1. ¿Kanaj tlenon notlajtoltiaj sekimej tokniuan?

TINOCHIMEJ tikuelitaskiaj tinemiskej ika toyojlo. San ika, tinochimej tikixnamikij itlaj tlen techajmana. Kanaj sekimej tokniuan hasta nomachiliaj ijkon ken tekiuaj David, akin okitlajtolti Jehová: “¿Hasta kamanon xok nikpiyas on ueyiajmantli yejuan mojmostla nikpiya ipan noyojlo niman ipan nonemilis?” (Sal. 13:2).

2. ¿Tlenon tikitaskej ipan yejuin tlamachtijli?

² Maski xuelis tikpopoloskej nochi tlen techajmana, onka seki tlemach tlen uelis techpaleuis maka melak matajmanakan. Ipan yejuin tlamachtijli, kachtopa tikitaskej tlenon ueliskia techajmanas. Sakin, tikitaskej chikuasen tlemach tlen techpaleuis maka matomojtikan noso melak matajmanakan ijkuak tikixnamikiskej tlen ouijtika.

3. Xteneua tlenon ueliskia techajmanas niman xkijto tla uelis tikyektlaliskej.

³ Onka miyek tlemach tlen techajmana niman tlen xuelis tikyektlaliskej noso tikpopoloskej. San matikonnemilikan yejuin, xuelis tikchiuaskej maka más mapatioua totlaken, tlakuajli noso okseki tlemach. Noijki xuelis tikchiuaskej ika akin touan tekitij noso akin touan yauej escuela maka matexchiualtikan matiauilnemikan noso matikchiuakan itlaj tlen toTajtsin xkuelita. Niman noijki xuelis tikpopoloskej tlen xkuajli nochiua kampa tichantij. Nochi tlen tikixnamikij panoua  pampa miyekej xkinekij kitlakamatiskej tlen kijtoua Biblia. Satanás, akin tlayekana ipan yejuin tlaltikpaktli, kuajli kimatstika ika sekimej xkinekiskej kitekichiuiliskej toTajtsin pampa san konnemilijtoskiaj “kenijki nopanoltiskej” niman pampa “kinekij kipiyaskej tomin” (Mat. 13:22; 1 Juan 5:19). Yejua ika, onka miyek tlemach tlen kichiua matajmanakan.

4. ¿Kanaj kenon uelis tomachiliskej ijkuak tikixnamikij tlen ouijtika?

⁴ Ijkuak tikixnamikij tlen ouijtika, kanaj melak tajmanaj niman xok tikmatij tlenon tikchiuaskej. Kanaj xtechajxilia totomin para tijkouaskej tlen techpoloua, kanaj tikualoj niman xueli titekitij noso xok tikpiyaj totekiyo. Kanaj noijki tajmanaj pampa tiknemiliaj ika xuelis timelajkanemiskej itech Jehová ijkuak oksekimej texchiualtiskej matikchiuakan tlen xkuajli. Niman, kanaj tomojtiaj pampa xtikmatij tlenon uelis panos ijkuak Satanás kixnamikis ikalpan toTajtsin. Kanaj totlajtoltiaj: “¿Xkuajli tla nechajmana nochi yejuin?”.

5. ¿Tleka Jesús okijto maka melak matajmanakan ipampa tlen tikixnamikij?

⁵ Jesús okijto maka melak matajmanakan ipampa tlen tikixnamikij (Mat. 6:25). ¿Okijtosnek ika nion achijtsin xuelis tajmanaskej? Ka, xyejon okijtosnek. Matikilnamikikan ika hasta sekimej itekipanojkauan toTajtsin akin yeuejkaui onenkej noijki onajmankej, maski ijkon, Jehová nochipa okintlasojtlak (1 Rey. 19:4; Sal. 6:3). * Kuakon, ¿tleka Jesús okijto maka melak matajmanakan ipampa tlen tikixnamikij? Jesús kinekiya techyolseuis niman techititis ika xnoneki melak tajmanaskej ipampa tlen tikixnamikij pampa yejon uelis kichiuas maka kuajli matiktekichiuilikan toTajtsin. Kuakon, ¿tlenon uelis tikchiuaskej ijkuak melak tajmanaskej? (Xkita recuadro “ ¿Tlenon uelis tikchiuas?”).

6. Itech tlen kijtoua Filipenses 4:6, 7, ¿tlenon techpaleuis maka melak matajmanakan?

⁶ 1) Miyekpa xchiua teoyotl. Ijkuak tikixnamikis itlaj tlen ouijtika, miyekpa xnotsa Jehová (1 Ped. 5:7). Tla ijkon tikchiua, kuajli timomachilis pampa toTajtsin mitsmakas on “yolseuilistli más ueyi yejuan xakaj uelis kajsikamatis” (xpoua Filipenses 4:6, 7). Jehová techyolseuiya ika iespíritu santo (Gál. 5:22).

