1. ¿Tlenon ipan onochiuj se telpochtli ijkuak okikak se tlamachtijli ipan se ueyi tlanechikojli?

IPAN xiuitl 1926, se telpochtli akin kipiaya 18 xiuitl onoapolakti. Itajuan katkaj Nomachtijkej itech Biblia * niman kinpiayaj yeyimej intelpochuan niman omemej imichpochuan, akin kuajli okimititijkej kenon kitekichiuiliskej Jehová niman kenon kichiuaskej ken Cristo. Yejon telpochtli akin onoapolakti, sejse xiuitl kikuaya pan niman koniya vino tlen nokui ijkuak noilnamiki imikilis Cristo, ijkon ken nochimej Nomachtijkej itech Biblia kichiuayaj. San ika, inemilis yejuin telpochtli onopatlak ipan xiuitl 1935 ijkuak okikak se itlamachtil tokniuj Joseph Rutherford kampa otlajto itech grupo kampa nemi “sanoyej miyek tlakatl”. Yejuin tlamachtijli onopanolti ipan se ueyi tlanechikojli ne Washington (Estados Unidos). ¿Tlenon okasikamatkej Nomachtijkej itech Biblia ipan yejon ueyi tlanechikojli?

2. ¿Tlenon okiteasikamachilti tokniuj Rutherford ipan itlamachtil?

² Tokniuj Rutherford kuajli okiteasikamachilti ipan itlamachtil akinomej nemij ipan on grupo kampa nemi “sanoyej miyek tlakatl”, tlen noteneua ipan Apocalipsis 7:9. Ipan yejon tonaltin, Nomachtijkej itech Biblia kinemiliayaj ika akin nemiyaj ipan yejuin grupo yaskiaj iluikak, san ika, xtekiuajtiskiaj iuan Jesús pampa xnochipa okitlakamatkej toTajtsin. Tokniuj Rutherford okiteititi ipan Biblia ika akin nemij ipan yejuin grupo xyaskiaj iluikak, okijto ika yejuamej teuamej intech on “oksekimej borregos”. * Noijki okijto ika akin nemij  ipan yejuin grupo kampa nemi “sanoyej miyek tlakatl” makisaskej itech “on temojtij tlajyouilistli” niman nochipa nemiskej ipan yejuin tlaltikpaktli (Apoc. 7:14). Jesús okijto: “No nikimpiya oksekimej borregos yejuan xtlapoualti[n] ipan in corral. No ika onkaj nikinuajuikas. Yejuamej kuajli kitenkakiskej notlajtol niman nechtlakamatiskej. Ijkon tej, san sekan nemiskej niman no san se tlapixki nemis” (Juan 10:16). Ijkuak Jesús okijto ika kinpiya “oksekimej borregos”, yejua tlajtotoya itech se grupo kampa nemij iteixpantijkauan Jehová akin melajkanemij niman kichiaj nochipa nemiskej ipan yejuin tlaltikpaktli tlen nokuepas se xochitlalpan (Mat. 25:31-33; Mat. 25:46, TNM). Tlen onasikamat ipan yejon xiuitl okipatlak innemilis miyekej iteixpantijkauan Jehová, niman noijki inemilis yejon telpochtli akin yotikteneujkaj (Sal. 97:11; Prov. 4:18).

3, 4. ¿Tlenon okasikamatkej miyekej tokniuan ipan ueyi tlanechikojli tlen onochiuj ipan 1935?

³ Melak kualtsin tlen opanok ipan yejon ueyi tlanechikojli ijkuak tokniuj Rutherford okintlajtolti nochimej akin ompa nemiyaj: “¿Uelis notelketsaskej nochimej akin kichiaj nochipa nemiskej ipan yejuin tlaltikpaktli?”. Se tokniuj tlakatl akin oyajka ipan yejon ueyi tlanechikojli, kampa onosentlalijkaj kanaj 20,000 tlaltikpakchanejkej, okijto ika más de tlajkotipan onotelketskej. Kuakon, tokniuj Rutherford okijto: “¡Xkitakan! Yejuamej akin teuamej itech grupo kampa nemi ‘sanoyej miyek tlakatl’”. Nochimej melak oyolpakej niman sekimej hasta opakatsajtsikej. Akin onotelketskaj okasikamatkej ika yejuamej xyaskiaj ne iluikak niman ika xokintlapejpenijkej ika espíritu santo. Uajmostla, onoapolaktijkej 840 tlaltikpakchanejkej, miyekej teuamej katkaj itech on “oksekimej borregos”.

