1, 2. a) ¿Tleka ueliskia tikchiaskej ika Jesús matechmachti ika xmiyek noneki ijkuak tikilnamikiskej imikilis? b) ¿Katlejua ikualneskayouan Jesús tomachtiskej?

¿UELIS tikijtos tlenon tikchiuaj sejse xiuitl ijkuak noilnamiki imikilis Cristo? Tikmatstokej ika kema uelis tikijtos, pampa yejuin tlen okichiuj Jesús xouijtika katka. San ika, kanaj yakaj uelis notlajtoltis: “¿Tleka ijkuak tikilnamikij iTlakualis toTeko xmiyek noneki maski melak ueyi kijtosneki?”.

² Ijkuak Jesús onen ipan tlaltikpaktli, otemachti tlen melauak ika xouijtika tlajtoltin niman xouijtika nasikamatiya (Mat. 7:28, 29). Noijki ijkon, otechititi ika xmiyek noneki ijkuak tikilnamikiskej imikilis, maski melak ueyi kijtosneki. Kuajli matomachtikan itech yejuin, noijki matikitakan seki tlen Jesús okichiuj niman okijto. Yejuin melak techpaleuis matikasikamatikan ika yolyemanki katka, yolchikauak katka niman tetlasojtlani. Noijki, tikitaskej kenon melak kuajli tikchiuaskej ijkon ken yejua okichiuj.

3. Ijkuak tikpouaj Mateo 26:26-28, ¿tleka tikijtouaj ika xmiyek ononek ijkuak Jesús okipeualti iTlakualis, niman tlenon kijtosneki pan tlen xkipiaya tlaxokolilistli niman vino?

³ Jesús okipeualti iTlakualis toTeko iuan 11 itlatitlankauan yolmelajkej. Ijkuak okichiujkej yejuin, san okikuik pan tlen xkipiaya tlaxokolilistli niman vino tlen onokaujka ijkuak okipanoltijkej pascua (xpoua Mateo 26:26-28). Okimijli itlatitlankauan ika yejuin ome tlemach kixneskayotiaya itlalnakayo tlen xkipiya tlajtlakojli niman iyesyo, tlen xok uejkauiskia kitemakaskia inpampa. Itlatitlankauan  xokimojkaitakej tleka san yejuin ome okikuikej ijkuak okipanoltijkej iTlakualis toTeko. ¿Tleka xokimojkaitakej?

4. ¿Tlenon Jesús okijli Marta tlen techpaleuiya matikasikamatikan tleka ijkuak noilnamiki iTlakualis toTeko xmiyek noneki?

⁴ Matikilnamikikan tlenon opanok seki metstli achto ika nopanoltiskia iTlakualis toTeko ijkuak Jesús ikuikaya yeyi xiuitl ika tenojnotsaya ipan tlaltikpaktli. Ijkuak Jesús okintlajpaloto akin imiuan nouikaya, Lázaro, Marta niman María, opeuj kinnojnotsa. Maski Marta ompa nemiya, opeuj kichijchiua miyek tlakuajli pampa akin okintlajpaloto ueyixtoya. San ika, Jesús ika tlasojtlalistli okijli ika xnonekiya makichijchiua miyek tlakuajli (Luc. 10:40-42). Sakin, ijkuak sa achijtsin poliuiya ika Jesús kitemakaskia inemilis, okichiuj ijkon ken okijlika Marta. Xmiyek ononek ijkuak okichiuj iTlakualis. ¿Tlenon techmachtia yejuin itech Jesús?

5. Pampa ijkuak noilnamiki iTlakualis toTeko xmiyek noneki, ¿tlenon techmachtia itech Jesús ijkon ken kijtoua Filipenses 2:5-8?

