1, 2. a) ¿Tlenon kita Jehová ijkuak miyekej nosentlaliaj pampa kilnamikij iTlakualis toTeko? (Xkita tlaixkopinajli tlen onka ixpan itech yejuin revista). b) ¿Tlenon tomachtiskej ipan yejuin tlamachtijli?

¿TLENON kita Jehová ijkuak miyekej nosentlaliaj pampa kilnamikij iTlakualis toTeko? Xsan kita kenon tojlan; yejua kimita inseselti. Kimita akin yauej nochi xiujtin. Ompa nemij sekimej akin yauej maski kintlaueltokaj. Oksekimej xyauej tlanechikoltin tlen nopanoltia ipan semana, san ika, kinemiliaj ika noneki yaskej ijkuak noilnamiki imikilis Cristo. Jehová noijki kimita akin kemach yauej san pampa kinekij kitaskej kenon noilnamiki imikilis Cristo.

² Tikmatstokej ika Jehová kiyolpaktia ika miyekej makilnamikikan imikilis Cristo (Luc. 22:19). San ika, yejua xkita kechmej yauej, kita tleka yauej. Ipan yejuin tlamachtijli tikitaskej tlen melak ueyi kijtosneki: ¿Tleka tiauej nochi tlanechikoltin tlen nopanoltia ipan semana niman xsan tiauej ijkuak noilnamiki imikilis Cristo? Matikitakan katlejua kualneskayomej kichiuaj matiakan tlanechikoltin.

3, 4. a) ¿Tleka tiauej tlanechikoltin? b) ¿Tlen kualneskayotl tikteititiaj ijkuak tiauej tlanechikoltin? c) Ipampa tlen kijtoua 1 Corintios 11:23-26, ¿tleka noneki maka matopolouilikan ijkuak noilnamiki imikilis Cristo?

³ Tiauej tlanechikoltin pampa ijkon tikueyichiuaj toTajtsin. Noijki tiauej pampa Jehová ompa techmachtia. Akin noueyimatij kinemiliaj ika xnoneki yakaj itlaj makinmachti (3 Juan 9). San ika, tejuamej tiknekij ika Jehová niman ikalpan matechmachtikan (Is. 30:20; Juan 6:45).

⁴ Ijkuak tiauej tlanechikoltin, tikteititiaj ika tiyolyemankej pampa tiknekij ika toTajtsin matechmachti. Tikilnamikij  imikilis Cristo xsan pampa tiknemiliaj ika noneki tiaskej, tikchiuaj pampa tiyolyemankej niman tiknekij tiktlakamatiskej itlanauatil Jesús ijkuak okijto: “Xnechelnamikikan” (xpoua 1 Corintios 11:23-26). Yejuin tlanechikojli kichikaua totlamachialis niman techtlalnamiktia kenon melak techtlasojtla Jehová. San ika, yejua kimatstika ika xnoneki san matechyolchikauakan niman matechyolseuikan san sejpa ipan se xiuitl. Ika yejon, techmaka tlanechikojli tlen nopanoltia ipan semanas niman technauatia matiakan. Tla tiyolyemankej kichiuas matiktlakamatikan. Tikxelouaj miyek horas ipan semana niman ijkon tiaskej niman tomachtiskej tlen nopanoltis ipan tlanechikojli.

5. ¿Tlenon kichiuaj akin yolyemankej ijkuak Jehová kinnotsa?

⁵ Nochi xiujtin, miyekej akin yolyemankej yauej ijkuak Jehová kinnotsa manomachtitij itechkopa (Is. 50:4). Kachtopa, san yauej ijkuak noilnamiki imikilis Cristo niman sakin peuaj yauej ipan okseki tlanechikoltin (Zac. 8:20-23). Tejuamej niman akin kemach peuaj, tikuelitaj matechyekana niman matechmachti toTajtsin akin techpaleuiya, niman techmakixtia (Sal. 40:17). Tikmatstokej ika xok onka okse tlen melak kuajli ken matiakan ipan tlanechikoltin niman ijkon matechmachti Jehová niman Jesús, iKonetsin akin melak kitlasojtla (Mat. 17:5; 18:20; 28:20).

6. ¿Kenon okipaleui se tlakatl mauiya makilnamikiti imikilis Cristo pampa yolyemanki katka?

⁶ Nochi xiujtin tokojtiliaj tikimijliaj nochimej kech tiuelij mauiyan makilnamikitij imikilis Cristo. Miyekej akin yolyemankej yonopaleuijkej pampa okinejkej oyajkej ijkuak okinnotskej. Xtlanemili itech yejuin. Yeuejkaui, se tokniuj okijli se tlakatl mauiya makilnamikiti imikilis Cristo, san ika, yejon tlakatl okijto ika xueliskia yas. Ijkuak oyejkok yejon tonajli, tokniuj omojkatlachix ijkuak okitak ika oajsik. Yejon tlakatl melak okuelitak kenon okiselijkej niman opeuj yauj nochi tlanechikoltin. Niman, ipan se xiuitl san yeyi tlanechikojli okinopolouili. ¿Tlenon okipaleui mauiya maski yokijtoka xyas? Tokniuj akin okinots okijto yejuin: “Yejua melak yolyemanki”. Kuajli nesi ika Jehová okichiuj ika yejon tlakatl mauajla itech ikalpan. Ipan yejuin tonajli, yejon tlakatl aman tokniuj pampa yonoapolakti (2 Sam. 22:28; Juan 6:44).

