1. ¿Tleka tikijtouaj ika tinemij ipan tonaltin kampa miyek tlen panotika?

TINEMIJ ipan tonaltin kampa miyek tlen panotika. Ijkon ken yokijtoka Biblia, Jehová kisentlalijtika melak miyekej tlaltikpakchanejkej itech “nochiuiyan países, nochi raza, nochi pueblo niman nochi sesetlamantik tlajtoltin”. Nochi yejuamej “se chikauak kalpan” tlen aman yonochiujkej ipantsin chikueyi millones tlaltikpakchanejkej akin yolpakij niman “kimauistiliaj Dios ikan tonajli niman yeuajli ne ipan iueyitiopan” (Apoc. 7:9, 15; Is. 60:22). Xkeman ijkon onenkej miyekej akin makitlasojtlakan toTajtsin niman makintlasojtlakan oksekimej.

2. ¿Katlejua tlasojtlalistli kipiyaj tlaltikpakchanejkej akin uejka nemij itech toTajtsin? (Xkita tlaixkopinajli kampa peua tlen tomachtijtokej).

² San ika, Biblia noijki yokijtoka ika ipan yejuin tonaltin, tlaltikpakchanejkej akin uejka nemij itech toTajtsin kipiyaskiaj okse tlasojtlalistli, se tlasojtlalistli tlen san itech tlanemilia. Apóstol Pablo okijkuilo ika, “sa itlajtlankan on tonajli”, miyekej “tsotsokamej yeskej [‘sa no yejuamej notlasojtlaskej’, TNM]”, “sanoyej kejeleuiskej tomin [‘kitlasojtlaskej tomin’, TNM]” niman “sa kinejnektiaskej on impakilis ipan in tlaltikpaktli xej kitetemoskej tlinon ika kipaktiskej Dios [‘kitlasojtlaskej tlen ika noyolpaktiskej maka ken kitlasojtlaskej toTajtsin’, TNM]” (2 Tim. 3:1-4). Yejuin tlasojtlalistli tlen san itech tlanemilia xijkon ken  tlasojtlalistli itech toTajtsin niman xkinmaka tlaltikpakchanejkej pakilistli tlen kichiaj kipiyaskej. San ika, kema kichiua ika tlaltikpakchanejkej san intech matlanemilikan niman kichiua ika innemilis nochimej maouijtika.

3. ¿Tlenon tikitaskej ipan yejuin tlamachtijli, niman tleka?

³ Pablo kimatiya ika tlasojtlalistli tlen san itech tlanemilia nochiuiyan nosemoyauaskia niman uelis kimijtlakos akin kichiuaj ken Cristo. Ika yejon, otechijli matikintlalkauikan akin kiteititiaj yejuin xkuajli tlasojtlalistli (2 Tim. 3:5). Pampa melauak ika xuelis kuajli tikintlalkauiskej yejuin tlaltikpakchanejkej, kuakon, ¿kenon uelis tikchiuaskej niman ijkon tikmapeuaskej ken kichiuaj tlaltikpakchanejkej akin techyeualouaj niman tokojtiliskej tikyolpaktiskej Jehová, toTajtsin akin yejua tlasojtlalistli? Matikitakan kenon xsan noijki tlasojtlalistli tlen toTajtsin kineki matikpiyakan niman tlasojtlalistli tlen noteneua ipan 2 Timoteo 3:2-4. Yejuin techpaleuis matotlachilikan niman matikitakan kenon tikiskaltiskej tlasojtlalistli tlen yemelak kichiuas kuajli matomachilikan niman matipakikan.

4. ¿Tleka tikmatij ika kuajli tla totlasojtlaj san ken kinamiki?

⁴ Ken yotikitakej, Pablo okijkuilo: “Tlakamej sa no yejuamej notlasojtlaskej”. ¿Kijtosneki yejuin ika xkuajli sa no tejuamej matotlasojtlakan? Ka. Tinochimej totlasojtlaj niman hasta noneki matotlasojtlakan san ken kinamiki. Ijkon otexchijchiuj Jehová. Jesús okijto: “Xkintlajsojtla oksekimej no ijki ken tejua timotlajsojtla” (Mar. 12:31). Tla xtotlasojtlaj sa no tejuamej, xuelis tikintlasojtlaskej oksekimej. Niman, Biblia kijtoua: “Ijkon, tej, ken on tlakatl kitlasojtla itlalnakayo, ijki noneki kitlajsojtlas isiuau. Yejuan kitlajsojtla isiuau sa no yejua notlajsojtla. Xakaj nemi yejuan xkitlajsojtla itlalnakayo, yej kitlakualtia niman cuidaroua” (Efes. 5:28, 29). Ika yejon, kuajli ika matotlasojtlakan san ken kinamiki.

