, tlen xmiyekej kichiuaj, ualeua itech tlen achijtsin notemaka, niman tlen miyekej kichiuaj. Nochimej tokniuan, hasta akin xmiyek kipiyaj, kichiuaj ken tokniuan akin onenkej ipan Macedonia ipan kachtopa siglo. Sekimej, maski “sanoyej mayankej” katkaj, okitlajtlankej makinkauilikan matlapaleuikan, niman ika inyojlo okitemakakej (2 Cor. 8:1-4).

12. ¿Tlenon kichiua ikalpan toTajtsin niman ijkon kuajli kitekitiltis tomintsin tlen noselia?

¹² Grupo akin Tlayekana ipan ikalpan toTajtsin nokojtilia kitekitiltis tomintsin ika melajkayotl niman tlamachilistli (Mat. 24:45). Yejuin tokniuan kichiuaj teoyotl niman kuajli kinemiliaj kenon kitekitiltiskej (Luc. 14:28). Itech tonaltin tlen kiteneua Biblia, notejtemouayaj tlakamej  yolmelaujkej akin kiyekanaskiaj ken notekitiltis tomin. Yejuamej kuajli kitayaj ika tomintsin san manotekitilti ipan ken noueyichiuas Jehová. Se neskayotl, se tonajli, Esdras onokuep Jerusalén ika miyek tlen patioj tlen okitemakaka tekiuaj persa, ompa uajlaya oro, plata niman okseki tlemach tlen aman patioj yeskia kanaj 1,700 millones, pesos mexicanos. Esdras kitaya nochi yejuin tlen patioj ken itlaj tlen okimakakej Jehová, ika yejon, kuajli otlanauati kenon kitlajpiyaskej ijkuak nojuitiskiaj kampa tlatemojtikan (Esd. 8:24-34). Miyek xiujtin sakin, apóstol Pablo okinechiko tomin tlen ika kinpaleuiskiaj tokniuan itech Judea niman kuajli okitak ika akin kixeloskiaj manoyekanakan “ken kitocaroua xsan ixpan toTeko, yej no imixpan on tlakamej” (xpoua 2 Corintios 8:18-21). Ipan yejuin tonaltin, ikalpan toTajtsin noyekana ika inneskayo Esdras niman Pablo. Ika yejon kuajli kiteijlia kenon notekitiltis niman nopopolos tomintsin tlen noselia.

13. ¿Tleka ikalpan toTajtsin yokipatlak seki tlen nochiuaya?

¹³ Kemantika seki familias noneki kipatlaskej kenon kitekitiltiaj intomin niman ijkon xkipopoloskej tlen nion xkitlanij. Noso kanaj kitejtemouaj nemiskej ika achijtsin niman ijkon uelis kiueyiliskej tlen kichiuaj ipampa Jehová. Ipan ikalpan Jehová panoua itlaj ken yejuin. Seki xiujtin tlen kemach yopanokej, yonopeualti seki tekitl tlen melak teyolpakti. Kemantika yejuin okichiuj ika manopopolo miyek tomin, hasta kipanauiaya kech noseliaya. Ika yejon, ikalpan toTajtsin kitejtemoua kenon xkipopolos miyek tomin niman okitak kenon kitsolos tekitl. Ijkon, tomintsin tlen tiktemakaj, tlen melak ueyi kijtosneki, melak kuajli ken notekitiltia.

14-16. a) ¿Ipan tlenon notekitiltijtika totomintsin tlen tiktemakaj? b) ¿Kenon yomitspaleui tejua nochi tetlayokoliltin tlen techmaka ikalpan toTajtsin?

¹⁴ Miyekej tokniuan akin kuikaj miyek xiujtin ika kitekichiuilijtokej Jehová kijtouaj ika xkeman kiseliayaj miyek tetlayokoliltin itech ikalpan toTajtsin ken aman. Niman melauak tlen kijtouaj. San xkonnemili, ipan xiujtin tlen yoonpanokej onochijchiuj página jw.org niman canal JW Broadcasting. Niman, Traducción del Nuevo Mundo de las Santas Escrituras onka ipan miyek tlajtoltin xijkon ken yeuejkaui. Noijki, ipan 2014 niman 2015, onochiujkej ueyi tlanechikoltin iuan miyekej países, tlen intoka “¡Matiktejtemokan achtopa iTekiuajyo toTajtsin!”, ipan seki estadios tlen melak uejueyimej ipan 14 ueyikalpamej iyeualiyan nochi tlaltikpaktli. Nochimej akin onenkej ipan yejuin tlanechikoltin melak okuelitakej.

