1-3. a) ¿Tleka Jehová kitlasojtlaya Salomón, niman kenon okiteochiuj? b) ¿Katlejua tlajtoltilistin tikinnankiliskej ipan yejuin tlamachtijli?

SALOMÓN melak telpochtli katka ijkuak onochiuj tekiuaj ipan kalpan Israel. Ijkuak opeuj tekiuajti, Jehová okinojtiti ipan se temiktli niman okijli: “Xtlajtlani tlen tikuelitaskia manimitsmaka”. Salomón okijli ika yejua san telpochtli katka akin xitlaj kimatiya, kuakon, okitlajtlanili makimaka se iyojlo tlen matetlakamati (1 Rey. 3:5-10). Pampa okitlajtlan yejon, okiteititi ika kimatiya ika xnochi ueliya kichiuaya. Yejua ika, xtikmojkaitaj tleka Jehová melak okitlasojtlak (2 Sam. 12:24). Pampa Jehová melak okuelkak tlen okitlajtlan Salomón, okimakak se iyojlo tlen tlamachilise niman tetlakamati (1 Rey. 3:12).

² Ijkuak Salomón oyolmelajkanen, nochipa okiseli miyek tlateochiualistin. Yejua okichijchiuili “itoka Jehová” se teopan (1 Rey. 8:20). Melak miyekej okixmatkej pampa kipiaya ueyi tlamachilistli tlen toTajtsin okimakak. Niman ika iespíritu santo toTajtsin okijkuilo yeyi amoxtli itech Biblia, niman se itech yejuin katka, Proverbios.

³ Ipan amoxtli Proverbios, miyekpa tlajtoua itech toyojlo, kanaj 39. Se neskayotl, Proverbios 4:23 kijtoua: “Más xkejeua moyojlo, xken nochi on tlajtlamach yejuan tiktlajsojtla”. ¿Tlenon kijtosneki tlajtojli “moyojlo” ipan yejuin tlaxelojli? Tikitaskej ipan yejuin tlamachtijli. Noijki tikinnankiliskej okseki ome tlajtoltilistin tlen ueyi kijtosnekij: ¿Kenon kiyejyekoua Satanás kijtlakos toyojlo? ¿Niman tlenon uelis tikchiuaskej niman ijkon tiktlajpiyaskej toyojlo? Tla tikasikamatij  tlanankilistin techpaleuis nochipa matimelajkanemikan itech toTajtsin.

4, 5. a) ¿Tlenon kijtosneki tlajtojli “moyojlo” tlen noteneua ipan Proverbios 4:23? b) ¿Kenon tiktlajpiyaskej tlen tikpiyaj tlaijtik ken ijkuak tiktlajpiyaj kuajli matinesikan?

⁴ Ipan Proverbios 4:23, ijkuak tlajtoua itech toyojlo kijtosneki totlanemililuan, tlen tikmachiliaj, tlen techyolmapeua matikchiuakan niman toileuilisuan. Yejon tlen yemelak tikpiyaj tlaijtik, xsan tlen nesi kiyauak.

⁵ Tiktlajpiyaskej tlen tikpiyaj tlaijtik san noijki ken ijkuak tiktlajpiyaj kuajli matinesikan. Se neskayotl, tla tiknekij kuajli tinemiskej, noneki kuajli totlakualtiskej niman nochipa tikchiuaskej ejercicio. Noijki ijkon, tla tiknekij kuajli tikpiyaskej totlaneltokil, kipiya ika nochipa tikiskaltiskej. Uelis ijkon tikchiuaskej ijkuak tikchiuaj tlen tomachtiaj niman titenojnotsaj itech tlen tikneltokaj (Rom. 10:8-10; Sant. 2:26, TNM). Ken tinesij uelis kiteititis ika kuajli tinemij maski tla tikualoj. Noijki ijkon, ken tikueyichiuaj toTajtsin techtlanemililtis ika totlaneltokil chikaujtok maski ipan toyojlo tikpiyaj xkuajkualtin ileuilistin (1 Cor. 10:12; Sant. 1:14, 15). Matikilnamikikan ika Satanás kineki matitlanemilikan ken yejua tlanemilia. ¿Kenon kiyejyekoua kichiuas niman kenon totlajpiyaskej?

6. ¿Tlenon kineki Satanás matikchiuakan, niman kenon kichiua yejuin?