5. ¿Kenon kichiuaj akin melak notlasojtlaj?

⁵ Timotlasojtlas sa no tejua ken noteneua ipan 2 Timoteo 3:2 xtechpaleuiya nion xkinamiki. Yejon tlasojtlalistli xkuajli niman san itech tlanemilia. Akin melak notlasojtlaj, sajnoye intech tlanemiliaj ken xok noneki kichiuaskej (xpoua Romanos 12:3). Melak najmanaj inpampa xijkon ken inpampa oksekimej. Niman, ijkuak itlaj xkuajli onkisa, miyekpa kintlajtlakoltiaj oksekimej niman xkiseliaj ika yejuamej noijki onopopolojkej. Se amoxtli tlen tlajtoua itech Biblia kijtoua ika akin sa no yejuamej notlasojtlaj kichiuaj ken erizo, se yolkatsin akin sa no yejua “notepayoloua, kuakon, ijtik nokaua tlen yemanki niman totonkitsin”, niman “kimititia iuitsyo akin kiyauak nemij”. Yejon tlaltikpakchanejkej akin san intech tlanemiliaj xmelauak yolpakij.

6. ¿Kenon kuajli onkisaj tlaltikpakchanejkej akin kitlasojtlaj toTajtsin?

⁶ Sekimej ixtlamatkej itech Biblia kinemiliaj ika ijkuak Pablo otlajto itech kenon yeskiaj tlaltikpakchanejkej ipan itlamiyan tonaltin, kachtopa okiteneuj sa no tejua timotlasojtlas pampa itech yejuin ualeuaj xkuakualtin kualneskayomej tlen sakin noteneuaj. San ika, tlaltikpakchanejkej akin kitlasojtlaj toTajtsin kiteititiaj okseki kualneskayomej. Biblia kisentlalia tlasojtlalistli itech toTajtsin iuan pakilistli, yolseuilistli, ijyouilistli, iknelilistli, yolkuajlilistli, tlaneltokijli, yolyemanilistli niman noteltia iselti (Gál. 5:22, 23, TNM). Se salmista onokuikati: “¡Yolpaki kalpan akin iTajtsin yejua Jehová!” (Sal. 144:15). Jehová yejua se toTajtsin akin yolpaki, niman itekipanojkauan kiteititiaj yejuin kualneskayotl. Noijki, pampa xsa no yejuamej notlasojtlaj niman xsan kinemiliaj itlaj kiseliskej, itekipanojkauan Jehová yolpakij pampa yejuamej kichiuaj tlen uelij niman ijkon kinpaleuiskej oksekimej (Hech. 20:35).

7. Tla tiknekij tikmatiskej kenon onka totlasojtlalis itech toTajtsin, ¿tlenon noneki totlajtoltiskej?

⁷ ¿Kenon uelis tikmatiskej tla tlasojtlalistli tlen tikmachiliaj topampa yokipanaui totlasojtlalis itech toTajtsin? Matiknemilikan itech  tlen techijlia Filipenses 2:3, 4: “Ma ka itlaj xchiuakan ikan nexikojli nion pampa nenkinekij nemoueyimatiskej, yej ikan yolyemanilistli xmomatikan ika oksekimej más uejueyixtokej xken nemejuamej. Ma ka xchiuakan on tlen kuajli san para nemejuamej, yej no xkinchiuilikan on oksekimej on tlen no kuajli para yejuamej”. Uelis totlajtoltiskej: “¿Nikchiua tlen nikan kijtoua ipan nonemilis? ¿Yemelak nikyejyekoua nikchiuas tlen kineki toTajtsin? ¿Niktejtemoua kenon nikinpaleuis oksekimej ipan tlanechikojli niman ipan tenojnotsalistli?”. Tikchiuaskej itlaj inpampa oksekimej kemantika ouijtika. Kanaj nonekis melak tokojtiliskej niman tijkauaskej itlaj tlen tikuelitaj. San ika, xtlaj melak techyolpaktis ken tikmatiskej ika tikchiuaj tlen kuelita Jehová, akin Ueyixtika.

8. ¿Tlenon yokinyoleuj makichiuakan sekimej tokniuan intlasojtlalis itech toTajtsin?