⁵ Itech nochi tlen Jesús okichiuj niman okijto, okiteititi ika yolyemanki katka. Kuakon, xtechmojkatlachialtia ika okiteititi yejuin kualneskayotl ijkuak sa achijtsin poliuiya ika kimiktiskiaj (Mat. 11:29). Kimatstoya ika ikitemakaskia se uentli tlen melak ueyi kijtosneki niman xkeman ijkon nochiuaya, niman ika Jehová kiyolitiskia niman kitlaliskia ken Tekiuaj ipan iluikak. Maski ijkon, xokichiuj se tlakuajli ika miyek tlemach pampa kinekiya ika oksekimej makiueyiteneuakan. Ka, okimijli inomachtijkauan makilnamikikan san sejpa ipan se xiuitl niman ika xmiyek nonekiya, okimijli makichiuakan ijkon ken noneki (Juan 13:15; 1 Cor. 11:23-25). Ijkon okiteititi ika xnoueyimatiya. Melak techyolpaktia ika toTekiuaj iluikakchane melak yolyemanki. Biblia kijtoua: “Nochipa xpiyakan tlanemilijli tlen noijki kipiaya Cristo Jesús, [...]. Ka, xokichiuj yejon, yejua okikauj nochi tlen kipiaya niman onochiuj se tlakeuajli niman onochiuj tlaltikpakchane. Niman xsan yejon, ijkuak yejua onochiuj tlaltikpakchane, onokauili makipijpinaujtikan niman otetlakamat hasta ijkuak omik, kema, okitlajyouiltijkej niman omik ipan se kojtli melaktik” (Filip. 2:5-8, TNM).

6. ¿Kenon uelis tiyolyemankej yeskej ken Jesús ijkuak tikixnamikiskej tlen ouijtika?

⁶ ¿Kenon uelis tiyolyemankej yeskej ken Jesús? Ijkuak tikitaj tlenon kinpoloua oksekimej niman sakin tlen tejuamej  techpoloua (Filip. 2:3, 4). Matikilnamikikan tlenon okichiuj Jesús ijkuak sa achijtsin poliuiya ika kimiktiskiaj. Maski kimatstoya ika melak tlajyouiskia ijkuak kimiktiskej, melak onajman inpampa tlen kimachiliayaj inomachtijkauan. Yejua ika, ipan yejon yeuajli, opeuj kinmachtia, kinyolchikaua niman kinyolseuiya (Juan 14:25-31). Okiteititi ika melak najmanaya inpampa oksekimej xijkon ken itech. Melak kuajli techmachtia kenon tiyolyemankej yeskej.

7. ¿Kenon Jesús okiteititi ika yolchikauak katka sakin ijkuak okipeualti iTlakualis?

⁷ Sakin ijkuak Jesús okipeualti iTlakualis, okiteititi ika yolchikauak katka. ¿Kenon? Ijkuak okichiuj tlen toTajtsin kineki, maski kimatstoya ika tlajyouis pampa kimiktiskiaj niman kitlajtlakoltiskiaj ika okiuijuikaltijka toTajtsin (Mat. 26:65, 66; Luc. 22:41, 42). Jesús nochipa oyolmelajkanen niman okiueyichiuj itokayo Jehová, okipaleui iueyitlayekanalis toTajtsin niman okichiuj ika tlaltikpakchanejkej akin noyolkuepaskiaj makipiyakan nemilistli tlen xkeman tlamis. Noijki okinmachti inomachtijkauan kenon kixnamikiskej tlen ouijtika.

8. a) ¿Tlenon Jesús okimijli itlatitlankauan? b) Sakin, ijkuak yomijka Jesús, ¿kenon inomachtijkauan okiteititijkej ika oyolchikaujkej ken yejua?

⁸ Jesús noijki okiteititi ika yolchikauak katka pampa xotlanemili itech tlen yejua kajmanaya, yejua okinemili itech tlen itlatitlankauan kinpolouaya. Sakin ijkuak okijli Judas makisa, okipeualti iTlakualis tlen xmiyek ononek niman yejon kinpaleuiskia inomachtijkauan tlapejpeniltin akin imiuan okichiuj yenkuik tlajtolkaualistli (1 Cor. 10:16, 17). Pampa okinek kinpaleuis  mayolmelajkanemikan niman iuan manemikan iluikak, okimijli tlenon yejua niman iTaj kichiayaj makichiuakan (Juan 15:12-15). Noijki okimijli itech tlatlatalistin tlen kixnamikiskiaj. Sakin, okimijli mayolchikauikan ijkon ken yejua (Juan 16:1-4a, 33). Opanok miyek xiuitl, inomachtijkauan ok kixkopinayaj iyolmelajkanemilis niman ok najmanayaj inpampa oksekimej. Okinejkej tlajyouiskej niman ijkon kinpaleuiskej oksekimej (Heb. 10:33, 34).

9. ¿Kenon uelis tiyolchikaujkej yeskej ken Jesús?