 ¹⁵ Miyekej yokijtokej kenon melak kitlasojkamatij nochi tlen kualtsin techmaka ikalpan toTajtsin. Se neskayotl, se tokniuj iuan isiuauj akin tlapaleuiyaj ipan se pitentsin kalpan itech Asia okijto itech JW Broadcasting: “Kemantika tikmachiliaj ika melak uejka tinemij intech oksekimej niman xouijtika tikilkauaj kech ika ueyi itekiyo Jehová. San ika, ijkuak tikitaj programas ipan JW Broadcasting, nimantsin tikilnamikij ika tinemij ipan se kalpan kampa tikinpiyaj tokniuan ipan nochi tlaltikpaktli. Nikan, totlasojkaikniuan melak kinyolpaktia JW Broadcasting. Miyekpa, tikinkakij kijtouaj ika programas tlen kisaj nochi metstin kichiua manomachilikan nisiuj itech tokniuan akin nemij ipan Grupo akin Tlayekana. Aman ijkon ken xkeman, melak pakij ika nemij ipan ikalpan toTajtsin”.

¹⁶ Nochiuiyan ipan tlaltikpaktli, nochijchiujtokej noso noyenkuilijtokej kanaj 2,500 Kaltin kampa Tosentlaliaj. Ipan Honduras, tokniuan itech se tlanechikojli okijkuilojkej yejuin ijkuak opeuj kitekitiltiaj se yenkuik Kajli kampa Tosentlaliaj: “Melak tiyolpakij pampa tinemij itech ikalpan tlen kipiya Jehová ipan iluikak niman tlaltikpaktli niman ika uelij touikaj iuan nochimej tokniuan ipan nochi tlaltikpaktli. Ipampa yejuamej, ouel otikpixkej ipan tokalpan se Kajli kampa Tosentlaliaj, itlaj tlen san tiktemikiyaj”. Miyekej noijki ijkon kijtouaj ijkuak kiseliaj Biblia niman okseki amatlajkuiloltin ipan intlajtol, ijkuak kinpaleuiyaj sakin ika itlaj otlaixpolo, noso ijkuak kitaj kenon kuajli onkisa tenojnotsalistli kampa tojlan nojuitilo niman ipan uejueyimej kalpamej.

17. ¿Kenon tikmatij ika Jehová kipaleuijtika ikalpan ipan yejuin tonaltin?

¹⁷ Miyekej tlaltikpakchanejkej akin xiteixpantijkauan Jehová xuelij kineltokaj nochi tlen tiuelij tikchiuaj san ika tomintsin tlen ika toyojlo tiktemakaj. Se akin kipiya ueyi tekitl ipan se empresa okitato kampa tikpiyaj se imprenta niman omojkatlachix ijkuak okimat ika nochimej akin ompa tekitij xkintlaxtlauiliaj, nochi nochiua ika tomintsin tlen oksekimej ika inyojlo kitemakaj niman ika xkeman notlajtlani tomintsin. Okijto ika xueliskia nochiuas tlen tejuamej tikchiuaj. Niman noijki ijkon tiknemiliaj. Tikmatij ika nochi ueli nochiua pampa techpaleuiya Jehová (Job 42:2).

18. a) ¿Tlen tlateochiualistin tikseliaj ijkuak tikmakaj Tekiuajyotl itech tlen tikpiyaj? b) ¿Kenon uelis tikinmachtiskej tokoneuan niman akin kemach nomachtijtokej noijki makitemakakan itech tlen kipiyaj?

¹⁸ Tiktlasojkamatij ika Jehová techkauilia matitlapaleuikan itech ueyi tekitl tlen kichiujtika Tekiuajyotl ipan yejuin tonaltin. Yejua techijlia ika, tla tikchiuaj, tikseliskej tlateochiualistin (Mal. 3:10). Niman yejua yokijto ika akin kuelita kitemakas kuajli onkisas ipan inemilis (xpoua Proverbios 11:24, 25). * Noijki, kichiuas matipakikan, pampa “más paki on yejuan kitemaka xken on yejuan kiselia” (Hech. 20:35). Niman xsan yejon, noijki tikpiyaj kualtsin tekitl, pampa ika totlajtoluan niman tlen tikchiuaj uelis tikinmachtiskej tokoneuan niman akin kemach nomachtijtokej itech kenon yejuamej noijki uelis kitemakaskej tlen kipiyaj niman kiseliskej miyek tlateochiualistin.

19. ¿Kenon yomitsyolchikauj yejuin tlamachtijli?

¹⁹ Nochi tlen tikpiyaj ualeua itech Jehová. Tikmakaskej itech tlen tikpiyaj kiteititia ika tiktlasojtlaj niman ika tiktlasojkamatij nochi tlen yokichiuj topampa (1 Crón. 29:17). Ijkuak kalpan Israel okitemakak tlen kipiaya niman ijkon nochijchiuas teopan, “kalpan melak oyolpak pampa okitemakakej yejuin uentin tlen intech okis, pampa yejuamej okimakakej Jehová uentin tlen intech okis ika nochi inyojlo” (1 Crón. 29:9). Tejuamej noijki matikmachilikan yejon pakilistli tlen tikpiyaj ijkuak tikmakaj Jehová itech tlen yejua yotechmakak.