⁸ Totlasojtlalis itech toTajtsin niman ika tiknekij miyek tiktekichiuiliskej, yokinyoleuj sekimej akin kichiuaj ken Cristo makikauakan tlen okinmachtijkej ipan uejueyimej kaltlamachtiltin tlen ueliskia kinmakas miyek tomin. Se tokniuj siuatl itoka Ericka yejua tlapajtiketl, san ika, xokitejtemo melak ueyixtos ipan itekiyo. Yejua onochiuj precursora regular niman yotlapaleui iuan iueuentsin ipan miyek países. Techijlia: “Melak miyek kualtsin topan yopanok pampa titlapaleuiyaj kampa tlajtouaj okse tlajtojli niman miyekej imiuan touikaj. Nochi yejuin melak yokikualtsintili tonemilis. Ok nitekiti ken tlapajtiketl, san ika, tlen yemelak nechyolpaktia niman kichiua kuajli maninomachili yejua ika nikmaka ueyi itech notiempo niman nokojtilis ika nikinpajtis tlaltikpakchanejkej ipan intlaneltokil niman nitlapaleuis ipan tlanechikojli”.

9. ¿Tleka xuelis yolpakiskej akin kitlasojtlaj tomin?

⁹ Pablo noijki otlajto intech akin “kitlasojtlaskej tomin”. Ikipiya seki xiujtin, se precursor akin chanti Irlanda okinojnots se tlakatl itech toTajtsin. Yejuin tlakatl okuajkixti icartera, okajsik seki amatomin niman ika ueyilistli okijto: “¡Yejuin notajtsin!”. Maski kanaj xkiseliaj, miyekej tlaltikpakchanejkej tlanemiliaj ken yejuin tlakatl. Kitlasojtlaj tomin niman tlen yejuin ueli kikoua. San ika, Biblia kuajli kijtoua: “Se akin kitlasojtla plata xkeman ixuis ika plata, nion akin kitlasojtla tomin ika tlen kitlani. Yejuin noijki xtlaj kijtosneki” (Ecl. 5:10). Akin kitlasojtlaj tomin nochipa kinekiskej okseki kipiyaskej, niman nochi innemilis kitejtemotoskej yejuin. San ika, yejuin san kichiuas makipiyakan “miyek ajmantli” (1 Tim. 6:9, 10).

10. ¿Tlenon kijtoua Biblia itech miyek tomin niman mayantli?

¹⁰ Melauak ika tinochimej techpoloua tomin, pampa uelis tikijtoskej ika yejuin techtlajpiya (Ecl. 7:12). Aman tej, ¿uelis yakaj yolpakis tla san kipiya tlen yemelak noneki? Tikmatstokej ika kema (xpoua Eclesiastés 5:12). * Agur, ikoneuj Jaqué, okitlajtlanili toTajtsin: “Maka xnechmaka mayantli nion miyek tomin. San xnechmaka tlen nijkuas”. Nimantsin tiuelij tikasikamatij tleka xkinekiya mayantli. Yejua okijto ika xkinekiya maajsi tonajli ijkuak kinekiskia tlachtekis, pampa ijkon kitsokuiloskia itokayo toTajtsin. San ika ¿tleka okitlajtlanili maka makimaka miyek tomin? Yejua okijto: “Niman ijkon maka manikmachili ika xitlaj nechpoloua niman manimitsilkaua niman manikijto: ‘¿Akinon Jehová?’” (Prov. 30:8, 9). Kanaj tikimixmatij akin tlaneltokaj itech intomin tlen kipiyaj niman xitech toTajtsin.

11. ¿Tlenon okijto Jesús itech tomin?

¹¹ Akin kitlasojtlaj tomin xuelis kiyolpaktiskej toTajtsin. Jesús okijto: “Xakaj ueli kintekichiuilia omemej tekomej, pampa se kitlajsojtlas niman okse kitlauelitas, noso se kipialis kuajli iyojlo niman okse kitlalkauis. Ijkon, tej, xakaj uelis kitekichiuilis Dios niman no kinotekimakas on tomin”. Jesús san kemach okonijtoka: “Ma ka xsentlalikan nemorriquezas nikan ipan in tlaltikpaktli kampa on pochauistli kijtlakoua niman nochi on  tlajtlamach san ixpoliui, niman kampa on ichtekej kalakij niman tlachtekij. Yej xsentlalikan nemorriquezas ne iluikak kampa on pochauistli xkeman tlaijtlakoua, niman nochi on tlajtlamach xkeman ixpoliui, niman on ichtekej xkeman kalakij para tlachtekij” (Mat. 6:19-24).