7. ¿Kenon tlen tomachtiaj ipan tlanechikoltin niman ipan Biblia techpaleuiya matiyolyemankej?

⁷ Tlen tomachtiaj ipan tlanechikoltin niman ipan Biblia techpaleuiya matiyolyemankej. Ipan semanas ijkuak xiajsi ika noilnamikis imikilis Cristo, ipan tlanechikoltin tomachtiaj ineskayo Jesús niman kenon okiteititi ika yolyemanki pampa onotemakak topampa. Ijkuak sa achijtsin tonaltin poliui ika noilnamikis imikilis Cristo, techijliaj matikpouakan ipan Biblia kenon okimiktijkej Jesús niman ijkuak oyoliuj. Nochi yejuin kichiua matiktlasojkamatikan tlen okichiuj topampa. Niman noijki techyolmapeua matiyolyemankej niman matikchiuakan tlen toTajtsin kineki, maski kemantika ouijtika tlen tikixnamikiskej (Luc. 22:41, 42).

8. ¿Kenon okiteititi Jesús ika yolchikauak katka?

⁸ Tiyolchikaujkej yeskej yejon okse kualneskayotl tlen noneki tikpiyaskej, ken Jesús okichiuj. Matiknemilikan kenon okiteititi yejuin ijkuak sa achijtsin poliuiya ika kimiktiskej. Kuajli kimatstoya ika itlauelikniuan kiuejuetskiliskiaj, kiuitekiskiaj niman kimiktiskiaj (Mat. 20:17-19).  Maski ijkon, okinokauili makimiktikan. Ijkuak oyejkok yejon tonajli, okimijli inomachtijkauan akin imiuan nemiya Getsemaní: “Xmotelketsakan. Tiauij. Ye uajlau on yejuan nechtemaktilis” (Mat. 26:36, 46). Niman ijkuak melak miyekej ouajlakej ika kinekiyaj kajsiskej, okijto akinon katka niman okinnauati soldados makinkauilikan mauiyan inomachtijkauan (Juan 18:3-8). ¿Xmelak ika okiteititi ika yolchikauak katka? Ipan yejuin tonajli, tlapejpeniltin niman oksekimej borreguitos tikyejyekouaj tiyolchikaujkej yeskej ken yejua. ¿Kenon?

9. a) ¿Tleka kanaj nonekis matiyolchikaujkej niman ijkon nochipa tiaskej tlanechikoltin? b) ¿Kenon tlen tikchiuaj uelis kinpaleuis tokniuan akin tsauktokej?

⁹ Kanaj itlaj tlen tikixnamiktokej uelis kichiuas maka matiuelikan matiakan tlanechikoltin. Tla ijkon panoua, noneki tiyolchikaujkej yeskej. Sekimej tokniuan kualoj, melak najmanaj noso noyolkokouaj. Oksekimej xkinkauiliaj mauiyan tlanechikojli inchanejkauan noso tekiuajkej. Matitlanemilikan intech tokniuan akin tsauktokej. ¿Yotiknemilijkaj ika uelis kinpaleuis tlen tikchiuaj? (Heb. 13:3). Ijkuak kimatij ika ok tiktekichiuiliaj Jehová maski ouijtika tlen tikixnamikij, kinchikauilia intlaneltokil, noyolchikauaj niman yejon kinpaleuiya makinekikan mayolmelajkanemikan. Ijkon ipan onochiuj Pablo. Ijkuak tsauktoya Roma, pakiya ijkuak kikakiya kenon ikniuan xkikajkauayaj kitekichiuiliaj toTajtsin (Filip. 1:3-5, 12-14). Ijkuak ikimakauaskiaj noso nimantsin ijkuak okimakaujkej, okintlajkuilouili hebreos. Ompa, okinnauati imikniuan ika maka makikajkauakan manosentlalikan niman okimijli: “Nochipa xmotlajsojtlakan ken nenmiknijtin” (Heb. 10:24, 25; 13:1).

10, 11. a) ¿Akinomej noneki tikimijliskej makilnamikitij imikilis Cristo? b) ¿Tleka Efesios 1:7 kijtoua ika noneki matikchiuakan?

¹⁰ Noijki tikteititiaj ika tiyolchikaujkej ijkuak tikimijliaj tochanejkauan, akin imiuan titekitij niman akin nisiuj chantij mauiyan makilnamikitij imikilis Cristo. ¿Tleka tikchiuaj? Pampa melak tiktlasojkamachiliaj Jehová iuan Jesús itech tlen yokichiujkej topampa. Niman, tiknekij ika yejon tlaltikpakchanejkej manopaleuikan itech “iueyitetlajsotlalis” Jehová, tlen techititia ika imikilis Cristo (xpoua Efesios 1:7; Apoc. 22:17).