7. ¿Tlenon noneki tikchiuaskej ijkuak tiknotsaskej toTajtsin?

⁷ Ijkuak tiknotsas Jehová, xkijli nochi tlen tikmachilia. Xkijli tlenon tikixnamiktika niman tleka mitsajmana. Tla uelis noyektlalis tlen tikixnamiktika, xtlajtlanili toTajtsin mamitspaleui niman mamitsmaka tlamachilistli niman ijkon uelis tikyektlalis tlen tikixnamiktok. Tla xuelis noyektlalis tlen tikixnamiktika, xtlajtlanili Jehová mamitspaleui maka melak mamitsajmana tlen mopan nochiujtok. Tla tikijlia Jehová tlenon yemelak mitsajmana, uelis tikitas kenon mitsnankilia. Maka xmosiaujkaua tla tikita ika Jehová xnimantsin mitsnankilia. Jehová kineki miyekpa xkijli tlen mitsajmana (Luc. 11:8-10).

8. ¿Tlenon más noneki tikchiuaskej ijkuak tiknotsaskej toTajtsin?

⁸ Ijkuak tikijlis Jehová tlenon mitsajmana, noijki xtlasojkamachili nochi tlen yokichiuj mopampa. Kemantika, kanaj nion xtikmatis kenon tikijlis mamitspaleui. San ika, xkilnamiki ika Jehová uelis mitsnankilis maski san tikijlis: “¡Xnechpaleui noTajtsin!” (2 Crón. 18:31; Rom. 8:26).

9. ¿Tlenon noneki tikchiuaskej ijkuak itlaj techmojtis?

 ⁹ 2) Maka san motech xtlaneltoka, xtlaneltoka itech Jehová. Ijkuak nemiya teotlajtoketl Isaías, miyekej akin chantiyaj Judá melak nomojtiayaj pampa kinemiliayaj ika asirios kimixnamikiskiaj niman ika kinchiualtiskiaj manochiuakan intlakeualuan. Ika yejon, okitlajtlanilijkej Egipto makinpaleui (Is. 30:1, 2). Jehová okimijli ika xkuajli onkisaskiaj pampa ijkon kichiujtoyaj (Is. 30:7, 12, 13). Itechkopa Isaías, Jehová okimijli akin chantiyaj Judá tlenon yemelak kinpaleuiskia. Isaías okijto: “Nenkojtitoskej tla xnemomojtiaj niman tla nenkiteititiaj ika nentlaneltokaj” itech Jehová (Is. 30:15b, TNM).

10. ¿Kemanon nonekis tikteititiskej ika titlaneltokaj itech Jehová?

¹⁰ ¿Kemanon nonekis tikteititiskej ika titlaneltokaj itech Jehová? Matikonnemilikan ika mitstekiuiltiaj se tekitl kampa tiktlanis miyek tomin, san ika, nonekis titekitis okseki horas niman xok tikpiyas tiempo niman ijkon kuajli tiktekichiuilis Jehová. Noso matikonnemilikan ika yakaj akin iuan titekiti mitsititia ika mitsuelita, san ika, yejua xiteixpantijkauj Jehová. Noso kanaj se mochanejkauj akin melak tiktlasojtla mitsijlia: “¿Akinon más tiktlasojtla: nejua noso moTajtsin?”. Ijkuak tikixnamikij yejuin, kanaj nion xtikmatij tlenon tikchiuaskej, san ika, Jehová nochipa techpaleuiya (Mat. 6:33; 10:37; 1 Cor. 7:39). Matotlajtoltikan: “¿Titlaneltokaskej itech Jehová niman tikchiuaskej tlen techijlia?”.

11. ¿Intech akinomej uelis titlanemiliskej ijkuak oksekimej techtlaueltokaskej?