⁶ Satanás akin san itech tlanemilia, teixnamiki niman xkitlakamati Jehová, kineki ika tejuamej noijki ijkon matitlanemilikan niman matikchiuakan ken yejua. Pampa xueli texchiualtia ijkon matikchiuakan, kitejtemouilia kenon uelis ijkon tikchiuaskej. Se neskayotl, techsentlalia imiuan akin yokimijtlako (1 Juan 5:19). Kineki imiuan matinemikan, maski tikmatstokej ika kijtlakouaj ken titlanemiliaj niman tlen tikchiuaj (1 Cor. 15:33). Ijkon okijtlako tekiuaj Salomón, akin ononamikti imiuan miyekej siuamej akin xkiueyichiuayaj Jehová. Yejuamej ika yolik okijtlakojkej niman okichiujkej makitlalkaui Jehová (1 Rey. 11:3).

7. a) ¿Tlenon okseki kichiua Satanás ika kisemoyaua itlanemililuan? b) ¿Tleka melak noneki matotlajpiyakan itech yejon?

 ⁷ Satanás kitekitiltia películas niman nochi tlen panoua ipan televisión pampa ijkon kisemoyaua itlanemililuan. Kimatstika ika tikuelitaj tijkakiskej tlen inpan nochiua oksekimej niman kimatstika ika yejuin xsan techpaktia; kijtlakoua tlen tikmachiliaj, tlen tikchiuaj niman ken titlanemiliaj. Jesús okintekitilti historias ika otemachti. Ijkon okichiuj ijkuak otlajto itech se samaritano niman itech se tekoneuj akin yopoliujka (Mat. 13:34; Luc. 10:29-37; 15:11-32). Noijki, akin yokimijtlako Satanás uelis techkakitiskej historias tlen uelis techijtlakoskej. Ika yejon, noneki melak matotlajpiyakan. Kema, onka películas niman okseki tlen panoua ipan televisión tlen uelis techmachtiskej itlaj niman xkijtlakoua totlamachilis. San ika, matikitakan kemanon tikchiuaskej niman kech tiuejkauiskej. Ijkuak itlaj tiknekiskej tikitaskej, matotlajtoltikan: “¿Yejuin película noso programa kineki nechititis ika kuajli tla nitlanemilia itech xkuajkualtin ileuilistin?” (Gál. 5:19-21; Efes. 2:1-3). Tla tikitaj ika kichiua matitlanemilikan ken Satanás, nimantsin matiktlalkauikan ijkon ken tiktlalkauijtoskiaj se kokolistli tlen temaua.

8. ¿Kenon tajtin ueliskej kinpaleuiskej inkoneuan makitlajpiyakan inyojlo?

⁸ Tajtin, nemejuamej nenkipiyaj se ueyi tekitl: nenkintlajpiyaskej nemokoneuan, pampa Satanás kineki kimijtlakouilis inyojlo. Tikmatstokej ika nemejuamej nemokojtiliaj nenkintlajpiyaskej nemokoneuan pampa xnenkinekij makualokan. Se neskayotl, nenkichipauaj nemokal niman nenkitlajkalij nochi tlen uelis kichiuas xkualokan. Noijki ijkon, kipiya ika nenkintlajpiyaskej nemokoneuan itech películas tlen kitaj, tlen panoua ipan televisión, itech videojuegos niman nochi tlen onka ipan Internet tlen uelis kichiuas matlanemilikan ken Satanás. Jehová yomechmakak tlanauatijli  pampa kineki xkintlajpilikan intlaneltokil nemokoneuan (Prov. 1:8; Efes. 6:1, 4). Kuakon, maka xmomojti tikimijlis makichiuakan tlen kisa ipan Biblia. Xkimijlikan nemokoneuan tlenon uelis kitaskej niman tlenon xuelis kitaskej, xkinpaleuikan makasikamatikan tleka ijkon nenkimijliaj (Mat. 5:37). Niman ijkuak noskaltijtiaskej, xkinpaleuikan san inselti makitakan tlen kuajli niman tlen xkuajli ijkon ken kijtoua toTajtsin (Heb. 5:14). Niman xkilnamikikan ika nemokoneuan ueliskej itech tlen nenkimijliaj, san ika, ok melak ueliskej itech tlen mechitaj nenkichiuaj nemejuamej (Deut. 6:6, 7; Rom. 2:21).

9. ¿Tlenon Satanás kineki matiknemilikan, niman tleka melak teijtlakoua?

⁹ Satanás noijki kiyejyekoua kijtlakos toyojlo, kichiua matitlanemilikan ken tlaltikpakchanejkej niman xijkon ken toTajtsin (Col. 2:8). Se neskayotl, kineki matiknemilikan ika tikpiyaskej tomin yejon tlen melak ueyi kijtosneki, niman yejon uelis techijtlakos. ¿Tleka? Pampa ijkon, akin kinekij notomintiskej melak chikauak tekitiskej niman xkinajmanas tla kualoskej, tla xiuan nemiskej inchanejkauan niman hasta kikajkauaskej nouikaskej iuan Jehová (1 Tim. 6:10). Melak tiktlasojkamatij ika toTajtsin iluikakchane techpaleuiya kuajli matitlanemilikan itech kenon noneki tikitaskej tomin (Ecl. 7:12; Luc. 12:15).