⁴ Sakin ika okikakej yejuin tlamachtijli, melak miyekej tokniuan xok okikuajkej pan nion xok okonikej vino tlen nokui ijkuak noilnamiki imikilis Cristo. Niman, yejon telpochtli akin kachtopa otikteneujkej noijki xok ijkon okichiuj. Miyekej nomachiliayaj ijkon ken se tokniuj akin okijto: “Ipan xiuitl 1935 sa ika tlami onikua pan niman onikonik vino tlen nokui ijkuak noilnamiki imikilis Cristo. Onikasikamat ika Jehová xonechtlapejpenijka ika iespíritu santo para nias iluikak. Noijki onikasikamat ika nejua ueliskia ninemis ipan yejuin tlaltikpaktli niman ika ueliskia nitepaleuis manokuepa yejuin tlaltikpaktli se kualtsin xochitlalpan” (Rom. 8:16, 17; 2 Cor. 1:21, 22). Desde ijkuakon, más miyekixtiuej akin teuamej itech grupo kampa nemi “sanoyej miyek tlakatl”. Yejuamej nokojtiliaj san sekan tekitiskej imiuan tokniuan tlapejpeniltin akin ok yoltokej ipan tlaltikpaktli.

5. ¿Tlenon kinemilia Jehová intech tokniuan akin xok kikuaj pan niman xok konij vino ijkuak noilnamiki imikilis Cristo?

⁵ ¿Tlenon kinemilia Jehová intech tokniuan akin xok kikuaj pan niman xok konij vino desde 1935? ¿Niman tlenon kinemilia Jehová intech tokniuan akin kikuaj pan niman konij vino pampa kinemiliaj ika tlapejpeniltin, san ika, sakin kasikamatij ika xtlapejpeniltin? (1 Cor. 11:28). Sekimej tokniuan kikuayaj pan niman koniyaj vino pampa kinemiliayaj ika kema yaskiaj iluikak. San ika, tla yejuin tokniuan kasikamatij ika onopopolojkej, tla xok kikuaj pan niman xok konij vino niman tla nokojtiliaj kuajli kitekichiuiliskej Jehová, yejua kimitas ken itekipanojkauan akin noixmatij ken “oksekimej borregos”. Maski yejuamej xok kikuaj pan niman xok konij vino tlen nokui ijkuak noilnamiki imikilis Cristo, ok yauej ipan yejon tlanechikojli pampa melak kitlasojkamatij tlen Jehová niman Jesús yokichiujkej inpampa.

6. ¿Tlenon kinnauatia Jesús sekimej iluikaktekitkej?

⁶ Sa achijtsin poliui ijkuak panos “on temojtij tlajyouilistli”, ika yejon, melak noneki kuajli matikasikamatikan tlen kijtoua Apocalipsis  capítulo 7, kampa tlajtoua itech tlapejpeniltin niman “oksekimej borregos”. Ompa kijtoua ika Jesús kinnauatia sekimej iluikaktekitkej makiteltikan “on naui ajakatl yejuan onkaj ipan in tlaltikpaktli”. Nonekiya kiteltiskej yejon naui ajakatl hasta ijkuak nochimej tlapejpeniltin makipiyakan “sen sello”, yejuin kijtosneki hasta ijkuak toTajtsin kijtos akinomej yemelak oyolmelajkanenkej (Apoc. 7:1-4). ToTajtsin kichiuas ika tlapejpeniltin matekiuajtikan iuan Cristo niman manochiuakan teopixkej ne iluikak (Apoc. 20:6). Jehová, Jesús niman iluikaktekitkej melak yolpakiskej ijkuak nochimej 144,000 tlapejpeniltin kiseliskej intetlayokolil ne iluikak.

7. Itech tlen kijtoua Apocalipsis 7:9, 10, ¿akinomej okimitak Juan, niman tlenon kichiujtoyaj? (Xkita tlaixkopinajli tlen onka ixpan yejuin revista).

⁷ Sakin ika Juan otlajto intech 144,000 tekiuajkej niman teopixkej, yejua okitak itlaj tlen melak temojkatlachialti: okitak se grupo kampa nemi “sanoyej miyek tlakatl” akin makisa itech Armagedón. Yejuin grupo más ueyi niman xnomati kechmej ompa nemij (xpoua Apocalipsis 7:9, 10). Biblia kijtoua ika yejuamej “tlaken istakej”, yejuin kijtosneki ika xokichiujkej “on tlen xkuajli yejuan kichiuaj on tlaltikpaktlakamej” niman ika oyolmelajkanenkej itech toTajtsin niman Cristo (Sant. 1:27). Yejuamej chikauak kijtouaj ika Jehová niman Jesús okinmakixtijkej. Ipan inma noijki kipiyaj se kualtsin soyatl tlen ika kiteititiaj ika yokiselijkej Jesús, iborreguito toTajtsin, ken tekiuaj akin Jehová yokitekitlali (uelis tikitas Juan 12:12, 13).