¹¹ 3) Xtlanemili itech tlen okichiujkej itekipanojkauan Jehová akin yeuejkaui onenkej. Jehová okichiuj manoijkuilo ipan Biblia tlen okichiujkej sekimej itekipanojkauan pampa kineki techititis ika xnoneki sajnoye tajmanaskej niman ika noneki itech titlaneltokaskej. Ijkuak timomachtis tlen kijtoua Biblia, kuajli xkita tlenon okinpaleui itekipanojkauan toTajtsin maka melak manajmanakan ijkuak okintlaueltokakej. San matitlanemilikan itech yejuin, ijkuak judíos akin teuamej katkaj itech Sanedrín okimijlikej apóstoles maka ok matenojnotsakan, apóstoles xonomojtijkej. Yejuamej ika yolchikaualistli okijtokej: “Kitocaroua achtoj tiktlakamatiskej Dios xken nemejuamej yejuan san nentlakamej” (Hech. 5:29). Maski sakin okinuijuitejkej, yejuamej xonomojtijkej. ¿Tleka? Pampa kimatstoyaj ika toTajtsin kuelitaya tlen yejuamej kichiujtoyaj niman ika yejua kinpaleuiskia. Ika yejon, yejuamej xokikajkaujkej ika tenojnotsaj (Hech. 5:40-42). Esteban, se inomachtijkauj Cristo, noijki xonomojti nion xonajman ijkuak ikimiktiskiaj. Biblia kijtoua ika, ijkuakon, ixayak nesiya ken “ixayak sen ángel” (Hech. 6:12-15). ¿Tleka? Pampa kuajli kimatstoya ika kiyolpaktijtoya toTajtsin.

12. Itech tlen kijtoua 1 Pedro 3:14 niman 4:14, ¿tleka uelis tiyolpakiskej maski techtlaueltokaj?

¹² Apóstoles kuajli kimatiyaj ika Jehová imiuan nemiya pampa kinpaleuijtoya makichiuakan milagros (Hech. 5:12-16; 6:8). Yemelak, aman tejuamej xueli tikinchiuaj milagros. Maski ijkon, Jehová kuajli techijlia ipan Biblia ika, ijkuak techtlaueltokaskej noso texchiuiliskej tlen xkinamiki, yejua techteochiuas niman techmakas iespíritu santo (xpoua 1 Pedro 3:14; 4:14). Kuakon, maka san matiknemilijtokan tlenon ueliskia topan nochiuas ijkuak techtlaueltokaskej, yej matikchiuakan tlen noneki niman ijkon más tikneltokaskej ika Jehová techpaleuis niman techmakixtis. Ijkon ken okichiujkej inomachtijkauan Cristo akin yeuejkaui onenkej, noneki tikilnamikiskej ika Jesús  techijlia ika yejua techpaleuis matikmatikan tlenon tikchiuaskej niman tlenon tikijtoskej ijkuak techtlaueltokaskej. Niman, Jesús noijki techijlia: “Tla nochipa nemelajkanemij ikan nemotlaneltok, nenkiseliskej on nemilistli yejuan para nochipa” (Luc. 21:12-19). Noijki, maka matikilkauakan ika Jehová kinyolitis nochimej itekipanojkauan akin oyolmelajkanenkej, yejua xkeman kilkauas tlen okichiujkej.

13. ¿Tleka melak kuajli tla tikitaj tlen inpan onochiuj akin onomojtijkej niman xotlaneltokakej itech Jehová?

¹³ Noijki uelis tikitaskej tlenon inpan onochiuj akin melak onomojtijkej niman xotlaneltokakej itech Jehová. Tla kuajli tikitaj tlen inpan onochiuj, techpaleuis maka noijki ijkon matikchiuakan. Matitlanemilikan itech tekiuaj Asá. Ijkuak kemach opeuj tekiuajti, yejua otlaneltokak itech Jehová ijkuak miyekej soldados okixnamikitoj Judá, niman Jehová okipaleui (2 Crón. 14:9-12). San ika ¿nochipa ijkon okichiuj Asá? Ka. Yejua xotlaneltokak itech Jehová ijkuak isoldados Baasá, akin tekiuajtitoya Israel, okixnamikitoj. Maski isoldados Baasá más achijtsitsintin katkaj, yejua xokitlajtlanili Jehová makipaleui, yej okintlaxtlauili sirios niman ijkon makipaleuikan (2 Crón. 16:1-3). Niman, ijkuak yejuin tekiuaj okualok niman imikiskia, xokitlajtlanili Jehová makipaleui (2 Crón. 16:12).

14. ¿Tlenon tiuelij itech tlen xkuajli okichiuj Asá?

¹⁴ Ijkuak Asá opeuj tlayekana Judá, yejua nochipa kitlajtlaniliaya Jehová makipaleui. San ika, sakin, xok ijkon okichiuj. Matikilnamikikan ika Asá okintlajtlanili sirios makipaleuikan niman ijkon makixnamikikan Israel. Nesiya ika tlen okichiuj Asá kuajli onkisaskia, san ika, melak xkuajli tlen opanok. Jehová okijli itechkopa se teotlajtoketl: “Isoldados on rey de Siria yocholojkej momak, pampa tejua xotiktlajtlanilij itlapaleuil moTEKO Dios. Yej otiktlajtlanilij itlapaleuil on rey de Siria” (2 Crón. 16:7). Tejuamej noijki noneki totlajpiyaskej maka san totech titlaneltokaskej niman tikchiuaskej tlen tejuamej tiknekij. Noneki tokojtiliskej tikitaskej tlenon techijlia Jehová ipan iTlajtoltsin. Kemantika, kanaj itlaj topan nochiuas niman kanaj nonekis nimantsin itlaj tiktlapejpeniskej, san ika, tla xtomojtiaj niman titlaneltokaj itech Jehová, tiktlapejpeniskej tlen kuajli.