10, 11. a) ¿Tlenon noneki matiuelikan matikchiuakan niman ijkon totlajpiyaskej? b) ¿Tlenon yeuejkaui kichiuayaj tlajpixkej, niman kenon totlamachilis uelis tekitis ken se tlajpixketl?

¹⁰ Tla tiknekij tiktlajpiyaskej toyojlo, noneki tiueliskej tikixmatiskej tlen uelis techijtlakos niman tikmapeujtiuetsiskej. Tlajtoltin tlen kiteneua Proverbios 4:23, techtlalnamiktia itech tlajpixkej akin onenkej ipan itonaluan Salomón. Yejuamej kitlajpiayaj itepanuan ueyikalpan, niman tla kitayaj ika intlauelikniuan nonisiuiayaj, nimantsin kuajteijliayaj. Yejuin neskayotl techasikamachiltia tlenon noneki tikchiuaskej tla xtiknekij ika Satanás makijtlako totlamachilis.

¹¹ Yeuejkaui, tlajpixkej imiuan nopaleuiayaj akin tlajpiayaj ipan ipuerta ueyikalpan (2 Sam. 18:24-26). San sekan nopaleuiayaj niman ijkon puertas kuajli matsauktokan ijkuak intlauelikniuan nonisiuiayaj (Neh. 7:1-3). Ijkuak Biblia yokimachti totlamachilis * uelis tekitis ken se tlajpixketl. ¿Kenon? Nimantsin techijlis ijkuak Satanás kijtlakosnekis toyojlo, kijtosneki, ijkuak kinekis kijtlakos totlanemililuan, tlen tikmachiliaj niman tlen tikileuiyaj. Nochipa ijkuak totlamachilis ijkon techijlis, noneki tijkakiskej niman maka matijkauilikan Satanás makalaki ipan toyojlo.

12, 13. ¿Tlenon uelis tiknekiskej tikchiuaskej, san ika, tlenon noneki tikchiuaskej?

¹² Matikitakan se neskayotl itech kenon totlajpiyaskej itech itlanemililuan Satanás. Jehová yotechmachti ika maka matitlajtokan itech auilnemilistli noso itlaj okse tlen tsokuiltik (Efes. 5:3). San ika ¿tlenon tikchiuaskej tla akin imiuan tomachtiaj noso imiuan titekitij peuaj tlajtouaj itech tlen tsokuiltik? Tikmatstokej ika noneki tikmapeuaskej “nochi tlen xkuajli niman nochi xkuajli eleuilistli yejuan onkaj ipan in tlaltikpaktli” (Tito 2:12). Kuakon, kanaj totlamachilis techijlis ika yejon xkuajli (Rom. 2:15). ¿Tlenon tikchiuaskej?  ¿Tijkakiskej yejuin tlajpixketl niman kentla tiktsakuaskiaj puerta? Kanaj uelis tiknekiskej tijkakiskej itech tlen tlajtouaj noso tikitaskej tlaixkopinaltin tlen noititijtokej. San ika, noneki matikpatlakan itech tlen tlajtotokej noso matiuiyan oksekan.

¹³ Noneki yolchikaualistli niman ijkon akin imiuan tomachtiaj noso akin imiuan titekitij xtexchiualtiskej matikchiuakan noso matiknemilikan tlen xkuajli. Kuajli matikmatstokan ika Jehová kita kenon tokojtiliaj tikinmapeuaskej itlanemililuan Satanás niman ika Jehová techmakas kojtilistli niman tlamachilistli niman ijkon uelis tikixnamikiskej Satanás (2 Crón. 16:9; Is. 40:29; Sant. 1:5). ¿Tlenon okseki uelis tikchiuaskej niman ijkon tiktlajpiyaskej toyojlo?

14, 15. a) ¿Tlenon noneki tikseliskej ipan toyojlo, niman kenon tikchiuaj? b) ¿Kenon techpaleuis Proverbios 4:20-22 ika ijkuak tikpouaskej Biblia yemelak matechpaleui? (Noijki xkita recuadro “ Kenon titlanemilis”).