12. ¿Tleka uelis techpaleuis tiktekichiuiliskej toTajtsin tla tinemij san ika tlen yemelak techpoloua? Xkijto se neskayotl.

¹² Miyekej yokitakej ika nemiskej san ika tlen yemelak kinpoloua xsan kichiua melak mayolpakikan, noijki kinkauilia makipiyakan tiempo tlen ika uelis kitekichiuiliskej Jehová. Ipan Estados Unidos, se tokniuj akin itoka Jack kipiaya se ueyi ikal niman se kuajli tekitl, san ika okinnemakak niman ijkon nochiuas precursor iuan isiuauj. Techtomilia: “Ouijtika otikitakej tijkauaskej tokal tlen melak kualtsin katka niman tiknemakaskej totlal tlen onkatka kampa melak tlakualtsinkan. San ika, nikselia ika ipan miyek xiujtin, ninokuepaya nochan ika ueyi ajmantli ipampa tlaueltin ipan notekiyo. Niman nosiuauj, akin precursora, nochipa melak ika iyojlo nemiya. Yejua kijtouaya: ‘Niktekichiuilia akin melak kuajli tlayekana’. Aman ika nejua noijki niprecursor, tiomemej tiktekichiuiliaj yejua, Jehová”.

13. ¿Tlenon techpaleuis matikmatikan tlenon yemelak tiknemiliaj itech tomin?

¹³ ¿Tlenon techpaleuis matikmatikan tlenon yemelak tiknemiliaj itech tomin? Noneki totlajtoltiskej niman tokuitiskej: “¿Kiteititia nonemilis ika yemelak nikneltoka tlen Biblia kijtoua itech tomin? ¿Melak ueyi kijtosneki ipan nonemilis niktlanis tomin? ¿Melak nechajmana tlen uelis nikpiyas xijkon ken ninouikas iuan Jehová niman akin nechyeualouaj? ¿Yemelak nitlaneltoka ika Jehová nechmakas tlen melauak nechpoloua?”. Uelis kuajli tikmatstoskej ika toTajtsin xkeman kinkauas akin itech tlaneltokaj (Mat. 6:33).

14. ¿Kenon kinamiki tikitaskej tlen ika toyolpaktiaj?

¹⁴ Ken yonoijtoka, aman nemiskiaj miyekej akin “kitlasojtlaskej tlen ika noyolpaktiskej”. Ijkon ken xtlajtlakojli timotlasojtlas niman tikitas tomin ken kinamiki, noijki xtlajtlakojli timoyolpaktis san ken kinamiki ipan monemilis. Sekimej kinemiliaj ika noneki tijkauas nochi tlen ika uelis timoyolpaktis niman nochi tlen kuajli ipan tonemilis. San ika, xyejon tlen temachtia Jehová. Biblia kimijlia nochimej itekipanojkauan toTajtsin akin yolmelaujkej: “Xuiya, xtlakua ika yolpakilistli niman ika kuajli moyojlo xkoni vino” (Ecl. 9:7).

15. ¿Tlenon kijtosneki ika yakaj san kitlasojtla tlen ika noyolpaktia?

¹⁵ Ijkuak 2 Timoteo 3:4 tlajtoua intech akin kitlasojtlaj  tlen ika noyolpaktiaj, kinteneua akin inpan innemilis xkitejtemouaj toTajtsin. Matikitakan ika tlaxelojli xkijtoua ika yejuamej kitlasojtlaskiaj tlen ika noyolpaktiaj xijkon ken toTajtsin, pampa yejuin kijtosnekiskia ika maski san achijtsin kitlasojtlaskiaj. Kijtoua ika “kitlasojtlaskej tlen ika noyolpaktiskej maka ken kitlasojtlaskej toTajtsin”. Se ixtlamatki, kijtoua ika yejuin tlaxelojli “xkijtosneki ika yejuamej noijki kitlasojtlaj toTajtsin maski san achijtsin. Kijtosneki ika nion achijtsin xkitlasojtlaj”. Yejuin itlaj tlen kinchikajkanotsa akin melak kiueyiliaj intlasojtlalis itech tlen ika noyolpaktiaj. Tlajtoltin “kitlasojtlaskej tlen ika noyolpaktiskej” kuajli ompa kalakij akin “sa komatstokej ken ijki [...] pakiskej ipan innemilis” (Luc. 8:14).

16, 17. ¿Kenon kitaya Jesús tlen ika timoyolpaktis?