15. ¿Tlenon uelis tikchiuaskej ijkuak tikamapoujtoskej Biblia?

¹⁵ 4) Xkintsontekontlali seki tlaxeloltin itech Biblia. Ijkuak tikinamapoujtos seki tlaxeloltin kampa kiteititia ika xnoneki tomojtiskej niman ika noneki titlaneltokaskej itech Jehová, xyejyeko xkintsontekontlali. Melak kuajli yes tla tikimijkuiloua yejuin tlaxeloltin. Noijki, uelis miyekpa tikimitas niman chikauak tikinamapouas. Jehová okinauati Josué: “Nochipa xmomachti in amamoxtli yejuan kipiya noleyes. Xkixtlalo ipan tonajli niman ipan yejuajli [...]. Ijki, nochi tlen tikchiuas kuajli kisas” (Jos. 1:8, 9). Tlen kijtouaya iTlajtol toTajtsin kipaleuiskia maka manomojti ijkuak kixnamikiskia tlen ouijtika. Ipan Biblia noijki uelis tikinnextiskej seki tlaxeloltin tlen techpaleuiskej maka matomojtikan nion matajmanakan ijkuak tikixnamikiskej tlen ouijtika (Sal. 27:1-3; Prov. 3:25, 26).

16. ¿Kenon Jehová kintekitiltia tokniuan niman ijkon maka matomojtikan niman nochipa itech matitlaneltokakan?

¹⁶ 5) Xmosentlali imiuan tokniuan. Jehová kintekitiltia tokniuan niman ijkon maka matomojtikan niman nochipa itech matitlaneltokakan. Ijkuak tiauej ipan totlanechikoluan, melak techpaleuiya tlen kijtouaj tokniuan ijkuak kipanoltiaj se tlamachtijli niman ijkuak tlanankiliaj. Niman, ijkuak tonojnotsaj imiuan  tokniuan, melak tiyolchikauij (Heb. 10:24, 25). Noijki, melak kuajli tomachiliaj ijkuak tikijliaj se tokniuj akin nemi ipan totlanechikol nochi tlen techajmana. Ijkuak se toamigo techijlia “sen kuajli tlajtojli”, xok sajnoye tajmanaj niman tiyolseuij (Prov. 12:25).

17. Ijkon ken kijtoua Hebreos 6:19, ¿tlenon panos tla xkeman tikilkauaj tlen toTajtsin yokijto techmakas ika tlayekapan?

¹⁷ 6) Maka xkilkaua tlen tikselis ika tlayekapan. Tla xkeman tikilkauaj tlen toTajtsin yokijto techmakas ika tlayekapan, xtomojtiskej niman xsajnoye tajmanaskej ijkuak tikixnamikiskej tlen ouijtika. Tlen tikchiaj ika tlayekapan “kimelajkapiya toalma ijkon ken on teposcadena kimelajkapiya on barco ijkuak ika yokisalojkej” (xpoua Hebreos 6:19). Maka xkilkaua ika ipan xochitlalpan xok tikilnamikiskej tlen aman techajmana (Is. 65:17). San xkonnemili kenon tiyolpakis ipan xochitlalpan, ompa tinemis ika yolseuilistli pampa xok nochiuas tlen xkuajli (Miq. 4:4). Tla timokojtilia tikteijlis tlen toTajtsin yokijto kichiuas ika tlayekapan, más tikneltokas ika Jehová ijkon kichiuas (Heb. 6:11).

18. ¿Tlenon tikixnamikiskej ika tlayekapan, niman tlenon techpaleuis matitlaxikokan?

¹⁸ Pampa itinemij ipan sa itlamiyan tonaltin, miyekixtias tlen xkuajli niman más tikixnamikiskej tlen ouijtika. Nochi yejuin kanaj kichiuas matomojtikan noso matajmanakan. Texto del año 2021 techilnamiktia ika san Jehová uelis techpaleuis ijkuak tikixnamikiskej tlen xkuajli. Matikteititikan ika tikneltokaj tlen Jehová techijlia ipan Isaías 30:15. Itech Traducción del Nuevo Mundo yejuin tlaxelojli kijtoua: “Nenkojtitoskej tla xnemomojtiaj niman tla nenkiteititiaj ika nentlaneltokaj”.