8. ¿Tlenon kijtoua Apocalipsis 7:11, 12 itech Jehová niman akin nemij ne iluikak?

⁸ Xpoua Apocalipsis 7:11, 12. ¿Tlenon okichiujkej akin nemiyaj ne iluikak ijkuak okitakej yejon grupo kampa nemi “sanoyej miyek tlakatl”? Juan okitak ika nochimej melak oyolpakej niman okiueyichiujkej toTajtsin. Kema, Jehová niman nochimej akin nemij ne iluikak melak yolpakiskej ijkuak kitaskej kenon yejuin grupo makisas itech ueyi tlajyouilistli.

9. Itech tlen kijtoua Apocalipsis 7:13-15, ¿tlenon ikichiujtokej akin nemij ipan grupo kampa nemi “sanoyej miyek tlakatl”?

⁹ Xpoua Apocalipsis 7:13-15. Juan kijtoua ika akin nemij ipan grupo kampa nemi “sanoyej miyek tlakatl” “okimpakkej intlakeuan niman okimistalijkej ikan iyesyo on Borreguito”. Yejuin kijtosneki ika chipauak intlamachilis niman ika Jehová kintlasojtla (Is. 1:18). Yejuamej yonoapolaktijkej, yonosentemakakej itech Jehová, tlaneltokaj itech tlen Jesús okichiuj inpampa niman kuajli iuan nouikaj Jehová (Juan 3:36; 1 Ped. 3:21, TNM). Ipampa nochi yejuin, yejuamej ueli “nemij ixpan on ueyixtikaj trono niman kitekipanouaj Dios ikan tonajli niman yeuajli” ipan yejuin tlaltikpaktli. Kema, yejuamej tenojnotsaj itech iTekiuajyo toTajtsin niman ika nochi inyojlo temachtijtokej. Yejuamej melak kinekij kichiuaskej itekiyo toTajtsin (Mat. 6:33; Mat. 24:14, TNM; Mat. 28:19, 20, TNM).

10. ¿Tlenon kuajli kimatstokej akin nemij ipan grupo kampa nemi “sanoyej miyek tlakatl”, niman tlenon sa kichiatokej manochiua?

¹⁰ Akin nemij ipan grupo kampa nemi “sanoyej miyek tlakatl” kuajli kimatstokej ika toTajtsin ok kintlajpiyas sakin ika yopanok ueyi tlajyouilistli pampa Biblia kijtoua ika akin “yeuatikaj ipan on ueyixtikaj trono [...] chantis inuan”. Ijkuakon, noijki nochiuas tlen “oksekimej borregos” sa kichiatokej. Kema, toTajtsin “kimpopouilis nochi iminixayo, niman xok onyas mikilistli, nion chokistli, nion ajmantli, nion kokolistli” (Apoc. 21:3, 4).

11, 12. a) Itech tlen kijtoua Apocalipsis 7:16, 17, ¿tlenon inpan nochiuas akin nemij ipan grupo kampa nemi “sanoyej miyek tlakatl” sakin ika yopanok ueyi tlajyouilistli”? b) ¿Tlenon uelis kichiuaskej “oksekimej borregos” ijkuak noilnamiki imikilis Cristo, niman tlenon kiteititiaj ijkuak ijkon kichiuaj?

¹¹ Xpoua Apocalipsis 7:16, TNM; * Apocalipsis 7:17. Ipan yejuin tonaltin, sekimej tokniuan melak tlajyouiyaj pampa xkipiyaj tlen kikuaskej,  pampa xkipiyaj tomin noso pampa onka guerra kampa chantij. Oksekimej tokniuan yokintsajkej pampa kitekichiuiliaj Jehová. San ika, akin nemij ipan grupo kampa nemi “sanoyej miyek tlakatl” melak yolpakij pampa kimatij ika ijkuak toTajtsin kinmakixtis itech Armagedón, kipiyaskej miyek tlakuajli niman nochipa kipiyaskej tlen ika kichikauaskej intlaneltokil. Ijkuak Jehová kipopolos nochi tlen kiyekana Satanás, Jehová kintlajpiyas akin nemij ipan yejon grupo para maka mamikikan ijkuak kiteititis itlauel, tlen yeskia ken itlaj “tlen melak tetlatij”. Sakin ika yopanok “on temojtij tlajyouilistli”, Jesús kinyekanas nochimej akin makisaskej kampa onka “atl yejuan kitemaka nemilistli” tlen xkeman tlamis. San xkonnemili nochi tlen kualtsin kiseliskej. Itech nochimej tlaltikpakchanejkej akin yonenkej, kanaj san yejuamej uelis kiseliskej se nemilistli tlen xkeman tlamis (Juan 11:26).

