KEMANTIKA, kema. Xkita se neskayotl. Deuteronomio 24:14, 15 kijtoua: “Xkipiya tiktlachtekilis se tlakeuajli akin xtlaj kipiya niman mayanki, maski tla se itech mokniuan noso se akin xchanej ipan motlal, ipan mokalpanuan [...]. Tla xijkon tikchiua, yejua chikauak kitsajtsilis Jehová niman xkuajli tlajtos motech, kuakon motlajtlakol yes”.

Inisiuj ueyikalpan Asdod, ononexti tepalkatlajkotsitsintin tlen onochijchiuj ipan siglo 7 (i.x.x. 1). Ompa ijkuiliujtika tlen okitlajtlan se tlakatl pampa ipan onochiuj ijkon ken kijtoua Deuteronomio 24. Nesi, ika yejuin tlakatl katka se tokaketl akin itech onoijto ika xokajxiltijka tlayojli tlen kitlajtlaniliayaj, maski yejuin xmelauak katka. Kijtoua: “Sakin ika motekipanojkauj [akin noteiluiya] yotlanka kejyeua tlen onopixkak, ikipiaya seki tonaltin, Hoshayahu tekoneuj itech Shobay ouajla niman okitkik itlaken motekipanojkauj. [...] Nochimej akin inuan nitekiti akin pixkatoyaj nouan maski melak tona katka kiteixpantiskej [...] ika tlen yonikijto melauak. Nejua xtlaj onikchiuj tlen xkuajli. [...] Tla tekiuaj kita ika xitekiyo kichiuas ika makikuepilikan motekipanojkauj itlaken, kuakon makichiua ipampa teiknelilistli. Xkipiya tikamatsauktos ijkuak motekipanojkauj xkipiya itlaken”.

Ixtlamatki Simon Schama kijtoua ika yejuin tlen onotlajtlan “xsan techijlia ika tekitketl melak kajmanaya makikuepilikan [itlaken]”. Noijki kijtoua: “Teasikamachiltia ika akin otetlateiluili kimatiya itlaj itech tlanauatiltin tlen kisaj itech Biblia, tikinteneuaj tlanauatiltin tlen onka ipan Levítico niman Deuteronomio kampa techikajkanotsa itech tikintlajyouiltis mayankej”.