¹⁴ Tla tiknekij tiktlajpiyaskej toyojlo, xsan noneki maka matikinselikan xkuajkualtin tlanemililtin, noijki noneki matikinselikan tlen kuajkualtin. Matitlanemilikan oksejpa itech ineskayo ueyikalpan tlen tsauktika ika tepantin. Tlajpixketl kintsakuaya puertas niman ijkon xkinkauiliaya makalakikan itlauelikniuan. San ika, noijki kintlapouaya puertas pampa kitekauiliaya makikalaktikan tlakuajli niman okseki tlen kinpolouaya akin ompa chantiyaj. Tla xijkon kichiuaskia, akin ompa chantiyaj mikiskiaj ika apistli. Noijki, noneki tiktlaposkej toyojlo niman ijkon makalakikan itlamachtiluan Jehová.

¹⁵ Ipan Biblia, tikinnextiaj itlanemililuan toTajtsin. Ika yejon, nochipa ijkuak tikpouaj, tijkauiliaj ika itlanemililuan makipaleui ken titlanemiliaj, tlen tikmachiliaj niman tlen tikchiuaj. Tla tiknekij matechpaleui tlen tikpouaj ipan Biblia, noneki tikchiuaskej ome tlemach. Kachtopa, matikchiuakan teoyotl. Se tokniuj siuatl kijtoua: “Achto ika nikpouas Biblia, niktlajtlanilia Jehová manechpaleui manikasikamati tlen kipiya iTlajtol, tlen melak kualtsitsintin” (Sal. 119:18). Ika ome, noneki titlanemiliskej itech tlen tikpoujtokej. Ijkuak tikchiuaj nochi yejuin, iTlajtol toTajtsin kalaki tlaijtik ipan toyojlo niman tipeuaj titlanemiliaj ijkon ken tlanemilia Jehová (xpoua Proverbios 4:20-22; Sal. 119:97).

16. ¿Kenon yokinpaleui miyekej akin kitaj canal JW Broadcasting?

¹⁶ Ijkuak tikitaj nochi tlen onka ipan JW Broadcasting^®, noijki tijkauiliaj ika topan makalakikan itlanemililuan toTajtsin. Se tokniuj iuan isiuauj kijtouaj: “Jehová yokinnankili toteoyouan ipampa tlamachtiltin tlen kistiuej nochi metstli. Techyolchikauaj niman techkojtiliaj ijkuak tajmanaj noso san toselti tomachiliaj. Niman tochan nochipa tikintlaliaj tlakuikaltin: ijkuak titlakualchiuaj, titlachipauaj, noso san tikonitokej té”. Yejuin tlamachtiltin techpaleuiyaj matiktlajpiyakan toyojlo. Techmachtiaj matitlanemilikan ijkon ken Jehová niman techpaleuiyaj matokojtilikan matikmapeuakan itlanemililuan Satanás.

17, 18. a) ¿Tlenon panoua ijkuak tikchiuaj tlen Jehová techmachtia ijkon ken kijtoua 1 Reyes 8:61? b) ¿Tlenon tiuelij itech ineskayo tekiuaj Ezequías? c) Ijkuak David okichiuj teoyotl ken nesi ipan Salmo 139:23, 24, ¿tlenon techititia ika uelis tiktlajtlaniskej ipan teoyotl?

¹⁷ Nochipa ijkuak tikitaj kenon tepaleuij tikchiuaskej tlen kuajli, chikaui totlaneltokil (Sant. 1:2, 3). Kuajli tomachiliaj pampa tikmatstokej ika Jehová yolpaki topampa niman techita ken ikoneuan, niman yejuin techyolmapeua nochipa matikyolpaktikan (Prov. 27:11). Nochipa ijkuak tikixnamikij tlatlatalistin, uelis tikteititiskej ika tiktekichiuiliaj  Jehová ika nochi toyojlo (Sal. 119:113). Tejuamej, tiktlasojtlaj Jehová ika nochi toyojlo niman tiknektokej tiktlakamatiskej itlanauatiluan niman tikchiuaskej tlen kineki (xpoua 1 Reyes 8:61). *

¹⁸ Tinochimej topopolouaj, pampa tinochimej titlajtlakolejkej. Ijkuak ijkon panos, matikilnamikikan tlen ipan onochiuj tekiuaj Ezequías. Yejua onopopolo, san ika, onoyolkuep niman ok okitekichiuili Jehová ika nochi iyojlo (Is. 38:3-6; 2 Crón. 29:1, 2; 32:25, 26). Kuakon, matikmapeuakan nochi tlen ika Satanás kijtlakos totlamachilis. Matiktlajtlanilikan Jehová matechpaleui matikpiyakan se toyojlo tlen “matlamachilise niman matetlakamati” (1 Rey. 3:9; xpoua Salmo 139:23, 24). Timelajkanemiskej itech Jehová, tla nochipa tiktlajpiyaj toyojlo.