¹⁶ Jesús kitaya tlen ika timoyolpaktis ijkon ken kinamiki. Yejua oyaj kampa nochiuaya “se tlanamiktilistli” niman noijki ipan “se ueyi iluitl” (Juan 2:1-10; Luc. 5:29). Ijkuak otlan vino ipan yejon “tlanamiktilistli”, ika se milagro okichiuj ika atl manokuepa vino. Niman okse tonajli, ijkuak oksekimej okitejteneujkej pampa tlakuaya niman tlaoniya, kuajli okiteititi ika xkinamiki titlanemilis ijkon (Luc. 7:33-36, TNM).

¹⁷ Maski ijkon, Jesús xokikuik inemilis san ika noyolpaktis. Ipan inemilis okitlali kachtopa Jehová niman okichiuj nochi tlen ouel ika kinpaleuis oksekimej. Niman okinek mikis ken melak tekoko ipan se kojtli melaktik niman ijkon miyekej ueliskiaj makisaskej. Nochimej akin kinekiskiaj kichiuaskej tlen yejua okichiuj, okimijli: “Dios mechtiochiuas nemejuamej ijkuak on tlakamej mechuijuikaltiaj, niman mechkojkokoskej, niman mechteneuiliskej tlajtlamach tlen xmelauak san pampa nennechneltokaj. Ijkuak ijkon mechchiuiliskej, xpakikan niman xnemikan ikan paktli, pampa ne iluikak nenkiseliskej se ueyi tetlayokolijli. On tlakamej no ijki okintlauelitakej niman tlajtlamach ika okintlajyouiltijkej on tiotlajtojkej yejuan onemikoj yeuejkaui ijkuak xe nennemiyaj” (Mat. 5:11, 12).

18. ¿Tlen tlajtoltilistin techpaleuiskej matikmatikan kech tiktlasojtlaj tlen ika toyolpaktiaj?

¹⁸ ¿Tlenon techpaleuis matikmatikan kech tiktlasojtlaj tlen ika toyolpaktiaj? Matotlajtoltikan: “¿Nikita melak ueyi kijtosneki tlen ika ninoyolpaktia xijkon ken tlanechikoltin niman tenojnotsalistli? ¿Niknektika nijkauas seki tlemach tlen nikuelita pampa nikneki niktekichiuilis toTajtsin? Ijkuak niktlapejpenia tlen ika ninoyolpaktis, ¿ninotlajtoltia tla kuelitas Jehová?”. Tla yemelak tiktlasojtlaj toTajtsin tikmapeuaskej tlen tikmatij ika xkuelita, san ika, noijki tlen tiknemiliaj ika uelis xkuelitas (xpoua Mateo 22:37, 38).

19. ¿Akinomej xkeman ueliskej yemelak pakiskej?

¹⁹ Tlaltikpaktli tlen kiyekana Satanás yokichiuj ika tlaltikpakchanejkej matlajyouikan kanaj 6,000 xiujtin. Aman ika tinemij ipan itlamiyan tonaltin, tlaltikpaktli tentika ika tlaltikpakchanejkej akin san tlanemiliaj intech, ipan tomin niman ipan tlen kinyolpaktia. Nochipa san kinemilijtokej tlen yejuamej kileuiyaj niman itech tlen uelis kipiyaskej. Yejon tlaltikpakchanejkej xkeman ueliskej yemelak pakiskej. San ika, Biblia kijtoua: “Yolpaki akin kipiya iTajtsin Jacob ken itlapaleuijkauj, akin kipiya itlamachialis itech Jehová, iTajtsin” (Sal. 146:5).

20. ¿Kenon yokichiuj xyolpaki motlasojtlalis itech toTajtsin?

²⁰ Itekipanojkauan Jehová mojmostla ueyiya kech tiktlasojtlaj. Niman, nochi xiujtin, miyekej oksekimej noijki uelij kixmatij niman kitlasojtlaj. Yejuin se tlen techititia ika iTekiuajyo toTajtsin itlanauatijtika niman ika san achijtsin poliui ijkuak techuajkuilis tlateochiualistin tlen amantsin nion xtiuelij tiknemiliaj. Tikchiuaskej tlen Jehová kineki niman tikmatiskej ika tikchiujtokej tlen kiyolpaktia, uelis kichiuas yemelak matiyolpakikan aman niman nochipa. Ipan okse tlamachtijli, tikitaskej ika tlamantik tlen kichiuaj akin kipiyaj tlasojtlalistli tlen san itech tlanemilia itech tlen kichiuaj itekipanojkauan Jehová.