⁹ Ipan yejuin tonajli, noijki tiyolchikaujkej ken Jesús. ¿Kenon? Ijkuak tikinpaleuiyaj tokniuan pampa kintlaueltokaj ipampa intlaneltok. Kemantika, sekimej kintsakuaj maski xitlaj okichiujkej. Ijkuak ijkon panos, matikchiuakan nochi tlen tiueliskej, tikchiuaskej teoyotl niman inpampa matitlajtokan imixpan tekiuajkej noso ipan tribunales (Filip. 1:14; Heb. 13:19). Noijki, tikteititiaj ika tiyolchikaujkej ijkuak xtijkajkauaj titenojnotsaj “ikan yolchikaualistli” (Hech. 14:3). Ijkon ken Jesús, kuajli yotikijtokej titenojnotsaskej itech Tekiuajyotl maski matechixnamikikan niman matechtlaueltokakan. Aman, ¿tlenon uelis tikchiuaskej tla kemantika tikmachiliaj ika xtiyolchikaujkej?

10. Ipan semanas ijkuak xiajsi ika tikilnamikiskej iTlakualis toTeko, ¿tlenon noneki tikchiuaskej niman tleka?

¹⁰ Tla titlanemiliaj itech tlamachialistli tlen tikpiyaj pampa Jesús onotemakak topampa, yejon techpaleuis melak matiyolchikauikan (Juan 3:16; Efes. 1:7). Ipan yejon semanas ijkuak xiajsi ika noilnamikis imikilis Cristo, kinamiki matikteititikan ika tiktlasojkamatij tlaxtlauijli. Ipan yejon tonaltin, matikitakan tlaxeloltin tlen tlajtoua itech iTlakualis toTeko niman kuajli matitlanemilikan itech tleka omik Jesús.  Kuakon, ijkuak tosentlaliskej ipan yejon tonajli, tikasikamatiskej tlenon kijtosneki pan niman vino. Ijkuak tikasikamatij tlen Jesús niman Jehová yokichiujkej topampa, noijki kenon techpaleuiya niman kinpaleuiya tochanejkauan, totlamachialis chikauis niman melak techyolchikauas matitlaxikokan hasta ijkuak tlapopoliuis (Heb. 12:3).

11, 12. ¿Tlenon yotomachtijkej hasta aman?

¹¹ Hasta aman, yotomachtijkej ika iTlakualis toTeko xsan techtlalnamiktia kenon tikpatiojkaitaskej temakixtilistli, noijki techpaleuiya matikpatiojkaitakan pampa Jesús yolyemanki niman yolchikauak. Niman melak tiktlasojkamatij ika ok kiteititia yejuin kualneskayomej aman ika topampa tlajtoua ken ueyi teopixki ipan iluikak (Heb. 7:24, 25). Tla tiknekij tiktlasojkamatiskej yejuin, noneki nochipa matikilnamikikan imikilis ken yejua otlanauati (Luc. 22:19, 20). Nochi xiuitl tikchiuaj ijkuak uetsi ipan tonajli 14, metstli nisán. Judíos melak kipatiojkaitayaj yejon tonajli itech nochi xiuitl.

¹² Ijkuak titlanemiliaj kenon xmiyek ononek ipan iTlakualis toTeko, tikitaj tlen kualneskayotl okiyolmapeuj manotemaka topampa. Yejuin kualneskayotl, nochipa okiteititi ijkuak onen ipan tlaltikpaktli. Matikitakan katlejua.

13. ¿Kenon kiteititia Juan 15:9 niman 1 Juan 4:8-10 itlasojtlalis Jehová niman Jesús, niman akinomej kinpaleuiya yejon tlasojtlalistli?

¹³ Itech nochi tlen Jesús okichiuj, kuajli okiteititi kenon Jehová melak techtlasojtla (xpoua Juan 15:9; 1 Juan 4:8, 9; 1 Juan 4:10, TNM). Niman yejuin tlasojtlalistli okiyolmapeuj makitemaka inemilis topampa. Tla titlapejpeniltin noso “oksekimej borregos”, uelis techpaleuis tlasojtlalistli tlen Jehová niman iKoneuj yotechititijkej ipampa imikilis Jesús (Juan 10:16; 1 Juan 2:2). Matikitakan noijki kenon ones ika Jesús okintlasojtlak niman okimasikamat inomachtijkauan ijkuak okipanoltijkej iTlakualis toTeko.

14. ¿Kenon Jesús okiteititi ika okintlasojtlak inomachtijkauan?