¹² Kuajli tikmatstokej ika “oksekimej borregos” melak kitlasojkamachiliaj Jehová niman Jesús ipampa tlen uelis kiseliskej ika tlayekapan. Maski Jehová xokintlapejpeni niman ijkon nemiskej iluikak, yejua melak kintlasojtla ijkon ken kintlasojtla tlapejpeniltin. Tokniuan akin tlapejpeniltin niman “oksekimej borregos” uelis kiueyiteneuaskej toTajtsin niman Jesús tla nosentlaliaj ijkuak noilnamiki imikilis Cristo.

13, 14. ¿Tleka tinochimej noneki matosentlalikan ijkuak noilnamiki imikilis Cristo?

¹³ Yonoitak ika itech 1,000 akin nosentlaliaj ijkuak tikilnamikij imikilis Cristo kemantika san se kikua pan niman koni vino tlen ompa nokui. Yejuin kijtosneki ika ipan miyek tlanechikoltin tlen onkatij ipan nochi tlaltikpaktli nion se xnemi akin kikua pan niman koni vino tlen nokui ipan yejon tonajli. Yejuin techititia ika melak miyekej akin yauej ijkuak noilnamiki imikilis Cristo kichiaj nochipa nemiskej ipan yejuin tlaltikpaktli. Kuakon, ¿tleka yauej? San matitlanemilikan itech yejuin, ¿tleka tiauej kampa nonamiktia se toamigo? Tiauej pampa tiknekij tikititiskej ika melak tiktlasojtlaj. Noijki ijkon, nochimej akin noixmatij ken “oksekimej borregos” kilnamikij imikilis Cristo pampa kinekij kimititiskej Jesucristo niman tlapejpeniltin ika kintlasojtlaj. Noijki, kinekij kiteititiskej ika kitlasojkamatij imikilis Jesús, tlen kinpaleuiya makipiyakan se nemilistli tlen xkeman tlamis ipan yejuin tlaltikpaktli.

¹⁴ Niman noijki yauej pampa kinekij kitlakamatiskej tlen Jesús otlanauati. Ijkuak Jesús sa ika tlami otlakua imiuan iapóstoles niman yokinmakaka pan niman vino, okimijli ika nochipa ijkon makichiujtokan niman ijkon kilnamikiskej  imikilis (1 Cor. 11:23-26). Kuakon, “oksekimej borregos” nochipa kilnamikiskej imikilis Cristo hasta ijkuak xok nemis nion se tlapejpenijli ipan yejuin tlaltikpaktli. Yejuamej noijki kinnotsaj nochimej tlaltikpakchanejkej niman ijkon imiuan manosentlalikan ipan yejon tonajli.

15. ¿Kenon uelis tikueyiteneuaskej toTajtsin niman Jesús ijkuak noilnamikis imikilis Cristo?

¹⁵ Ijkuak tosentlaliaj niman ijkon tikilnamikij imikilis Cristo, ueli tikueyiteneuaj toTajtsin niman Jesús ijkuak san sekan tokuikatiaj niman ijkuak tikchiuaj teoyotl. Tlamachtijli tlen nopanoltis ipan yejuin xiuitl itoka: “Matiktlasojkamatikan tlen toTajtsin niman Cristo yokichiujkej topampa”. Yejuin tlamachtijli techpaleuis más matiktlasojkamatikan tlen Jehová niman Cristo yokichiujkej topampa. Ijkuak nopanoltis pan niman vino, akin ompa tinemiskej uelis tikilnamikiskej tlenon kixneskayotiaj: itlalnakayo niman iyesyo Jesús. Noijki tikilnamikiskej ika Jehová okikauili Jesús mamiki pampa kineki matikpiyakan se kualtsin nemilistli (Mat. 20:28). Nochimej akin kitlasojtlaj toTajtsin niman Jesús touan nosentlaliskej ijkuak tikilnamikiskej imikilis Cristo.