¹¹ Ijkuak tiauej tlanechikoltin tikteititiaj okse kualneskayotl. Jehová niman Jesús melak kuajli ken yokiteititijkej yejuin kualneskayotl.

12. a) ¿Tleka tlanechikoltin kichikaua tlasojtlalistli tlen tikmachiliaj ipampa Jehová niman Jesús? b) ¿Kenon uelis tikchiuaskej ken Jesús ijkon ken kijtoua 2 Corintios 5:14, 15?

¹² Tlasojtlalistli tlen tikmachiliaj ipampa Jehová niman Jesús kichiua matiakan  tlanechikoltin, niman ompa, chikaui yejuin tlasojtlalistli. Ipan tlanechikoltin, miyekpa techilnamiktiaj tlen yejuamej yokichiujkej topampa (Rom. 5:8). Ijkuak noilnamiki imikilis Cristo techilnamiktiaj kenon Jehová melak techtlasojtla, niman kenon kintlasojtla akin nion xkitlakaitaj tlen Jesús okichiuj topampa. Tejuamej melak tiktlasojkamatij, ika yejon tikyejyekouaj mojmostla tikchiuaskej ijkon ken Jesús (xpoua 2 Corintios 5:14, 15). Toyojlo techmapeua matikueyichiuakan Jehová pampa okitemakak iKoneuj. Niman tikteititiaj yejuin ijkuak ika nochi toyojlo titlanankiliaj ipan tlanechikoltin.

13. Xkijto kenon uelis tikteititiskej ika melak tiktlasojtlaj toTajtsin niman iKoneuj.

¹³ Tikteititiaj kenon melak tiktlasojtlaj toTajtsin niman iKoneuj tla tiknektokej tikchiuaskej miyek tlemach inpampa. Miyekpa, tias tlanechikoltin nonekis tikchiuas miyek tlen ouijtika. Xnemili, miyekej tlanechikoltin nosentlaliaj ipan semana ijkuak nochimej yokiskej ipan intekiyo, niman tosentlaliaj maski kanaj melak tisiaujtokej. Niman okse tlanechikojli nochiua ijkuak ontlami semana, ijkuak tlaltikpakchanejkej noseuiyaj. ¿Kita Jehová ika tiauej tlanechikojli maski melak tisiaujtokej? Kema, kema kita. Niman, tla melak tochikauaj, Jehová kitlasojkaitas yejon tlasojtlalistli tlen tikititiaj (Mar. 12:41-44).

14. ¿Tlenon kuajli yotechititi Jesús?

¹⁴ Jesús melak kuajli yotechititi tlenon kijtosneki tikinpaleuis oksekimej pampa tikintlasojtla. Niman xsan ika onotemakak inpampa inomachtijkauan, noijki pampa mojmostla intech tlanemiliaya. Xkonnemili, imiuan nosentlaliaya maski melak siaujtoya noso noyolkokouaya (Luc. 22:39-46). Yejua otlanemili itech tlen ueliskia kitemakas, xitech tlen ueliskia kiselis (Mat. 20:28). Tla ijkon melak tiktlasojtlaj Jehová niman tokniuan, tikchiuaskej nochi tlen tiuelij niman tiaskej tikonilnamikiskej imikilis Cristo niman tiaskej nochi tlanechikoltin.

15. ¿Akinomej noneki melak matikinpaleuikan?

¹⁵ Tinemij kampa toteititiaj melauak tlasojtlalistli niman ika toyojlo tikimijliaj  oksekimej noijki manemikan kampa tejuamej tinemij. San ika, tiknekij melak tikinpaleuiskej akin tlaneltokaj ken tejuamej, akin xok touan nosentlaliaj nion xtenojnotsaj (Gál. 6:10). Tikimititiaj ika tikintlasojtlaj ijkuak tikimijliaj mauajlakan tlanechikoltin, niman noijki ijkuak noilnamiki imikilis Cristo. Ijkon ken Jehová niman Jesús, melak tiyolpakij ijkuak akin ijkon nemi oksejpa uajnokuepa itech toTajtsin akin melak tetlasojtla (Mat. 18:14).

16. a) ¿Itech tlenon noneki matoyolchikauakan, niman kenon techpaleuiskej tlanechikoltin? b) ¿Tleka ipan yejon tonajli melak noneki matikilnamikikan itlajtoluan Jesús tlen uajnestiuj ipan Juan 3:16?

¹⁶ Ipan semanas tlen uajlauej, noneki matikimijlikan nochimej kech tiueliskej, ika touan makilnamikikan imikilis Cristo ipan yeuajli viernes 19 de abril de 2019 (xkita recuadro “ ¿Tikimijliskej oksekimej mauiyan?”). Nochipa matoyolchikauakan matiakan tlanechikoltin. Pampa tonisiuijtiuej ijkuak tlapopoliuis, noneki matiakan tlanechikoltin tlen techpaleuiskej matikteititikan ika tiyolyemankej, tiyolchikaujkej niman titetlasojtlaj (1 Tes. 5:8-11). Ika nochi toyojlo, matikititikan Jehová niman Jesús ika melak tikintlasojkamachiliaj pampa melak techtlasojtlaj (xpoua Juan 3:16).