¹⁴ Ken yotikitakej, Jesús xokinnauatij inomachtijkauan tlapejpeniltin makilnamikikan iTlakualis toTeko ika tlen melak ouijtika, okimititi ika xmiyek nonekiya. Nochi xiuitl, yononek makilnamikikan imikilis Cristo, maski san kanon noso kenon manemikan, kemantika hasta kampa tsauktokej (Apoc. 2:10). ¿Youelkej yokitlakamatkej tlen otlanauati Jesús? Kema.

15, 16. ¿Kenon sekimej tokniuan kilnamikij iTlakualis toTeko maski ouijtika tlen kixnamikij?

¹⁵ Akin yemelak kichiuaj ken Cristo, nochipa kilnamikij imikilis Jesús niman xkikajkauaj kichiuaj. Kiyejyekouaj kitlakamatiskej tlen otlanauati Jesús hasta kampa uelij, kemantika maski melak ouijtika. Matikitakan tlenon okichiuj tokniuj Harold King. Pampa tsauktoya China niman xueliya iuan yakaj nonotsaya, okitejtemouili kenon kipanoltis imikilis Cristo. San ichtaka kichijchiuaya pan niman vino san ika tlen kipiaya. Noijki, kuajli konnemiliaya kemanon uetsiya yejon tonajli. Kuakon, san iselti nokuikatiaya kampa tsauktoya, kichiuaya teoyotl niman kipanoltiaya tlamachtijli.

¹⁶ Matikitakan okse neskayotl. Ipan ika okpa Guerra ipan nochi tlaltikpaktli, sekimej tokniuan akin nemiyaj ipan campo de concentración noso kampa nochiuaya chikauak tekitl, okipanoltijkej iTlakualis toTeko maski ueliskiaj kinmiktiskiaj. Niman pampa xmiyek nonekiya, ouelkej okipanoltijkej  san ichtaka. Yejuamej kijtouaj: “Otikyeualojkej se banco ika se tlakentli istak kampa otiktlalijkej pan niman vino. Pampa tikmatstoyaj ika ueliskia yas tlauijli, otitlatlikuiltijkej ika se vela. [...] Oksejpa otikijlikej toTajtsin ika tiktekitiltiskiaj nochi tochikaualis niman ijkon tikueyichiuaskej itoka”. ¡Tikitaj ika melak ueyi intlaneltokil! Pampa tiuelij tikilnamikij imikilis Cristo kampa melak ouijtika, ompa nesi kenon Jesús techtlasojtla.

17. ¿Tlenon kinamiki matotlajtoltikan?

¹⁷ Tla iyejkotika ijkuak noilnamikis imikilis Cristo, kinamiki matotlajtoltikan: “¿Kenon uelis kuajli nitetlasojtlas ken Jesús? ¿Nitlanemilia itech tlen kinpoloua nokniuan noso san itech tlen nechpoloua? ¿Nikchia makichiuakan tlen xuelij, noso nikasikamati ika kichiuaj tlen uelij?”. Nochipa matikchiuakan ken Jesús niman matikteititikan ika titeasikamatij (1 Ped. 3:8).

18, 19. a) ¿Tlenon uelis kuajli tikmatstoskej? b) ¿Tlenon timokojtilis tikchiuas tejua?

¹⁸ Xok uejkauis, xok nonekis matikilnamikikan imikilis Cristo. Ijkuak Jesús “uajlas” ipan ueyi tlajyouilistli, kinuikas iluikak akin “yokintlapejpeni” akin ok nemiskej ipan tlaltikpaktli. Kuakon xok noilnamikis imikilis Cristo (1 Cor. 11:26; Mat. 24:31).

¹⁹ Uelis kuajli tikmatstoskej ika, ijkuak xok noilnamikis imikilis Cristo, tikilnamikiskej ika tlasojtlalistli ken nochiuaya, onoteititi yolyemanilistli, yolchikaualistli niman tlasojtlalistli tlen nion se tlaltikpakchane xkiteititia. Tikmatstokej, ika akin okipanoltijkej yejuin kiminojnotsaskej akin nemiskej ipan yejon tonajli. Melak kinpaleuis ijkuak kikakiskej. Aman, tla tiknekij topaleuiskej ijkuak tikilnamikij imikilis Cristo, noneki tokojtiliskej tikteititiskej ika tiyolyemankej, tiyolchikaujkej niman titetlasojtlaj, ijkon ken Jesús okichiuj. Tla ijkon tikchiuaj, kuajli matikmatstokan ika Jehová techteochiuas (2 Ped. 1:10, 11).