16. ¿Tleka tikijtouaj ika Jehová xkinemilia ika tlapejpeniltin más uejueyixtokej xijkon ken “oksekimej borregos”?

¹⁶ Jehová xkinemilia tla tlapejpeniltin más uejueyixtokej xijkon ken “oksekimej borregos”. Yejua nochimej kintlasojtla. Jehová okuajtitlan iKoneuj niman ijkon mamikiki inpampa tlapejpeniltin niman inpampa “oksekimej borregos”. Melauak, maski yejuin ome grupos xsan noijki tlen kichiaj kiseliskej, nochimej noneki kitlakamatiskej toTajtsin niman Cristo (Sal. 31:23). Niman maka matikilkauakan ika Jehová kinmaka nochimej itekipanojkauan, maski tla tlapejpeniltin noso ka, iespíritu santo niman ijkon kuajli makichiuakan on tekitl tlen yokinmakak.

17. ¿Tlenon melak kinekij akin tlapejpeniltin?

¹⁷ ToTajtsin kintlapejpenia akin yaskej iluikak. Kema, Jehová kichiua ika yejuamej makimatikan ipan inyojlo ika yaskej iluikak. Tokniuan tlapejpeniltin xkeman kilkauaj kenon kinteochiuaskej, kiteneuaj yejuin ijkuak kinotsaj Jehová niman sa kinektokej kiseliskej intlaxtlauil ne iluikak. Maski yejuamej xkimatij kenon yemelak yeskej ijkuak inemiskej iluikak, sa kinektokej nemiskej iuan Jehová, Jesús, iluikaktekitkej niman imiuan oksekimej tlapejpeniltin akin yoyoliujkej. Sa kinektokej tekiuajtiskej iuan Cristo (Filip. 3:20, 21; 1 Juan 3:2).

18. ¿Tlenon melak kinekij akin noixmatij ken “oksekimej borregos”?

¹⁸ Akin noixmatij ken “oksekimej borregos” melak kinekij nochipa nemiskej ipan yejuin tlaltikpaktli pampa yejon tlen onka ipan inyojlo (Ecl. 3:11). Yejuamej sa kinektokej tlapaleuiskej niman ijkon kikuepaskej yejuin tlaltikpaktli se xochitlalpan. Noijki, melak kinekij kinchijchiuaskej inkaluan, tokaskej niman yolpakiskej imiuan inchanejkauan. Ijkuakon melak ika inyojlo nemiskej  pampa xok keman kualoskej (Is. 65:21-23). Sa kinektokej paxaloskej ipan nochi tlaltikpaktli, kinekij yaskej kampa melak tepeyoj, kampa kojyoj niman kampa onka mar. Kinekij más kuajli kixmatiskej tlen toTajtsin yokichijchiuj. San ika, melak yolpakij pampa kimatij ika ijkuakon más kixmatiskej toTajtsin niman más kuajli iuan nouikaskej.

19. ¿Tlenon tikteititiaj ijkuak noilnamiki imikilis Cristo, niman kemanon tikilnamikiskej imikilis Cristo yejuin xiuitl?

¹⁹ Jehová kineki ika nochimej itekipanojkauan kualtsin manemikan ika tlayekapan (Jer. 29:11). Ijkuak tikilnamikij imikilis Cristo, tikueyiteneuaj toTajtsin niman Jesús. Ijkuakon, tikteititiaj ika tiktlasojkamatij nochi tlen okichiujkej topampa niman ijkon nochipa matinemikan. Tejuamej akin tikchiuaj ken Jesús tikitaj ika melak ueyi kijtosneki yejon tonajli. Ipan xiuitl 2021, tikilnamikiskej imikilis Cristo ipan tonajli sábado 27 de marzo sakin ika yokalak tonaltsintli. Ipan yejuin xiuitl, miyekej kanaj xouijtika kitaskej touan nosentlaliskej, sekimej ijkon kichiuaskej maski kintlauelitaj. Oksekimej kanaj kilnamikiskej imikilis Cristo kampa tsauktokej. Maski san kenon, matikilnamikikan ika Jehová, Jesús, iluikaktekitkej niman tlapejpeniltin akin yoyoliujkej kitaskej tlen tikchiuaskej. Tiknekij ika nochimej akin nemij ipan ikalpan toTajtsin niman akin kinekij kitlakamatiskej Jehová makinyolpakti yejon tonajli.